El Gobiernu del Principáu va dedicar esti añu’l 8-M, Día Internacional de les Muyeres, a homenaxar la trayectoria del movimientu feminista n’Asturies, con especial atención a les muyeres qu’impulsaron la llucha nos años de la Transición, al entamu de la democracia. En coincidencia cola conmemoración de los 40 años del Estatutu d’Autonomía, la Dirección Xeneral d’Igualdá decidió destacar los llogros alcanzaos poles feministes nestes cuatro décades, y por ello reivindica’l lema clásicu del movimientu: ¡Qué viva la lucha de las mujeres!/¡Puxa la llucha de les muyeres!.
L’Executivu pon la mirada nes meyores promovíes poles feministes p’avanzar hacia una sociedá igualitaria y moderna. Con esi propósitu, rinde tributu a l’Asociación Feminista d’Asturies (AFA), primera organización del feminismu asturianu, constituyida en 1977 -magar presentada un añu antes-, que dedicó los sos primeros manifiestos a revindicar la llibertá de les persones encarcelaes por cuestiones polítiques; ente elles, les muyeres preses por adulteriu o por albuertu. Tamién va recordar a una de les sos fundadores, Begoña Sánchez, finada en xunu de 2020, y a Paz Fernández Felgueroso, una de les grandes abogaes de les causes feministes na comunidá autónoma.
La situación llaboral de les muyeres, con una fienda salarial n’Asturies del 25,2% en salariu brutu añal – la más alta del país, según los últimos datos oficiales de 2019, a pesar del amenorgamientu de los últimos años – siempre foi una de les principales reivindicaciones de la llucha de les muyeres. Les movilizaciones provocaes polos conflictos de CRADY y IKE o pa poder trabayar na mina son dellos exemplos de la vinculación col movimientu obreru y de l’aspiración del feminismu a un sistema democráticu igualitariu.
La llectura d’obres y estudios espublizaos clandestinamente dende la trastienda de la llibrería Universal de Xixón pa sortear la censura sirvieron de cimientu pa dir creando una conciencia colectiva y un sólidu movimientu que foi fortaleciéndose colos años y que en 2014 protagonizó una de les mayores movilizaciones feministes del país, el Tren de la Llibertá. Fueron el colectivu de Muyeres pola Igualdá de Barredos y la Conxusta Feminista Les Comadres de Xixón les que lo punxeron en marcha pa frenar l’anteproyectu de llei del albuertu promovíu pol ministru Alberto Ruiz Gallardón. La movilización tuvo repercusión internacional con manifestaciones en Francia, Italia y Reinu Uníu.
Actu institucional
La Dirección Xeneral d’Igualdá diseñó una campaña que se va espublizar en redes sociales y medios de comunicación pa homenaxar a les feministes, auténtiques protagonistes del 8-M. “Siempre defendimos qu’esti día ye d’elles y por eso esti añu queremos homenaxales y poner en valor toles meyores que’l feminismu llogró nestos 40 años d’Estatutu d’autonomía”, resaltó la directora xeneral d’Igualdá, Nuria Varela.
Amás, ante la meyora de la pandemia sanitaria, el Principáu decidió recuperar l’actu institucional, que nun se celebraba dende 2020. Nesta ocasión la casa de cultura de Morea, nel conceyu d’Ayer, va ser la sede central de la xornada, onde les feministes tamién van tener protagonismu.
D’esta miente, les intervenciones del presidente del Principáu, Adrián Barbón, y del alcalde del conceyu, Juan Carlos Iglesias, van alternar con una conferencia al cargu de Soledad Murillo, socióloga, ex secretaria d’Estáu d’Igualdá, y una de les referentes del feminismu n’España. Coles mesmes, la cantante Anabel Santiago va ufiertar una actuación col grupu de panderetes Compañeres. Va ser a les 12:00 hores na casa de cultura.
La Conseyería de Cultura, Política Llingüística y turismu tamién entamó diverses actividaes. Ente elles, destaquen una esposición arqueolóxica en clave de xéneru nel Parque de la Prehistoria de Teberga y talleres infantiles y familiares nel Centru del Prerrománicu Asturianu y el Muséu del Xurásicu. Dellos centros culturales tamién incluyeron nes sos programaciones actividaes pa conmemorar el 8-M.
