El Serviciu d’Atención Ciudadana (SAC) del Principáu recuperó en payares el volume de cites presenciales anterior a la pandemia. Ente les oficines d’Uviéu (5.964 cites), Xixón (2.192) y Avilés (1.915) emprestóse asistencia personal a 10.071 usuarios, la cifra más alta dende febreru de 2020. Amás, per primer vegada supérase la media de 9.828 consultes mensuales de 2019, l’añu anterior a la crisis sanitaria.
Esti serviciu cerró’l mes pasáu con una ufierta total de 21.619 cites presenciales disponibles nel rexistru, de les que fueron solicitaes 13.848 (62% del total) y 10.071 atendíes (46,6%). Un total de 3.413 nun fueron atendíes al nun allegar les persones que les solicitaron, lo que supon el 33,8% del total.
Pela so parte, la demanda d’atención telefónica al traviés del 012 Asturies aumentó significativamente dende l’entamu de la crisis sanitaria, hasta algamar un picu de 60.232 en xunu de 2020, lo que supon una media de más de dos mil al día. La mayoría de les consultes tán rellacionaes coles convocatories de prestaciones y los trámites pa desaniciar los efectos de la pandemia.
Tocantes a anguaño, tolos meses hasta xunu superó la media de llamaes telefóniques del mesmu períodu de 2020. A partir d’esi momentu, y debíu al paulatín aumentu de les consultes presenciales, la demanda mensual baxó respecto al exerciciu pasáu, anque sigue siendo cimeru a la rexistrada antes de la pandemia.
El SAC llogró caltener una atención calidable a pesar d’ese notable aumentu de la demanda motiváu pol coronavirus.
El director xeneral de Gobernanza Pública, Tresparencia, Participación Ciudadana y Axenda 2030, José Antonio Garmón, confirma que les oficines d’atención ciudadana vuelven trabayar al ritmu anterior al entamu de la pandemia.
“Los datos de payares amuesen que’l Serviciu d’Atención Ciudadana tien capacidá p’asumir mayor carga de trabayu presencial y que combina la cita previa voluntaria col accesu llibre a los rexistros ye xuna fórmula d’ésitu que dexa a la ciudadanía entamase meyor y esperar menos p’arreglar trámites burocráticos”, esplicó.
El SAC ye un organismu dotáu de medios técnicos y profesionales cualificaos pa resolver les consultes que la ciudadanía formula a l’Alministración, empobinar sobro la manera d’aportar a un serviciu públicu, realizar trámites y xestionar reclamaciones y suxerencies. Ye’l primer puntu de contactu y sirve d’intermediariu ente l’Alministración autonómica y la población. Tamién ufierta información xeneral sobro los servicios qu’empresta’l Principáu y apurre documentación y formularios, según asesoramientu pa rellenalos.
