El diputáu de Podemos Asturies, Daniel Ripa, anunció esti martes que va preguntar al Gobiernu autonómicu sobro los planes pa la rampla de Payares, “una de les mayores obres d’inxeniería de la Península y una de les que más potencial turísticu y paisaxísticu tienen”, recordó. Amás, Ripa reclamó un estudiu de la viabilidá del so caltenimientu pa usos turísticos y económicos y pa dar servicios de cercaníes a los pueblos asturianos y llioneses.
El diputáu de la formación morada, sumóse al pidimientu que, dende Unión del Pueblu Llionés, facíase esta selmana a la Xunta de Castiella y Llión, onde se solicitaba’l caltenimientu de la rampla de Payares pa caltener el serviciu de cercaníes y pa esplorar
usos turísticos de la infraestructura. Según él, esta infraestructura “ye hestoria d’Asturies
y perdela pa caltener n’esclusiva l’AVE ente L.lena y Llión, sería perder parte de la nuesa hestoria y soterrar les posibilidaes en materia de cohesión territorial y promoción turística de delles contornes de Cordal Cantábricu”.Nesi sentíu, recordó qu’esta infraestructura foi creada ente 1880 y 1884 y, nel so orixe, “foi una de les mayores obres d’inxeniería de la península”.
Según el diputáu de Podemos Asturies, “hai que buscar un equilibriu ente eficiencia económica y cohesión territorial. Seique nun pueden encarase les inversiones de modernización de la rampla de Payares, pero refugar los sos potenciales usos turísticos y económicos ensin estudios fayadizos paez precipitáu”. Por esti motivu, anunció que va preguntar al conseyeru de Mediu Rural y Cohesión Territorial sobre los planes del Gobiernu asturianu pa esta infraestructura y reclamó tamién un analís de costos, potenciales usos y planes pa esa llínea ferroviaria “primero que l’Executivu tome cualquier decisión que cierre’l so funcionamientu”.
“Los potenciales usos en materia de tresporte de mercancíes tamién han de ser estudiaos y débese garantizar el caltenimientu de la rede de cercaníes hasta Fierros”, manifestó. Na so opinión, “Asturies y Llión tienen de mirar xuntes al futuru, si queremos faer un polu del Noroeste”. A lo último, recordó que dambes Comunidaes Autónomes “tenemos que trabayar xuntes pa sacar alantre’l pidimientu de gratuidá del peaxe d’El Güerna pa tolos viaxes que s’efectúen nun períodu de 24 hores, como yá asocede na AP-9 gallega, y pa impulsar la vía xudicial pola supresión del peaxe”.
