Xixón al día

Categoría: Sociedá

  • La osezna lliberada en payares nos Picos evoluciona con normalidá

    La osezna lliberada en payares nos Picos evoluciona con normalidá

    La esbarda reintroducida en payares nel Parque Nacional de los Picos d’Europa ta aclimatándose a la redolada con normalidá. Per primer vegada dende esa fecha púdose establecer contactu visual col exemplar. L’animal presenta un bon aspeutu. Dende’l momentu de la so suelta realizóse un siguimientu per parte del personal del Gobiernu asturianu, la Xunta de Castiella y Llión y del propiu parque. Esti trabayu confirmó que l’animal alternó periodos d’inactividá, nos que tuvo a abellugu, con otros nos que abeyaba en busca d’alimentu. Tamién se confirmó la presencia de dos exemplares subadultos d’osu pardu nes proximidaes.

    La lliberación de la esbarda fízose en condiciones d’estremu precuru y ensin contactu con humanos p’aumentar les posibilidaes d’ésitu del so reintroducción nel mediu natural. La zona de la suelta foi escoyida n’analizando múltiples variables, ente otres, la disponibilidá d’alimentu y la baxa presencia de persones. Coles mesmes, el so treslláu al núcleu oriental del cordal cantábricu puede contribuyir a conectar la población osera d’esta área, non bien numberosa, cola del occidente, muncho más estabilizada.

    La esbarda foi recoyida na redoma de la corralada osera de Proaza a finales de mayu de 2019. Carecía desnutrición, deshidratación y alteraciones neurolóxiques y foi unviada a un centru veterinariu pa estabilizala. N’esperimentando un leve ameyoramientu, alcordóse’l so treslláu al Centru de Recuperación de la Fauna Montesa, en Cantabria, unes instalaciones específiques pal tratamientu d’esta especie.

    Mientres los trés meses que permaneció ellí, tuvo baxu control permanente y especializáu, anque ensin contactu visual colos sos cuidadores. L’animal algamó un desenvolvimientu óptimu, hasta llegar a los 23 kilogramos en septiembre. Nesi momentu, foi treslladada al recintu de Valsemana, espaciu en semilibertad, aislláu y con un fayadizu arriquecimientu ambiental, como pasu previu al so reintroducción nel mediu natural.

  • El gripe aumenta per segunda selmana consecutiva y afecta yá a tolos grupos d’edá

    El gripe aumenta per segunda selmana consecutiva y afecta yá a tolos grupos d’edá

    La incidencia del gripe aumenta de manera significativa na primer selmana del añu y algama una tasa de 245,8 casos per cien mil habitantes. Esta xubida produzse de forma significativa en tolos grupos d’edá y caltiénse ente los menores de 5 a 14 años. Magar esta medría, la situación considérase d’intensidá baxa y d’espardimientu epidémicu, según los datos facilitaos pola Rede de Médicos Centinela d’Asturies.

    Na primer selmana de xineru, el gripe ye’l virus respiratoriu que más circula, con predominiu de la gripe pandémica A (nH1N1). L’Hospital Universitariu Central d’Asturies (HUCA), como centro centinela, rexistró nesti periodu 21 ingresos, de los cualos 9 yeren graves. Nel conxuntu d’Asturies, les hospitalizaciones fueron 65. Nel 75 % de los ingresos y nel 67 % de los casos graves que presentaben dalgún factor de riesgu, les persones afectaes nun se vacunaren.

    Los datos nacionales tamién reflexen la fase d’ascensu del gripe que, pela primer vez, supera l’estragal epidémicu. Amás d’Asturies, l’espardimientu ye estensu xeográficamente nel País Vascu, Navarra, Murcia, Estremadura y Canaries. El Serviciu de Salú del Principáu (Sespa) realiza una valoración diaria de la situación en toles árees sanitaries.

    El Sespa considera estabilizada la presión asistencial n’atención primaria y nes urxencies hospitalaries, que ye similar a otros años nestes feches. Caltiénse’l númberu d’altes al respective de los ingresos. En concreto, creció’l númberu de cames llibres en tola rede hasta asitiase en 127. Anque la campaña d’inmunización contra esti virus remató’l 31 d’avientu, los centros de salú disponen de vacunes pa los usuarios.

    Encamientos

    Pa evitar les andaes, les autoridaes sanitaries encamienten llavar con frecuencia les manes con agua y xabón, amás de caltener una bona ventilación de los espacios zarraos. En casu de tusir y/o espirriar encamiéntase utilizar pañuelos de papel d’un solu usu pa tapase la boca y la ñariz, o bien usar el coldu pa evitar contaminar les manes. Ye conveniente llimpiar con frecuencia les superficies que se toquen coles manes como los pomos de les puertes, interruptores etc. Los síntomes del gripe son malestar xeneral, una fiebre alta súbita y tos, que se trata con antitérmicos y non con antibióticos.

  • Asturies destina 1,7 millones a trés proyectos pa blindar l’alministración electrónica

    Asturies destina 1,7 millones a trés proyectos pa blindar l’alministración electrónica

    El Gobiernu asturianu destinó 1.747.420 euros pa trés proyectos de ciberseguridá. L’oxetivu ye ameyorar los sistemes informáticos con qu’operen los funcionarios y que pretenden fomentar l’usu de los servicios esenciales de l’alministración electrónica. L’últimu Conseyu de Gobiernu aprobó la inversión necesaria para les trés iniciatives, que cunten con financiación de la Xunión Europea al traviés del Fondu Européu de Desenvolvimientu Rexonal nel marcu del programa Feder Asturies 2014-2020.

    El primeru de los contratos va suponer una inversión de 751.524 euros hasta l’añu 2023. L’actuación va consistir na instalación y puesta en marcha d’un antivirus. El segundu tien un importe de 485.324 euros. Va financiar un sistema de protección perimetral pa la rede principal y pa la plataforma de virtualización de los puestos de trabayu na alministración. A lo último, van contratase los servicios d’un sistema de prevención de intrusión nel sistema por valor de 510.571 euros.

    Nel Principáu, al igual qu’en cualesquier gran organización, el númberu d’incidentes cífrase en miles al añu. Nel conxuntu del país, los ataques por aciu suplantación d’identidaes (ransomware) y el so posterior pidimientu de rescates amontáronse nun 500% nel últimu añu. Amás, constatóse que los ciberatacantes investiguen cualquier fienda de seguridá para poder robar o manipoliar datos esenciales como los de los ámbitos de la xusticia, la educación o la sanidá. Por estos motivos, ye mester aumentar l’esfuerzu pa caltener un sistema de ciberdefensa acorde a la coyuntura tecnolóxica actual y los peligros contra la integridá de los datos.

    El Principáu lleva años construyendo estructures defensives atendíes por recursos humanos y materiales especializaos con notables éxitos. Asina lo certifica, por casu, la reconocencia del cumplimientu del Esquema Nacional de Seguridá.

  • Asturies continúa con cifres récord de turistes

    Asturies continúa con cifres récord de turistes

    Asturies sigue rexistrando cifres récord de visitantes y estancies a falta d’un mes pal zarru del exerciciu turísticu de 2019. Según los datos del Institutu Nacional d’Estadística (INE), la comunidá recibió 2.233.479 turistes y sumó 5.507.917 pernoctaciones nos once primeros meses. Estos datos representen medres del 1,4% y del 3,5%, respectivamente, en relación a esti mesmu períodu de 2018. En comparanza con 2017, añu nel que se rexistraron los datos más altos de la serie histórica, los aumentos asítiense nel 0,6% y el 1,4%.

    D’esta miente, los resultaos de payares confirmen l’enclín a l’alza que tamién se caltien nos viaxeros procedentes d’otros países. El turismu internacional esperimentó una medra nel númberu de visitantes del 3,5% nos primeros once meses del añu, frente al 1,1% del turismu nacional. Estos porcentaxes iguálense nes pernoctaciones, con un aumentu del 3,7% nes internacionales y un 3,5% nel casu de viaxeros españoles.

    En términos d’empléu, los agospiamientos turísticos asturianos rexistraron unu amenorgamientu del 0,4% en relación a payares de 2018. El total de puestos de trabayu directos foi de 4.287.

  • Bomberos d’Asturies participa nel rescate de dos senderistes en Palencia

    Bomberos d’Asturies participa nel rescate de dos senderistes en Palencia

    L’helicópteru medicalizáu del SEPA rescató a dos varones que resultaron mancaos mientres una ruta na redolada de Peña Labra, en Palencia. El Centru de Coordinación d’Emerxencies recibió l’avisu a les 11:45 hores. El 112 de Castiella y Llión solicitó collaboración pa realizar el rescate d’una persona nel Mirador de Piedrasluengas, cerca de las Brañas. Darréu movilizóse al equipu de rescate de Bomberos del SEPA, a bordu de l’aeronave medicalizada.

    Una vegada na zona, el grupu de rescate alcontró a dos persones, dos varones, que al paecer sufrieren una cayida na nieve, cerca del cume de Peña Labra. Por cuenta de l’enclín de la rimada, a la nieve de la zona y al xelu, l’equipu baxó de l’aeronave por aciu la execución d’una operación de sofitu de patín. Aportaron a dambos afectaos, dixebraos ente sí varios metros, con crampones y piolé. En valorando a dambos mancaos, evacuóse de la zona, de primeres, al varón que resultó mancáu leve. Pa ello, el pilotu de l’aeronave realizó una operación de sofitu de patín y un bomberu-rescatador ayudó al afectáu a xubir a l’aeronave. De siguío treslladóse hasta’l Mirador de Piedrasluengas.

    Mentanto, la médica-rescatadora y un bomberu-rescatador atendieron ya inmovilizaron al segundu mancáu. Presentaba una quebra abierta de tibia y peroné na pierna derecha. Foi treslladáu nun helicópteru sanitariu de Castiella y Llión. El grupu de rescate de Bomberos del SEPA dio per rematada la intervención a la so llegada a base, a les 16:15 hores.

  • Vichyssoise y pixín: el menú de Nuechevieya en Cabueñes

    Vichyssoise y pixín: el menú de Nuechevieya en Cabueñes

    Los ocho hospitales públicos d’Asturies van ufiertar menús especiales pa facer más prestosa la estancia de los pacientes ingresaos nes navidaes. L’Hospital Universitariu de Cabueñes sirvió crema de calabaza con cruxente ibéricu, salmón a la riberana, tarta de quesu con arándanos y dulces navidiegos pa la cena de Nuechebona. La xinta de Navidá consistió en sopa del Cantábricu, carrilleres al vinu tinto con cogordes monteses, copa xelada de vainilla y carambelu y dulces navidiegos.

    En Nuechevieya, los pacientes del centru hospitalariu xixonés van disfrutar de crema vichyssoise, supremes de pixín dos testures a la marinera, tarta San Marcos y dulces navidiegos, amás de les uves. N’Añu Nuevu, el menú va consistir en marmitaco de llagostinos, bacaláu con amasueles y gules, copa xelada de vainiella y carambelu y dulces navidiegos.

  • Pérez Simón, presidente del Conseyu Social de la Universidá d’Uviéu

    Pérez Simón, presidente del Conseyu Social de la Universidá d’Uviéu

    El Gobiernu asturianu nomó al empresariu asturmexicanu Juan Antonio Pérez Simón presidente del Conseyu Social de la Universidá d’Uviéu. Con esta designación, publicada nel BOPA, ciérrase’l procesu de renovación del órganu universitariu. En feches próximes va aconceyar el plenu del Conseyu Social pa proceder al relevu del presidente, cargu nel que Pérez Simón sustituye al tamién empresariu Ladislao Azcona, y de los vocales nuevos. Desque se realice esti trámite, la presidencia va escoyer a la persona que va asumir les funciones de la secretaría.

    El nomamientu de Pérez Simón foi aprobáu pol Conseyu de Gobiernu a propuesta del conseyeru de Ciencia, Innovación y Universidá, Borja Sánchez. Nacíu en Turancias (Llanes), en 1941, Juan Antonio Pérez Simón emigró a los cinco años xunto a la so familia a México. Estudió la titulación de Contador Públicu na Universidá Nacional Autónoma de México y entró en contactu col mundu de la bolsa hasta asociase con Carlos Slim n’Inversora Bursátil, a finales de los años setenta.

    La so trayectoria empresarial afianzóse a partir de 1990, cuando Grupo Carso, South Western Bell (güei ATT) y France Telecom adquieren Teléfonos de México. Baxo la so dirección, llogró convertir a la compañía nuna de les empreses de telecomunicaciones más modernes del mundu. Darréu, dexó l’alministración directa y siguió cola so participación nos Conseyos d’Alministración de les empreses más importantes del Grupu.

    En 1996 funda la institución ensin fines d’arriquecimientu Juntos Actuando por la Superación, conocida n’España como Fundación JAPS, que proporciona sofitu al desenvolvimientu de proyectos empresariales, culturales y artísticos. La so reconocida colección d’arte cunta con más de 1.700 obres, que van dende la Renacencia a les vanguardies, de la pintura flamenca a la española, y con atención especial a los artistes norteamericanos y llatinoamericanos del sieglu XX.

    Forma parte del Conseyu Internacional del Muséu del Louvre, la Fundación Amigos del Muséu del Prado, la Fundación Muséu Reina Sofía, el Conseyu Internacional del Metropolitan Opera de Nueva York y la Hispanic Society de Nueva York, ente otres instituciones. Amás, ye patronu de la Fundación Princesa d’Asturies y vocal de l’Asociación d’Amigos del Arquivu d’Indianos – Muséu de la Emigración.

    Fuertemente venceyáu a Asturies, Pérez Simón cedió en depósitu delles obres al Muséu de Belles Artes d’Asturies. Entregó a la Xunta Xeneral el manuscritu de la Carta de Xovellanos al Marqués de Camposagrado sobre’l blasón del Principáu d’Asturies.

  • Despega Cheops, el satélite ‘español’ que va midir exoplanetes

    Despega Cheops, el satélite ‘español’ que va midir exoplanetes

    L’Axencia Espacial Europea (ESA) acaba de llanzar la so primer misión p’analizar el tamañu de dalgunos de los más de 4.000 planetes estrasolares que yá s’afayaron hasta la fecha. Dempués del aplazamientu d’ayeri por una incidencia na secuencia automática del llanzamientu, güei sí, el satélite Cheops (CHaracterising ExOPlanet Satellite: satélite de caracterización de exoplanetas) desapegó esti miércoles a les 9:54 h (hora peninsular española) dende’l Puertu Espacial Européu de Kurú, na Guayana Francesa, a bordu d’un cohete Soyuz-Fregat.

    Cheops ye una misión conxunta de l’Axencia Espacial Europea (ESA) y l’axencia espacial suiza que va caracterizar exoplanetas yá conocíos, de tamaños entendíos ente la Tierra y Neptuno, midiendo los minúsculos cambeos que se producen nel rellumu de la so estrella cuando pasen per delantre. Esta xera realizarala orbitando la Tierra a 700 km d’altor y con un únicu preséu: un fotómetru operando nun telescopiu de 30 cm d’apertura. Les observaciones de fotometría d’ultra alta precisión de les estrelles brilloses con exoplanetas va dexar conocer el radiu d’estos.

    Esta información, xuntu colos datos sobro les sos mases llograos con estudios espectroscópicos dende la Tierra, van ayudar a determinar la so densidá. D’esta forma podrá llograse una primer caracterización d’estos mundos, daqué esencial pa entender la so composición (predresu o gaseosu), orixe y evolución.

    Desenvolvimientu y operación dende España

    El contratista principal pal diseñu y la construcción de Cheops foi Airbus Defence and Space España, pero nesti proyectu tamién participaron otres siete compañíes españoles: GMV, Alter Techonology, Crisa, Elecnor Deimos, HV Sistemes, Iberespacio y Sener. El responsable tantu de la so puesta n’órbita como de la operación mientres la so vida útil, ye l’Institutu Nacional de Técnica Aeroespacial (INTA). Ello ye que ye la primer vegada qu’un satélite de la redolada europea va controlar dende’l nuesu país tres el llanzamientu.

    El INTA va ser l’encargáu de dirixir, al pie de la compañía GMV, el Centru d’Operaciones de la Misión (MOC). Ta asitiáu na see d’esti institutu en Torrejón de Ardoz (Madrid), dende onde se va operar el satélite y van xestionase los datos telemétricos que tresmita la nave.

  • Educación va convocar en 2020 la mayor ufierta d’empléu públicu pa Secundaria, con 712 places

    Educación va convocar en 2020 la mayor ufierta d’empléu públicu pa Secundaria, con 712 places

    La Conseyería d’Educación va convocar 712 places pa los cuerpos docentes de Secundaria en 2020. Trátase de la mayor ufierta d’empléu públicu desque Asturies asumió les competencies en materia d’educación nel añu 2000. El presupuestu global de la conseyería xube a 694.131.368 euros, un 5% superior al d’anguaño.

    La conseyera, Carmen Suárez, presentó na Xunta Xeneral unes cuentes que dediquen 535 millones a gastos de personal, 28,6 millones más qu’en 2019, lo que supon un 5,65% más. Con esta partida, sufrágense, en parte, los costos acomuñaos al amenorgamientu de la xornada lectiva a 18 hores para’l profesoráu de Secundaria, l’aumentu del presupuestu pa sustituciones y los consiguientes costos sociales.

    La ufierta d’empléu acuta 537 places pa ingresu llibre de los cuerpos de Secundaria y técnicos de Formación Profesional, asina como 175 places pa promoción interna, nun apueste de la conseyería por amenorgar la tasa d’interinidá. Por ello, prevese una convocatoria de procesu selectivu para estos cuerpos de 712 places distribuyíes ente 29 especialidaes. D’elles, el 7% (50) van tar acutaes pa persones con discapacidá. A estos puestos hai que sumar otros cinco de profesoráu d’Escueles Oficiales d’Idiomes y, tamién per primer vegada dende les tresferencies, 250 de promoción interna de catedráticos de Secundaria. El costu de los procedimientos selectivos calcúlase en 1,5 millones.

  • El Campus cede diez places d’aparcamientu pa coches compartíos

    El Campus cede diez places d’aparcamientu pa coches compartíos

    El rector de la Universidá d’Uviéu, Santiago García Granda, y el presidente del Grupu Baldajos, Alejandro Díaz González, roblaron esti miércoles un alcuerdu de collaboración para promover la movilidá más sostenible. La institución académica va ceder espacios d’aparcamientu gratuitos nos campus de Xixón y Uviéu pal estacionamientu de vehículos eléctricos compartíos. Van ser en total quince places, diez d’elles allugaes nel Campus de Xixón y otres cinco nel Campus d’El Cristu. L’alcuerdu, que tien una duración inicial d’un añu, recueye la posibilidá d’habilitar otres cinco places nel Campus de Mieres nel casu de que Hi! Mobility amplíe la so rede.

    Mientres la firma, destacaron les árees d’interés que comparten y que tán rellacionaes cola movilidá eléctrica, la eficiencia enerxética y l’usu y fomentu de les enerxíes llimpies. Nesti sentíu, l’alcuerdu suscritu inclúi la collaboración ente la Universidá d’Uviéu y Hi! Mobility en proyectos y actividaes de promoción del usu d’enerxíes llimpies amestada a la movilidá eléctrica.