Un estudiu nuevu de los arqueólogos Sergio Ríos, o César García de Castro, revela que, de lo que se lleva escavao hasta agora na actual villa de Xixón nun sedría esactamente una villa romana, sinón que podría correspondese a una ocupación de calter priváu entamada a finales del sieglu I d.C. que tuviera venceyada con una pequeña fábrica de salazones y unos baños.
Esti asentamientu ye’l que ta identificáu na zona de les termes y concentra’l poblamientu estable del cuetu, según los resultaos de les escavaciones. La supuesta villa romana amuesa un crecimientu y potenciación na so actividá mientres el sieglu III, con una pesquería que taría asitiada embaxo de lo qu’anguaño conocemos como Plaza del Marqués. Poco tiempu depués, ye cuando se venceya la muralla a Xixón, quiciás como puntu defensivu militar dientro de la ruta marítima atlántica.
Esta propuesta ye namás una hipótesis de los arqueólogos. Dende l’Ayuntamientu afirmen que «dende’l puntu de vista científicu, que ye’l criteriu que tien de prevalecer, la relevancia del asentamientu romanu de Xixón ta dafechu respondida por, tantu polos numberosos estudios realizaos na ciudá dende los años ochenta por Carmen Fernández Ochoa, Ángel Morillo y Mar Zarzalejos, catedráticos d’arqueoloxía romana de reconocíu prestíu, como por trabayos recién. Ente ellos Almudena Oreyes, profesora d’investigación del CSIC, y Oriol Olesti Vila, de la Universidá Autónoma de Barcelona».
