Del 17 al 25 de payares, la 61 edición d’El Festival Internacional de Cine de Xixón, consolídase como una cita cultural ineludible. Nel so enfotu por ampliar la nuesa visión del mundu y averanos a otres realidaes, el FICX apuesta, con una infrayable personalidá, pol meyor cine independiente. Nel so 61 edición, el Festival brinda una amplia programación qu’entiende la pluralidá del cine nacional ya internacional nun xustu equilibriu ente cineastes de sonadía y talentos emerxentes. Na so Sección Oficial, tolos títulos van tener el so estrenu absolutu n’España, y en dellos casos a nivel mundial, en Xixón. De la mesma, el FICX ufierta sofitu a toles películes escoyíes pa llograr un llanzamientu comercial.
Albar: nomes que consoliden la identidá del FICX
El prestixosu director surcoreano habitual del FICX, Hong Sang-soo, torna a la pantalla con dos nueves películes. Cola habilidá de tratar temes fondes d’una manera cenciella, Nuestro día, escoyíu pa competir na Quincena de Realizadores de Cannes, captura magistralmente fragmentos de cotidianidá de los sos distintos personaxes. Per otru llau, en In Water, Hong Sang-soo propón una película lliteralmente desenfocada; un desafíu estilísticu que cunta la hestoria d’un director primerizu, un operador de cámara novatu y una actriz conocida que ta fora de focu. El filme incluyóse na Sección Encounters del Festival de Berlín.
La cineasta francesa Catherine Corsini, Mención Especial del Xuráu na pasada edición del FICX pola so película Le fracture, estrena Le retour, una hestoria sobre la identidá y el deséu de tornar al llugar d’orixe que pasó pola Sección Oficial de Cannes.
Triplemente premiada nel Festival de Karlovy Vary, La lección de Blaga, del director búlgaru Stephan Komandarev, asitia’l focu nel so brillante protagonista. L’actriz Eli Skorcheva interpreta a una muyer de moral ferrial qu’empieza a cuestionase los sos propios principios.
Le grand chariot ye’l nuevu llargumetraxe del reconocíu cineasta francés Philippe Garrel, pol que llogró l’Osu de Plata a la meyor dirección na Berlinale. Coescrito xuntu a guionistes de la talla de Jean-Claude Carrière; el filme cunta cola interpretación de los fíos del propiu Garrel pa ficcionar la hestoria d’una familia de marionetistas nun claru paralelismu col so propiu legáu y amor pol oficiu.
Tres el so pasu pola Sección Oficial del Festival de Venecia, la cineasta belga Fien Troch presenta Holly, la hestoria d’una moza que tres una mal figuración decide nun dir al institutu’l día que tien llugar una quema. Les families de les víctimes empiecen a creer que la moza tien el don d’obrar milagros. En Baltimore, últimu filme realizáu pola pareya de cineastes irlandeses Christine Molloy & Joe Lawlor, protagonista d’unu de los Focos qu’anguaño dedica’l FICX, la hestoria centrar en Rose Dugdale; muyer qu’en 1974 remóntase contra la so alta clase social inglesa p’apuntase como voluntaria n’Exércitu Republicanu Irlandés. La película, programada fuera de concursu, va tener el so estrenu español nel Festival dientro de la Sección Oficial Albar. A estos títulos súmense les películes yá anunciaes No esperes demasiado del fin del mundo, de Radu Jude; El último verano, de Catherine Breillat; y Eureka, de Lisandro Alonso.
Retueyos: les nueves miraes del cine
Tres l’estrenu del so primer llargometraxe en 2017, Bajo la piel de lobo, el cineasta asturianu Samu Fuentes torna con Los últimos pastores pa ufiertar una acertada semeya sobro la manera de vida n’estinción de dos hermanos, pastores de Picos d’Europa. La película va tener el so estrenu mundial nel FICX.
Coles mesmes, va tener estrenu mundial El cine, 5; de la tamién asturiana Elisa Cepedal que, tres un fuerte percorríu nel curtiumetraxe, estrenó nel FICX en 2019 la so ópera prima El trabajo o a quién le pertenece el mundo. Nesta ocasión presenta una película que parte de les fotografíes del güelu de la mesma cineasta p’averase al calter de Barredos, un pueblu mineru que s’enfrenta a la despoblación y l’olvidu.
En 2014 la cineasta francesa d’ascendencia xeorxana, Marie Amachoukeli, presentaba nel FICX Mil noches, una boda (Party Girl); primer película codirigida con Claire Burger y Samuel Theis pola qu’habríen de llograr la Cámara d’Oru en Cannes. Casi diez años dempués, la cineasta ufiértanos el so segundu llargumetraxe, estrenáu na Selmana de la Crítica de Cannes: Àma Gloria avérase con fonda sensibilidá al venceyu creáu ente una neña francesa y la so ñeñera caboverdiana.
Esta selección añédese a los llargometraxes anunciaos con anterioridá na Sección Oficial Retueyos: Blackbird Blackbird Blackberry, de Elene Naveriani; Chicken for Linda!, de Chiara Malta & Sébastien Laudenbach; y Locals, de Måns Nyman.
