El 13 y 14 de setiembre son díes marcaos nel calendariu polos aficionaos asturianos al ciclismu. Y tamién de los ciclistes profesionales que tán disputando La Vuelta. Col remate de la carrera esti domingu en Madrid, les dos etapes asturianes van ser xueces del resultáu, y ye que, magar del dominiu de la tricefalia del Jumbo-Visma, la carrera entá ta por decidir y con un líder sorpresa qu’aguanta nel primer caxón del podium día tres día. Poro, Asturies espera la llegada de La Vuelta con dos percorríos bien esixentes.
La primer xornada en tierres asturianes va tener como final una cima hestórica y decisiva. Con 124,5 quilómetros per delantre, el pelotón va salir de Ribeseya, pasando per Les Arriondes, L’Infiestu, Nava y Sotrondio enantes d’afrontar l’Altu de la Col.ladiel.la. Depués, van baxar a Figareo y van sufrir les ramples del Altu del Cordal pa poner el ramu a una etapa corta y esplosiva nel Altu L’Angliru de Riosa.
La segunda y postrer etapa va tener un aniciu occidental. Dende La Puela, los ciclistes van pasar per Sooutu enantes de xubir l’Altu de Las Estacas. Darréu, van baxar a Balmonte p’afrontar el Puertu de San Llorienzu, enllazándolo col Altu del Tenebréu. A lo último, el percorríu final y decisivu: el doble pasu pel puertu de La Cruz de L.linares.
