Xixón al día

Etiqueta: Hospital de Cabueñes

  • Asturies va invertir 13,6 millones pa implantar la ciruxía robótica nel HUCA y el Hospital de Cabueñes

    Asturies va invertir 13,6 millones pa implantar la ciruxía robótica nel HUCA y el Hospital de Cabueñes

    El Principáu va invertir 13,6 millones para enllantar la ciruxía robótica nel Hospital Universitariu Central d’Asturies (HUCA) y l’Hospital Universitariu de Cabueñes. El Conseyu de Gobiernu dio güei un pasu clave para avanzar escontra ese oxetivu, cola aprobación d’un gastu de 5.517.600 euros que va dexar adquirir el próximu añu los dos equipos para los centros de cabecera de les árees sanitaries IV y V.

    Esti sistema, que cunta con financiamientu del Fondu Européu de Desenvolvimientu Rexonal (Feder), podrá aplicase en siete especialidaes quirúrxiques: uroloxía, xinecoloxía, otorrinolaringoloxía y ciruxía xeneral, torácica, pediátrica y maxilofacial.

    L’alquisición d’estes plataformes tecnolóxiques d’última xeneración va dexar llevar a cabo intervenciones quirúrxiques mínimamente invasivas per vía laparoscópica con visión tridimensional. D’esta miente, la robótica va ayudar a los profesionales a efectuar operaciones complexes con mayor seguridá, precisión, flexibilidá y control que coles técniques convencionales. Amás, esti tipu de ciruxíes favorecen una recuperación más rápida de los pacientes, impliquen menos tiempu d’hospitalización y faciliten una torna más rápida a la vida cotidiana.

    La ciruxía robótica xuniráse a la inversión en tecnoloxíes que yá ta en cursu nel sistema sanitariu públicu y que va movilizar más de 24 millones hasta finales de 2023. D’ellos, 12,9 correspuenden al Plan Inveat, a los que’l Principáu va añedir 2,7 millones para nuevos equipos y 8,7 más para obres rellacionaes con ellos. En total, van anovase cinco aparatos (trés TAC y dos resonancies) y van adquirise otros 12 que van ampliar la capacidá diagnóstica y terapéutica en seis centros.

  • El Gobiernu d’Asturies aprueba una partida de 85,8 millones pa llicitar l’ampliación del Hospital de Cabueñes

    El Gobiernu d’Asturies aprobó ayeri un gastu de 85.868.561 euros pa llicitar la primer fase de les obres de reforma y ampliación del Hospital Universitariu de Cabueñes, en Xixón. Esta decisión adóptase dempués de revisar l’importe previstu pa l’actuación, que la so llicitación quedó erma’l mes pasáu.

    La Conseyería de Salú actualizó’l preciu a l’alza para afaelo al encarecimientu del costu de los materiales qu’esperimentó nos últimos meses el sector de la construcción, un problema al que s’enfrenten anguaño toles alministraciones públiques. La intención ye que la obra, que tien un plazu d’execución de 29 meses, s’axudique con baramentu y los trabayos nel hospital empiecen darréu. Pa diseñar el nuevu presupuestu, los técnicos ellaboraron un estudiu detalláu de les distintes unidaes d’obra y realizaron un cálculu con perspectiva temporal, tanto en materiales como n’otros elementos constructivos, de manera que nun se plantegó una medría o xubida puramente llineal.

    L’actuación cunta con financiamientu del Fondu Européu de Desenvolvimientu Rexonal (Feder) y apenes va alteriar el funcionamientu del hospital, yá que que se va executar nuna parcela aledaña al este del actual complexu

    Nesta primer etapa va construyise un nuevu edificiu de 51.232 metros cuadraos, col que se va doblar la superficie actual del complexu. Esti inmueble va ser el centru de l’actividá asistencial, nel que va primar un modelu d’altu resolvimientu, y al que los pacientes van allegar para ser diagnosticaos y trataos ensin precisar ingresu. Ente otros servicios, va allugar urxencies, consultes esternes, bloques quirúrxicos, UCI, llaboratorios, farmacia, esterilización, diálisis y l’hospital de día oncohematológico. El bloque va constar de cuatro plantes asistenciales, semisótano y suétanu. Amás, va incluyir dos interplantas técniques que van facilitar el caltenimientu d’instalaciones ensin aportar a la área sanitaria.

    Asina, na planta baxa van allugase Urxencies y Diagnósticu per Imaxe. Na segunda van tar les consultes esternes, el serviciu de diálisis, gabinetes de pruebes funcionales y despachos médicos. La área quirúrxica, que va cuntar con 19 quirófanos, va ocupar el tercer pisu, nel que tamién s’asitiarán dos unidaes de recuperación postanestesia y otra de cuidos críticos postquirúrgicos. L’hospital de día oncohematológico s’emplazará na quinta planta, que va acoyer amás los llaboratorios d’Hematoloxía y Hemoterapia, Bioquímica, Microbioloxía y Urxencies, según consultes d’hematoloxía y el bancu de sangre. L’últimu pisu va acoyer la UCI y un área de descansu pa les guardias médiques.

    L’edificiu va disponer d’un semisótanu, con accesos independientes directos dende l’esterior, onde se van allugar servicios centrales como farmacia, esterilización, almacenes y vestuarios de personal y otres instalaciones.

  • El Sespa aumenta un 23 % l’actividá quirúrxica nos primeros nueve meses del añu

    El Sespa aumenta un 23 % l’actividá quirúrxica nos primeros nueve meses del añu

    L’actividá quirúrxica aumentó n’Asturies un 23 % nos primeros nueve meses del añu, al pasar de 42.733 intervenciones a 52.664, lo que supón 9.931 más que nel mesmu periodu del 2020. En setiembre, cuando se rexístren davezu peores cifres, el númberu d’operaciones medró un 9 % al respective del mesmu mes del exerciciu anterior. Al zarrar setiembre contabilizábense 21.147 ciruxíes pendientes, según l’últimu informe publicáu esta tarde pol Serviciu de Salú del Principáu (Sespa).

    A la medría de l’actividá ordinaria súmase’l plan de choque p’amenorgar les llistes d’espera quirúrxica. Asina, dende’l 20 de setiembre, realizáronse 267 intervenciones n’horariu de tarde, polo que’l Sespa calcula qu’a partir de payares va notase la mengua del númberu de pacientes qu’aguarden una operación.

    Los profesionales del Sespa atendieron 126.740 consultes esternes el mes pasáu, polo que menguó en siete díes la espera media estructural en comparanza col mesmu mes del 2020 y asitióse en 70. Esta mengua ye destacable sobre manera nes especialidaes de Traumatoloxía y Dermatoloxía, que los sos pacientes aguarden, de media, 41 y 24 díes menos, respectivamente.

    Otra manera, tamién xubió’l númberu de pruebes de diagnósticu al respective d’agostu. De resultes d’esó, menguó la demoranza media d’espera pa una colonoscopia, mamografía y ecografía, y caltúvose pal TAC en referencia a setiembre del 2020.

  • L’Hospital de Cabueñes prepárase ente posibles biltos

    L’Hospital de Cabueñes prepárase ente posibles biltos

    L’Hospital de Cabueñes empecipió les obres d’ampliación d’Urxencies con una nueva zona d’observación que va cuntar con quince boxes. D’esta miente, va ameyorase la xestión de les circulaciones pa enllantar los protocolos Covid-19 y van aumentar la capacidá y funcionalidad del serviciu. Les obres d’esta nueva zona, allugada al oeste del pasiellu principal d’Urxencies, cunten con un presupuestu que supera los 240.000 euros. Los trabayos tan cofinanciaos pol Fondu Européu de Desenvolvimientu Rexonal (Feder).

    La Conseyería de Salú realiza esta actuación, que cunta con un plazu d’execución de trés meses, por trámite d’emerxencia. L’oxetivu ye cuntar na seronda con una estructura que garantice circuitos asistenciales y de cuidos pa pacientes respiratorios estremaos del restu. Estos trabayos van lliberar la planta cero de Cabueñes, que mientres la crisis dedicóse a urxencies de casos sospechosos de covid-19. D’esta manera, recupérense 28 cames n’habitaciones dobles pa hospitalización convencional. Estos espacios van quedar integraos na ampliación del hospital. «Asina adelantramos al futuru y ameyoramos el presente para pacientes y profesionales», esplica’l xerente de la área V, Manuel Bayona.

    Los nuevos puestos van cuntar con característiques técniques d’hospitalización, zona de control d’enfermería, bañu asistíu, aséu de personal y los sofitos necesarios pa l’asistencia sanitaria. Tamién va haber una consulta polivalente con aséu y un área de trabayu médicu. Cada puestu va disponer de monitorización centralizada, carru de paraes con desfibrilador y marcapasos esternu, electrocardiógrafu, robots de constantes vitales, ecógrafo, calez sueros y respirador, ente otros dispositivos, amás de nuevu moblame y cabeceros con barra técnica.

    L’área d’urxencies p’adultos dispon anguaño de dos zones estremaes pa la estancia de pacientes: una con 7 puestos zarraos lateralmente y una sala d’observación que dexa l’allugamientu d’otros 14. Tres esta actuación, el serviciu va disponer de 36 boxes en total.

  • Segunda paciente con cornavirus que sal de la UCI en Cabueñes

    Segunda paciente con cornavirus que sal de la UCI en Cabueñes

    Una muyer de 55 años ye la segunda paciente con coronavirus en salir de la UCI nel Hospital de Cabueñes. La noticia dióla la propia Conseyería de Sanidá al traviés del so perfil oficial en Twitter. «Encántanos compartir bones noticies. Infórmennos dende’l Hospital de Cabueñes que güei dieron l’alta UCI a la so segunda paciente, una muyer de 55 años. ¡Norabona!», pue lleese na cuenta d’Astursalud.

    La Conseyería tamién informó de que la primer paciente que salió de la UCI del hospital foi una muyer de 82 años. «Nun se celebró yá que’l so home finara, pero tamién queremos recordala y manda-y un cariñosu abrazu». Na planta de cuidos intensivos del centru hospitalariu xixonés hai 6 pacientes positivos en Covid-19 pendientes de resultancia y 27 cames disponibles.

  • Xixón decide la gratuidá del autobús urbanu

    Xixón decide la gratuidá del autobús urbanu

    El Conceyu de Xixón decidió esta mañana que, dende esta sábadu, el serviciu d’autobuses urbanos va ser gratuitu pa toles persones. La frecuencia de les llínees va amenorgase al 40% a partir del llunes. Asina, daráse prioridá a les zones onde s’alluguen centros de trabayu, como l’Hospital de Cabueñes y los polígonos. Mientres esti fin de selmana, los servicios qu’empresta EMTUSA son los mínimos correspondientes a un domingu.

    L’equipu de Gobiernu tomó amás nueves midíes pa proteger a los conductores de la empresa municipal. La entrada y salida de los autobuses va realizase poles puertes traseres y van dexase llibres los asientos de les zones más cercanes al conductor para caltener la distancia de seguridá. Los autobuses van detenese, por defectu, en toles paraes, pa que de esta forma nun sía necesariu solicitala. Los autobuses van desinfestase a diariu.

    Los centros municipales ciérrense definitivamente. L’atención ciudadana y el rexistru va realizase namás per vía telefónica y telemática, sacante n’Antigua Pescadería Municipal, onde se va riquir cita previa telefónica. Tamién se suspendieron los servicios d’arriendu de bicicletes y patinetes, que yá empezaron a retirase de les cais.

    L’alcaldesa de Xixón, Ana González, llama a la ciudadanía a «quedase en casa». «La meyor manera de frenar l’andada del coronavirus ye quedanos toos en casa”, señaló.

  • Primer alta hospitalaria por coronavirus n’Asturies

    Primer alta hospitalaria por coronavirus n’Asturies

    L’Hospital Universitariu Central d’Asturies (HUCA) dio esti martes a mediudía la primer alta hospitalaria a un afectáu pol nuevu coronavirus. El llaboratoriu de viroloxía confirmó’l segundu negativu por COVID-19 del mozu de 32 años que foi’l segundu casu detectáu na comunidá. Hasta agora, permanecen ingresaos nel HUCA nueve pacientes. La muyer de 85 años afectada por una neumonía foi treslladada al Hospital de Cabueñes al descartase que se tratare d’un casu de nuevu coronavirus.

    N’esti momentu, dos de los afectaos permanecen estables dientro de la gravedá ingresaos na UCI y otros siete caltiénense n’aislamientu con síntomes leves, sacante un varón de 48 años qu’empecipió una neumonía. El restu sigue n’aislamientu nes sos cases, con siguimientu telefónicu. El númberu de persones diagnosticaes de COVID-19 n’Asturies ye de 25, de les cualos 13 tán venceyaes a un centru educativu d’Uviéu. El 112 atendió hasta les 15:30 hores un total de 890 llamaes rellacionaes col nuevu coronavirus nel Principáu.

    Les autoridaes sanitaries recuerden que los encamientos siguen siendo los mesmos. Les persones que viaxaron a dalguna de les zones consideraes de riesgu (China, Corea del Sur, Xapón, Singapur, Irán y les rexones italianes de Lombardía, Veneto, Emilia-Romagna y Piamonte) y que presenten los síntomes de tos, fiebre o dificultá respiratoria tienen de ponese en contactu col 112 pa llograr información sobre les actuaciones qu’han de realizar. Tamién s’insiste en que la midida más eficaz para prevenir la tresmisión de los virus respiratorios, ente ellos el nuevu coronavirus, ye la llavadura frecuente de les manes con agua y xabón. Tamién s’aconseya utilizar la flexura del coldu o pañuelos desechables d’un solu usu pa tusir o espirriar.

  • Yá son cinco los positivos por coronavirus n’Asturies

    Yá son cinco los positivos por coronavirus n’Asturies

    Quintu casu de coronavirus n’Asturies. Trátase d’un xixonés de 48 años que permanez nel so domiciliu con síntomes leves. Salú confirmó ayeri el tercer y cuartu casu venceyaos a esta epidemia. Una d’elles ye una muyer de 85 años, paciente d’una residencia xeriátrica privada. Ingresó’l llunes por una neumonía atípica nel Hospital Universitariu de Cabueñes, onde foi aislada. Desque se-y tomaron dos muestres, la segunda resultó positiva anueche. La paciente permanez estable, dientro de la gravedá, nel área d’aislamientu del HUCA. El cuartu positivu ye un varón de 48 años, que nestos momentos permanez aisláu na so casa.

    Estos tres últimos casos súmense al mozu de 32 años, qu’evoluciona favorablemente, y al varón de 70, que se caltién estable dientro de la gravedá. Dambos permanecen aislaos nel HUCA, xunto a la muyer de 66 años que ta pendiente del resultáu del Centru Nacional de Microbioloxía de Majadahonda (Madrid).

    El Sespa repite los conseyos empobinaos a los profesionales, que consisten n’estremar les midíes d’hixene de manes. El serviciu desaconseya a los profesionales l’asistencia a congresos, xornaes, seminarios y cursos de formación presenciales. Amás, retardóse tola actividá docente nos centros sanitarios con casos positivos. Tamién se restrinxó temporalmente la presencia de visitadores médicos y voluntarios a hospitales y centros de salú. Tamién se ta llimitando l’acompañamientu de pacientes hospitalizaos o n’Urxencies a un únicu familiar que nun presente fiebre nin síntomes respiratorios agudos.

  • Nuevu reconocimientu al Hospital de Cabueñes

    Nuevu reconocimientu al Hospital de Cabueñes

    L’Hospital Universitariu de Cabueñes llogró la primer acreitación de coloproctoloxía qu’obtién un centru n’Asturies y que certifica l’Asociación Española de Coloproctoloxía. L’hospital xixonés súmase asina a les 27 unidaes d’esta especialidá que recibieron yá esta acreitación en tol país. La sociedá científica destacó la escelencia d’esta unidá funcional integrada por un xefe de serviciu y siete ciruxanos xenerales especialistes en dixestivu. La unidá foi pionera na puesta en marcha de la Vía Clínica de Recuperación Intensificada en Ciruxía Abdominal (RICA) y otros protocolos de práctica clínica como’l tratamientu ambulatoriu de la diverticulitis aguda o’l protocolu de cáncer oclusivu de colon.

    Estos profesionales atendieron 1.328 primeres consultes y unes 2.746 segundes revisiones nel 2019. Amás, practicaron 510 operaciones nel centru xixonés y 120 ciruxíes de patoloxía proctolóxica (enfermedá hemorroidaria, fisuras anñales, abscesos y fístules anales) n’Hospital de Cruz Roja. La sociedá científica valoró’l dinamismu de les sesiones multidisciplinares que realiza la unidá xunto a otres del hospital. Asina, siguieron 854 casos na sesión de cáncer colorrectal y estudiaron, xunto al serviciu de Dixestivu, 46 casos d’enfermedaes inflamatories intestinales. L’acreitación destaca que’l serviciu cunte con un fisioterapeuta y un rehabilitador con esperiencia en suelu coxal, que trató 41 casos.

  • Cabueñes incorpora les nueves técniques endoscópiques pa tratar les patoloxíes de columna

    Cabueñes incorpora les nueves técniques endoscópiques pa tratar les patoloxíes de columna

    El Serviciu de Ciruxía Ortopédica y Traumatoloxía del Hospital de Cabueñes practicó a trés pacientes de estenosis de canal lumbar y hernia discal, les primeres intervenciones coles nueves técniques endoscópiques. El centru incorporóles pa tratar les lesiones de columna. Esti nuevu procedimientu aplicáu pola Unidá de Columna de Cabueñes resulta mínimamente invasivu y apurre a los pacientes una recuperación más rápida con menores molesties posoperatories, lo qu’amenorga tamién los tiempos d’estancia hospitalaria.

    La endoscopia de columna permite la esploración de la canal espinal por aciu una óptica d’alta definición que namás rique d’una incisión menor d’un centímetru. Esto da como resultáu un abordaxe de la lesión muncho menos agresivu quirúrgicamente.

    El doctor Ghassan Elgeadi, espertu internacional nesti tipu de técniques, va asisitió al desenvolvimientu d’estes microciruxíes, que permiten tratar de manera eficaz patoloxíes tan habituales como la hernia discal cervical y lumbar. Estes enfermedaes dexeneratives de la columna afecten a gran parte de la población adulta y acarreten costos tanto asistenciales como sociales en términos de baxes llaborales y discapacidá residual permanente.