El presidente del Principáu, Adrián Barbón, aseguró güei que nos primeros cien díes d’esta nueva llexislatura’l Gobiernu d’Asturies “punxo en marcha’l reló de la década del cambéu”. Nuna rueda de prensa convocada pa faer balance de los postreros trés meses, destacó diez finxos clave d’esti períodu:
1. L’apertura de la variante de Payares
La puesta en serviciu d’esta infraestructura pa pasaxeros y mercancíes, a partir del 29 de payares, supón el fin del complexu d’aislamientu d’Asturies. Pa saca-y el máximu provechu posible, Asturies va dedicar un millón a la promoción de la comunidá.
2. L’aprobación del proyectu de Llei d’Impulsu Demográficu
La primer iniciativa lexislativa del nuevu mandatu y una de les normes estratéxiques pa tola llexislatura. Combina de forma equilibrada polítiques empobinaes al fomentu de l’actividá económica y la cohesión social, per un sitiu, y tendentes a impulsar l’aumentu de la población, por otru.
3. L’entamu de la concertación y de la negociación presupuestaria
Son dos alcuerdos imprescindibles al curtiu plazu pa impulsar el tresformamientu d’Asturies. El pactu cola patronal y los sindicatos va dedicar especial atención al avieyamientu y les xeneraciones del baby boom. Pela so parte, les cuentes de 2024 son una ferramienta clave pa reforzar los servicios públicos y l’estáu de bienestar.
4. El compromisu de construyir 294 viviendes d’alquiler asequible pa menores de 35 años
N’avientu van sacase a llicitación los proyectos de construcción de 250 viviendes en Xixón, na parcela de Peritos, y d’otres 44 en Llugones (Siero), destinaes al alquiler social, preferentemente pa mozos.
5. La cesión de los edificios de la Seguridá Social p’ampliar el campus d’El Cristu
La cesión per parte de la Tesorería Xeneral de la Seguridá Social de los edificios de maternidá, consultes esternes y silicosis del antiguu HUCA pa destinalos a usos universitarios yá foi axustada, solicitada y va formalizase llueu. Va dexar avanzar na ampliación del campus d’El Cristu y, paralelamente, na reunificación de les sedes xudiciales d’Uviéu.
6. La revisión del mapa sanitariu
Una iniciativa entamada pola Conseyería de Salú. Esti procesu nun va implicar el zarru nin l’amenorgamientu de prestaciones en consultorios, centros de salú o hospitales, sinón l’adaptación d’una rede diseñada nos años 80 del sieglu pasáu p’afaela a la nueva realidá. L’adecuación de la estructura alministrativa va redundar nuna meyor atención sanitaria.
7. L’entamu de la rede autonómica d’escueles infantiles
Los primeros centros autonómicos van abrir en 2024 en conceyos con llista d’espera o qu’entá nun disponen d’esti ciclu educativu, con especial énfasis na zona rural. L’ampliación de la rede, que va ser dafechu gratuita y de titularidá autonómica, ye unu de los grandes compromisos d’esti mandatu.
8. El desbloquéu de les parceles de Sogepsa
Los terrenes de la sociedá pasaron a ser de titularidá autonómica y yá tán adscritos al patrimoniu d’Asturies, talmente que pueden ponese a la vienta más de 200 finques nos parques empresariales de Bobes (Siero), Barres (Castropol), La Cardosa (Grau), La Granda II (Carreño), Guadamía (Ribeseya) y Lloreda (Xixón).
9. La concesión d’ayudes estraordinaries pa la seca
El Gobiernu d’Asturies alcordó destinar 5,7 millones n’ayudes directes a los ganaderos pa compensar los efectos de la seca y de la invasión rusa d’Ucrania. D’esta manera, va doblase l’ayuda que l’Executivu central abonó a primeros d’ochobre.
10. El desenvolvimientu del nuevu modelu d’atención a les persones mayores
Asturies va dedicar 8,7 millones, con cargu a fondos europeos Next Generation, a financiar el tresformamientu de residencies y centros de díes privaos. Nesti momentu tán valorándose les solicitúes presentaes p’axudicar les ayudes primero que remate l’añu.
El xefe del Executivu tamién se refirió al presupuestu pa 2024, que les sos negociaciones van empezar el vienres, y avanzó que va ser el más eleváu de la hestoria y que va rondar los 6.000 millones, de los cualos unos 1.000 van destinase a inversión.
