Xixón foi testigu’l pasáu sábadu 22 d’una nueva edición del Vibra Mahou Fest, que se celebró nel recintu ferial Luis Adaro. Una xornada de música ininterrumpida con siete actuaciones distintes que s’alternaron con sesiones de Dj que dexaron esfrutar de música de too tipu nun mesmu espaciu nel que Vibra Mahou quixo apostar pola música en directu.
El festival empezó al mediudía cola actuación de Carmen 113, que col so indie-pop crearon un ambiente fantásticu pa entrar en calor. Tres ellos, xubióse al escenariu Carlangas. El cantante de Monterroso punxo’l so sellu y presentó los temes tan interesantes del so primer discu en solitariu tres la separación del grupu Novedades Carminha.
Tres estes primeres actuaciones, y mientres taba a los mandos Dj Soho la xente, adulces, empecipió a salir del recintu pa ver los distintos puestos de comida y foodtrucks que se rexuntaren pa ufiertar una variada ufierta de comida pal públicu. Gracies al magníficu clima qu’hebo en Xixón pudo aprovechase les zones verdes esteriores pa comer, amás de les árees de descansu afayadices que s’asitiaren nel interior del recintu.
Y con esto, el públicu enfotóse nos conciertos de la tarde, que nun pudieron empezar de forma más brengosa cola actuación de Sexy Zebras, los de Hortaleza son unos visitantes asiduos d’Asturies, y asina lo fixeron saber nel conciertu onde’l públicu esfrutó descomanadamente col so icónico “Jaleo”. Al tríu de rock siguió-y el prometedor grupu Karavana, col so estilu punk-rock que protagoniza’l so últimu discu “Muertos en la disco”, anubrieron el recintu d’enerxía y actitú, amás d’un recital sonoru d’induldable calidá.
Dempués tocó’l momentu de la señaldá cuando Second empezó a tocar n’unu de los sos últimos conciertos como grupu n’Asturies, el públicu supo apreciar estos 25 años de trayectoria con una gran comunión que se sentía en cada cantar. Una actuación ensin dulda digna de recordar. Ha destacase’l gran trabayu de los DJs, que calteníen bien alta la fiesta nel descansu ente cada actuación, que xunto cola la zona de descansu dexaben siguir esfrutando del festival coles piles cargaes pa la siguiente actuación.
Con too esto, llegó la vez de Shinova, algamando quiciabes los momentos más máxicos de la nueche y que la banda vasca apodera a la perfección, dexándo yá encaráu’l cénit de la nueche con Viva Suecia, grupu que se merez una mención especial pola calidá de show que dieron. Amosaron los cantares del so xenial álbum “El Amor de la clase que sea”, que, anque de recién llanzamientu munches d’elles son yá ésitos contrastaos ente’l públicu, que nun duldó n’acompañar intensamente tola actuación. Amás, pudimos ser compensaos cola actuación conxunta con Shinova del cantar “El Bien”, un momentu bien especial pa los fans.
