La Universidá d’Uviéu y el Gobiernu d’Asturies van collaborar pa la recuperación de la memoria histórica de les víctimes de la guerra civil y la dictadura franquista. Dambes entidaes suscribieron un conveniu de collaboración que foi robláu por Ignacio Villaverde, rector de la Universidá d’Uviéu, y Ovidio Zapico, conseyeru d’Ordenación del Territoriu, Urbanismu, Vivienda y Derechos Ciudadanos.
Esti conveniu de collaboración enmárcase na Llei del Principáu d’Asturies 1/2019, de 1 de marzu, pa la recuperación de la memoria democrática, qu’establez ente los sos oxetivos alcontrar a les persones desaparecíes mientres la guerra civil y la dictadura franquista. La llei busca facer efectivos los derechos de los sos familiares a llograr información sobre’l so paradoriu y, si procede, identificar los sos restos, mesmo que realizar un censu de les persones desaparecíes non alcontraes y un bancu de datos de los restos de cadabre ensin identificar.
El rector Ignacio Villaverde calificó como un actu de xusticia” la recuperación de la memoria histórica y l’arreglu de la dignidá arrebatada a les víctimes de la guerra civil y el franquismu. Villaverde destacó que la universidá, como motor de la conocencia n’Asturies, tien la obligación moral” de contribuyir nesta xera. El rector recordó que yá’l Claustru Universitariu aprobó n’ochobre del añu pasáu por asentimientu y con una zarrada ovación les midíes presentaes pola Comisión de la Memoria Histórica de la universidá qu’incluyíen, ente otres, la retirada del títulu de rector honorariu a Franco.
El conseyeru Zapico destacó que les alministraciones “tenemos de saldar una delda histórica colos familiares de los represaliaos de la dictadura franquista” y comprometióse a trabayar, dende’l so departamentu, en favor de “la verdá, la xusticia, l’arreglu del dañu y sobre manera pola garantía de la non repetición”. Zapico añedió que, a diferencia de los Executivos d’otres comunidaes autónomes, Asturies tien como oxetivu postreru apurrir a los familiares los restos de los sos seres queríos “pa cerrar el círculu y desaniciar, anque seya mínimamente, el dolor causáu a estes víctimes” y, d’ende, la importancia de los trabayos d’identificación que va llevar a cabu la Universidá d’Uviéu gracies a esti conveniu.
La Universidá d’Uviéu, acordies con el conveniu, comprométese a realizar les xeres d’investigación y espardimientu social de los trabayos de localización, prospección, escavación, exhumación, estudiu ya identificación de víctimes y persones desapariciones mientres la guerra civil o na represión política de la dictadura franquista. Estes actividaes van ser coordinaes y realizaes pol grupu d’investigación n’Arqueoloxía ARQUEOS, que lidera José Avelino Gutiérrez González, catedráticu d’Arqueoloxía de la Universidá d’Uviéu.
Esti grupu ta especializáu na investigación arqueolóxica del pasáu y la xestión del patrimoniu cultural; desenvolvió múltiples proyectos d’investigación n’arqueoloxía, antropoloxía física y arqueometría. Ta allugáu nel Departamentu d’Hestoria de la Universidá d’Uviéu, qu’integra tamién l’equipu qu’ellaboró la base de datos de fueses comunes y persones desaparecíes na guerra civil y na dictadura franquista, que constitúi’l corpus documental más completu disponible pa la identificación y localización de los llugares onde s’atopen los restos de persones desaparecíes que van ser oxetu de les actuaciones recoyíes nesti conveniu.
La Universidá d’Uviéu va llevar a cabu tamién la localización, prospección, escavación de fueses y llugares d’enterramientu, exhumación, estudiu ya identificación de les persones desaparecíes y asesinaes mientres la guerra civil y la represión posterior, mientres la dictadura franquista, mesmo que l’estudiu de los oxetos acompañantes, del escenariu d’entierru y de les circunstancies que dexen identificar les causes y procesos d’execuciones y d’enterramientos illegales. Coles mesmes, la universidá asturiana va encargase de recoyer les amueses ósees de los restos esqueléticos desaterraos, destinaes a los analises xenéticos, que faciliten la posterior identificación de los restos desaterraos. Igualmente, la institución académica va llevar a cabu les actividaes d’espardimientu científicu y de divulgación social de los trabayos efectuaos y de les resultancies consiguíes n’aplicación del conveniu.
Pela so parte, el Gobiernu del Principáu d’Asturies, al traviés de la Conseyería d’Ordenación de Territoriu, Urbanismu, Vivienda y Derechos Ciudadanos, comprométese a apurrir el financiamientu necesariu pa realizar estes acciones. Con esti propósitu y en virtú del conveniu, que va tener una vixencia de dos años, l’Alministración autonómica va apurrir a la universidá 80.000 euros anguaño y otros 80.000 en 2024. L’Executivu rexonal va apurrir la información necesaria pa llevar a cabu los trabayos oxetu del conveniu y va apurrir a la Universidá d’Uviéu, pa realizar los correspondientes analises xenéticos, les amueses d’ADN que se fueron tomando a familiares de víctimes qu’asina lo solicitaron.
