Xixón al día

Etiqueta: Conceyu de Xixón

  • Obres de reparación nel firme de la glorieta de Foro

    Obres de reparación nel firme de la glorieta de Foro

    El Conceyu de Xixón reparó’l firme de la glorieta de Foro, una de les principales zones de tránsitu de la ciudá allugada n’avenida de La Constitución. Los trabayos, que s’empecipiaron el xueves 23 d’abril, remataron esti martes tres la reposición de la calzada. D’esta miente, los llabores necesarios pa la so completa adecuación realizáronse aprovechando l’amenorgamientu del tráficu a consecuencia del decretu d’estáu d’alarma.

    Esta actuación ta enmarcada dientro del contratu d’obres de caltenimientu y meyora de la infraestructura viaria. Los operarios del Conceyu van treslladase esti miércoles hasta los Xardinos de la Reina. El tramu de calzada más próximu a la cera va habilitase pa que les bicicletes puedan circular con continuidá per esi tramu. D’esta miente, los usuarios del vial van disponer de la conexón ente la Plaza del Marqués y El Fomento tres la instalación d’una terraza sobre’l carril bici. El presupuestu d’estos trabayos ye de 27.883’40 euros y tienen un plazu d’execución d’un mes.

  • El pozu de tormentes d’Hermanos Castro llevará un añu y 2,5 millones más

    El pozu de tormentes d’Hermanos Castro llevará un añu y 2,5 millones más

    La obra del pozu de tormentes del parque de los Hermanos Castro retrásase. Asina lo anunció esti xueves el conceyal de Caltenimientu y Obres Públiques, Olmo Ron. L’edil, que tamién preside la EMA, esplicó que’l proyectu constructivu encargáu pol anterior equipu de gobiernu «nun cuntaba colos estudios xeolóxicos necesarios». D’esta manera, el proyectu va ser modificáu pola posibilidá de que se produzan deslizamientos de tierra que podríen afectar a les viviendes de la zona.

    El conceyal esplicó que «la obra taba mal proxectada dende’l principiu, y agora tócanos a nós encarar la solución”. Asina, reconoció que se trata d’una decisión difícil», magar nun duldaron «nin un segundu» n’encarala y «siguir alantre». Detalló que’l gobiernu municipal nun tuvo conocencia d’esta situación hasta’l cambéu de xerencia en EMA y cuando Acciona, axudicataria de la obra, empezó a plantegar duldes.

    Ente esta situación, la EMA encargó un informe a la Fundación Universidá d’Uviéu que concluyó que nun ye posible siguir les obres col actual proyectu constructivu. Esti cambéu va suponer una medría nel presupuestu de la obra d’unos 2’5 millones d’euros. Tamién va retrasar la finalización de les obres. El plazu va tener qu’estendese un añu más. Los cambeos nel proyectu van treslladase al conseyu d’alministración de la EMA.

  • El 010 atendió más de 4.500 llamaes dende l’entamu del estáu d’alarma

    El 010 atendió más de 4.500 llamaes dende l’entamu del estáu d’alarma

    El teléfonu d’información municipal 010 atendió 4.521 llamaes dende l’entamu del estáu d’alarma. El Conceyu reforzó esti serviciu cola incorporación, en modalidá de teletrabayu, de personal auxiliar de los cinco centros municipales que permanecen zarraos pa frenar la espansión del COVID19. De forma virtual y telefónica xestionáronse 2900 rexistros rellacionaos coles ayudes estraordinaries pa les neños con beca de comedor nesti cursu.

    Coles mesmes, siguen tramitándose vía telemática los procedimientos que se presenten al traviés de la oficina virtual. En total fueron 1974 rexistros, 144 consultes y 99 solicitúes de tarxeta ciudadana. Pa espachar los asuntos más urxentes habilitóse tanto’l teléfonu 010 como’l corréu electrónicu atencionciudadana@gijon.es. Per estes dos víes llegaron 295 consultes. Tamién s’alministraron casi 300 propuestes de reclamaciones y suxerencies pa evitar dilaciones nos espedientes mientres esta situación d’emerxencia sanitaria.

  • Juan Miguel Chaves toma posesión como conceyal de Podemos-Equo

    Juan Miguel Chaves toma posesión como conceyal de Podemos-Equo

    Juan Miguel Chaves yá ye conceyal de Podemos-Equo nel Conceyu de Xixón. El nuevu edil sustitúi nel cargu a Alba González, qu’abandonó’l so puestu nel Plenu p’asumir nueves responsabilidaes nel Ministeriu d’Igualdá. «Ye un honor y espero tar al so altor», defendió’l nuevu conceyal ente un Plenu más vacíu de lo normal. La sesión celebróse de forma semipresencial.

    Al salón de Plenos de la Casa Conceyu namás asistieron los voceros de cada formación. El restu de conceyales siguió la sesión de manera telemática. El conceyal siguió la sesión dende’l Salón de Recepciones hasta’l momentu de tomar de posesión del cargu. Pa respetar la distancia de seguridá, l’alcaldesa, Ana González, convidó-y a recoyer él mesmu la medaya de conceyal. «Coyer usté mesmu», indicó-y la rexidora insistiendo na importancia de cumplir col distanciamientu social.

  • Serunión asume’l serviciu de comedor nos colexos públicos de Xixón

    Serunión asume’l serviciu de comedor nos colexos públicos de Xixón

    La empresa Serunión entamó esti miércoles a funcionar nos 32 centros escolares del conceyu. Nellos comen diariamente un total de 3.515 neños, de los cualos, 1.730 cunten con beca de comedor escolar. La entrada de la nueva empresa producióse con total normalidá. La llicitación contempla la meyora de la calidá de l’alimentación y atención a los neños que faen usu de los comedores escolares. Una llicitación que supunxo la xubida del preciu d’esti serviciu, pasando de 66’02 euros a 91’99 euros.

    El Conceyu de Xixón va convocar una llínea d’ayudes estraordinaries, dotaes con 172.000 euros, pa compensar la medría esperimentada por esti serviciu. Estes ayudes tan dirixíes a les families que nun cunten con beca comedor y que los sos ingresos nun superen cuatro vegaes l’Indicador Públicu de Renta d’Ingresos Múltiples (IPREM). Esta convocatoria ta pendiente de la publicación definitiva del Presupuestu municipal de 2020, prevista pal 20 de xineru.

    Asina, a les families con una renta que nun supere los 26.318’57 euros va abonáse-yos el total de la xubida, esto ye, 25’97 euros mensuales. A les families con ingresos que superen dicha cantidá, pero nun algamen los 30.078’36 euros, va abonáse-yos el 50% de la xubida. Les ayudes van abonase nun pagu únicu enantes del final del cursu escolar.

  • Escolares de Xixón bauticen seis nuevos autobuses d’Emtusa

    Escolares de Xixón bauticen seis nuevos autobuses d’Emtusa

    Emtusa presentó esti miércoles seis nuevos autobuses. Los vehículos fueros bautizaos polos ganadores del concursu ‘Un nome pal to autobús’ y del concursu del logo de la Selmana Europea de la Movilidá 2020. Los nomes escoyíos polos escolinos fueron AsturBus, Enrebus, SobreRuedas, EcobusGijón, El Xixón Pro y Relámpago Rojo. Los nuevos autobuses van incorporase a la llínea 4, que conecten El Lauredal col campus de Xixón. Los vehículos, fabricaos por Scania, cumplen colos requisitos más restrictivos en materia d’emisiones contaminantes.

  • Xixón va rescindir el contratu d’ayuda a domiciliu si la empresa vuelve incumplilu

    Xixón va rescindir el contratu d’ayuda a domiciliu si la empresa vuelve incumplilu

    El Conceyu de Xixón nun descarta rescindir el contratu con Aralia, concesionaria del serviciu d’ayuda a domiciliu, si la empresa vuelve a incumplir el contratu. La conceyala de Bienestar Social y Derechos, Natalia González, manifestó esti miércoles la so esmolición depués de que la empresa comunicara a los trabayadores la so intención de nun pagar la nómina de payares.

    González contactó cola empresa, que-y aseguró que “en nengún casu falaron d’impagos, sí de retrasu nel pagu de les nómines”. La conceyala declaró que si finalmente la empresa nun abona’l salariu a los trabayadores, sumaría un nuevu incumplimientu que traería la rescisión del contratu, «coles consecuencies que d’ello se derivaríen».

    La conceyala de Bienestar Social reconoció que, magar en Servicios Sociales tán a la espera de que la empresa facilite les cuentes de 2019, les de 2018 nun demuestren una situación qu’esplique o xustifique lo que ta asocediendo. Según informa’l conceyu, n’otros conceyos nos qu’esta empresa empresta los sos servicios los trabayadores tán cobrando con normalidá. La Fundación yá trabaya nel nuevu pliegu de llicitación del nuevu serviciu si Aralia decide nun rematar el so contratu ya inclusive tener casi preparáu un contrato ponte, nel casu de que la empresa dexe d’emprestar el serviciu de manera inmediata.

    La conceyala anunció que la facturación a Aralia correspondiente al mes de payares ta paralizada, hasta que se clarifique esta situación. La próxima selmana, la conceyala va caltener una xunta cola xerencia de la empresa.

  • Yolanda Huergo llamenta la falta de tresparencia” del equipu de gobiernu

    Yolanda Huergo llamenta la falta de tresparencia” del equipu de gobiernu

    “L’equipu de gobiernu reincide na so falta de tresparencia colos grupos municipales de la oposición. Enzancar el trabayu de la oposición pon de manifiestu’l pocu apreciu pola calidá democrática que tien el PSOE”, sentenció ayeri Yolanda Huergo. La vocera de Podemos-Equo Xixón llamentó nun tener noticies del conseyu d’alministración de Xixón Al Norte. «Nun recibimos la documentación magar que la oposición yá la había solicitáu’l pasáu 18 d’ochobre».

    La comisión informativa d’Urbanismu celebrada a mediaos d’ochobre aceptó un ruegu del grupu municipal de Foru en relación a la xunta del Conseyu d’Alministración de Xixón al Norte, del 10 d’ochobre. La solicitú recoyía que se facilitara a tolos grupos municipales la información, les conclusiones y los alcuerdos adoptaos pol conseyu. “Entá tamos esperando por ello. Y eso que dada la importancia de proyectos como’l del Solarón, l’equipu de gobiernu tendría de tar dando inclusive más esplicaciones”, sostien la vocera.

    Por ello, Yolanda Huergo va solicitar mañana de nuevu na Comisión d’Urbanismu que s’atienda’l ruegu, anque sía con un mes de retrasu. Tamién va preguntar sobre l’actualización de la web de Xixón al Norte, que lleva meses ensin actualizase. “Les últimes noticies que se recueyen nella son noticies publicaes el día 10 de mayu de 2019. Nella nun figura nenguna referencia al proyectu d’Urbanización que s’atopa nestos momentos n’información pública. Fai falta una información fiable y accesible de temes tan importantes como ye l’urbanismu”, señala la vocera de Podemos-Equo Xixón.

  • La Xunta de Gobiernu aprueba’l proyectu de presupuestos pa 2020

    La Xunta de Gobiernu aprueba’l proyectu de presupuestos pa 2020

    La Xunta de Gobiernu del Conceyu de Xixón aprobó esta mañana’l proyectu de presupuestos pa 2020 dotáu con 233 millones d’euros pal Conceyu. La propuesta  12.252.500 euros pa la Fundación Municipal de Cultura, Educación y Universidá Popular; 21.921.700 euros pa la Fundación Municipal de Servicios Sociales; y 12.610.400 d’euros pal Patronatu Deportivu Municipal.

    Tres la so aprobación empecipia la tramitación presupuestaria cola apertura del plazu de presentación d’enmiendes, que va rematar el 22 de payares. Depués va celebrase una comisión estraordinaria de facienda na que, namás, van presentase les enmiendes recibíes, que se van votar en comisión el 28 de payares. La votación del proyectu definitivu de presupuestos va celebrase’l 4 d’avientu nuna sesión estraordinaria del Plenu municipal.

  • El conseyu d’alministración de EMTUSA refuga’l presupuestu de la empresa

    El conseyu d’alministración de EMTUSA refuga’l presupuestu de la empresa

    El conseyu d’alministración de la Empresa Municipal de Tresportes Urbanos de Xixón refugó esti miércoles el presupuestu presentáu pola empresa pa 2020. La propuesta cuntó con siete votos a favor, trés en contra y cuatro astenciones. Nesti casu yera necesarios ocho votos a favor, la mayoría absoluta, para sacar alantre la propuesta. Los votos a favor fueron de PSOE (4), IX (2) y Comisiones Obreres (1); en contra de VOX (1), Foru (1) y UXT (1) y les astenciones de Ciudadanos (1), PP (1), Podemos-Equo (1) y FAV (1).

    El presupuestu presentáu pola empresa municipal incluyía un millón y medio d’euros de gastu corriente pal amenorgamientu de la xornada llaboral a 35 hores selmanales y pa la contratación de conductores. Coles mesmes taba prevista una aportación estraordinaria del Conceyu d’un millón d’euros esti añu, pa la compra de trés vehículos híbridos, amás de los trés que la empresa tenía previstu adquirir con cargu al presupuestu de 2020.

    Les cuentes diben destinaes a «asegurar la viabilidá de EMTUSA», esplica’l Conceyu. El proyectu contemplaba «la meyora de les condiciones llaborales de los sos trabayadores y a potenciar l’usu del tresporte públicu, según el so compromisu col medioambiente».