La bona suerte sonrió esti llunes a un vecín de Xixón. El sortéu del cupón de la ONCE dexó na ciudá un premiu de 35.000 euros. Un cupón vendíu del puestu de venta de La Plazuela resultó agraciáu col primer premiu. El númberu premiáu nel sortéu foi’l 22026
Autor: xixonaldia
-
Huergo: «Queremos facer de Xixón un referente tecnolóxicu n’I+D+i»
Yolanda Huergo, candidata a l’alcaldía de Podemos-Equo Xixón, y Juan Chaves, integrante de la candidatura, caltuvieron esti miércoles una xunta cola Asociación Cluster TIC d’Asturies para presenta-yos les sos propuestes en materia económica y d’empléu con valor añedíu de la coalición. “Esta ciudá tien blimes, tien persones con iniciativa y una Universidá innovadora. Con too ello, la coalición Podemos-Equo Xixón venimos xenerar les polítiques y les sinerxes que faigan de Xixón un referente tecnolóxicu n’I+D+i y dinamizador d’un empléu llimpiu y con valor diferencial”, afirmó Huergo, candidata a l’alcaldía.
Pa consiguilo, la coalición considera que ye preciso “dar continuidá a la collaboración público-privada de los programes impulsaos pol Conceyu venceyaos con Europa, el Cluster TIC, el Parque Tecnolóxicu y l’Universidá pa crear un texíu social, económicu y empresarial que xenere empléu calidable y de valor añedíu cola implicación de too el texíu tecnolóxico que yá esiste en Xixón y que realiza la so actividá en redol al Cluster TIC”, caltuvo Juan Chaves.
Asina, el principal oxetivu ye la «xeneración d’oportunidaes d’empléu y autu empléu» pa les persones qu’estudien tantu na Universidá como en centros de formación profesional. El papel de l’alministración nesti sentíu va ser «facilitar les infraestructures que dexen xenerar valor pa la creación d’empléu calidable», dende Xixón, pa intentar evitar la fuga de la mocedá. Un puntu que tien de complementase col sofitu a les empreses locales pa que puedan retrucar los servicios de Xixón n’otres ciudaes fomentando la so internacionalización, señala la coalición nuna nota de prensa.
Igualmente, la coalición tien por oxetivu desenvolver una base económico-industrial diversificada y d’altu valor añedíu. Nesta llínea va l’apueste pol Parque Tecnolóxicu y del Mar na nueva zona industrial d’El Natahoyo, contemplada nel Plan Xeneral d’Ordenación [PDF]: “Esti desenvolvimientu tien de ponenos na sienda de la economía azul y pa ello pretendemos impulsar la creación d’empreses innovadores por aciu mecanismos d’incubación de xeneración centrífuga (spin-off) nes actividaes de acuicultura, turismu costeru, biotecnoloxía, enerxía oceánica y esplotación de los fondos marinos”, espuso la candidata de Podemos-Equo Xixón. Nel marcu d’esta estratexa, la coalición va encamentar al Principáu a introducir los estudios de Ciencies del Mar nel campus de Xixón.
La candidatura liderada por Huergo apuesta poles enerxíes llimpies y comprométense a crear una comercializadora enerxética pública d’enerxía anovable. “Esta comercializadora suministraría, nuna primer fase, a les instituciones municipales, pa abrir dempués a otres entidaes y a la ciudadanía”, señala.
En sintonía con esta iniciativa diría tamién l’apertura d’una Oficina d’Asesoría Enerxética coles mires d’ameyorar la eficiencia enerxética, tantu nos ámbitos municipales como de les empreses que quieran sumase al programa. Esta Oficina, amás, va asesorar a la ciudadanía en relación a les grandes suministradores (llectura de factures, potencia contratada, solución de problemes). Al empar, va asumir les xestiones y costos derivaos de que cualquier particular o grupu de particulares qu’exerzan el so derechu al autoconsumo enerxéticu puedan sacar rendimientu económicu venciendo a la cooperativa enerxética’l so escedente de producción.
Estes apuestes en materia enerxético van dexar afondar nesa collaboración público-privada en cuestiones rellacionaes cola eficiencia enerxética: “Esta collaboración ye la base pa que surdan empreses auxiliares capaces de crear puestos de trabayu calidable”, apunta Chaves.
-
El Principáu meyora la financiación de la Universidá d’Uviéu hasta’l 2021
El Gobiernu d’Asturies autorizó esti miércoles la modificación del conveniu soscritu’l 19 d’ochobre del 2017 ente l’Alministración del Principáu y la Universidá d’Uviéu cola mira de determinar un marcu de financiamientu estable pa la institución académica hasta’l 2021. Esti cambéu dexa impulsar un sistema d’anticipos pa compensar la pérdiga d’ingresos que podría derivase de la rebaxa de les matrícules, según informaron güei’l conseyeru d’Educación y Cultura, Genaro Alonso, y el rector de la Universidá d’Uviéu, Santiago García, en rueda de prensa.
Asina, d’acuerdu cola modificación aprobada, la Universidá d’Uviéu va poder recibir de forma antemanada’l 55 % del importe de la compensación pola rebaxa de los precios nel mesmu añu en que se toma’l determín y el 45 % restante nel siguiente, siempre qu’exista abonda consignación presupuestaria.
Según los términos del conveniu inicial, la institución académica nun podía recibir los fondos hasta que se dispunxera de los datos definitivos de matriculación, desque publicaos nel Sistema Integráu d’Información Universitaria (SIIU), lo que podía asoceder un añu depués de que se tomare’l determín de rebaxar los precios.
Esti cambéu ye relevante sobre manera anguaño, porque pal cursu que vien (2019-2020) ta prevista una mengua significativa de les tases universitaries. Los cambeos nel conveniu dexen, amás, concretar y clarificar aspectos técnicos rellacionaos col financiamientu de personal o del plan d’inversiones de la Universidá d’Uviéu.
L’alcuerdu soscritu ente’l Principáu y l’Universidá d’Uviéu, modificáu agora, considérase bien positivu por dambes partes. Per un llau, el financiamientu pa gastos corrientes garantiza estabilidá; per otru, el plan d’inversiones ayuda a cubrir necesidaes de caltenimientu, renovación y modernización d’infraestructures. Amás, la vinculación de parte de los recursos al cumplimientu d’oxetivos, lo que comúnmente se llama contratu programa, ayuda a potenciar la escelencia de la institución académica na formación, la investigación, la innovación, la xestión y la eficiencia.
-
Ana González: “El carné del Real Oviedo col mio nome ye falsu”
La candidata del PSOE a l’Alcaldía de Xixón, Ana González, aseguró esti martes que nunca foi socia del Real Oviedo, y que’l carné que se distribuyó peles redes sociales la fin de selmana del derbi asturianu “solo buscaba desacreditame”. González realizó estes declaraciones enantes de la visita a les instalaciones del Muséu del Real Sporting nel estadiu d’El Molinón, “claru iconu de la ciudá”.
La candidata del @PSOE a la alcaldía de #Gijón es socia del ¡¡¡Oviedo!!! Que desgracia!!!!
Difundirlo, que se sepa, ni un voto en #Gijón para el @PSOE! pic.twitter.com/Is86qOohQ7— ZULU-AG (@ZULU_AG) 22 de marzo de 2019
La candidata socialista aseguró que too respondió a una artimaña política “pa intentar faeme dañu” y que nunca foi socia de nengún equipu porque “nun soi futbolera”. González dixo saber d’ónde salió esa falsificación y bromió cola torpeza” de quien fixo esi carné, expedíu supuestamente nun añu nel que’l Real Oviedo cuntaba con más de 12.000 socios y “a mi axudicáronme’l 5.615”.
González llamentó que “persones que recurren a estos métodos, como mentir y falsificar, pretendan tener dalguna opción dientro d’una institución pública”. Per otra parte, aseguró que la relación ente’l Sporting y la ciudá ye absoluta y ye bien importante tar col equipu yá que forma parte de la marca Xixón”.
-
Martín: «Fairemos de Xixón una ciudá más inclusiva ya con más oportunidaes»
El candidatu a l’Alcaldía de Xixón por la Izquierda, Aurelio Martín, visitó esti martes les instalaciones de l’asociación Una ciudad para todos onde aconceyó con usuarios del Centru Especial d’Empléu. Martín comprometióse a facer de Xixón «una ciudá más inclusiva y con más oportunidaes pa toos y toes, especialmente no que cinca a la integración llaboral«. Nesta visita, tuvo acompañáu polos candidatos de la coalición Ana Castaño, Javier Suárez Llana y María Antuña.
Martín afirmó que, pa la coalición, les polítiques sociales concíbense como derechos de ciudadanía que tiene que ser garantizaes pol gobiernu, pero nel que debe xugar un papel muy importante’l movimientu asociativu ya’l tercer sector, poniendo como exemplu la esperiencia d’esta asociación. «Esta entidá, que lleva casi mediu sieglu lluchando polos más desfavorecíos, ye una muestra de lo que ye capaz el movimientu asociativu».
El candidatu a l’Alcaldía de la ciudá dixo que quier que’l primer oxetivu del prósimu gobiernu municipal seya atender a tola ciudadanía y nun dexar a nadie fuera. «El prósimu gobiernu municipal deberá reforzar tolos programes d’atención a les persones, para que funcionen como ferramientes de redistribución de los recursos y contribuyan a equilibrar les desigualdaes». Xixón por la Izquierda propón crear nel próximu gobiernu un área municipal qu’incorpore les polítiques d’empléu, servicios sociales y vivienda para favorecer el desenvolvimientu d’estratexes d’atención integral a les persones, dar continuidá a los programes d’ayudes finalistes complementaries al Salariu Social Básicu y reforzar los servicios d’ayuda a casa y teleasistencia.
-
Uviéu acueye esti fin de selmana’l II Seminariu Oficialidá
El rector de la Universidá d’Uviéu, Santiago García Granda, va inaugurar esti vienres n’Uviéu el II Seminariu ‘Oficialidá, el camín constitucional de futuru pal asturianu’. El presidente d’Iniciativa pol Asturianu, Inaciu Galán, y la vocal de voluntariáu de la organización, Sabel Tuñón, presentaron esti martes n’Uviéu el programa completu d’esta segunda edición que se va celebrar los díes vienres 17 de mayu y el sábado 18 de mayu nel Edificiu Hestóricu de la Universidá d’Uviéu.
El programa inclúi varies meses redondes con representantes políticos de los partíos que tuvieron responsabilidá de gobiernu, con empresarios y profesionales qu’utilicen l’asturianu na so llabor comercial, con trabayadores de los servicios de normalización, con representantes de sindicatos del sistema educativu, y otra mesa con periodistas. Amás, dientro de la primera xornada, va presentase un nuevu documental baxo’l títulu «El valir económicu d’una llingua» sobre diferentes empreses qu’usen l’asturianu nos sos productos o servicios y nel que van falar tamién economistes desplicando los beneficios que supondría la oficialidá de la llingua asturiana.
El programa del seminariu. Tamién hai que destacar les ponencies de Leopoldo Tolivar Alas y Víctor Manuel Vázquez Portomeñe, exconseyeru del Gobiernu del PP de Galicia que va aportar una visión interesante sobre’l desarrollu de la oficialidá na comunidá vecina.
El seminariu va acabar con una semeya colectiva baxo’l lema ‘La sociedá asturiana axúntase pola oficialidá’ nel patiu del Edificiu Hestóricu de la Universidá d’Uviéu nel que representantes de la sociedá asturiana van sofitar la oficialidá del asturianu.
-
González comprométese a acometer la reforma integral de la cai Ríu Eo
La candidata del PSOE a l’Alcaldía de Xixón, Ana González Rodríguez, comprometióse esti llunes a acometer la reforma integral de la cai Ríu Eo, una demandada de los vecinos de Pumarín ya «ignorada pol gobiernu municipal de Foro, pesie a cuntar con partida presupuestaria para ello», señala’l partíu nuna nota.
González caltuvo un alcuentru col presidente de l’Asociación de Vecinos Severo Ochoa, Esteban Calleja, na que pudo constatar que los problemes que sufre Pumarín son “tristemente comunes a otros barrios de Xixón”. Problemes derivaos, non solo de la inacción del gobiernu de Foro, sinón tamién del so «pasotismu», al faer “oyíos sordos” a les demandes vecinales.
La candidata socialista recordó que, mientres los vecinos reclamaben una reforma integral de Ríu Eo, el gobiernu llocal «namás parcheó l’asfaltáu de la cai» y reformó la cai Ramón Areces que “naide pidiera al tar en muncho meyor estáu que Ríu Eo”, puntualizó. Aseguró que’l candidatu de Foro nun tendría de presumir tanto de la bona xestión del gobiernu de Carmen Moriyón, yá qu’amenorgaron la delda colos bancos, que «nunca foi elevada», a cuenta de «pasa-yla a los vecinos de Xixón al traviés d’incontables promeses incumplíes y actuaciones presupuestaes, non executaes».
-
Álex Alegría y Babin reincorpórense al entrenamientu
El Sporting protagonizó esta mañana en Mareo‘l so segundu entrenamientu de la selmana, que tuvo como protagonista la vuelta de Álex Alegría y Babin. El delanteru tornó ayeri a casa por cuenta d’un procesu víricu, mientres que’l defensa tuvo afectáu d’una farinxitis. Nun se reincorporaron inda Aitor García y Ivi, que s’empleguen col readaptador, ente que Isma Cerro sigui cola última fase de recuperación de la so mancadura de rodiya y Diego Mariño empecipia la suya tres la operación de clavícula a la que foi sometíu.
L’entrenamientu d’esta mañana tuvo puertes abiertes, como tamién lo será’l de mañana, a diferencia del postreru, el del xueves, nun estadiu d’El Molinón a puerta zarrada. Depués, l’equipu partirá per carretera hacia Zaragoza, onde se va midir el vienres a los ‘blanquillo’. El Zaragoza, pela so parte, entrénase esta mañana tamién na so ciudá deportiva.
-
Diego Mariño: «Nun me plantego otra cosa que siguir nel Sporting»
Diego Mariño nun piensa n’otra cosa qu’en xugar nel Sporting. El porteru, que confía en tar recuperáu para encarar la prósima pretemporada, esplicó en rueda de prensa que la so intención ye siguir «equí, nel Sporting». «Ye onde tengo contratu y onde soi feliz; el mio familia ser en Xixón y yo, xugando n’El Molinón». Añedió que’l mundu del fútbol puede ser cambiante, pero que “nestos momentos nun pasa pela mio cabeza otra posible opción, sacantes nel club piensen distintu”. Aportunáron-y sobro si pensaríase otra posibilidá nel casu de tener que siguir xugando en Segunda, a lo que respondió que “yá refugué esta temporada ufiertes pa xugar en Primera División”.
Anque nun ye partidariu de falar más más allá de l’actual temporada, pa la que queden cuatro partíos. “La situación ta complicada, pero tenemos qu’apurar les nueses opciones, tenemos que dir a Zaragoza en busca de los trés puntos y depués, a esperar”. Siéntese en deuda cola afición: «Nun podemos rindinos”. Preguntáu por Dani Martín, aseguró velu «tranquilu» depués de trabayar «perbién tol añu». Considera que «nun tien que demostrar nada y, como yá-y dixi, tien qu’esfrutar». Ta convencíu de que «va ayudar al equipu».
-
Vintage Trouble va actuar en Xixón
Formaos nel añu 2010, Vintage Trouble convirtiéronse nel secretu meyor guardáu del rock and roll. La pasión y fuerza que destilen, el so soul blues, los ritmos R&B y un toque de pop crean un cóctel difícil de refugar. Dieron más de 3.000 conciertos en 30 paises, xirando con grupos de talla mundial como The Who, The Rolling Stones, AC/DC, Lenny Kravitz o Bon Jovi. El sábadu 15 de xunu tarán na sala Teatru Albéniz.
Actuaron en programes de televisión de gran ésitu como ‘Later… with Jools Holland’, ‘Limmy Kimmel LIVE!’, ‘Conan’, ‘The View’, ‘The Tonight Show’ y ‘Late Motiv’, amás de recibir los aplausos de la prensa y revistes especializaes como’l ‘New York Times’, ‘NPR’, ‘The Wall Street Journal’, ‘Billboard’ y ‘Rolling Stones’, ente otros.
Con trés álbumes sol brazu (The Bomb Shelter Sessions, The Swing House Acoustic Sessions y 1 Hopeful Rd) decidieron dar un pasu más y ponese un nuevu desafíu col so últimu trabayu: Chapter II, formáu por dos episodios. El Chapter I llanzáu en 2018 y Chapter II, en 2019. Inspiraos pola so escelente reputación como banda de directu, el grupu californianu púnxose como oxetivu llevar esi terrible espíritu que tienen enriba l’escenariu al estudiu de grabación.
“Tuvimos la oportunidá de tocar en dalgunos de los shows más grandes del mundu”, comenta Taylor. “Sicasí nun captábamos esi sentimientu que tenemos en vivu. Eso unviónos de nuevu a los talleres de montaxe. Empezamos a escuchar música más mainstream, dende Amy Winehouse y Adele hasta Bruno Mars y Lauryn Hill. Queríamos coyer daqué del pasáu y ponelo nun marcu contemporaneu. Asina surdió la idea del nuevu discu. Decidimos tocar cantares pop pero con un toque más de R&B y rock and roll”. “Llanzámonos ensin mieu al abilsu”, añede Nalle. “Queríamos amosar el nuesu otru llau. Ensin batura a duldes, este ye’l Capítulu II de la hestoria de Vintage Trouble”.