Esta selmana’l Teatru de la Llaboral acueye los conciertos del CONSMUPA y Quique González y el show de Vaquero y Clavero. Amás, Llaboral Cinemateca proyecta, nel Paraninfu, los últimos pases de La vida era eso y Tres veranos y la película infantil La estrella de los simios. Llaboral Ciudá de la Cultura ye un equipamientu dependiente de la Conseyería de Cultura, Política Llingüística y Turismu y xestionáu pola Sociedá Pública de Xestión y Promoción Turística y Cultural del Principáu d’Asturies.
El miércoles 16 de marzu, a les 20:00 hores, la Banda Sinfónica del Conservatorio Superior de Música del Principáu d’Asturies “Eduardo Martínez Torner” (CONSMUPA) va ofrecer un conciertu empobináu por Antonio Ribera Soler, nel que va interpretar obres de Chapí, Chabrier, Rimsky, Korsakov y Appermont. La entrada ye llibre hasta completar aforu.
José Juan Vaquero y Álex Clavero van presentar el so últimu espectáculu, Nunca llueve a gusto de todos, el sábadu 19, a les 20:30 hores. Dos de los meyores cómicos del país amuesen en clave d’humor los dos cares d’una mesma moneda, nun show directo y viviego nel que xueguen colos ritmos, los tiempos y la química ente ellos.
El domingu 20, a les 20:00 hores, Quique González vuelve a la Llaboral pa presentar el so últimu trabayu, Sur nel valle, títulu inspiráu nesti vientu famosu na cornisa cantábrica sobre’l que s’estiende un halo de misteriu y acomúñase a tou tipu de lleendes. El discu, más reflexivu que narrativu, inclúi 11 nuevos cantares y una pista escondida con un soníu nel que busca nuevos paisaxes sonoros y otorga mayor protagonismu a preseos acústicos como’l contrabaxu y la guitarra clásica.
Grabáu en payares de 2020, Sur nel valle ye’l decimotercer álbum de Quique González, que yá lleva más de dos décades de trayectoria musical. Respetáu pola crítica y con un públicu fiel, na so discografía atopen títulos como Avería y redención, escoyíu como meyor álbum nacional de 2007 na revista Rolling Stone; Daiquiri Blues, col que realiza una esitosa xira per España y percuerre países como Arxentina, Estaos Xuníos, Canadá o Francia; o Delantrera Mítica, publicáu en 2013, qu’entró al númberu 1 na llista de vientes, ocupó la portada de Ruta66 y foi escoyíu meyor discu esi añu para el llectores de la revista Rolling Stone.
Cine pa tolos públicos nel Paraninfo
Laboral Cinemateca, en coordinación col Festival Internacional de Cine de Gijón/Xixón, presenta esta fin de selmana los últimos pases de La vida era eso de David Martín de los Santos y Tres veranos de Sandra Kogut. En collechando un centenar de premios colos sos cuatro curtiumetraxes, David Martín de los Santos escribe y dirixe el so primer llargumetraxe de ficción que se proxecta’l vienres 18 a les 19:00 hores nel Paraninfu de la Llaboral.
Protagonicen esti delicáu aproximamientu a la edá adulta -nomada a dos Premios Goya (meyor director novel y meyor actriz)- les impresionantes Anna Castillo y Petra Martínez, que pola so interpretación de María recibió’l premiu a meyor actriz nel Festival de Sevilla y nos Premios Feroz y Forqué.
El sábadu, tamién a les 19:00 hores, va poder vese Tres veranos de la cineasta brasileña Sandra Kogut, qu’al traviés de la mirada d’una emplegada y un padre vieyu escaecíu, dambes víctimes de la velea neolliberal, ufiértanos una semeya del Brasil contemporaneu -bien alloñáu de la samba, el fútbol o l’Antroxu xustu antes de la traxedia de 2018. Los cinéfilos más nuevos van esfrutar, el domingu a les 17:30 hores, de les aventures de la pequena Jonna y la gorila que lu adopta en La estrella de los simios, filme empobináu pola surcoreana Atiesta Hambäck y nomáu a Meyor Filme Animación nos Premios del Cine Européu que s’emite na so versión doblada al español.
Les entraes pal show de Vaquero y Clavero, pal conciertu de Quique González y pa les proyecciones de Llaboral Cinemateca pueden adquirise na Recepción de la Llaboral, nel Centru d’Información Turística del Principáu (CITPA) n’Uviéu/Uviéu, nel Centru Niemeyer n’Avilés, vía telefónica nel 985 969 708, en entradas.liberbank.es y na web de Llaboral Ciudá de la Cultura, onde va comunicase cualesquier cambéu na programación.
