Xabier Díaz ye un músicu esencial nel caltenimientu y espardimientu de la cultura gallega. Con más de trenta años de trayectoria enriba de los escenarios en dellos proyectos de bayura, el primer día de marzu, bien cerca de la primavera (quiciás como símil a que cola cultura tradicional xorrecen les flores) , asoleyó’l que ye’l séptimu discu d’estudiu, Axúdame a sentir.
Trátase d’un discu que toma’l nome d’una frase de so güela y que va poder sentise’l 20 d’abril nel Nuevu Teatru de La Felguera, nun conciertu de Xabier Díaz & Adufeiras de Salitre qu’entama A Mansalva. Enantes de que les ruxideres de les sos panderetes entamen a sonar, falamos selemente con él.
- Axúdame a sentir ye’l títulu del discu caberu y yá son siete. ¿Cómo naz esti proyectu qu’asoleyó’l 1 de marzu?
El proyectu naz, en primer llugar, de la necesidá de siguir cuntando coses diferentes y d’una manera distinta. Col pasu del tiempu, la manera de ver la música va camudando y ensin remediu esto tamién va modificando la to forma de producir y facer música. Yo preciso siguir buscando atmósferes nueves y llugares nuevos pa compartir la mio visión de la música tradicional.
No que cinca al títulu, ye una frase fecha de mio güela materna, que la usaba sobre too énte catástrofes pequeñes doméstiques y familiares y más como petición de sofitu énte’l naufraxu. Pero a mi paezme que tiene tamién un significáu doble mui poéticu y paecíame interesante llamalu asina.
- ¿Qué hai nuevo nesti trabayu que nun hai nos anteriores?
Creo que dos coses fundamentalmente, una que tiene que ver cola llírica y ye que la mayor parte de los testos escribílos yo, yá nun beben de manera directa del cancioneru tradicional, sino que son autorales y esi creo que ye un cambiu sustancial ya importante. Y depués, na cuestión más formal o estética, diría que ye l’apaición de la guitarra llétrica y del baxu del mio collaciu Manu Sija dende Tucumán, un músicu maraviyosu y amigu urxénticu que tamién-y da un calter y una atmósfera diferente al álbum.Ye la primer vez qu’utilizo sintetizadores, guitarres o baxos en dalgunos de los temes y esto creo que-y da una estética y un acabáu distintu.
- Hai tamién cantares que trespasen llendes y que van más p’allá de Galiza, como temes d’Asturies o Llión. ¿Cuál ye’l porqué d’esto?
Yo siempres trespasé les llendes alministratives cola certeza absoluto de que nun trespasaba nin les llendes culturales nin estétiques nin inclusive les ideolóxiques o idiomátiques. Creo que pa munches coses, tanto Llión, como Asturies, como Galiza – y diría tamién que Zamora y norte de Portugal – conformen un noroeste ampliu qu’a mi me ye mui familiar y esi compromisu tresfronterizu tamién ye un retu pequeñu y daqué que me presta afrontar. Creo que somos cultures mui próximes y vengo faciendo esto dende’l primer discu con Adufeiras, asina que ye dalgo mui natural pa mi.
- Apaez la voz de l’asturiana Marta Elola, y hai delles referencies a les pandereteiras gallegues, guardianes de la tradición ente los sieglos. ¿Hai un papel de visibilización d’esto nel trabayu más p’allá de la música?
Yo nun les llamaría tanto guardianes de la tradición como continuadores, porque guardianes, en cierta manera, condérgales al pretéritu, a lo que yá foi, y mesmo Marta Elola como las pandereteiras de Galiza tan de contino anovándose porque son muyeres del sieglu XXI, d’esti tiempu que nos tocó vivir. Elles siguen de dalguna manera bebiendo del mesmu manantial primixeniu, pero tresformando tou esi calce pa convertilu y armonizalu col tiempu actual. Nel casu de Marta foi un descubrimiento maraviyosu del postrer conciertu en Llangréu, nel que vieno a cantar con nós y llevé una sorpresa mui grande mesmo con ella que col so talentu musical. El tema que nos propunxo pa la collaboración ye precisamente’l que ta incluyíu a la fin nel discu nuevu, Ronda de Borbolla, un tema deliciosu del cancioneru asturianu.
- ¿Son elles, eses muyeres guardianes de la cultura, quienes te “axudan a sentir y cantar”?
Sí, absolutamente sí. El títulu del discu, como dixi enantes, ye un regalu de mio güela y toles güeles qu’alcontré peles aldees de Galiza. Regaláronme la única universidá que yo tengo, una conocencia mui vital y mui real de lo que ye la tradición de la música cantada y acompañada de percusión de mano. Asina que sí, d’una manera rotunda elles son les que m’ayudaron a sentir, les que güei me siguen ayudando a sentir. Las Adufeiras, en cierta manera, personalicen esa herencia nel presente.
- Ye chocante que precisamente esi patrimoniu cultural tea siendo atacao por dellos sectores de la sociedad, ¿no?
Tengo que dicir que quiciás nel casu gallegu seya daqué singular, porque equí la música tradicional, folk o de raigañu goza d’una cierta reconocencia social. Munches vegaes esta reconocencia nun vien de les élites culturales por dicilo de dalguna manera, pero por embargu, la sociedá en xeneral sí abraza esta música y siéntela como propia. La mocedá que baila cuando siente tocar una pandereta revela númberos totalmente ablucantes. Toi falando de decenes de miles de persones implicaes na música y baille tradicional, asina que nel casu gallegu nun podría dicir eso. No que cinca a los ataques que sufre la música de raigañu y la música que s’identifica con un territoriu, paezme que respuenden a una cuestión d’inorancia.
- Magar de que seya música tradicional, nos postreros años venimos viendo cómo se tán faciendo interpretaciones en dellos ámbitos y con nomes que trunfen, como Rodrigo Cuevas, Tanxugueiras o Baiuca. ¿Cómo ha interpretase esto?
Como daqué natural y como daqué que celebro profundamente nel sen de que me paez fantástico que les músiques y que los artistes mainstream beban d’un patrimoniu peninsular que ye enorme y que resuena más natural eso que tar de manera permanentente mirando a Manchester, Liverpool o Nueva York. Que de dalguna manera les músiques de moda, les músiques más comerciales miren a la música de raigañu y tenga una carga identitaria muncho más grande, paezme que ye daqué qu’hai que celebrar. Y per otra parte, véolo como daque mui natural que pasa n’otres llatitúes del mundo y qu’equí nun asocedia y qu’agora hai que lo disfrutar.
- Nes tos xires, Asturies ye casi parada obligatoria. ¿Cómo crees que ta la cultura musical asturiana anguaño?
Vengo agüeyando nos posteros años un procesu, que tamién se da en Galiza y que creo que se ta dando por estensión nel restu del estáu español, nel que la música de raigañu cantada y que tiene la percusión como elementu vertebrador de les propuestes. Ta abriéndose un espaciu importantísimu nel mercáu, que creo que a poco y a poco va enanchando. Y paezme qu’esti fenómenu n’Asturies ta intensificándose. Cada vuelta que voi descubro dos o trés bandes nueves que tán pegando mui fuerte, que tienen muyeres que toquen la pandereta y que ta faciendo coses mui interesantes y cada vez ta prestándome más la escena asturiana, ensin llugar a duldes. Paezme que’l camín ta claro, qu’esto yera inevitable y tengo la certeza de que ye dalgo imparable.
- La mocedá ta, otra vuelta, interesándose pola música popular. ¿Cómo crees que va ser el futuru músical de la tradición?
En primer llugar hai que dicir que’l futuru musical de la tradición va ser como quiera la mocedá del futuru. Y ha ser así porque han facelo con total y absoluta llibertá, ensin tener ningún tipu de respetu poles referencies o polos qu’enantes lo fiximos. Han ser llibres, construir un llinguaxe nuevu, si pue ser calteniendo los pies na tierra na que ñacieron y calteninendo la llama vivo de lo que somos, de lo que llegó hasta aquí. Pero han tresformalo como ellos quieran, y en función de tolo que los arrodia, de los impactos musicales contemporáneos que reciben, de lo que ta pasando alredor del mundu. Too ello conxuntáu con eses dosis necesaries d’identidá y vínculu colo de nueso. Como dicía enantes, en Galiza el compromisu d’una cantidá importantísima de xóvenes ye ablucante, y noto que n’Asturies tamién lo ye porque veo dalgunos alcuentros y se siguen masivamente por xente que bailla y canta, asina que creo que nesi sen la salú ye estraordinaria y yo soi mui optimista.
