La investigación asturiana llogró captar más de 5,7 millones d’euros nes dos últimes convocatories d’ayudes a la I+D+i del Ministeriu de Ciencia, Innovación y Universidá. El Gobiernu central va financiar 54 proyectos presentaos por equipos de la Universidá d’Uviéu y d’organismos públicos d’investigación que tienen como oxetivu xenerar conocimientu y encarar grandes retos incluyíos nel plan estatal d’investigación ya innovación.
La resolución de les convocatories de 2018 de l’Axencia Estatal d’Investigación supón la financiación de proyectos con un horizonte temporal d’ente trés y cuatro años. Los principales beneficiarios de les convocatories Reto Investigación y Xeneración de conocencia, les más relevantes pa la comunidá científica, son investigadores y grupos de la Universidá d’Uviéu y d’organismos públicos d’investigación como l’Institutu de Productos Lácteos d’Asturies (Ipla), l’Institutu Nacional del Carbón (Incar), el Centru d’Investigación en Nanomateriales y Nanotecnoloxía (CINN) -toos ellos centros mistos del Conseyu Superior d’Investigaciones Científiques (CSIC)- y el Serviciu Rexonal d’Investigación y Desenvolvimientu Agroalimentariu (Serida).
La Universidá d’Uviéu lidera la mayor parte de les 35 iniciatives d’esti programa
Por volume de financiación, la convocatoria más relevante p’Asturies ye la de proyectos empobinaos a la resolución de problemes venceyaos a los grandes retos de la sociedá española, un apartáu nel que los equipos rexonales van disponer de 3.773.627 euros. La Universidá d’Uviéu lidera la mayor parte de les 35 iniciatives d’esti programa. Les temátiques rellacionaes cola bioloxía, la inxeniería y la informática centren dalgunos de los proyectos con mayor financiación. Sicasí, dientro de los retos pa la sociedá inclúyense tamién estudios venceyaos con Derechu, Economía, Ciencies de la Educación o Filoloxía.
De los organismos públicos d’investigación, destaquen cuatro proyectos del Incar, con más de 560.000 euros; trés del IPLA, que van cuntar con daqué más de mediu millón de financiación, y trés del Serida, con 386.000 euros. Pela so parte, el CINN va disponer de 60.000 euros pa un programa d’ultramateriales de carbonu pa la xestión térmica.
Polo que respecta a la convocatoria de Xeneración de conocencia, la investigación asturiana va disponer de casi dos millones pa 19 proyectos, presentaos na so totalidá por investigadores de la Universidá d’Uviéu. Nesti apartáu, van desenvolvese propuestes d’Humanidaes, Ciencies Xurídicu-Sociales, Ciencies de la Educación, Matemátiques, Física y Xeoloxía, ente otres disciplines.
Proyectos en toles árees de conocencia
Estos resultaos ponen de relieve, según el conseyeru de Ciencia, Innovación y Universidá, Borja Sánchez, “el potencial científicu del Principáu, yá que se trata de convocatories nacionales bien competitives”. Al so xuiciu, ye importante visibilizar mesmo los fondos que se capten como’l númberu de proyectos que, amás, “tomen toles árees de conocimientu y van tratar estudios tan distintos como la revalorización de subproductos de la industria agroalimentaria o los nuevos abordaxes nel derechu alministrativu sancionador”.
Les convocatories qu’acaben de llograr la resolución definitiva sumen, xunto coles del añu anterior, más de 150 proyectos n’activo con financiación nacional. «Anguaño tamos trabayando pa diseñar una estratexa que potencie l’actividá investigadora de los nuestros grupos lo primero posible, tal que vamos esplicar llueu na Xunta Xeneral del Principáu», avanzó’l titular de Ciencia.
El Ministeriu de Ciencia, Innovación y Universidaes incrementó l’aportación económica con un total de 360,7 millones a proyectos presentaos por universidaes, centros públicos d’I+D+i, centros privaos y entidaes ensin ánimu d’arriquecimientu y centros tecnolóxicos venceyaos a la ciencia, la tecnoloxía y la innovación. Ello ye que la convocatoria 2018 conviértese na meyor financiada dende 2011, con un crecimientu del 12% al respective de la de 2017, qu’algamó los 323 millones, gracies un meyor aprovechamientu del Fondu Européu de Desenvolvimientu Rexonal (Feder).
