– Les subvenciones van otorgase per un períodu de dos años en réxime de concesión directa, lo que va dexar una tramitación más axilosa, y van tener en cuenta non solo los ingresos, sinón tamién la situación de vulnerabilidá de les persones solicitantes.
– El plazu de presentación de solicitúes va empezar tres la publicación del resolvimientu nel Boletín Oficial del Principáu y va rematar el 30 d’avientu.
El Gobiernu d’Asturies autorizó güei un gastu de 16.145.124 euros destináu a la nueva convocatoria d’ayudes al arriendu, que se van tramitar en réxime de concesión directa y van otorgase por un períodu de dos años. Los fondos van distribuyise en trés añalidaes: 8.058.000 euros en 2023, 6.143.450 pa2024 y 1.943.661 pa2025.
Estes ayudes tienen por oxetu facilitar l’esfrute d’una vivienda o habitación, en réxime d’arriendu o de cesión d’usu, a sectores de la población con escasos medios económicos, asina como a colectivos en situación de riesgu. L’aplicación del réxime de concesión directa va dexar tramitar les solicitúes con más rapidez.
Pa la concesión de les subvenciones van tenese en cuenta non solo los ingresos de la unidá de convivencia, sinón tamién la vulnerabilidá de les persones solicitantes, polo que na convocatoria estremaránse trés llínees:
• Programa d’ayudes al arriendu de vivienda.
• Programa d’ayudes a les víctimes de violencia de xéneru, persones desanunciaes de la so vivienda habitual, persones ensin llar y otres especialmente vulnerables.
• Programa d’ayudes a persones arrendataries en situación de vulnerabilidá sobrevenida.
La cuantía que van recibir les persones solicitantes va depender de les llínees a les qu’opten y va tener calter retroactivu a fecha 1 de xineru de 2023. El plazu de presentación de solicitúes va empezar en cuanto s’espublice’l correspondiente resolvimientu de la Conseyería de Drechos Sociales y Bienestar nel Boletín Oficial del Principáu (Bopa) y va rematar el 30 d’avientu.
Per otra parte, la Conseyería de Derechos Sociales y Bienestar yá empecipió los pagos pendientes de la última convocatoria d’ayudes al arriendu. Amás, l’aumentu del créitu en 4 millones, hasta algamar los 11,5, dexó atender toles solicitúes que cumplíen los requisitos establecíos nes bases.
Estos abonos correspuenden a los segundos pagos de 1.751 persones (el 27% de los beneficiarios) que s’atopaben en dalgún de los siguientes casos: nun presentaren en plazu los recibos, figuraben como debedores de l’Alministración, camudaren de cuenta del bancu nes últimes selmanes de 2022 o los sos datos bancarios conteníen dalgún erru.
El Principáu punxo en marcha distintes midíes pafacilitar l’accesu a una vivienda a un preciu algamadizu. Anguaño cunta con casi 10.000 inmuebles nel parque públicu autonómicu y mil viviendes protexíes en réxime d’arriendu, a les que se suma otru millar de los parques municipales.
Etiqueta: Gobiernu d’Asturies
-
El Gobiernu d’Asturies llanza la nueva convocatoria d’ayudes al arriendu, dotada con 16,1 millones pa’l períodu 2023-2025
-
El Gobiernu d’Asturies solicita al Conseyu de Ministros la declaración de la comunidá como zona afectada gravemente por una emerxencia de protección civil
– Los 278 quemes forestales rexistraos del 29 de marzu al 9 d’abril afectaron a 32.000 hectárees de 51 conceyos y causaron daños de considerancia en montes, camperes, cultivos y servicios
– El Principáu aprueba l’espediente que va dexar llanzar ayudes para prevención y reforestación destinaes a empreses y particulares
– L’Executivu avanza na reorganización de les Bripas y de la Guardería del Mediu Natural col fin de reforzar dambos servicios y amontar la seguridá
El Gobiernu d’Asturies alcordó güei solicitar al Conseyu de Ministros la declaración de la comunidá como zona afectada gravemente por una emerxencia de protección civil –lo qu’antes se denominaba zona catastrófica-, de resultes de los 278 quemes forestales rexistraos dende’l 29 de marzu al 9 d’abril. Los fueos afectaron a 51 conceyos y 32.000 hectárees. L’aprobación de la declaración per parte del Executivu central dexaría aportar a distintes llínees d’ayudes.
El Principáu sostien que los perxuicios causaos pola fola de quemes xustifiquen sobradamente la solicitú. Asina, detalla que se producieron daños de gran considerancia en mases arbolaes de rexeneración natural y repoblación forestal, tanto en terrenes d’utilidá pública como en montes vecinales en mano común y privaos.
El fueu, abonda’l gobiernu, tamién afaró zones de carba, pacional y cultivu, de cuenta que provocó graves perdes en pación, madera, reserves y cotos de caza, na collecha de castañes y setes, y na producción ganadera y de miel.
Les consecuencies de les quemes tamién se fixeron notar n’infraestructures, equipamientos, instalaciones y servicios, con series perturbaciones pa la vida de la población: hubo cortes de carreteres, desprendimientos, cayida de tendíos eléctricos y de telecomunicaciones ya interrupciones del suministru d’agua, ente otros problemes.
Tou esti catálogu de daños, que la so valoración entá nun foi concluyida, motiva la solicitú del Executivu autonómicu.
Amás d’esti pidimientu –que yá fuera adelantráu pol presidente, Adrián Barbón-, el gobiernu avanza n’otres midíes previstes nel plan de choque pa encarar les consecuencies de les quemes. -
El Gobiernu d’Asturies va poner en serviciu la próxima selmana’l vial de 3,7 kilómetros que xune la Zalia con La Peñona
– L’Executivu invirtió casi 30 millones na construcción d’esta nueva carretera que facilita l’accesu dende Xixón y el Puertu d’El Musel a la parte d’Actividaes Loxístiques ya Industriales d’Asturies
El Gobiernu d’Asturies va poner en serviciu a finales de la próxima selmana’l nuevu vial que comunica la Zona d’Actividaes Loxístiques ya Industriales d’Asturies (Zalia) cola carretera AS-19 (Xixón-Avilés) na redolada de La Peñona. La inversión xube a 29.651.993 euros.
El viceconseyeru d’Infraestructures, Movilidá y Territoriu, Jorge García, realizó esti anunciu mientres una visita a los trabayos. Esplicó que l’Executivu ta rematando estos díes les obres de construcción d’esta infraestructura de 3,7 kilómetros de llargor, que va ameyorar les conexones de la Zalia con Xixón y el Puertu d’El Musel, y va contribuyir a asitiar esta área como una plataforma loxística líder nel noroeste.
El nuevu vial cuenta con un anchor 10,5 metros d’anchu, partida en dos carriles de 3,5 metros y dos arcenes de 1,75 metros a cada llau, col envís de favorecer la circulación de los vehículos pesaos.
Amás, y para facilitar l’accesu a les zones industriales que traviesa la carretera, el Principáu construyó dos glorietes entemedies que faciliten la conexón colos polígonos industriales de Somonte y La Lloreda, según col accesu a la planta d’Arcelor Mittal. Les obres tamién incluyeron la construcción de 1,8 kilómetros de víes adicionales, sumando enllaces y ramales.
La conexón ente la Zalia y La Peñona tamién incorpora dos nuevos viaductos. El primeru tien un llargor de 85 metros y salva el ríu Aboñu, un ramal y un camín de serviciu. El segundu tien un llargor de 370 metros y escurre percima de la vía d’anchu métricu Xixón-Cuideiru, el ríu Pinzales y la carretera AS-326, ente otres infraestructures.
Pa executar el nuevu tramu tamién foi necesariu construyir dos pasos cimeros, unu inferior y una llosa pilotada de 72 metros de llargor que salva les víes del ferrocarril d’Arcelor Mittal. Tamién s’executaron 6 murios de tierra reforzada, según 9,5 kilómetros llineales de cunetes.
La Zalia ye un proyectu de máxima relevancia pal desenvolvimientu de la loxística y los puertos del Estáu (El Musel y Avilés) nel Principáu. Amás, esta plataforma va cobrar entá más importancia y atractivu tres la próxima puesta en serviciu de la variante de Payares y l’aplicación del plan de descarbonización d’Arcelor.
Les obres de conexón complementaranse cola alquisición, per parte del Principáu, de la mayoría accionarial na sociedá que xestiona esti equipamientu. Asina, el Gobiernu d’Asturies va poder siguir impulsando la puesta en marcha d’esti polu industrial y loxísticu. Tamién va dexar que la sociedá pública estatal Sepides materialice’l compromisu adquiríu pa collaborar na finalización de les obres d’urbanización y construcción d’una subestación eléctrica y empezar la comercialización de les parceles. -
La ufierta de FP va superar per primer vegada les 10.000 nueves places el próximu cursu, al reforzar los ciclos venceyaos a l’atención a les persones y les tecnoloxíes emerxentes
– Curiaos Auxiliares d’Enfermería establecerase en Valdés y en Villaviciosa, que recupera la Formación Profesional dempués de 18 años
– La cartera de titulaciones afíxose tolos años de la llexislatura y amontóse en seis graos cimeros
El Gobiernu d’Asturies va reforzar la ufierta de titulaciones de Formación Profesional (FP) el próximu cursu (2023/2024) cola ampliación de cuatro ciclos presenciales y l’implantación de cinco nuevos cursos d’especialización. En total, la Conseyería d’Educación va ufiertar, per primer vegada, más de 10.000 places para los primeros cursos de grau básicu, mediu y superior, distribuyíes en 105 ciclos presenciales y 11 cursos d’especialización.
Estos son los datos más relevantes qu’ufiertaron güei la conseyera d’Educación, Lydia Espina, y el director xeneral d’Enseñances Profesionales, Javier Cueli, na presentación del catálogu de títulos. Destacaron que se potencia especialmente l’atención a les persones y les tecnoloxíes emerxentes y, amás, recupérase la *FP en Villaviciosa dempués de 18 años.
El próximu cursu va enllantase’l grau mediu de Cuidos Auxiliares d’Enfermería tantu nel institutu Víctor García de la Concha (Villaviciosa) como’l Carmen y Severo Ochoa (Valdés). L’oxetivu de la conseyería ye incrementar el númberu de places disponibles n’una de les titulaciones con más demanda nel Principáu.
A partir del próximu cursu, auméntase la ufierta de dos graos cimeros implantaos na actual llexislatura:
-El d’Acondicionamientu Físicu, estrenáu nel CIFP del Deporte (Avilés) nel cursu 2021/2022, tamién va formar parte del catálogu de titulaciones de La Llaboral, en Xixón.
– Estilismu y Dirección de Peluquería, qu’este mesmu cursu enllantóse nel institutu Pérez de Ayala, n’Uviéu, tamién se va ufiertar n’Avilés.Amás, desdóblense unidaes de trés ciclos medios qu’en cursos pasaos nun tuvieron matrícula, magar que rexistren una elevada demanda del mercáu llaboral: Mecanizado, en La Llaboral (Xixón); Caltenimientu Electromecánicu, en Llangréu; ya Instalación Eléctriques, n’Avilés.
La Conseyería d’Educación decidió volver ufiertar el grau mediu del ciclu de Producción Agroecolóxica, nel institutu Conceyu de Tinéu, que s’abrió per primer vegada esti cursu pasáu y que nun se pudo impartir por falta de matrícula. Esta midida escuerre ampliar les posibilidaes na redolada rural.
El director xeneral d’Enseñances Profesionales esplicó que l’adaptación de la cartera de titulaciones pal próximu cursu basóse na ampliación de les que tienen más demanda. *Cueli añedió que nun se buscaron otros graos medios o cimeros porque’l Ministeriu d’Educación ta somorguiáu nel desenvolvimientu de la nueva llei y esto va suponer cambeos nos currículos: “Paez oportunu esperar a conocer el documentu final que va regular la ordenación antes de pensar n’otros ciclos”.
Sicasí, sí que va haber cinco cursos más d’especialización, qu’ayuden a l’actualización de la conocencia d’alumnáu yá graduáu en materies rellacionaes coles tecnoloxíes emerxentes. A partir del próximu cursu, los graduaos interesaos podrán matriculase en Robótica Collaborativa, nel institutu Fernández Vallín (Xixón) o nel CIFP Avilés. El cursu de Modeláu de la Información de Construcción va impartise nel institutu Doctor Fleming (Uviéu) y el de Desenvolvimientu de Videoxuegos y Realidá Virtual va formar parte del catálogu de La Llaboral. Amás, ábrese una nueva unidá d’Instalación y Caltenimientu de Sistemes Conectaos (IoT), tamién nel Doctor Fleming.
La intención de la conseyería ye poner en marcha los cursos d’especialización de Caltenimientu de Vehículos Híbridos y Eléctricos y de Caltenimientu y Seguridá de Sistemes de Vehículos Híbridos y Eléctricos. Nestos momentos atópase analizando ónde se van impartir.
Balance de llexislatura
Dende’l cursu 2019/2020, la Dirección Xeneral d’Enseñances Profesional xestionó’l tresformamientu de los currículos de dos graos (Química y Salú Ambiental y Guía nel Mediu Natural y de Tiempu Llibre) y enllantó n’Asturies seis nuevos ciclos de grau superior.
Per otru llau, dende 2021/2022, entornóse nel desenvolvimientu de los nuevos cursos d’especialización en materies rellacionaes con intelixencia artificial, *ciberseguridad, vehículos híbridos o *digitalización del caltenimientu industrial.
Amás, abriéronse 22 nueves unidaes de graos yá esistentes en ciclos rellacionaos cola caña sanitaria, la informática, actividaes físicu-deportives o oficios industriales como Soldadura y Calderería, ente otres.
En total, a lo llargo de la llexislatura creáronse 1.085 places en tolos ciclos y cursos d’especialización. A esta cantidá habría que sumar les 260 que se van incrementar pal cursu 2023/2024. -
Mediu Ambiente va empecipiar n’abril les obres de renovación del suministru d’agua de Areñes y Belonciu
La Conseyería d’Alministración Autonómica, Mediu Ambiente y Cambéu Climáticu va invertir 328.000 euros nes obres de renovación del suministru d’agua de Areñes y Belonciu, en Piloña, que se van empecipiar n’abril y van concluyir en septiembre. La viceconseyera de Mediu Ambiente y Cambéu Climáticu, Nieves Roqueñí, esplicó güei los detalles del proyectu al alcalde, Iván Allende, y a los vecinos de dambes localidaes, nuna xunta celebrada na escuela d’Areñes.
Amás de la renovación de la rede, l’actuación inclúi la conducción dende’l manantial hasta los depósitos de Areñes y Belonciu. Los trabayos impliquen la baltadera de la captación actual y l’acondicionamientu del decantador. Igualmente, van sustituyise 1.600 metros de tubería ente la captación y el depósitu d’Areñes, 800 metros ente esta última instalación y la de Belonciu, y otros 600 que se van encargar nun futuru del suministru directu a la población d’Areñes.
Tamién se van acondicionar los dos equipamientos por aciu la llimpieza, impermeabilización, pintura y renovación de les válvules y de los equipos desinfestantes. Les obres, que van beneficiar a más de 300 habitantes, van rematar cola pavimentación de los caminos y viales afectaos.
Los núcleos de Areñes y Belonciu abastécense anguaño d’agua potable dende’l manantial d’El Cabritu, en la riega Escobio. La captación que recueye les agües tien más de 30 años y ta afectada por una fana de tierres que produz atascos frecuentes.
Per otra parte, Roqueñí indicó que les obres de saneamientu que se tán executando en La Piñera y en delles zones del ríu Piloña, en L’Infiestu, van rematar en septiembre. Nesti proyectu inviértense 551.633 euros procedentes del Institutu pa la Restructuración de la Minería de Carbón y Desenvolvimientu Alternativu de les Comarques Mineres.
-
630.000 euros pa impulsar un Plan Social de Deporte pa fomentar la igualdá de xéneru y l’inclusión de les persones con discapacidá
El Gobiernu d’Asturies impulsa un Plan Social de Deporte pa fomentar la igualdá de xéneru y l’inclusión de les persones con discapacidá na práctica deportiva. Asturies va destinar 628.901 euros procedentes de los fondos europeos Next Generation a distintes acciones coles mires d’amenorgar la fienda de xéneru y facilitar que les persones con discapacidá puedan practicar cualquier disciplina deportiva.
“Tratar d’una actuación histórica y bien relevante para ayudar a que’l deporte femenino y afecho gane pesu específicu y visibilidá social. Ye unu de los principios qu’inspira la nueva Llei de Deporte y Actividá Física, y el Gobiernu d’Asturies va siguir trabayando para traducir en fechos y actuaciones el nuesu compromisu infrayable cola igualdá y l’inclusión”, destacó Aida Nuño, directora xeneral de Deporte. Nuño recordó, amás, qu’España ye l’únicu país européu qu’incluyó’l deporte dientro’l so Plan de Recuperación, Tresformamientu y Resiliencia al traviés de los fondos europeos tresferíos dende’l Conseyu Cimeru de Deportes.
La campaña Deporte ensin apellíos ye una de les acciones de sensibilización del plan y va cuntar con una inversión de 263.398 euros. La iniciativa presentóse n’Uviéu, nuna xornada destinada a deportistes y públicu polo xeneral na que tomen parte la directora xeneral de Deporte, Aida Nuño, y el director xeneral d’Ordenación, Evaluación y Equidá Educativa, David Artime, xuntu cola yudoca paraolímpica Marta Arce, Loida Pérez, árbitra nacional de lluches olímpiques; Beatriz Álvarez, técnica de Fedema, y la periodista Cristina Gallo.
Deporte ensin apellíos tien como oxetivu romper la fienda de xéneru tocantes a la tipoloxía de deporte practicáu y normalizar ente l’alumnáu y el profesoráu la igualdá a tolos niveles, tanto na práctica deportiva como nos equipos directivos de los clubes, nos cuerpos técnicos y nel arbitraxe. La campaña va promocionar un deporte inclusivo, nel qu’haya espaciu pa persones con y ensin discapacidá.
Más de 30 deportistes, árbitres y entrenadores asturianes van participar na campaña, que va llegar a 76 centros educativos non universitarios. Al traviés del relatu de les sos esperiencies personales dientro de les sos distintes disciplines deportives, l’oxetivu ye que les neñes y adolescentes atopen puntos de referencia pa sumase a la práctica deportiva rompiendo los tabúes y barreres qu’esisten históricamente.
La campaña tamién se va estender a les federaciones deportives, que la so función resulta clave pa romper cualquier fienda de xéneru, tanto dende’l puntu de vista de la so propia xestión como de les actividaes que desenvuelven.
-
Más de 3.600 ganaderíes de cebu o con vaques nodrices van beneficiase de les ayudes al sector
Más de 3.600 ganaderíes asturianes de cebu y/o con vaques nodrices beneficiar de les ayudes estraordinaries al sector que convoca’l Gobiernu d’Asturies, con una dotación de cuatro millones, pa faer frente a la xubida de los costos de producción motivada pola invasión rusa d’Ucrania.
El llistáu provisional de les esplotaciones que cumplen los requisitos y de les cabeces de ganáu contabilizaes puede consultase yá nel tablón electrónicu d’anuncios d’Asturies.
Les ganaderíes beneficiaries disponen d’un plazu de cinco díes hábiles, a cuntar dende mañana, para aceptar, refugar o solicitar el cambéu de los datos. Si nun figuren nel llistáu provisional, pueden solicitar la so inclusión apurriendo la documentación acreditativa. Pa cobrar les ayudes, ye necesariu que les ganaderíes comprueben que s’atopen al corriente de les sos obligaciones tributaries y cola Seguridá Social.
Esta convocatoria estraordinaria, cofinanciada al traviés del Fondu Européu Agrariu de Desenvolvimientu Rural (Feader), dexa destinar trés millones a les ganaderíes que ceben xatos producíos na mesma esplotación y un millón a aquelles que caltienen vaques nodrices.
Pal cobru d’estes ayudes afítense una serie de tramos acomuñaos al númberu d’animales por esplotación y unos importes máximos per caún d’ellos.
Esta midida pretende compensar a les ganaderíes polos significativos aumentos de los gastos de producción y les alteraciones de los fluxos comerciales provocaos pola invasión rusa d’Ucrania. Esta crisis acarreta graves consecuencies na ufierta de ceberes a escala mundial, lo qu’implica una xubida de precios que se suma a la medría de los costos de la enerxía y los fertilizantes.
El vacunu de carne, de vaca nodriza y de cebu de xatos na mesma esplotación ye unu de los sectores de producción claves n’Asturies y caracterízase pola so base familiar y por llevase a cabu en zones de monte o con llimitaciones naturales específiques.
-
Educación evalúa al 95% del alumnáu de primeru de Primaria na fase inicial de la estratexa de detección d’altes capacidaes
La Conseyería d’Educación llogró evaluar al 95% del alumnáu matriculáu nel primer cursu de Primaria na fase inicial de la estratexa de detección d’altes capacidaes, empecipiada esti cursu y pionera a nivel nacional. Esto supón que s’arrexuntaron un total de 6.297 cuestionarios, unu per estudiante, rellenaos polos tutores de 273 centros escolares públicos y alcordaos.
La información percanciada nesta primer parte dexó ordenar al alumnáu en trés grupos distintos, que s’identifiquen con los colores d’un semáforu. Un total de 637 –señalaos con color coloráu- son quien presenten nicios d’altes capacidaes y agora van sometese a una evaluación sicopedagóxica para confirmar o refugar estes señales. Otros 308 estudiantes –arrexuntaos sol color naranxa- van tener un siguimientu específicu del personal docente. Los restantes formen parte de la categoría verde, que nun riquir más midíes venceyaes con esta iniciativa.
La conseyera d’Educación, Lydia Espina, participó güei en Llugones nuna xunta informativa sobre esta estratexa de detección ya intervención inclusiva, a la qu’asistieron la Unidá d’Altes Capacidaes, les direcciones de colexos de Primaria y orientadores de centros públicos y alcordaos.
Esta novedosa investigación pretende llograr el doble oxetivu d’ameyorar les tases de detección d’alumnáu con altes capacidaes y favorecer tamién una respuesta educativa que garantice’l máximu desenvolvimientu de les sos potencialidaes. Tamién se va reforzar la formación del profesoráu. Toes estes midíes escuerren el mesmu propósitu: ameyorar l’atención a la diversidá.
Antes de les vacaciones de Navidá, el tutores del primer cursu de Primaria rellenaron un cuestionariu propuestu pola Unidá d’Altes Capacidaes. Esi test analizaba 39 ítems arrexuntaos en trés bloques, sobre capacidá-creatividá, personalidá y motivación. Con esa información, configuróse’l semáforu que tuvo en cuenta dos índices correctores: la fecha de nacencia del alumnu o alumna –cuánto más nuevos, la puntuación amenorga- y l’efectu suxetivu de les valoraciones ente los distintos grupos.
-
El Gobiernu d’Asturies incorpora una unidá de fisioterapia a la cartera de servicios del centru de salú de Cuideiru.
El Principáu acondicionó una sala na planta baxa del equipamientu, con una inversión de 30.000 euros, para ufiertar a partir de güei esta nueva prestación.
Toles zones básiques de la área sanitaria III, con cabecera n’Avilés, disponen d’esti recursu, que dexa averar los tratamientos a la ciudadanía.El Gobiernu d’Asturies incorpora una unidá de fisioterapia a la cartera de servicios del centru de salú de Cuideiru, perteneciente a la área sanitaria III, con cabecera n’Avilés. Esti nuevu recursu entra güei en funcionamientu tres una inversión de 30.000 euros, ente obres y equipamientu, p’acondicionar una sala na planta baxa del edificiu.
El conseyeru de Salú, Pablo Fernández Muñiz, y la directora xerente del Serviciu de Salú del Principáu (Sespa), Concepción Saavedra, acompañaos pol alcalde del conceyu, Carlos Abargane, visitaron el centru sanitariu, qu’atiende a más de 4.500 persones.
Por mor del volume de población, la nueva fisioterapeuta va emprestar serviciu en Cuideiru trés díes a la selmana (llunes, miércoles y vienres), n’horariu de 8:00 a 15:00 hores, y dos en Corvera (martes y xueves), col fin d’ameyorar l’accesibilidá a los tratamientos de toa l’área sanitaria.
Hasta agora, los habitantes de Cuideiru que precisaben fisioterapia teníen d’allegase al centru de salú de Pravia que, a partir de güei, va atender solo a los pacientes d’esa zona.La incorporación de la nueva unidá refuerza esti serviciu na área sanitaria III, dao que toles zones básiques de salú cunten con una. Los centros que disponen d’atención de fisioterapia son los de Sabugo, Quirinal, Llano Ponte, Villalegre y La Madalena, n’Avilés; según los de Corvera, Pravia, Piedrasblancas, Lluanco y Cuideiru.
-
Asturies va promocionar el patrimoniu industrial mineru colos fondos Next Generation
El Gobiernu d’Asturies cunta per primer vegada con un plan qu’apuesta pol patrimoniu industrial mineru como reclamu turísticu prioritariu, al que se va destinar más d’un millón de los fondos europeos Next Generation. Esta cantidá va dexar desenvolver delles actuaciones para promocionar la ufierta y convertila en motor de reactivación de los territorios en procesu de transición xusta.
La conseyera de Cultura, Política Llingüística y Turismu, Berta Piñán, presidió güei la xunta del grupu de trabayu sobro patrimoniu industrial mineru, que s’axuntó nel Muséu de la Minería y la Industria, y na que tamién participaron la viceconseyera de Turismu, Graciela Blanco, y les directores de Cultura y Patrimoniu, y Minería y Enerxía, Pablo León y Belarmina Díaz. Xuntu colos representantes del Principáu, formen parte d’esti órganu la Federación Asturiana de Conceyos (FACC), Hunosa, el sindicatu SOMA-FITAG-UXT, la Universidá d’Uviéu, el Centru de Desenvolvimientu y Cooperación Territorial (Cecodet) y el Colexu d’Arquiteutos.
El plan d’allugamientu del patrimoniu mineru, que per primer vegada establez una fueya de ruta pa la promoción del catálogu asturianu de recursos patrimoniales venceyaos a la esplotación del carbón, el más estensu d’España, foi unu de los asuntos trataos. “La creación d’una marca turística propia va ser la primer actuación. El plan recueye, amás, el diseñu d’una serie de rutes temátiques en distintos puntos de la comunidá que’l so filo conductor van ser espacios venceyaos a la hestoria minera”, señaló Berta Piñán. La conseyera destacó la oportunidá que supon apostar “pola enorme riqueza cultural que representa esti patrimoniu”.
El plan considera que la privilexada redolada natural nel que s’alluga la práctica totalidá del patrimoniu industrial ye un fechu diferencial y una ventaya competitiva. Tamién sorraya la importancia de fomentar el llamáu turismu d’esperiencies, nel que’l visitante interactúa y conoz más de la realidá social qu’arrodia al propiu patrimoniu.
El proyectu preve la creación d’un repositorio audiovisual con pieces promocionales, la ellaboración de nuevos materiales informativos y la puesta en marcha de campañes publicitaries centraes nel turismu industrial. Tamién se valoren acciones con prescriptores especializaos como operadores, prensa especializada o miembros de colectivos ya instituciones venceyaos a la xestión y promoción del patrimoniu industrial.
Tamién se va impulsar la presencia d’Asturies en foros especializaos cola organización d’un foru biañal qu’axunte a espertos na materia. Amás, va fomentase la conexón con instituciones y organizaciones nacionales ya internacionales que trabayen na puesta en valor del patrimoniu industrial. El potencial qu’esti tipu d’espacios puede tener como escenariu de rodaxes ye otra de les opciones.
La protección del pozu Santa Bárbara
Amás de les actuaciones dende’l puntu de vista turísticu, la conseyería tramitó l’ampliación de la declaración de Bien d’Interés Cultural (BIC) del pozu Santa Bárbara de La Rabaldana, en Mieres, cola incorporación del antiguu economatu de la esplotación, construyíu en 1916. Ye l’únicu d’estos establecimientos que se caltien nel valle de Turón.
Pela so parte, la directora xeneral de Minería y Enerxía repasó los proyectos de fondos mineros que se tán realizando n’antigües instalaciones de pozos de carbón. Actuaciones qu’inclúin dende renovación d’instalaciones pa la so habilitar espacios empresariales a la descontaminación de terrenes.