Xixón al día

Categoría: España

  • Barbón respalda a Pedro Sánchez pa que forme gobiernu «cuanto antes»

    Barbón respalda a Pedro Sánchez pa que forme gobiernu «cuanto antes»

    El presidente del Principáu, Adrián Barbón, manifestó esti martes so respaldu a Pedro Sánchez pa que pueda formar gobiernu cuanto primero. Nuna conversación telefónica, Barbón afaló al candidatu socialista a prosiguir los sos esfuercios pa encarar con éxitu la investidura: «Nun puede siguir esta situación d’interinidá y menos entá dir a terceres elecciones, la ciudadanía ta farta y ta debilitándose la estabilidá institucional».

    La charra ente Barbón y Sánchez forma parte de la ronda de contactos empecipiada pol presidente en funciones pa encarar la situación política y, en concreto, les negociaciones coles qu’encara la investidura. Per parte de Barbón nun hubo duldes: tol so sofitu al candidatu. Pal presidente del Principáu, la estabilidá y el creitu institucional d’España riquen que se forme un gobiernu en plenitú de funciones y supérese dafechu’l riesgu d’una tercer convocatoria electoral.

    Con esi razonamientu, el presidente asturianu denunció l’actitú del Partíu Popular y de Ciudadanos. «Cónstame que Pedro Sánchez intentó too, pero hai que llamentar la falta de llealtá institucional del PP y Cs, que tienen nes sos manes la posibilidá de desbloquiar la situación y, sicasí, prefieren el bloquéu de la política española y forzar la repetición de les elecciones, a pesar de qu’asina estropien los intereses d’España y d’Asturies».

    El xefe del Executivu sorrayó que pal Principáu resulta decisivo qu’haya gobiernu estatal. «Asturies precisa con urxencia un gobiernu d’España que tenga plenitú de funciones y pueda exercer toles sos competencies. Precisámoslo pa que pueda aprobase l’Estatutu de la Industria Electrointensiva, p’acelerar la execución de les inversiones n’infraestructures y pa negociar munches otres cuestiones pendientes».

    «Por eso», siguió Barbón, «pensando única y puramente nos intereses d’Asturies, no muncho que mos xugamos, na necesidá urxente de qu’haya un gobiernu d’España énte’l que’l Principáu pueda reivindicar, negociar y alcordar, reiteré-y a Pedro Sánchez tol mio sofitu y el del Gobiernu d’Asturies pa que pueda sacar alantre la investidura cuanto primero».

  • El rey propón a Sánchez como candidatu a la investidura

    El rey propón a Sánchez como candidatu a la investidura

    El secretariu xeneral del PSOE y presidente del Gobiernu en funciones, Pedro Sánchez, peslló esti miércoles la ronda de contactos con Felipe VI pa la formación de gobiernu. El candidatu socialista recibió l’encargu del rei pa sometese a la investidura. Nuna rueda de prensa posterior, aseguró qu’asume esti encargu «con honor, responsabilidá y enorme gratitud al conxuntu del pueblu español».

    Sánchez sorrayó que la so voluntá ye «gobernar dende los valores progresistes y construyendo grandes consensos dientro del marcu constitucional». Coles mesmes anunció que’l llunes va convocar al presidente del PP, Pablo Casado, a una xunta nel Congresu. D’igual manera tamién va convocar a la nueva vocera de Ciudadanos, Inés Arimadas, en respuesta al alcuentru que solicitó.

    La vocera socialista nel Congresu, Adriana Lastra, va aconceyar con tolos partíos políticos «pa ver si podemos atopar una mayoría parlamentaria más amplia». La intención del presidente del Gobiernu en funciones ye llamar a tolos presidentes autonómicos, incluyíu el catalán Quim Torra, y al presidente de la FEMP.

    El candidatu a la presidencia del Gobiernu recordó que l’encargu del Rei ye consecuencia directa del mandatu de les urnes el 10 de payares y el 28 d’abril. «Los ciudadanos fueron claros col so votu: quieren que gobierne’l PSOE, nun hai otres alternatives parlamentaries». «Toos tenemos de poner de la nuesa parte pa que la llexislatura eche a andar y faigamos frente a los desafíos que tenemos per delantre», concluyó.

  • Sánchez ya Iglesias algamen un prealcuerdu de gobiernu de coalición

    Sánchez ya Iglesias algamen un prealcuerdu de gobiernu de coalición

    Pedro Sánchez y Pablo Iglesias tan acabantes d’anunciar un peralcuerdu de gobiernu de coalición. El presidente del Gobiernu en funciones y candidatu del PSOE y el secretariu xeneral de Podemos comparecieron esti meudía ente los medios nel Congresu de los Diputaos. Dambos llíderes roblaron un documentu sobre’l van trabayar nes vinientes selmanes.

    «Esti alcuerdu pa un gobiernu progresista ye de llexislatura, pa un gobiernu de cuatro años que  va tar basáu na llealtá», esplicó Sánchez tras roblar el prealcuerdu con Pedro Sánchez. El presidente del Gobiernu en funciones aseguró que’l pactu con Xuníes Podemos «naz col enfotu d’abrise a otres fuercies polítiques». Dambos llíderes refiriéronse a esti prealcuerdu como un momentu «ilusionante».

  • Barbón: «Ye fundamental p’Asturies qu’haya un gobiernu cuanto antes»

    Barbón: «Ye fundamental p’Asturies qu’haya un gobiernu cuanto antes»

    La comisión executiva autonómica de la Federación Socialista Asturiana axuntó esti llunes n’Uviéu pa encetar l’escenariu posterior a les elecciones del 10-P. Un panorama que’l secretariu xeneral y presidente del Principáu, Adrián Barbón, confía en que lleve a un gobiernu estable llideráu por Pedro Sánchez. «Ye fundamental pa España y tamién p’Asturies na midida na que hai cuestiones claves que dependen del trabayu conxuntu col executivu central».

    Barbón fixo una llectura favorable de la resultancia electoral y celebró los datos n’Asturies. Con una participación menor, precisó’l dirixente socialista, el PSOE consiguió amontar el so porcentaxe de votu y caltener los sos trés diputaos y los sos trés senadores. «Seis de los once representantes asturianos nes Cortes Xenerales son socialistes», destacó, añediendo que’l PSOE impúsose en 70 de los 78 conceyos. «Son cifres a poner en valor», aplaudió.

    El secretariu xeneral dexó otros dos mensaxes. Per una parte, amosó’l plenu respaldu de la dirección de la FSA-PSOE al procesu de diálogu qu’abra la executiva federal, con Sánchez al frente, pa formar un nuevu gobiernu que ponga fin al bloquéu. Per otra, cargó con durez contra PP y Ciudadanos, a los que responsabilizó del emburrie de la estrema derecha. «En llugar de tender un gordón sanitariu como se fai nel restu d’Europa, prefirió blanquiar». Barbón dexó claro que los socialistes van caltener una política d’absolutu «refugu y oposición» a una propuesta «contraria a los más elementales principios democráticos».

  • Albert Rivera dimite como presidente de Cs y dexa la política

    Albert Rivera dimite como presidente de Cs y dexa la política

    Albert Rivera comunicó esti llunes a la executiva de Ciudadanos la so dimisión como presidente del partíu. El candidatu de la formación naranxa a les elecciones xenerales del 10-P asumió tola responsabilidá poles males resultancies obteníes. Cs nun consiguió meyorar el datu del pasáu 28 d’abril, pasando de 56 diputaos a 10. “Ciudadanos va trazar un nuevu mapa y los sos afiliaos van tomar les riendes”.

    “Metíme en política porque m’apasiona España, la llibertá y l’igualdá”, reconoció’l líder del partíu lliberal que tamién dixo que “asume les resultancies”. Rivera apuntó que va convocase un Congresu estraordinariu pa que «los militantes, los que voten, los que nos escoyeron y naide más decidan y tomen les riendes del futuru de Cs”. “Los españoles merécense que-yos digamos la verdá cuando les resultancies son bonos o malos”, sentenció.

    “Nun soi como otros líderes políticos, yo nun toi fechu d’esa pasta, soi honestu, honráu y lo que tenemos ye una mal resultancia ensin paliativos y ensin escuses”, reconoció’l presidente de la formación naranxa quien tamién avanzó que “cuando ún lidera un proyectu asume que los ésitos son de toos y les males resultancies son propios”. Rivera tamién estimó’l trabayu a “tolos que fixeron posible estes elecciones: servidores públicos, apoderaos y interventores” y aprovechó la ocasión “pa felicitar como demócrata a los ganadores de les elecciones, el PSOE”.

  • L’esterramientu de Franco yá tien fecha y hora: xueves 24 a les 10:30 hores

    L’esterramientu de Franco yá tien fecha y hora: xueves 24 a les 10:30 hores

    El Gobiernu d’España va proceder esti xueves, a les 10:30 hores, a esterrar los restos del dictador Francisco Franco de la Basílica del Valle de los Caídos. Los restos van ser treslladaos, tres el so esterrameintu, al panteón de Mingorrubio, nel que yá ta soterrada la so viuda, Carmen Polo. L’Executivu de Pedro Sánchez va llevar a cabu esta midida en cumplimientu de la Llei de Memoria Histórica de 2007.

    Tantu l’esterramientu como’l posterior soterramientu van llevase a cabu na intimidá, en presencia de los sos allegaos. La ministra de Xusticia en funciones, Dolores Delgado, va tar presente mientres tol procesu na so condición de notaria mayor del Reinu.

    El Gobiernu defendió dende’l principiu del procesu que los restos del dictador nun podíen siguir nun mausoléu públicu qu’aponderara la so figura. La sentencia firme y unánime del Tribunal Supremu del pasáu 30 de setiembre punxo fin al procesu contenciosu-alministrativu interpuestu pola familia pa intentar torgar la so salida del Valle de los Caídos. El presidente del Gobiernu en funciones, Pedro Sánchez, señaló en conociéndose el fallu que d’esta manera cerrábase simbólicamente el círculu de la democracia española.

  • Espulsen a una diputada de Vox de la Diputación Permanente

    Espulsen a una diputada de Vox de la Diputación Permanente

    La presidenta del Congresu, Meritxell Batet, espulsó esti martes a la diputada de Vox Macarena Olona de la Diputación Permanente. Too empezó cuando los representantes de la formación d’ultraderecha ocuparon los asientos asignaos a Ciudadanos. Los diputaos de la formación naranaxa viéronse obligaos d’esta manera a ocupar l’espaciu acutáu pal Gobiernu. Batet pidió a los de Santiago Abascal qu’ocuparen los sos asientos, pero estos negáronse.

    La cosa nun quedó ende. Olona saltóse l’orde d’intervenciones y garró la palabra para reclamar que s’aldericara sobro la situación en Cataluña. La presidenta del Congresu llamó-y l’atención al nun tar esa tema nel orde del día. Énte la insistencia de la diputada d’ultraderecha, Batet espulsó a Olona de la Diputación Permanente. Los sos compañeros de partíu tamibén abandonaron la sesión énte la indignación unánime del restu de formaciones. «Esto nun ye un circu, ye’l Congresu de los Diputaos», sentenció Batet.

  • Sánchez va presentar un plan pa superar el bloquéu: “Nun hai tiempu que perder»

    Sánchez va presentar un plan pa superar el bloquéu: “Nun hai tiempu que perder»

    El secretariu xeneral del PSOE y presidente del Gobiernu en funciones, Pedro Sánchez, anunció esti miércoles que’l domingu va presentar un plan para superar el bloquéu políticu. “España nun tien tiempu que perder. Que los españoles sepan que, col so votu, van desbloquiar la situación política y van tener un Gobiernu que funcione”, dixo’l líder socialista nuna entrevista n’El Programa d’Ana Rosa‘ (Telecinco).

    El plan de Sánchez pasa por poner en marcha “un Gobiernu cuanto antes, n’avientu”. Amás, amestó, el PSOE va proponer “que nun haya vacaciones parlamentaries” y que, arriendes d’ello, tantu avientu como xineru sían meses arteros nes Cortes Xenerales. Y, de terceres, va presentase yá en xineru’l techu de gastu, pasu previu a l’aprobación de los Presupuestos Xenerales del Estáu.

    Sánchez argumentó qu’el 10 de payares “tenemos que romper el bloquéu y dexar qu’España avance en xusticia social, convivencia y exemplaridá na vida pública”. El candidatu socialista esplicó qu’el nuesu país enfréntase a retos como la calidá del empléu, la sostenibilidá de les pensiones, la llucha contra’l cambéu climáticu, la transición dixital, la igualdá, el combate contra la esclusión social y el fortalecimientu de la convivencia, y que lo fai amás nun contestu marcáu por amenaces como’l Brexit, la sentencia del procés y l’enfriamientu de la economía.

    Por too ello, aprofió, “ye importante qu’el 10N venzamos a esti bloquéu, y eso vamos faer”. Nesi sentíu, apuntó que namá hai dos alternatives “avanzar o bloquiar” y que, lo que ye güei, “la meyora y el desbloquéu namá lu garantiza’l PSOE”. “Somos los únicos que podemos desbloquiar la situación y garantizar lo que los ciudadanos votaron el 28A y el 26M: qu’haya un Gobiernu progresista con respuestes progresistes a los problemes que tenemos per delantre”, incidió Sánchez, que reprochó a PP y Cs qu’apautaren cola ultraderecha y bloquiaren la gobernabilidad, y a UP, que per cuarta vegada torgara la conformanza d’un Executivu de progresu.

  • Vuelve UPyD: dirá a les elecciones en coalición con Ciudadanos

    Vuelve UPyD: dirá a les elecciones en coalición con Ciudadanos

    Unión Progreso y Democracia presentaráse a les elecciones xenerales del 10-P con Ciudadanos. L’alcuerdu inclúi la integración del so voceru nacional, Cristianu Brown, y del filósofu y cofundador d’UPyD Fernando Savater na llista per Madrid. Brown, que ganó esti domingu les primaries para la liderar la candidatura por amplia mayoría esplicó qu’esta unión yera lo más fayadizo para «volver ser útiles». Brown va dir nel puestu siete de les llistes per Madrid ente que Savater va cerrar simbólicamente la mesma.

    «La puxanza de los estremismos, l’ausencia d’un proyectu económicu sólidu para faer frente a una nueva crisis y los continuos ataques de los separatistes lleváronnos a dexar a un llau les sigles». D’esta manera, la formación va sofitar «la única opción centrista con capacidá para desbloquiar el gobiernu d’España». «Los partíos qu’apostamos por refaer la democracia xunimos para ser más fuertes”, aseguró’l líder progresista.

    Per otru llau, Brown señaló que la repetición electoral «punxo de relieve» la incapacidá de Pedro Sánchez de llegar a alcuerdos con otres formaciones. «Les elecciones del 10-P van suponer un nuevu gastu innecesariu para’l bolsu de el españoles». Nesi sentíu, el voceru nacional d’UPYD aplaudió’l discursu d’Albert Rivera para «sacar a España del paralís» y comprometióse a trabayar pa «favorecer l’entendimientu ente les fuerces constitucionalistes». Eso sí, Brown tamién alvirtió «que non cualesquier suma vale en política». «Esti alcuerdu tien de tener como puntu de partida la rexeneración y como meta ameyorar el bienestar de los ciudadanos.

  • España, a elecciones el 10 de payares

    España, a elecciones el 10 de payares

    Nun va haber candidatu a la investidura. El rei Felipe VI comunicó na tarde d’ayeri a la presidenta del Congresu, Meritxell Batet, que nun esiste un candidatu que cunte colos sofitos necesarios pa ser investíu presidente. El monarca zarró esti martes la ronda de consultes colos representantes de les fuerces polítiques con representación parlamentaria. Esta situación va suponer la repetición de les elecciones el prósimu 10 de payares. La Constitución establez nel so artículu 99.5 que, «si trescurríu’l plazu de dos meses, a partir de la primer votación de investidura, nengún candidatu llogra’l sofitu del Congresu, el rei va disolver dambes Cámares y va convocar nueves elecciones».

    Depués de conocese la decisión del rei, el secretariu xeneral del PSOE y presidente del Gobiernu en funciones, Pedro Sánchez, llamentó la falta d’una mayoría nel Congresu que garantice la formación d’un Executivu. Sorrayó que “España precisa un Gobiernu estable y coherente” y aseguró que los españoles yá “votaron por un Gobiernu progresista que nun dependa de les fuerces independentistes”. Sánchez acusó a PP, Ciudadanos y Xuníes Podemos de “bloquiar” l’entamu de la llexislatura y dixo que’l PSOE va pidir a los españoles que lu digan «entá más claro en payares”.

    El presidente del Gobiernu en funciones llamentó que “los conservadores españoles poco tienen que ver colos conservadores europeos y optaron por desabrise de la estabilidá del país”. Tamién atacó a Xuníes Podemos, a quien acusó de ser “l’únicu partíu européu a la izquierda de la socialdemocracia que torgó cuatro vegaes un Gobiernu progresista”. “Intentámoslo por tolos medios», defendió, pero «fixéronlo imposible».