Xixón al día

Autor: xixonaldia

  • Convocaes les subvenciones a entidaes locales pal Circuitu de les Artes Escéniques

    Convocaes les subvenciones a entidaes locales pal Circuitu de les Artes Escéniques

    La Conseyería d’Educación y Cultura convocó nel plazu previstu la llinia de subvenciones pal Circuitu de les Artes Escéniques del Principáu, dotada con 250.000 euros. A ella pueden presentase entidaes y organismos autónomos locales. La collaboración ente’l Gobiernu y los conceyos interesaos en programar artes escéniques pasa a canalizase pente medies de la subvención a entidaes locales, al traviés de la convocatoria de la llinia llamada Circuitu de les Artes Escéniques, publicada güei nel Boletín Oficial del Principáu (BOPA). D’esta manera, el sofitu económicu pa la programación apaez pela primer vez, esplícitamente y de manera singularizada, na llei de presupuestos, con una partida esclusiva.

    La convocatoria ta destinada a los conceyos y tien como oxetu la promoción y el fomentu de les artes escéniques profesionales de la comunidá, al traviés d’una programación cultural estable y de calidá. Igualmente, les ayudes busquen incentivar el desenvolvimientu y la proyección nacional de les artes escéniques rexonales. Los conceyos tienen que programar un mínimu anual del 80% de compañíes profesionales asturianes.

    L’añu pasáu, realizáronse per esta vía más de 200 actuaciones en 25 conceyos por un importe de 197.000 euros

    El sofitueconómicu a los conceyos pa programar actuaciones nos sos teatros y cases de cultura desenvuélvese nel marcu d’un modelu de cofinanciación. Si les entidaes locales programen pola mesma cantidá que da la llinia de subvención autonómica, el sector va percibir mediu millón d’ayuda. L’añu pasáu, realizáronse per esta vía más de 200 actuaciones en 25 conceyos por un importe de 197.000 euros.

    El Principáu valoró la importancia que tien la instrumentalización d’estes ayudes na meyora na eficiencia y la eficacia del trabayu de les alministraciones. La convocatoria de la llinia de subvenciones otorga a les entidaes locales 20 díes naturales de plazu pa la presentación de solicitúes. Les actuaciones subvencionables han llevase a cabu ente’l 1 de xineru y el 31 d’avientu d’anguaño.

  • Dani Martín, Santana, Djurdjevic y Alegría reincorpórense al entrenamientu

    Dani Martín, Santana, Djurdjevic y Alegría reincorpórense al entrenamientu

    L’entrenamientu del Sporting d’esta mañana volvió cuntar cola presencia nel mesmu de Dani Martín, Hernán Santana, Djurdjevic y Álex Alegría. Los cuatro xugadores reincorporánse al trabayu una vez superaes les sos respectives molesties físiques. Nel casu del porteru ye’l so últimu entrenamientu de la temporada antes d’incorporase a la disciplina de la Selección Española Sub21. Tamién toma parte de manera parcial Isma Cerro.

    Tabayaron nel ximnasiu Traver, Álvaro Jiménez y Geraldes, Aitor atópase col readaptador y Diego Mariño col fisioterapeuta.

    Mañana vienres va tener llugar a les 10.30 hores, nuevamente en Mareo y de puertes abiertes, l’últimu entrenamientu de la selmana, nuna xornada ensin competición, cuidao que nesta penúltima jornado los roxiblancos tán empareyaos col Reus: «Nun se xuega’l partíu por cuenta de la espulsión del CF Reus de la competición d’alcuerdu al Resolvimientu del Xuez de Disciplina Social de LaLiga. Resultancia en función de la normativa reglamentaria aplicable».

  • Dani Martín, a la Selección Sub21

    Dani Martín, a la Selección Sub21

    Dani Martín ya piensa na Selección Sub21. Depués d’entrenase col Sporting esti xueves pela mañana na escuela de fútbol de Mareo, el porteru roxiblancu pasó pela sala de prensa onde aseguró asumir el retu «con muncha ilusión y bien contentu por haber entrada na convocatoria». El xixonés va tar mañana a la una de la tarde na Ciudá Deportiva de Las Rozas de la Real Federación Española de Fútbol, onde se va sumar al conxuntu nacional. Asume la competencia que se va atopar na portería y dirá «lluchar pol puestu». Ellí va coincidir nuevamente con Jorge Meré, «siempres un gran sofitu» para él, amás de ser «un bon amigu». El central del Colonia tuvo precisamente esta mañana de visita en Mareo.

    Preguntáu pol balance del añu, recordó qu’empezó la temporada con una «mancadura grave pa un porteru», como foi la quiebra d’un deu d’una mano. «Depués llegó la Copa, con partíos que me dieron muncho enfotu», y finalmente acabó xugando en LaLiga tres la mancadura de Diego Mariño. La temporada déxalu «contentu». En referencia a la próxima campaña, aseguró vela «inda alloñada» y espunxo que “toos precisamos xugar, pero ye depués l’entrenador el que decide”.

  • Prohibío fumar en cuatro playes d’Asturies

    Prohibío fumar en cuatro playes d’Asturies

    Acabóse fumar en cuatro playes d’Asturies. La Conseyería de Sanidá va prohibir esti branu’l consumu de tabacu nes sableres de Misiego, Miami y El Puntal, en Villaviciosa, y Los Quebrantos, en Sotu’l Barcu. El programa Sableres ensin fumu tien por oxetivu promover una vida llibre d’esti productu, prevenir el consumu y fomentar el respetu a les persones y al mediu ambiente. La iniciativa va desenvolvese anguaño como esperiencia piloto. La intención ye estendelo darréu a otros conceyos y constituyir una rede autonómica de sableres ensin fumu. Esta propuesta educativa y de concienciación social pa promocionar estilos de vida saludables va desenvolvese en collaboración colos dos conceyos.

    Nos cuatro arenales calificaos como Sableres ensin fumu va promovese que nun se fume en tola zona o n’árees señalizaes, sacante los espacios abiertos de los locales d’hostelería. Preténdese, amás, protexer del fumu del tabacu a neños y adolescentes. La esposición al fumu del tabacu ye nociva en toles etapes de la vida y especialmente nes edaes más tempranes.

    Nun se va poder fumar en tola zona o n’árees señalizaes, sacante los espacios abiertos de los locales d’hostelería

    El Gobiernu asturianu destaca que la prohibición de fumar n’estes cuatro playes fomenta tamién el respetu al mediu ambiente. Los filtros de los pitos nun son biodegradables y pueden tardar hasta 10 años en descomponese. Tán diseñaos p’atropar los componentes del tabacu, incluyíes les sustances químiques más peligroses, que son lliberaes en contactu cola agua y lleguen a ríos y mares. Una colilla contamina ocho llitros d’agua. Amás, al refundiales nes sableres, pueden ser inxeríes por especies marines o acabar en manos de neños.

    Dalgunes de les sustances nocives que se toparon nes colilles son pesticides, que provoquen un potencial efectu tóxicu sobro’l mediu y pueden atropase na cadena alimentaria. Tamién se detectaron otres como’l etilfenol, la nicotina, el mentol, metales o alquitrán y carcinóxenos, ente otres.

    Esta situación supon una seria amenaza pal mediu ambiente, yá que n’España fumen unos 89 millones de pitos al día, lo que supon 32.455 millones de filtros añalmente, según un informe del Comité Nacional pa la Prevención del Tabaquismu. Tán fechos d’acetato de celulosa, una sustanza non biodegradable que se disgrega en pequenes pieces, pero que’l so material fonte nunca desapaez. Nes sableres, el 14% de borrafes retiraes son filtros de pitos. La campaña quier sensibilizar a la población infantil y xuvenil énte’l tabaquismu ya informar sobro los efectos nocivos del fumu.

  • El musical de ‘West Side Story’, en Xixón

    El musical de ‘West Side Story’, en Xixón

    La xira del musical de West Side Story va llegar Xixón a finales d’añu. La versión orixinal íntegra cola qu’esti musical míticu debutó nel Winter Garden Theatre(Broadway, 1957) estrenaráse per primer vegada n’Asturies. Hai siete funciones programaes: xueves 28 de payares de magar les 20.30 hores, el vienres 29 y el sábadu 30 a les 18 y les 22 hores, y el domingu 1 d’avientu a les 17 y les 20.30 hores.

    Dende la primer nota hasta l’últimu suspiru, ‘West Side Story’ ye ún de los musicales más importantes y representativos del teatru universal. La partitura al cargu de Leonard Bernstein y Stephen Sondheim ye unánimemente reconocida como una de los meyores na hestoria de los musicales. El testu d’Arthur Laurens sigue siendo tan conmovedor y actual como’l primer día. Y les coreografíes orixinales de Jerome Robbins ocupen un llugar d’honor na lleenda del baille contemporaneu. De la so mano, la más grande hestoria d’amor toma les cais de Broadway para convertise n’ún de los iconos del teatru musical.

    La más grande hestoria d’amor toma les cais de Broadway para convertise n’ún de los iconos del teatru musical

    Arthur Laurens tresporta al Romeu y Xulieta de Shakespeare a la ciudá de Nueva York. Dos nuevos namoraos vense atrapaos pol enfrentamientu ente dos bandes caleyeres, los americanos Jets y los puertorriqueños Sharks. La so llucha por sobrevivir nun ambiente d’odiu, violencia y prexuicios tresfórmase nuna de les hestories más emocionantes, desgarradores, belles y relevantes del teatru musical.

    Les entraes pa ver el musical de ‘West Side Story’ en Xixón tan yá a la venta a un preciu d’ente 42 y 59 euros. Pueden comprase na recepción de Laboral Ciudad de la Cultura, nel Centru d’Información Turística del Principáu d’Asturiesd’Uviéu, nel Centro Niemeyerd’Avilés, n’entradas.liberbank.es, nel 902 106 601 y red de cajeros Liberbank. Los usuarios del Pasaporte Cultural y socios del Club Cultura Asturiaspueden beneficiase d’un descuentu del 10% aplicable a un máximu de 75 localidaes/función hasta’l 6 de payares.

  • Daniel Ripa, sobre’l 26-M: «Tócanos cambiar coses»

    Daniel Ripa, sobre’l 26-M: «Tócanos cambiar coses»

    «Lo que toca cuando les resultancies nun son los esperaos ye escuchar a la xente p’ameyorar y camudar coses». Daniel Ripa analizó esti miércoles n’Uviéu los resultaos electorales del 26-M. Podemos perdió nestos comicios más de la metá de la representación na Xunta Xeneral, pasando de nueve a cinco diputaos. «Tócanos escuchar a la xente p’ameyorar y camudar coses, avanzando y trabayando muncho, reforzando la organización, abriendo un diálogu, trazando estratexes al mediu plazu, con mayor implicación social y más apertura». El secretariu xeneral de la formación morada compareció énte los medios de comunicación en compañía d’Andrés Fernández Vilanova, diputáu saliente y responsable d’Organización, y de Nuria Rodríguez, vocera autonómica del partíu y diputada electa.

    Daniel Ripa anunció la convocatoria pa esti sábadu d’una xunta del Conseyu Ciudadanu y del Conseyu Territorial de Podemos Asturies pa valorar unos resultaos que, «ensin ser los qu’esperábamos», asítiense como «los meyores de Podemos» en toles comunidaes autónomes. «Somos l’únicu llugar onde se superó la barrera del 10% nel Parlamentu, l’únicu onde la suma de Podemos y d’Izquierda Xunida supera la suma de les elecciones xenerales». Reconoció que «hubo una baxada xeneralizada en toles comunidaes y en toles ciudaes, que tien enforma que ver con una inercia de les elecciones xenerales onde la victoria de Pedro Sánchez asitióse tamién nel restu d’elecciones d’esti ciclu».

    «La victoria de Pedro Sánchez asitióse tamién nel restu d’elecciones d’esti ciclu»

    A pesar d’ello, aseguró, «les resultancies déxennos tener fuerza nel Parlamentu asturianu, porque’l PSOE sigue ensin cuntar cola mayoría pa gobernar. Y a nivel municipal nuesa presencia pasa de 22 a 23 conceyos, amenorgando daqué’l númberu de conceyales». Recordó que «nestos cuatro años consiguimos ésitos, tantu a nivel municipal como autonómicu. Nel Parlamentu asturianu consiguimos devolver a les families la delda del ERA, plantegar midíes contra les llistes d’espera sanitaries, amenorgar les matrícules de 0 a 3 y universitaries, impulsar procesos xudiciales en casos de corrupción… Y son llogros que se van a caltener». Refirióse tamién a les resultancies electorales d’Izquierda Xunida y afirmó que «pa nós nun ye una bona noticia la potencial perda del grupu parlamentariu d’IX». Por ello, manifestó, «apostamos por que nun se produza. Tamos por buscar soluciones pa que xuntos avancemos en busca d’una Asturies que vaiga meyor».

    Pela so parte, Nuria Rodríguez esplicó que «tamos equí pa faer política pa la ciudadanía. Lo único qu’importa son les polítiques de cambéu, les que pueden faer que la xente ameyore la so situación. Porque Asturies ta nun momentu críticu, cada selmana hai nueves trabayadores que ven apeligrar los sos puestos de trabayu». Por tanto, alvirtió, «quien quiera xugar al intercambiu de cromos, a intereses de sillones y de sielles, que lo faigan so la so responsabilidá». Sobro les resultancies electorales collechaos pol partíu moráu, aseguró que «nun ye innecesariu focalizar la responsabilidá en nenguna persona en concretu. De lo que se trata ye d’analizar con criteriu p’avanzar y p’ameyorar la situación».

    Andrés Fernández Vilanova queda fuera de la Xunta al nun consiguir representación na circunscripción occidental

    Andrés Fernández Vilanova, diputáu saliente pola circunscripción occidental, señaló que «despídome como parlamentariu dempués de cuatro años bien intensos. Esta vegada nun pudo ser, yera difícil pero teníamos qu’intentar de toes toes sacar representación nel oriente y nel occidente. Sicasí, estos territorios van siguir teniendo la so voz enriada al traviés de Podemos nes instituciones». Amestó que «defendimos les necesidaes de la vida nesos territorios y, nel mio casu particular, engarré contra la corrupción nel sistema sanitariu y por una sanidá meyor. Hai munches coses que dexamos feches y esto danos una prestu enorme».

    Quixo estimar amás «l’honor de poder representar a la xente del Occidente y de poder engarrar pola sanidá pública mientres estos cuatro años. Agora vuelvo a la mio vida profesional, porque quien entramos en Podemos facer pa sirvir a Asturies, non pa sirvinos d’ella. Creemos que la política ye un mediu pa camudar y ameyorar la vida de la xente, non pa vivir d’ella». Y dexó claro que «a quien na nueche electoral frotaben les manos al ver el descensu de Podemos diría-yos que nun rieren tantu, porque agora, anque tengamos menos diputaos, sabemos muncho más, conocemos les sos trampes, los sos procedimientos d’engañu, y vamos siguir desatapándolos».

  • Moriyón renuncia a ser diputada pero va siguir lliderando Foru

    Moriyón renuncia a ser diputada pero va siguir lliderando Foru

    Carmen Moriyón renuncia a l’acta de diputada. La candidata de Foru Asturies a la presidencia del Gobiernu d’Asturies asumió esti miércoles como propios los malos resultaos del partíu nes elecciones autonómiques del pasáu domingu y anunció al so intención de nun ocupar l’escañu que-y correspuende na Xunta Xeneral. «Cuando se llogra una derrota en política, dimítese. Ye lo que procede facer, anque nun sía la práctica habitual», resaltó.

    La tovía alcaldesa de Xixón en funciones aseguró qu’entró en política «col deséu y l’ilusión de contribuyir a camudar fechos y usos de la política«. Aseguró sentir «una alcordanza imborrable con toles persones que trabayaron conmigo y tanta xente que me paró pola cai pa dame ánimos».

    [Llea’l comunicáu íntegru de Carmen Moriyón]

    Moriyón llamentó «los erros que pudiera cometer», pero aseguró que va siguir como presidenta de Foru. «Sigo creyendo nesti proyectu. Débo-ylo a los más de 34.000 asturianos que colos sos votos dexáronnos llograr 49 conceyales en 21 conceyos». Comprometióse a «favorecer los cambeos necesarios» nel partíu «p’afaenos al nuevu escenariu políticu y a lo que la sociedá asturiana demanda». Y defendió que la so formación ye «l’únicu partíu con un proyectu y una ideoloxía propia más allá de personalismos: Asturies nel centru y centraos n’Asturies».

    La renuncia de Carmen Moriyón a l’acta de diputada va suponer la so vuelta a la plaza de Ciruxía Xeneral nel Hospital de Cabueñes. Una marcha que coincide nel tiempu cola decisión del candidatu de Foru a l’Alcaldía de Xixón, Álvaro Muñiz, d’arrenunciar al acta de conceyal pa dar pasu a Rubén Hidalgo.

  • Álvaro Muñiz céde-y el puestu de conceyal a Rubén Hidalgo

    Álvaro Muñiz céde-y el puestu de conceyal a Rubén Hidalgo

    Álvaro Muñiz nun va recoyer l’acta de conceyal. El candidatu de Foru Asturies a l’Alcaldía de Xixón anunció esti miércoles pela tarde la so renuncia. «Voi siguir lliderando’l partíu y voi tar arreyáu al 100% en tolo qu’asoceda nel Conceyu de Xixón y nel grupu municipal», esplicó. Detalló que la so decisión vien motivada pol so deséu de que’l númberu cuatro de la llista, Rubén Hidalgo, ocupara un asientu nel Plenu.

    «Toi seguro que l’equipu formáu por Jesús Martínez Salvador, Ana Braña y Rubén Hidalgo ye l’únicu nel Conceyu que va poder realizar una oposición calidable», aseguró en rueda de prensa. Y insistió en que la so decisión «nun ye un pasu atrás». Muñiz esplicó que Jesús Martínez Salvador va ser la voz del partíu nel Plenu y descartó que vaya haber bicefalia porque «tamos en constante comunicación».

    Álvaro Muñiz afirmó que los socialistes nun a atopar «sorpreses» na so llegada a la Casa Conceyu. «Van encontrase con una situación muncho meyor de la que dexaron», dixo. El candidatu forista valoró d’esta manera la xestión de la que tovía ye alcaldesa en funciones, Carmen Moriyón, que güei anunció la renuncia a l’acta de diputada pa tornar a la so actividá como ciruxana nel Hospital de Cabueñes.

  • Bon tiempu hasta’l domingu

    Bon tiempu hasta’l domingu

    Selmana soleyera en Xixón. El bon tiempu va ser protagonista hasta’l domingu na ciudá. Les nubes de díes atrás dexen pasu a un miércoles nel que va llucir el sol tol día. Les temperatures perpasaron los 20 graos nos momentos centrales del día. La estación meteorolóxica asitiada nel campus de Viesques marcó 20,4 graos.

    La situación va mantenese nos díes vinientes. El xueves vamos siguir esfrutando del sol, con temperatures que podríen algamar los 23 graos. Les máximes van siguir xubiendo de cara al viernes y el sábadu cuando los termómetros podríen llegar a los 26 graos.

    El domingo espérense intervalos nublos, principalmente de nubes altes, aumentando a nublu o cubiertu na metá occidental pela tarde. Nun se descarten agües débiles na mariña occidental a la fin del día. Les temperatures baxarán y el vientu va soplar variable tendiendo a oeste y noroeste.

     

  • Nuevu retrasu d’un Alvia de Madrid a Xixón

    Nuevu retrasu d’un Alvia de Madrid a Xixón

    Nueva incidencia na conexón ferroviaria ente Asturies y Madrid. L’Alvia de les 14.50 nun llegó a salir de la estación de Chamartín. Los pasaxeros de la llínia atoparonse con un tren de media distancia. «Renfe fai lo que-y da la gana col trayectu Madrid-Asturies. Espérennos cinco hores de viaxe ensin cafetería y nun tren de media distancia. Olé.
    Tamos fartes. Muncho», criticó Noelia Odieres, una de les pasaxeres afectaes, en Twitter.

    A través de la mesma rede social, Renfe esplicó que’l convói circula con 24 minutos de retrasu por una avería d’instalaciones que nun tien nada que ver col cambiu de tren. «Vamos con retrasu, nun tren ensin cafetería que nun ye un Alvia y ensin avisanos», llamentó. L’avería ta provocando retrasos n’otres llínies que conecten Madrid col norte de la península.