La Conseyería d’Educación va abrir mañana, martes 4 de febreru, y hasta’l día 24, el plazu de presentación de solicitúes, per vía telemática puramente, pa concurrir al concursu-oposición ordinariu de reposición de profesoráu de Secundaria y otros cuerpos docentes. El resolvimientu publícase güei nel Boletín Oficial del Principáu (Bopa).
Les pruebes van celebrase en xunu, anque la fecha ta entá por determinar. La convocatoria consta de 770 places de 51 especialidaes que se correspuenden coles ufiertes d’empléu públicu de los años 2022 y 2023, que taben pendientes d’execución, amás de parte de la ufierta de 2024.
El procesu selectivu –que la conseyería trabayó coles organizaciones sindicales– presenta como principal novedá la eliminación de la llectura de los exames. Nel so llugar, la corrección va realizase por aciu un sistema de pliques que va garantizar l’anonimatu. Esi procedimientu yá s’utiliza n’otres comunidaes ya inclusive s’emplega n’Asturies nes pruebes de los premios estraordinarios.
Tamién s’introducieron dellos cambeos nos baremos. Asina, nel apartáu Otros méritos –que tien un máximu de dos puntos–, van valorase les oposiciones yá aprobaes con anterioridá poles persones aspirantes. Tamién se va envalorar la posesión d’un premiu estraordinariu de fin de carrera.
Amás, va reconocer d’oficiu la competencia dixital docente d’aquellos cursos realizaos hasta que concluya’l plazu de presentación de solicitúes pa esti procesu selectivu y que tean pendientes de acreditación per parte del Gobiernu. Coles mesmes, valórase la competencia dixital docente (del nivel A1 hasta’l C2) con puntuaciones que tán ente 0,125 y 0,5.
Per otru llau, precísense los requisitos pa tener en cuenta otres titulaciones universitaries, especifícase la fórmula pa calcular un espediente qu’escareza d’espresión numbérica concreta, y valórense actividaes de formación con un máximu de 1,5 puntos.
Más valoración del asturianu
Otra novedá afecta al asturianu. En concretu, va valorar con 0,5 puntos tener un certificáu de superación o la habilitación pa impartir docencia n’asturianu.
Amás d’estos cambeos específicos del gobiernu pa les oposiciones, hai otros cambeos del baremu regulaes nun real decretu ministerial que la conseyería llindóse a incorporar a la convocatoria. En concretu, trátase del amenorgamientu del númberu máximu d’años valorables d’esperiencia llaboral, la medría de la puntuación de los trabayadores de la enseñanza alcordada o la estimación de la esperiencia docente como cargu directivu n’escueles infantiles públiques o privaes (0 a 3 años) p’aquelles persones titulaes como maestros d’Infantil.
La convocatoria del concursu-oposición de reposición de 2025 consta de 40 especialidaes pa los cuerpos de Secundaria, 2 de profesoráu pa les Escueles Oficiales d’Idiomes, una pa Música y Artes Escéniques y 8 de profesoráu especialista en sectores singulares de Formación Profesional (FP). Del total de 770 places ufiertaes, 579 son de la vez llibre y 46 de la vez por discapacidá. Amás, va haber otres 145 de promoción interna. Les places de reposición correspuéndense fundamentalmente con xubilaciones o fallecimientos de docentes.
Esta convocatoria ordinaria de places de reposición en Secundaria va ser la primera que se celebre n’Asturies tres la culminación de los procesos del plan de estabilización del personal docente. Esi procedimientu transitoriu, por aciu concurso-oposición y méritos, llévase a cabu mientres 2023 y 2024 nos cuerpos de Secundaria y de maestros, respectivamente. En total, consolidáronse 1.562 places ocupaes por profesoráu interín, lo que dexó rebaxar al 6,7% la tasa d’interinidá de la plantiya orgánica de docentes.
