Xixón al día

Etiqueta: Gobiernu d’Asturies

  • Asturies va poner en funcionamientu l’app Radar Covid en setiembre

    Asturies va poner en funcionamientu l’app Radar Covid en setiembre

    El Serviciu de Salú del Principáu (Sespa) unificó l’atención telefónica a la ciudadanía pa cualquier cuestión rellacionada col coronavirus nel númberu gratuitu 984 100 400. El nuevu serviciu, denomináu CovidAstur Respuendi, va concentrar toles llamaes y va redirixir, en función de si la consulta ta rellacionada cola enfermedá o con un llamamientu públicu provocáu por un biltu.

    Quien precise información de calter xeneral o sobro síntomes compatibles cola covid-19 pa recibir atención sanitaria ha marcar el 1. Nel casu de que la consulta tea rellacionada con un llamamientu públicu por un biltu, tien de pulsiase’l 2. Pela so parte, el personal alministrativo va solicitar los datos de la persona qu’utiliza’l serviciu pa, si procede, citala darréu en dalgún de los autocovid de la so área sanitaria de referencia. El Sespa va ampliar les llínees d’esti teléfonu gratuitu en función de la situación epidemiolóxica.

    Per otra parte, la Conseyería de Salú va poner en funcionamientu l’aplicación móvil Radar covid. Va ser previsiblemente en setiembre, una vegada se complete la fase de pruebes en distintes autonomíes. La so esperiencia va ser bien pervalible pal desenvolvimientu d’una ferramienta que va completar l’actual sistema de vixilancia pa la detección de contactos y establecer les cadenes d’andada. L’aplicación, diseñada pola Secretaria d’Estáu de Digitalización ya Intelixencia Artificial del Gobiernu d’España, garantiza l’anonimatu y la privacidá del usuariu, al tiempu qu’ayuda a efectuar un rastrexu de manera segura y rápida.

  • Les mázcares van ser obligatories n’Asturies dende esta selmana

    Les mázcares van ser obligatories n’Asturies dende esta selmana

    El Gobiernu asturianu va aprobar esta selmana l’usu obligatoriu del mázcaru con independencia de que pueda caltenese la distancia de seguridá establecida como protección frente a la COVID-19. Asina lo anunció esti domingu’l presidente del Principáu, Adrián Barbón. El xefe del Executivu informó de que lleva díes trabayando na normativa llegal que va dexar l’aplicación d’esta midida.

    «La respuesta asturiana foi capaz de controlar la espansión del virus, con una amenorgada incidencia na nuesa tierra. Agora nun podemos baxar la guardia», destacó. «Énte la relaxación qu’apreciamos creemos dende’l Gobiernu d’Asturies ye necesario dar un pasu más cola obligatoriedá d’usu del mázcaru», añadió. El Conseyu de Gobiernu del Principáu va caltener esta selmana una xunta estraordinaria p’aprobar la midida.

    Pa Barbón, el so Executivu demostró mientres esta crisis sanitaria que «adopta les decisiones que considera más fayadices pa protexer a la ciudadanía». Barbón añadió que “colos rebrotes que tamos reparando n’otres partes, esta crisis ta bien llueñe de terminar», polo que la obligatoriedá d’usu del mázcaru “ye una respuesta necesaria pa frenar la espansión del virus”.

  • Un texu n’alcordanza de les víctimes de la Covid-19 n’Asturies

    Un texu n’alcordanza de les víctimes de la Covid-19 n’Asturies

    Un texu como homnaxe a les víctimes del coronaviru n’Asturies. El presidente del Gobiernu asturianu, Adrián Barbón, inauguró esti vienres el memorial n’alcordanza a les víctimes del coronavirus n’Asturies. L’actu tuvo llugar de magar les 12 na redolada del Hospital Universitariu Central d’Asturies (HUCA). «Tendríamos de nomar una por una toles víctimes pa dici-yos que tamos deprendiendo, qu’entendimos que toos dependemos de toos y promete-yos que vamos saber honra-yos cola memoria que merecen. Asturies, la so patria y la nuesa nun los va escaecer», proclamó. Al actu asistieron distintes autoridaes del ámbitu políticu, xudicial, militar, eclesiásticu, económicu y cultural.

    Mientres la so intervención, el xefe del Executivu aportunó en que l’alcordanza colectiva ye un deber moral. «Tamos en delda coles nueses persones mayores porque la enfermedá buscó’l llutu ente los más débiles, escorriéndoles hasta les residencies que son los sos llares, los sos llugares de vida». Nel sobriu actu, Barbón tamién recordó que «somos nós quien tenemos agora que falar, construyir, llevantar como ellos antes fixeron”.

    El presidente tuvo esa alcordanza especial pa los güelos d’Asturies porque fueron «les sos manes edificaron l’Asturies que güei esfrutamos. Sé que los mios güelos nun me diben perdonar que nun supiera honrar los mayores, intentar siquier tar a la so altor.  Los asturianos tenemos, tuvimos siempres, como seña d’identidá, el respetu y el reconocimientu constante a los nuesos mayores. Tenelos na nuesa acordanza y honralos ye un deber al tiempu qu’un arguyu».

    Tres les palabres del presidente, la periodista Mily Cimadevilla lleó un poema homenaxe escritu por Carmen Yáñez, vilba del escritor chilenu afincáu n’Asturies, Luis Sepúlveda, primer fallecíu de coronavirus n’Asturies. L’actu concluyó con un minutu de silenciu y l’allugamientu d’un ramu de roses blanques al pie del Texu de la Memoria. El gaiteru Pablo Carrera interpretó La marcha d’Anton, el neñu, una marcha aciaga asturiana, y l’himnu d’Asturies.

    Na zona escoyida llantáronse cinco texos. Esti árbol, bien llonxevu, acomúñase tradicionalmente nel mundu rural asturianu col ciclu de la vida y la muerte. L’oxetivu ye que’l memorial sía daqué vivo, como viva quier caltenese l’alcordanza. Unu de los árboles tien mayor tamañu que los demás. Esti ye’l que se llama Texu de l’alcordanza.

  • Asturies rexistra’l primer positivu dempués de 25 díes ensin andaes de coronavirus

    Asturies rexistra’l primer positivu dempués de 25 díes ensin andaes de coronavirus

    El Llaboratoriu de Viroloxía del HUCA confirmó esti martes el positivu d’un varón que presentaba síntomes compatibles col coronavirus. La Conseyería de Salú constata asina’l primer casu positivu de COVID-19 tres 25 díes ensin andaes rexistraes na comunidá autónoma.

    L’home tornó de Cataluña nel so propiu coche. Foi atendíu n’Uviéu, onde permanez aislláu, con pocos síntomes, na so casa. Al paecer nun tuvo nengún contactu estrechu n’Asturies. El Gobiernu recuerda la necesidá de caltener la distancia de seguranza, l’usu de mázcaru y la llavadura frecuente de manes.

  • Asturies, primer comunidá llibre de coronavirus

    Asturies, primer comunidá llibre de coronavirus

    Asturies ye la primer comunidá autónoma en completar un ciclu completu d’incubación del coronavirus, envaloráu en 14 díes, ensin rexistrar nuevos biltos. Sicasí, el Gobiernu asturianu encamienta a la ciudadanía a nun baxar la guardia énte los riesgos de rebrotes. Adrián Barbón calificó la situación como «un llogru colectivu del pueblu asturianu” y animó a prosiguir col cumplimientu de les midíes de seguridá. «Agora, más que nunca, tenemos de caltener tol precuru. Nun podemos pensar que tou ta resueltu. Hasta que nun haya una vacuna o un tratamientu eficaz, nós somos la vacuna”, aportunó.

    Un exemplu de que los biltos pueden remanecer en cualquier momentu, señaló’l presidente, ye la pinga de nuevos casos que se tán detectando en distintes zones d’España y n’otros países como Alemaña. Nel mesmu sentíu asitióse’l conseyeru de Salú, Pablo Fernández-Muñiz, pa quien la esistencia de rebrotes ye «cuestión de tiempu». Por ello, pidió a la ciudadanía y a los turistes que lleguen a Asturies que «nun baxen la guardia».

    El presidente punxo una vegada más en valor la inversión pública en sanidá n’Asturies, qu’algama’l 40% del presupuestu de la comunidá. Coles mesmes, Barbón emponderó les decisiones del so predecesor, Javier Fernández, quien apostó por caltener el llaboratoriu de microbioloxía, esmanteláu o privatizáu n’otres partes, que permitió tar a la cabeza del númberu de pruebes PCR per cada mil habitantes. A lo último, l’anticipación na respuesta de la pandemia, “anque fuera tan solo nunos díes, tamién pudo influyir na situación”.

    “A eso sumamos que falemos bien claro a los ciudadanos. Ensin paños calientes. Esplicamos día ente día la situación, cómo evolucionaba y qué ciscábamos. Esa foi la respuesta a la crisis d’Asturies y la que vamos siguir dando”, concluyó’l presidente.

  • Barbón llamenta la situación de Feve pero refuga asumir les competencies

    Barbón llamenta la situación de Feve pero refuga asumir les competencies

    Como la crónica d’una muerte anunciada. Asina calificó’l presidente del Gobiernu asturianu, Adrián Barbón, la situación de Feve n’Asturies. El xefe del Executivu compareció esti xueves en rueda de prensa tres la celebración del conseyu de Gobiernu. A entrugues de los periodistes, el socialista achacó la delicada situación que traviesa la empresa pública a la falta d’inversión. Y apuntó directamente al Gobiernu d’España. «Mientres años los gobiernos de distintu signu nun invirtieron en Feve».

    El xefe del Executivu reclamó al Gobiernu central tomar una decisión al respectu: «O s’invierte y se pon a puntu la compañía o que planteguen una solución pa Feve». Barbón asumió la necesidá de revisar les llínees y faer axustes y obres nel trazáu, amás d’anovar un parque móvil que «tien tantos años como yo», sentenció.

    A pesar d’ello, el xefe del Executivu refugó asumir les competencies en materia ferroviario. «Ensin fondos pa invertir enriba de la mesa, ¿pa qué lo vamos a asumir nós?». Barbón punxo como exemplu los casos de les comunidaes qu’asumieron les competencies de Feve, onde’l serviciu convirtióse en deficitariu. «Asumir competencia nun puede significar una amenaza pa la estabilidá del Principáu al mediu plazu», remató.

  • Una app p’acutar asientu nel tresporte públicu

    Una app p’acutar asientu nel tresporte públicu

    La nueva normalidá ta llamada a camudar pa siempres la movilidá. Peatones y ciclistes van ganando espaciu nes ciudaes al tiempu que s’impón l’usu obligatoriu de la mázcara nel tresporte públicu. Garantizar la seguridá nos desplazamientos ye ún de los principales oxetivos de les autoridaes sanitaries. Por esti motivu, el Gobiernu asturianu empecipió’l periodu de pruebes d’un plan pilotu de reserva de places con billete únicu nel tresporte públicu interurbanu per carretera. El sistema va ponese en marcha nos meses de xunetu y agostu p’aguiyar l’enfotu de la ciudadanía y ameyorar el serviciu nos principales desplazamientos.

    Esti ensayu empecipióse colos trabayadores de l’Alministración autonómica y pretende favorecer una entrada y salida al trabayu en veces gradiaes tres el periodu braniegu. Consiste n’una aplicación de reserva de plaza desenvuelta pol Consorciu de Tresportes d’Asturies (CTA) que va facer posible acutar trayectu d’ida y vuelta, hora y plaza nes rutes más frecuentaes, ensin costu adicional. D’esta miente, quierse ameyorar los tiempos, al ufiertar viaxes directos ente distintes paraes cuando la demanda asina lo aconseye.

    L’aplicación va permitir realizar una distribución óptima de la flota d’autobuses, mesmo que crear percorríos amenorgaos y más directos

    Dende ayeri, el CTA ufierta a los emplegaos públicos la posibilidá d’utilizar esta ferramienta nun serviciu ente Uviéu y Xixón, nel principal horariu d’entrada y salida del trabayu, con un percorríu bien ampliu en dambes ciudaes. La reserva garantiza l’asientu nesi serviciu col abonu mensual billete únicu, que tien de disponer de carga a valir nel momentu de realizar la operación. El proyectu va implantase primeramente ente colectivos de funcionarios y sanitarios. Nuna segunda fase, prevista a partir de setiembre, va abrise a tolos usuarios pa desplazamientos al trabayu y a la Universidá. L’aplicación va permitir realizar una distribución óptima de la flota d’autobuses, mesmo que crear percorríos amenorgaos y más directos.

    El CTA tamién prevé implantar l’aplicación, nel futuru, nel tresporte públicu de los polígonos industrial y tecnolóxicu del área central siempre qu’exista un númberu mínimu d’usuarios. La midida busca retomar el conceptu de tresporte d’empresa, entamáu pol consorciu y cola opción d’atender a trabayadores de delles factoríes allugaes nuna mesma zona. Les tarifes van ser les regulares del billete únicu. Cada empresa podría bonificar a los sos emplegaos total o parcialmente.

  • El Principáu apela a la responsabilidá individual pa evitar biltos

    El Principáu apela a la responsabilidá individual pa evitar biltos

    El Gobiernu asturianu estrenó esti sábadu nes redes sociales un vídeu de sensibilización ciudadana. El spot pon l’acentu na responsabilidá individual y la necesidá de siguir cumpliendo les midíes de seguridá tres l’estáu d’alarma. La campaña se va emitise pola Televisión del Principáu d’Asturies.

    Nun estilu qu’apela directamente al espectador, una moza numbera les peores consecuencies de la crisis sanitaria: les víctimes, les traxedies de les residencies, el zarru d’establecimientos, l’aumentu del desempléu… «Too esto entamó por una persona. ¿Vas tener tu la culpa de que se vuelva a repitir?», entruga, antes de sorrayar la importancia de cumplir los encamientos de seguridá p’amenorgar el riesgu de biltos.

  • Barbón reestructura’l gobiernu «p’afaer l’Alministración a les necesidaes del sieglu XXI»

    Barbón reestructura’l gobiernu «p’afaer l’Alministración a les necesidaes del sieglu XXI»

    Adrián Barbón aprovechó’l sábadu la so última comparecencia pública mientres l’estáu d’alarma p’anunciar una reestructuración del gobiernu. El vicepresidente Juan Cofiño va asumir les competencies sobre función pública y Alejandro Calvo, hasta agora titular de Desenvolvimientu Rural, Agroganadería y Pesca, va asumir tamién el cargu tamién l’area d’infraestructures. L’oxetivu d’estos cambeos, que se van faer efectivos nos vinientes díes, ye reforzar la respuesta del Gobiernu asturianu a los desafíos acentuaos pola pandemia, como la reforma de l’Alministración autonómica. El númberu de conseyeríes va siguir siendo’l mesmu: diez.

    Barbón enllazó’l cambéu coles reflexones amenaes pola pandemia. “Camudónos a toos, tamién a mi. Sale un presidente distintu al qu’entró”, confesó. La crisis fizo evidente la necesidá d’encarar “una reforma bien amplia” de l’Alministración autonómica pa que respuenda a les necesidaes del sieglu XXI. Esi cometíu de primer orde va recayer en Juan Cofiño, quien tamién asumió’l lideralgu de la comisión delegada p’asuntos económicos y la reconstrucción. La nueva cartera del vicepresidente llamaráse Conseyería d’Alministración Autonómica, Mediu Ambiente y Cambéu Climáticu.

    L’andanciu tamién aumentó la importancia del mediu rural, “que sale revalorizáu”. El presidente sorrayó la relevancia de les infraestructures pa la cohesión del territoriu y aprovechar meyor el potencial de les zones rurales. D’esta manera, Alejandro Calvo pasa a encargase tamién de la política de comunicaciones. La resultancia ye un nuevu departamentu que se va titular Conseyería de Mediu Rural y Cohesión Social.

    Homenaxe

    La reestructuración del Executivu nun foi l’únicu mensaxe del presidente. Barbón fixo balance del estáu d’alarma, qu’empezó con 142 casos activos de coronavirus, 2.000 pruebes PCR y dos finaos y terminó con 2.435 casos, más de 200.000 pruebes y 366 finaos con coronavirus. El presidente confirmó que na primera quincena de xunetu inaugurará un memorial vivu n’homenaxe a les víctimes. «Va valir pa recordanos lo asocedío y que sía tamién un mensaxe de futuru pa les próximes xeneraciones».

    L’impactu económicu de la pandemia foi otru asuntu encetáu pol xefe del Gobiernu. Resaltó la importancia del fondu de compensación de 16.000 millones aprobáu pol Conseyu de Ministros. Al aceptar dalgunes de les propuestes plantegaes pol Executivu del Principáu, Asturies va pasar a recibir 280 millones, 50 más de los envaloraos cola propuesta inicial. Pal presidente, ye lóxicu qu’esi fondu conceda más recursos a les comunidaes onde’l virus tuvo mayor incidencia. “Nun camudo un hospitalizáu nin un ingresáu en UCI por un euru más”, afirmó.

  • Adrián Barbón: «La imaxe d’Asturies sal reforzada d’esta gran crisis del coronavirus»

    Adrián Barbón: «La imaxe d’Asturies sal reforzada d’esta gran crisis del coronavirus»

    El presidente del Principáu, Adrián Barbón, afirmó esti llunes que «la imaxe d’Asturies salió reforzada de la gran crisis del coronavirus». Nuna entrevista concedida a TPA, valoró que se fale de la comunidá «a nivel nacional ya internacional» como destín turísticu «bien apetecedor» pola so «calidá de vida, el so paisaxe y el so paisanaje». El presidente del Executivu asturianu amosóse convencíu de que la comunidá va recibir visitantes que busquen tranquilidá y evitar aglomeraciones. «Muncha xente ve agora Asturies como un llugar apetecedor pa vivir, polo que tamién sale reforzada la vida rural. Volvemos mirar a los güeyos de los pueblos y villes porque la so calidá de vida ye clave», precisó.

    Barbón pidió a la ciudadanía «que nun baxe la guardia» y aportunó na necesidá de caltener el precuru pa embrivir los riesgos d’andada de la COVID-19. Nesti sentíu, apeló a la responsabilidá individual pa garantizar la seguridá colectiva y aseguró que «los abrazos qu’evitemos danos agora son la meyor garantía pa poder abrazanos nos meses vinientes».

    Tránsitu desigual

    Al respective de la nueva normalidá, criticó «la desigualdá máxima» que se vivió nesti tránsitu ya que delles comunidaes saltaron dafechu la fase 3. «El Gobiernu central reconoció abiertamente que yá nun tenía capacidá pa prorrogar l’estáu d’alarma, porque la tensión política foi tan encarnizada nel Congresu de los Diputaos y el clima tan tóxicu, que foi imposible enllargalo 15 díes más pa que delles autonomíes transitaren por esa fase 3″, llamentó.

    N’opinión del presidente, el sistema sanitariu asturianu ta preparáu pa reaccionar énte cualquier rebrote de la enfermedá: «Vamos tener tolos protocolos p’actuar si se produz», afirmó. Sicasí, llamó a la prudencia de la población ya indicó que «tou arimo que s’evite ye un trunfu y un ésitu p’Asturies».

    Modernizar l’alministración

    Adrián Barbón tamién aportunó que la crisis del coronavirus «marca un antes y un dempués na llexislatura». Nesti sentíu, el presidente xulga necesario camudar la estructura de l’Alministración col fin de dar respuesta a los nuevos retos. «Precisamos que se modernice y s’actualice, qu’entre de llenu nel sieglu XXI y sía más áxil», esplicó. «Taría fuera de sitiu creer que camudó tou pero nun tien de cambiar la respuesta del Gobiernu asturianu», añadió.

    Nesti contestu, comprometióse a encarar la reordenación del sector públicu dende’l diálogu: «Queremos empezar a trabayar nesa reforma dende’l consensu colos grupos políticos, teniendo en cuenta la opinión de los axentes sociales y de una forma constructiva», manifestó. Coles mesmes, sorrayó que l’oxetivu principal ye «garantizar la sostenibilidá de l’Alministración y protexer l’empléu públicu»: