Categoría: Sociedá

El Gobiernu asturianu adelantra’l pagu del salariu social y la dependencia

El Gobiernu asturianu va adelantrar quince díes el pagu del salariu social básicu y de les prestaciones económiques destinaes a les persones dependientes. Trátase d’una midida urxente na que trabaya la Conseyería de Derechos Sociales y Bientar que blinda la cobertoria económica de los sectores más vulnerables de la sociedá. L’oxetivu ye desaniciar los efectos derivaos del andanciu del nuevu coronavirus. «Esta midida va permitir a les persones usuaries d’estes ayudes dispongan de lliquidez abonda pa encetar esta crisis”, manifestó la directora xeneral de Xestión de Derechos Sociales, Paula Álvarez Herrera.

Esta midida de calter escepcional va beneficiar a los más de 21.000 usuarios del salariu social y a otres 9.270 persones dependientes. «Tenemos en cuenta la situación d’especial vulnerabilidá d’estos colectivos. Con esta midida garantizamos que puedan cuntar con medios económicos suficientes para encarar estes dures selmanes», concretó Álvarez Herrera.

17/03/2020
El coronavirus paraliza Xixón

Cais vacíes. Namás el soníu de los páxaros ruempe estos díes el silenciu dominante nos barrios de la ciudá. La declaración del estáu d’alarma n’España supón llimitaciones a la libre circulación de persones. Namás les persones con autorización pa dir a trabayar pueden salir a la cai y los llamamientos a zarrase en casa sacante pa comprar bienes de primer necesidá repíntense nos medios de comunicación.

Les midíes de contención tan recoyíes nel Real Decretu que declara l’estáu d’alarma. A saber: la suspensión de tolos negocios cola esceición de locales de primer necesidá como alimentación, farmacia, médicu, quioscos, gasolineres, peluqueríes y tintoreríes. Prohíbese, amás, la circulación ciudadana con motivu d’ocio. Namás se podrá salir a la cai en casu de necesidá, pasear a les mascotes o acudir a trabayar y al médicu. Nestos casos, tien de facese siempres de forma individual, a nun ser que seya necesaria la compañía en casu de incapacidá o minusvalía.

Los servicios de tresporte públicu redúcense en tolos ámbitos. Habrá un 50% menos de taxis con limitación d’ocupantes. Amás, la zona azul, l’I.B.I, les tases de terraza, agua, basura y alcantarillado queden suspenses. L’autobús, que circulará de manera gratuita y ensin inspector, será’l transporte más afectáu. Suspéndense les llínies 26, 34, 35, 36 y los servicios nuecherniegos. La llínia 25, per otru llau, terminará’l percorríu en La Olla. Instalaráse, tamién, una zona d’esclusión pal conductor, que quedará a más d’un metru y mediu de distancia de los pasaxeros. Asina mesmo, para garantizar la seguridá del trabayador, será obligatorio entrar poles puertes del mediu y cabu. Pa garantizar la ventilación, l’autobús deberá parar en toles paraes ensin necesidá de solicitala.

Oficina virtual

Mientras siga en vigor l’estáu d’alarma, Xixón va atender de forma virtual les consultes de los ciudadanos. La oficina virtual del Conceyu va permitir presentar solicitudes y documentos y tar al día de los sos trámites. Tolos museos, biblioteques y centros municipales tan pesllaos, sacante la Pescadería Municipal, qu’atiende de manera presencial namás con cita previa.

L’incumplimientu de les midíes establecíes pol Gobiernu tendrá consecuencies tanto económiques como disciplinares n’os casos graves. Asina, establécense multes d’entre 100 y 600 euros por retirar una valla o precintu, hasta 30.000 euros por negar la identificación ante un axente de policía. Les sanciones perpasarán los 60.000 euros por conductes que pongan en peligru la salú de la ciudadanía. Estes sanciones tán amparaes poles lleis de Seguridá Ciudadana, la de Salú Pública, la de Protección Civil y pol Códigu Penal.

16/03/2020
Primer fin de selmana d’estáu d’alarma: 60 persones y 30 locales sancionaos

La Policía Local de Xixón propunxo pa sanción, a lo llargo d’esta fin de selmana, a un total de 60 persones y 30 establecimientos. El motivu nun foi otru que l’incumplimientu de les ordes de zarru y confinamientu nes cases. Esta medida, d’obligáu cumplimientu, ta recoyida nel estáu d’alarma decretáu a nivel nacional, pa frenar la espansión del nuevu coronavirus.

Los coches patrulla alviertieron mientres la fin de selmana al traviés de la megafonía y personalmente de la obligación de confinamientu. Sicasí, los axentes tuvieron qu’intervenir nuna trentena de locales d’hostelería, chigres, sidreríes y vinateríes, por permanecer abiertos y negase a cerrar. En dellos casos tuvieron los axentes tuvieron que clausurar hasta en trés causes dichos establecimientos.

Amás, y a pesar de los repitíos avisos realizaos, hasta sesenta persones fueron denunciaes dende ayeri por atopase na vía pública ensin motivu. Delles fueron sosprendíes tomando’l sol nes sableres, xugando al fútbol nos parques o pasiando pol Muru. Esti tipu de conductes tán siendo sancionaes con cuantíes que pueden superar los 3.000 euros.

16/03/2020
Xixón suspende la zona azul y les tases de terraces, agua, basura y alcantarelláu

El Conceyu de Xixón decidió esta mañana suspender la ORA y les tases pola instalación de terraces, agua, recoyida de basures y alcantarelláu. Trátase d’una más de les midíes adoptaes pol equipu de gobiernu enfotada n’apangar l’impactu económicu que l’estáu d’alerta va tener sobro la hostelería y el pequenu comercio.

Les unidaes técniques de la Fundación Municipal de Servicios Sociales van trabayar vía telefónica y telemática. L’atención va ser presencial puramente en situaciones urxentes y siempres con cita previa. El Serviciu d’Ayuda a Casa caltién los servicios d’aséu ya hixene y los servicios d’ellaboración y entrega de comida. El restu de servicios van sustituyise por siguimientu telefónica diariu de les mesmes auxiliares. Van ser elles quien detecten les necesidaes que vaigan surdiendo, dándo-yos respuesta.

Nel casu del Albergue Cuadonga, que permanez abiertu, la organización anicia n’evitar que confluyan munches persones. Pela so parte la Cocina Económica va apurrir a los sos usuarios les comíes y cenes en recipientes pa llevar.

16/03/2020
Una ventena de xixoneses, sancionaos por «salir a tomar el sol»

La Policía Local de Xixón sigui percorriendo les cais de la ciudá pa controlar el cumplimientu de les midíes que supón la declaración del estáu d’alarma. Los axentes viérsonse obligaos a intervenir esti sábadu pa pesllar dellos establecimientos hosteleros que se negaben a zarrar. Por esti motivu, más d’una ventena d’ellos foron denunciaos pol cuerpu policial y propuestos pa una sanción mínima de 3.000 euros. La Policía Local patrulla esti domingu con mensaxes d’audiu que recuerden a la población que la circulación de persones ta llindada, salvu en casos escepcionales.

Nesti sentíu los axentes propunxeron pa sanción, a lo llargo de la mañana, a una ventena de persones que «s’atopaben tomando’l sol nes sableres de Poniente y L’Arbeyal, circulando en bicicleta pol Parque Fluvial o pasiando pol Paséu de Begoña». Según esplica’l Conceyu nuna nota de prensa, toes estes persones foron identificaes. Darréu, enviose la so propuesta de sanción a Delegación de Gobiernu. Les sanciones, tipificaes como graves, parten de los 3.000 euros y pueden algamar hasta los 600.000 euros.

L’alcaldesa de Xixón, Ana González, fizo un llamáu a la «responsabilidá» de la población pa cumplir les normes. «Trátase non solo de nun contaxanos nós, sinón de nun contaxar a los demás”.

15/03/2020
Menos taxis con menos places

El Conceyu de Xixón anunció esta mañana nueves midies enfotaes en frenar l’andanciu de coronavirus n’Asturies. L’equipu de gobiernu alcordó amenorgar al 50% el serviciu de taxis na ciudá, llindando tamién el númberu d’ocupantes que viaxen en cada vehículu. Los taxis nun van poder superar el 50% de los viaxeros permitíos davezu.

Nun ye la única midida u’afecta al tresporte públicu urbanu. La frecuencia de les llínees d’Emtusa va amenorgase al 40% a partir del llunes. Asina, daráse prioridá a les zones onde s’alluguen centros de trabayu, como l’Hospital de Cabueñes y los polígonos. Esti domingu los servicios son los mínimos correspondientes a un domingu. Tampoco circulen los autobuses nuecherniegos.

L’equipu de Gobiernu tomó amás nueves midíes pa proteger a los conductores de la empresa municipal. La entrada y salida de los autobuses va realizase poles puertes traseres y van dexase llibres los asientos de les zones más cercanes al conductor para caltener la distancia de seguridá. Los autobuses van detenese, por defectu, en toles paraes, pa que de esta forma nun sía necesariu solicitala. Los autobuses van desinfestase a diariu.

15/03/2020
Emulsa caltién la recoyida de basures

Emulsa caltien con normalidá’l serviciu de recoyida de basures. La empresa municipal ta afaciendo’l serviciu d’hixene urbana a los nuevos escenarios d’usos urbanos col fin de garantizar la salú de los trabayadores y de caltener la recoyida y la llimpieza diaria. El servicio de basures funciona al 100% y tomáronse midíes d’escalonamientu na entrada y salida de los operarios nos vestuarios. El personal ta recibiendo tratamientos especiales de llimpieza ente los turnos, tamién los vehículos, que tan sometiéndose a llimpieces internes y esternes. La empresa municipal modificó la periodicidá de llavadura de los contenedores.

El restu de servicios d’Emulsa tán afaciéndose a les nueves necesidaes. La empresa ta siguiendo les directrices de les autoridaes pa garantizar el funcionamientu de los servicios públicos y la seguridá de los trabayadores.

Coxersa tamién caltien los servicios de recoyida de reciclaxe. El consorciu rexonal establez encamientos pa les families con enfermos o posibles casos de coronavirus. Les basures procedentes d’esos enfermos han depositase en bolses zarraes dientro al contenedor de restu y nunca nos de reciclaje.

15/03/2020
La Policía Local pieslla 20 bares en Xixón

Los axentes de la Policía Local de Xixón propunxo yá para sanción a más d’una ventena de locales d’hostelería que se negaben a pesllar les sos puertes. Les sanciones parten de los 3.000 euros. El Gobiernu asturianu alcordó ayeri’l pieslle de tolos bares y restoranes del país como midida pa frenar l’andanciu de coronavirus n’Asturies. Tolos efectivos de la Policía Local atópense patrullando les cais de la ciudá pa garantizar el cumplimientu del pidimientu de nun salir a la cai. L’alcaldesa de Xixón, Ana González, llama a la ciudadanía a quedase en casa. «La meyor manera de frenar l’andada del coronavirus ye quedanos toos en casa”, señaló.

El Conceyu de Xixón decidió esta mañana la gratuidá del serviciu d’autobuses urbanos. La frecuencia de les llínees va amenorgase al 40% a partir del llunes. Asina, daráse prioridá a les zones onde s’alluguen centros de trabayu, como l’Hospital de Cabueñes y los polígonos. Mientres esti fin de selmana, los servicios d’EMTUSA son los mínimos correspondientes a un domingu. La entrada y salida de los autobuses va realizase poles puertes traseres y van dexase llibres los asientos de les zones más cercanes al conductor para caltener la distancia de seguridá. Los autobuses van detenese, por defectu, en toles paraes, pa que de esta forma nun sía necesariu solicitala. Los autobuses van desinfestase a diariu.

Los centros municipales ciérrense definitivamente. L’atención ciudadana y el rexistru va realizase namás per vía telefónica y telemática, sacante n’Antigua Pescadería Municipal, onde se va riquir cita previa telefónica. Tamién se suspendieron los servicios d’arriendu de bicicletes y patinetes, que yá empezaron a retirase de les cais.

14/03/2020
Xixón decide la gratuidá del autobús urbanu

El Conceyu de Xixón decidió esta mañana que, dende esta sábadu, el serviciu d’autobuses urbanos va ser gratuitu pa toles persones. La frecuencia de les llínees va amenorgase al 40% a partir del llunes. Asina, daráse prioridá a les zones onde s’alluguen centros de trabayu, como l’Hospital de Cabueñes y los polígonos. Mientres esti fin de selmana, los servicios qu’empresta EMTUSA son los mínimos correspondientes a un domingu.

L’equipu de Gobiernu tomó amás nueves midíes pa proteger a los conductores de la empresa municipal. La entrada y salida de los autobuses va realizase poles puertes traseres y van dexase llibres los asientos de les zones más cercanes al conductor para caltener la distancia de seguridá. Los autobuses van detenese, por defectu, en toles paraes, pa que de esta forma nun sía necesariu solicitala. Los autobuses van desinfestase a diariu.

Los centros municipales ciérrense definitivamente. L’atención ciudadana y el rexistru va realizase namás per vía telefónica y telemática, sacante n’Antigua Pescadería Municipal, onde se va riquir cita previa telefónica. Tamién se suspendieron los servicios d’arriendu de bicicletes y patinetes, que yá empezaron a retirase de les cais.

L’alcaldesa de Xixón, Ana González, llama a la ciudadanía a «quedase en casa». «La meyor manera de frenar l’andada del coronavirus ye quedanos toos en casa”, señaló.

14/03/2020
Xixón pieslla pol coronavirus: piscines y biblioteques zarraes, parques precintaos

Xixón amplía les midíes preventives pa evitar l’andanciu de coronavirus. L’equipu de gobiernu del Conceyu alcordó esta mañana el pieslle les instalaciones deportives municipales, la rede de museos y biblioteques municipales y los centros municipales integraos. Van permanecer zarraos al públicu mientres les vinientes dos selmanes. Sí se van caltener abiertos los servicios de rexistru y atención al públicu, anque con cambeos.

El Conceyu va priorizar l’atención telefónica y telemática y la presencia va desenvolvese al traviés de cita previa. El personal municipal dedicáu a l’atención al públicu va trabayar por turnos. Siguiendo’l zarru de colexos decretáu pol Gobiernu asturianu, les escueles infantiles de 0 a 3 años van permanecer tamién zarraes. Estos centros sí abrieron esti vienres p’atender a «aquelles families que nun tuvieren tiempu de buscar una solución», señala’l Conceyu nuna nota. Los trabayadores nun van dir a les escueles.

El Xardín Botánicu Atlánticu de Xixón va zarrar tamién les sos puertes ente l’andanciu de coronavirus. Amás, van precintase les zones de xuegos infantiles y de práctica deportiva de persones mayores nos parques. Queden suspendíos tamién los talleres d’empléu, les escueles taller y la escuela de segunda oportunidá. Tantu’l rastru como’l mercáu ecolóxicu y artesanu que se diben a celebrar esta fin de selmana quedaron suspendíos. La Casa Conceyu va siguir celebrando bodes mientres les vivientes selmanes. Sicasí, va llindase l’accesu a un máximu de diez persones.

El Conceyu va aprovechar estos díes p’acometer llimpieces intensives nes escueles, instalaciones deportives municipales y centros sociales. Coles mesmes va reforzase la llimpieza na Cocina Económica, l’Albergue Cuadonga y los centros de día. Respectu al personal municipal, va potenciase’l teletrabayu y va establecese una mayor separación ente los puestos de trabayu.

13/03/2020