El presidente d’Asturies, Adrián Barbón, anunció güei la so decisión de caltener la Conseyería de Derechos Sociales y Bientar y crear otra de Cultura, Política Llingüística y Deporte “pa dar el meyor serviciu a Asturies”. El xefe del Executivu, qu’informó sobre esta midida nel plenu de la Xunta Xeneral, aseguró que respuende a les demandes de les entidaes culturales, deportives y del tercer sector, y que s’adopta tres escuchar tamién a los socios de gobiernu d’IX-Convocatoria por Asturies.
“Soi un presidente qu’escucha, qu’ayeri dixo abiertamente que la estructura de gobiernu y los nomes tán en permanente exame, porque a quien tienen que sirvir ye a los ciudadanos y les ciudadanes. Poro, recoyendo’l planteamientu de les asociaciones culturales y del tercer sector, y como paez que’l PP por una vegada va abandonar la crítica, anuncio que va haber efectivamente dos conseyeríes”, esplicó nel Parlamentu.
Barbón informara ayeri sobre la creación d’una Conseyería de Derechos Sociales, Cultura, Política Llingüística y Deporte que tendría al frente a l’actual viceconseyera de Cultura, Política Llingüística y Deporte, Vanessa Gutiérrez, yá que la titular de Derechos Sociales, Melania Álvarez, va ser propuesta pa ocupar l’escañu nel Senáu por designación autonómica. Tanto nel plenu como nuna posterior atención a los medios de comunicación, el presidente aportunó en que tuvo en cuenta la opinión de diversos sectores, incluyida la de los grupos de la oposición, y finalmente decidió’l desdoblamientu en dos departamentos, col fin d’atender de la meyor manera posible les necesidaes nos campos de la cultura y de los derechos sociales.
Al respective de los nomamientos, al mandu de Cultura va tar Vanessa Gutiérrez, ente que en Derechos Sociales tamién va haber una conseyera que’l so nome anunciar más palantre.
El xefe del Executivu aportunó en que “liderar ye decidir lo que funciona meyor pensando nos intereses d’Asturies” y precisó que la creación d’una nueva conseyería, colo que va haber once en total, dexa completar la organigrama y ejemplifica “la voluntá d’escucha y la capacidá de diálogu del Gobiernu del Principáu”.
“El verdaderu llogru ye una meyor estructura qu’esta vegada los grupos de la oposición nun van poder criticar, porque ayeri pidieron espresamente lo que se decidió güei”, añedió.
