Xixón va cuntar el próximu añu con trés campos artificiales na Llaboral

0
757

El Conceyu de Xixón empezó les obres na Llaboral pa l’adecuación de dos campos de verde natural y unu de yerba artificial, onde hasta agora se practicaba fútbol y rugby, y h.oquei, respectivamente, coles mires de tresformalos en trés campos de yerba artificial. El conceyal d’Obres Públiques, Olmo Ron, y el conceyal d’Actividá Física y Deporte, Ramón Tuero, visitaron esti vienres les obres, acompañaos pol xefe de serviciu de Parques y Xardinos del Conceyu, Juan Carlos Martínez Sánchez.

Los campos alcuéntrense nunos terrenales allugaos na redolada de la Llaboral, que’l Principáu cedió al Conceyu de Xixón al traviés d’una concesión demanial per cuarenta años cola posibilidá de prorrogala hasta los 50 años. La obra, qu’empezó’l pasáu 3 de xunetu, foi axudicada a la empresa Obres y Pavimentos Especiales S.A, por un importe de 1.275.697,54 euros IVA incluyíu y un plazu d’execución de seis meses. El so oxetivu ye optimizar les posibilidaes de xuegu y los recursos disponibles, motivu pol que se van sustituyir los campos de verde natural por yerba artificial y tamién se van reasitiar.

Con estos cambeos consiguiráse un usu más intensivu de los campos, al dexar xugar en condiciones climatolóxiques adverses, amás de compatibilizar el so usu con otros deportes y col deporte base. Coles mesmes garantízase un mayor nivel calidable de los campos y va consiguise embrivir los costos de caltenimientu.

El campu de futbol asítiase al sur de les instalaciones deportives de la Universidá Llaboral, de manera paralela a la fachada del edificiu históricu. El so allugamientu nun se modificar, pero si s’amplía la so dimensión para cumplir los requerimientos d’un campu de futbol frente al usu actual de h.oquei.

Col fin de poder reutilizar l’agua de riegu, va realizase una nueva instalación para saneamientu cola instalación d’un depósitu de 5000 llitros y un sistema de bombéu. Nesta zona, l’algame de la intervención nun xenera nengún impactu negativu sobro l’edificiu históricu, cuidao que los materiales a utilizar y el so allugamientu respeten puramente tolo esistente.

Nel otru ámbitu d’intervención, van construyise dos campos: unu de rugby y otru d’h.oquei, sobro los agora esistentes. L’asitiáu más al este va ser el de rugby y l’asitiáu más al oeste va ser d’h.oquei.

Respectu al campu d’h.oquei, va reutilizase’l verde artificial retiráu enantes na construcción del campu de fútbol. Va Disponer d’un sistema de recoyida d’agua y almacenamientu pal so posterior reaprovechamiento pal riego. P’absorber la diferencia de cota que se produz nes llendes esteriores de los campos, optóse por asitiar unes zones de graderíu, que van ser independientes pa los campos de rugby y h.oquei, y van executase per mediu d’una solera de formigón que se va cubrir con verde artificial.

El so allugamientu vien definíu pola topografía del terrén, de forma que s’afaen fielmente a la mesma, pa nun xenerar impactos visuales negativos. Caún de los campos cunta con una rampla d’accesu que cumple les dimensiones y pindies máximes afitaes na normativa d’accesibilidá del Principáu d’Asturies.