Rayden demostró dende los sos entamos dir siempres un pasu más allá de lo establecío. Collaboró con Leiva, SFDK o Iván Ferreiro, ente otros munchos, afayándose como unu de los artistes que más pontes construyó ente estilos nel ámbitu nacional. Con una trayectoria musical na que sobresalen fitos como axuntar a más de 8000 persones nel WiZink Center de Madrid pa celebrar los sos 20 años de carrera, la so notable participación nel Benidorm Fest, la so xira de conciertos en Llatinoamérica en 2022 o ser asesor musical de Sebastián Yatra en La Voz Kids, nesti 2023 Rayden presentó “La Victoria Imposible”, el so séptimu álbum en solitariu.
Esti trabayu ruempe con tolo anterior ensin recurrir a esa gran modernidá na que paez que ta sumida’l mundu de la música, pero cola seguridá de tar sofitáu pola constancia del so esfuerzu y del so trabayu tres más de dos décades na industria y too ello acompañáu d’un directu con una banda esplosiva que sospriende allá por onde pisa.
Agora, cola anuncia de la so despedida de los escenarios, Rayden esfruta de los conciertos que van dar remate a la so trayectoria musical y falamos con él sobre’l pasáu, el futuru y el presente del artista madrilanu enantes del que va ser l’últimu conciertu n’Asturies, esti xueves na Sala Albéniz de Xixón.
¿Cómo llega la decisión de retirate de la música?
La decisión de retirame de la música vien determinada de distintos factores, qu’a la fin tienen que ver toos, el primeru ye a nivel d’honestidá. Sentí que tolo que podía cuntar en solitariu como Rayden yá lo contara y que yo mesmu me metiera nun berenxenal conceptual sacando dos triloxíes, una al rodiu del mensaxe, al rodiu de la palabra y rematar cola victoria imposible con un discu que sirviera como alderique pa confrontar distintos conceptos y palabres astractes que pa mi tienen otru sentíu a día de güei.
Per un sitiu eso, por otru’l mio fíu tien siete años. Nun quiero perder la etapa más guapa primero que llegue a l’adolescencia y tenga que tar a la griesca con él. Y tamién la vocación nel mundu de la novela. Anguaño, saqué la mio primer novela, el próximu añu a primeros d’añu saco la mio segunda novela y afayé una vocación orgánica que nunca tuvi cola música. Cola música empecé como una actividá más que queríen facer los mios amigos, que quería compartir con ellos y llevó a un llugar bien guapu.
¿Qué sientes énte la fin d’esta xira de despedida?
Creo que nestos últimos conciertos, creo que foi en Santander y en Valladolid, cuando empecé a notar que yá se diba averando adulces de manera inesorable’l final. Si que ye cierto que la xira va terminar n’agostu del próximu añu, a finales d’agostu, pero si que ye cierto que nestes feches y depués en Llatinoamérica qu’acabamos de tar, nes feches de México y nes feches de Bogotá, empecemos a notar yá la despidida y empezamos a sentir munches coses. Pero la contrapartida, lo guapo, ye que nos dexa vivilo echando’l restu echando’l restu y sacando tolo que tienes.
¿Qué diferencia estos conciertos d’otros anteriores?
Lo que te dicía na anterior entruga, creo que la diferencia anicia neso, saber que tienes qu’echar el restu, saber que nun puedes facer depués otra xira pa camudar la opinión que formaron y construyeron sobre ti en directu. Y que tienes que vaciate y que tienes que facer que cada persona que fixo un esfuerzu monetariu y un esfuerzu de cualquier tipu por dir vete por dir dicite l’adiós.
Dir con un conciertu que siempres que recuerde dibúxe-y una sorrisa y seya como tema de conversación, yo tuvi nesta xira, como foi, como saltamos, como abrazamos, como emocionamos, como revindicamos. Y a nivel de públicu tamién lo siento eso, siento como si fuera un marcianu d’estos de Toy Story que vien el gabitu y va llevame, pol ciñu y calor de la xente. Creo qu’agora-y tán dando un valor al mio trabayu que nunca tuviera no musical y siéntome mui valoráu.
Va poco que publicasti la to primer novela, ¿cómo foi’l procesu de creación?
El procesu de creación d’una novela d’escribir una novela pa mi, como te dicía n’otra entruga, foi afayar una vocación orgánica. Creo que too me preparó pa tolo que fixi a la de materializar, no artístico preparóme pa esto de dalguna forma, inclusive la improvisación y la batalla de gallos y afinar el tiru con esos punch lines, con eses llinies afilaes o les poesíes colos aforismos o colos estribillos. Sirvióme too p’apuntalar bien los testos. Y xeneróseme una cosa que m’encanta, que tu nun cantar puedes cuntar daqué y que nun se solucione en conflictu y esti bien puede ser una cantar increíble, un cantar memorable, pero nun llibru cada arma qu’enseñes antes de terminar la novela tien que disparase.
Tamién el morbu del retu. Creo que puedes tener un día de suerte y escribir un estribillu pegadizu d’esos que vienden entraes, pero creo qu’esta sensación tienes que consiguila en cada páxina o a lo menos en cada capítulu del llibru pa que nun se pierda comba.
¿Cuál ye la diferencia ente escribir narrativa y poesía?
La diferencia ente una novela y una poesía anicia na psicoloxía de los personaxes, en dar voz nel viaxe del héroe o de la heroína que constrúin cada unu. Tamién como te comentaba’l resolvimientu de conflictos en toles capes, ¿non? Toles capes que puedes meter, toles formes de representar con analoxíes, con too y creo qu’eso nuna poesía nun entra o la xente nun tendría tanta paciencia pa ello.
¿Qué fue antes con La mujer cactus y el hombre globo, la novela o la canción?
El procesu de qué foi primero, que si la pita o’l güevu, foi antes los dos primeros capítulos de la novela y, rápido, quixi facer un cantar a manera de banda sonora. Lo que pasa ye qu’ende m’entorné nel cantar y dexé un poco de llau la novela. Y depués yá l’añu pasáu foi cuando retomé, creo que foi a partir d’abril, la novela.
Sirvió y ye chocante como, de dalguna forma, dibuxes les llendes por onde tien que transitar la novela, el ring, l’escenariu. Pero tamién ye cierto que’l videoclip xenera una imaxe visual, valga la redundancia, bien potente y que xuegues tamién con eso pa desdoblar y descontestualizar les coses qu’asoceden tanto nel cantar, que ye como un storytelling, como nel vídeu, que tamién cunta una hestoria, pa que nun seya incoherente cola novela.
Naquelles ciudaes que visites, de xuru que tienes recuerdos mui guapos, como por exemplu’l conciertu improvisáu nes instalaciones universitaries n’Uviéu va unos años. ¿Cuáles destacarías n’Asturies?
Xusto díba a dicir esa. Pa mi, el conciertu ensin microfonía con Gracia Roel, col mio guitarrista, y yo na escalinata de la universidá pa la tola xente que quería averase porque díbemos tar nes fiestes de San Mateo hasta que camudó’l gobiernu.
Paezme que foi lo más épico, lo más épico por como se dio y por como eso si que yera valorar, valorar al públicu y facer cientos de kilómetros ensin cobrar nengún tipu d’entrada por ufiertar. Porque tamién somos conocedores que munches persones nun pueden destinar parte de dinero nuna entrada y a lo meyor nes fiestes grandes ye cuando puede sirvir como puntu d’alcuentru con artistes y grupos que te gusten y que, de secute, se quede en nada, a lo meyor ye un baxón. Entós, quería de dalguna forma dar ciñu a la xente d’Uviéu.
Agora que dexes la música, ¿a qué se va dedicar David?
Pues nun se, se que va ser daqué dedicao cola música porque’l componente productor y de creador de lletres, anque seyan pa otres persones, nun se pierde. Voi siguir col mundu de la novela, nun refugo tamién aventurame nel management o nel otru llau de la representación d’artistes. Tamién voi estudiar un máster de guión cinematográficu, agora mesmo tengo un programa de radiu en Radio3, La flor en el hormigón… Pues a ver a onde me lleva tamién eso. Nun se, yo siempres como soi mui guindilla, me dexa poder esplorar en distintos campos.
