Esti miércoles dexónos Rosa Rodríguez Menéndez, conocida como Rosa Cunqueira. La familia daba anuncia al traviés de les redes sociales pidiendo pasar estos momentos murnios na intimidá y, tal como pidió Rosa, ensin nengún tipu d’actu públicu de despidida. Pidieron tamién que s’eviten les llamaes nestos momentos. Rosa llevaba seis meses de llucha nun hospital italianu tres l’accidente del autobús nel que viaxaba col so hermanu cerca de Venecia, onde taben pasando unes vacaciones.
Rosa Cunqueira yera natural d’A Estierna, nel conceyu d’Ibias, onde naciera en 1971. Xunto al so fíu Víctor García Rodríguez rexentaba “La guarida del Cunqueiru”, un espaciu dedicáu a l’artesanía cunqueira y al espardimientu de la cultura asturiana en Trabáu, Degaña, que yera l’heriede d’El Rincón Cunqueiru, fundáu por Vitorino. El so llabor d’espardimientu de la cultura asturiana dende l’Asturies rural más periférica fixo que la nomaren ‘Muyer Rural d’Asturies 2022’.
En 2010 y tres participar nun cursu d’asturianu con Roberto González-Quevedo y esmolecese pola situación de la llamada variedá cunqueira del asturianu, la falada na so zona, escribe y asoleya un llibru de poemes tituláu “Suenos, versos cunqueiros”, que tuvo mui bona acoyida. En 2023 reedita’l llibru añadiendo una versión oral que permite sentila lleendo los sos versos, col aquel de conservar la oralidá de la so variedá del asturianu.
La iniciativa de reeditar el llibru tenía amás un oxetivu solidariu, “Esta edición de ‘Suenos’ ía algo importante pa mi pol QR, pa que s’escuite, y outro porque’l 25 cientu va donase a un proyectu guapísimu que creamos tando Vitorino vivu que se llama #SalvaElMundoRural”, esplicaba Rosa na presentación celebrada nel espaciu de Cuatro Gotes Producciones en Xixón malpenes unes selmanes enantes del accidente.
Poco enantes de colar d’Asturies nel viaxe qu’inesperadamente diba ser caberu na so vida, Rosa participó tamién na presentación del docuental “Il Mulín”, nel qu’apaez como una de les protagonistes de la vida nel territoriu cunqueiru. Amás, en 2022 llevó’l so trabayu como artesana de les pandereteres a la construcción xunto al so fíu Víctor de “A Panderetúa di Trabáu”, un monumentu que supunxo la construcción de la mayor pandereta d’España. La obra inauguróla Rodrigo Cuevas y llevó a más de 400 persones a Trabáu. Unu más de los munchos eventos entamaos por Rosa Cunqueira dende Degaña, que conviertieron a Trabáu nunu de los centros culturales rurales más importantes d’Asturies.
En conociéndose l’anuncia de la so muerte y anque pasaben yá les once de la nueche fueron numberoses les perspones y colectivos que se solidarizaron yá cola familia pola muerte de Rosa Cunqueira, con mensaxes na so alcordanza en redes sociales, como los asoleyaos pol presidente Adrián Barbón o l’Academia de la Llingua Asturiana, ente otros.
Rosa Cunqueira dexa un gran güecu na cultura asturiana y una sensación murnia en munchos asturianos y asturianes, como tamién ente xente d’otros llugares, que la que conocieron y quixeron.
