El Serviciu de Salú del Principáu (Sespa) entamó l’I Ciclu de Cine y Salú Mental Imaxínate, una iniciativa cola que busca concenciar a la población contra l’estigma que se venceya a estes enfermedaes, alloñando estereotipos y prexuicios, y garantizar los derechos de les persones afectaes.
Va constar d’ocho sesiones y va desenvolvese nos Cines Embajadores Foncalada d’Uviéu tolos llunes d’ochobre y payares a les 19:45 hores. La programación va incluyir tanto documentales como películes y la entrada va ser gratuita hasta completar aforu. Les entraes van poder recoyese na taquilla dende’l sábadu anterior y hasta un máximu de cuatro per persona.
Na primer sesión, el 7 d’ochobre, va proyectase’l documental arxentín-español LT22 Radio La Colifata, qu’amuesa’l funcionamientu d’una radio xestionada poles persones enfermes, nesti casu del hospital psiquiátricu Borda, de Bonos Aires. El so director, Carlos Larrondo, va asistir al eventu.
El llunes 14 va haber dos proyecciones. Per un sitiu, el curtiu Votamos, de Santiago Requejo, que rellata cómo lo qu’empieza como una xunta ordinaria de la comunidá de vecinos pa votar el cambéu d’ascensor acaba convirtiéndose nun inesperáu alderique sobre les llendes de la convivencia. Per otru, va poder vese la película de Santi Amodeo Los gentiles, sobre la hestoria d’una adolescente de clase media colos conflictos familiares y problemes d’identidá propios de la so edá hasta que la palabra suicidiu, qu’empieza como un xuegu nes redes sociales, fíltrase na realidá.
El 21 d’ochobre, tocará-y el vez al documental qu’analiza la fascinante y tarrecible hestoria del cantautor Daniel Johnston, The Devil & Daniel Johnston, dirixíu por Jeff Feuerzeig.
L’últimu llunes d’ochobre, los y les espectadores van tener la oportunidá de ver el curtiumetraxe Estigma, d’Aida Argüelles, qu’amuesa la vida d’una muyer que, tres un fechu personal traumáticu, sufre una crisis mental que marca la so llibertá pa siempres, y el documental Nel Adamant, dirixíu por Nicolas Philibert y qu’ilustra el día ente día d’un peculiar centru de salú mental nuna estructura flotante allugada nel Sena, en París.
