La Conseyería de Ciencia, Innovación y Universidá recibió’l Premiu San Alberto Magno Méritu Científicu que conceden el Colexu Oficial de Químicos d’Asturies y Llión y l’Asociación de Químicos del Principáu pol so llabor en sofitu de la I+D+i y la divulgación de la investigación y la innovación. El conseyeru Borja Sánchez, que recoyó güei’l gallardón, destacó que “supón un estímulu pa siguir trabayando pol desenvolvimientu de la ciencia n’Asturies”.
L’acta del xuráu recueye la concesión del premiu a la conseyería “pola so contribución exemplar y relevante al mundu de la ciencia y la innovación que la sociedá tanto precisa, y pol so sofitu al desenvolvimientu científicu”.
En recoyendo’l gallardón, Sánchez realizó un repasu de la creación, nel 2019, de la conseyería que dirixe como un apueste por reactivar l’ecosistema científico-tecnolóxicu d’Asturies, camudar el modelu de gobernanza y ser quién a aumentar el gastu al respective del PIB.
Tamién aludió a los retos vinientes, que suponen dexar a les xeneraciones futures convocatories científiques tolos años, menos burocracia y más empreses innovadores. Pa eso, destacó, ye menester “crear ferramientes afayadices, como l’Axencia de Ciencia y Innovación”, que va dexar afitar talentu y ameyorar l’ecosistema científico-tecnolóxicu.
Amás, destacó’l llabor desenvueltu pa impulsar la difusión y la divulgación, sobre manera nel marcu de la Selmana de la Ciencia.
N’ediciones anteriores, esti premiu recayó en distintes instituciones, industries, empreses y personalidaes del ámbitu científicu, como la Fundación Princesa d’Asturies, el Campus d’Escelencia Internacional de la Universidá d’Uviéu, DuPont, Bayer, el Muséu de la Minería, l’investigador Carlos López-Otín o la presidenta del Conseyu Superior d’Investigaciones Científiques (CSIC), Rosa Menéndez, ente otres.
A lo llargo del actu tamién se fixo entrega del Premiu San Alberto Magno a les meyores tesis doctorales, lo mesmo que de les insignies a los nuevos asociaos y colexaos.
