Xixón al día

Categoría: Sociedá

  • N’estáu grave’l primer positivu por coronavirus n’Asturies

    N’estáu grave’l primer positivu por coronavirus n’Asturies

    L’home de 70 años ingresáu nel Hospital Universitariu Central d’Asturies (HUCA) por coronavirus sigue grave anque estable. L’afectáu acudió a un centru priváu, onde se-y diagnosticó una neumonía aguda ensin antecedentes. Esti ye unu de los criterios pa consideralu como casu n’investigación y pol que se-y realizó la prueba. El paciente ta clínicamente estable. La so pareya, una muyer de 66 años d’edá que tamién manifiesta síntomes, dio negativu nes dos pruebes que se-y realizaron.

    El Serviciu de Vixilancia Epidemiolóxica identificó a les persones del entornu familiar y social del paciente, esto ye, los denominaos contactos estrechos p’activar les midíes de control y prevención. Estes midíes consisten nuna vixilancia del so estáu de salú, esto ye, tomase la temperatura y llevar una vida social lo más restrictiva posible. Si presenten síntomes, van tener que ponese en contactu col 112. Los esfuercios céntrense agora n’investigar cómo se pudo contaxar. L’home presentó síntomes díes depués de participar nun congresu en Portugal.

    El Serviciu Públicu de Salú (Sespa) reforció l’atención del 112 con personal sanitario p’atender les consultes de la ciudadanía. Ye’l teléfonu de referencia pa toes aquelles persones que viaxaron a zones afectaes pola enfermedá y que presenten los síntomes respiratorios de fiebre, tos o falta d’aire. Pa prevenir la tresmisión de la infección, les autoridaes sanitaries encamienten llavase de cutiu les manes con agua y xabón, asina como utilizar el flexu del coldu o pañuelos desechables d’un solu usu pa tusir o espirriar.

  • Descartaos dos nuevos casos sospechosos de coronavirus n’Asturies

    Descartaos dos nuevos casos sospechosos de coronavirus n’Asturies

    La Conseyería de Salú escartó esta madrugada dos nuevos casos sospechosos de coronavirus rellacionaos col biltu COVID-19 n’Asturies. Les persones fueron atendíes nel Hospital Universitariu Central d’Asturies (HUCA) en activándose el protocolu d’actuación. Presentaben fiebre y síntomes respiratorios dempués de tornar de viaxe nes rexones afectaes d’Italia. Al presentar estos síntomes llamaron al 112.

    El Llaboratoriu de Viroloxía del HUCA procesó les amueses que dieron negativu al nuevu coronavirus y positivu para otres infecciones respiratories. La Conseyería de Salú caltien actualizáu’l protocolu d’actuación p’afaelo a la nueva realidá del coronavirus. Una nuevu cambéu qu’ayeri s’alcordó nel Conseyu Interterritorial celebráu en Madrid y al qu’allegó’l Conseyeru de Salú, Pablo Fernández Muñiz.

    El nuevu procedimientu amplía’l criteriu epidemiolóxicu d’árees de riesgu. Amás de China, les zones de riesgu son Xapón, Corea del Sur, Singapur, Irán y les rexones del norte d’Italia: Vénetu, Lombardía, Emilia Romagna y Piamonte. Anque estes zones pueden dir camudando. Sía que non, si tuvo en dalguna de les zones de riesgu, y presenta los síntomes respiratorios, tos, o fiebre encamiéntase llamar al 112.

    Les autoridaes sanitaries encamienten nun viaxar a les árees de riesgu, sacantes sía imprescindible. Nesi casu, si presenta dalgún síntoma aconséyase siguir les indicaciones de les autoridaes sanitaries locales. Tolos casos d’España son importaos y tase intentando contener la situación con distintes midíes pa que’l país nun sía un área de tresmisión.

    Encamientos

    Les autoridaes sanitaries recuerden que les midíes xenerales de prevención pal COVID-19 son les mesmes que pa otros virus respiratorios. La llavadura frecuente de manos con agua y xabón ye una de les midíes más eficaces pa evitar les andaes. En casu de tusir o espirriar tienen d’usase pañuelos desechables d’un solu usu pa tapase la boca o la ñariz, o bien el buecu del coldu pa evitar contaminar les manos.

    Coles mesmes, la Conseyería de Salú encamienta a aquelles que persones que viaxaren apocayá a les zones afectaes y que tengan sintomatoloxía respiratoria, esto ye, fiebre, tos o sensación de falta d’aire, llamen al 112, onde-yos facilitarán información ya indicarán-yos les actuaciones precises.

  • COVID-19: ¿qué ye’l coronavirus y cómo prevenir contaxos?

    COVID-19: ¿qué ye’l coronavirus y cómo prevenir contaxos?

    El mundu vive anguaño pendiente de la evolución del nuevu coronavirus COVID-19. La medrana ente una posible pandemia mundial aumentó cola medría de nuevos casos fora de China. Italia sufrió un biltu mientres la fin de selmana que riquió’l zarru d’escueles y comercios y que s’espera qu’aumente significativamente. Tampoco ta controláu l’andanciu de Corea del Sur, onde probablemente vamos ver una segunda China. Informáronse de casos n’Oriente Mediu, incluyíes les primeres infecciones n’Israel y Llíbano, y 40 casos con siete muertes n’Irán, lo que suxure que se trata de la punta d’un iceberg.

    Tamién n’España detectáronse un total de ocho casos: cuatro en Canaries, dos en Madrid, unu en Cataluña, otru en Castellón. N’Asturies, descartóse que’l posible casu detectáu’l domingu tuviera venceyáu finalmente al nuevu coronavirus. Los coronavirus son virus que circulen ente los animales, pero dalgunos d’ellos tamién pueden afectar a los seres humanos. El COVID-19 foi identificáu en China a finales de 2019 y ye una cepa que nun se vio primeramente n’humanos.

    Les autoridaes sanitaries recuerden que les midíes xenerales de prevención pal COVID-19 son les mesmes que pa otros virus respiratorios. La llavadura frecuente de manes con agua y xabón ye una de les midíes más eficaces pa evitar los contaxos. En casu de tusir o espirriar tienen d’usase pañuelos desechables d’un solu usu pa tapar la boca o la ñariz, o bien el buecu del coldu pa evitar contaminar les manes.

    Coles mesmes, la Conseyería de Salú encamienta a aquelles persones que viaxaren apocayá a les zones afectaes y que tengan sintomatoloxía respiratoria, esto ye, fiebre, tos o sensación de falta d’aire, llamen al 112, onde-yos facilitarán información ya-yos indicarán les actuaciones precises.

  • La casona de los Franco n’Asturies, a la venta

    La casona de los Franco n’Asturies, a la venta

    Siete dormitorios, seis cuartos de bañu y 360 m2. La familia Franco caltien a la venta un palacete n’Asturies casi un añu depués. A la familia del dictador nun-y ta resultando cenciello desfacese de la vivienda asitiada en Llanera. La casona salió a la venta a un preciu de 5 millones d’euros. Sicasí, les dificultaes del mercáu inmobiliariu faen qu’agora seya posible adquirila por ‘namás’ 3.

    La propiedá inclúi un terrén de 30 hectárees, arbolea, praos, una zona de xardín decorativu y una zona d’árboles frutales, y cuenta con siete habitaciones, seis baños y terraza. Destaca la decoración rústica y dellos elementos decorativos relixosos.

    El palacete, comercializáu pola inmobiliaria Royal Premium y anunciáu n’Idealista, asítiase ente Uviéu, Xixón y Avilés, y atópase abargana de Castillo de San Cucao, el Palaciu de Villabona, el Centru Ecuestre L’Asturcón, el Muséu Fernando Alonso y Llamorgal. Anguaño ye la propiedá más cara que tien disponible la inmobiliaria. El mesmu anunciu dexa entever que’l comprador perfectu pa la propiedá ye un inversor que quiera reconvertilo n’hotel, cases rural o llugar pa convenciones y celebraciones.

  • El Bancu de Lleche Materno alimentó a 237 neños prematuros dende la so creación

    El Bancu de Lleche Materno alimentó a 237 neños prematuros dende la so creación

    El Bancu de Lleche Materno d’Asturies suministró nos postreros trés años lleche materno a 237 naciellos prematuros. Na mayor parte de los casos tratábase de ñácaros menos de 33 selmanes de xestación, con un pesu inferior a 1.500 gramos o neonatos enfermos que nun disponen d’abondu alimentu de la so propia madre.

    Dende la so apertura nel 2017, esta unidá especializada cuntó col altruísmu de 178 madres, qu’a lo llargo de meses simultaniaron la lactancia de los sos fíos cola estracción de lleche pa otros naciellos. Estes muyeres apurrieron 840 llitros. Desque pasteurizao, 710 llitros destináronse a les Unidaes de Neonatoloxía del HUCA y del Hospital Universitariu de Cabueñes p’atender a los naciellos ingresaos que lo precisaron.

    El Bancu de Lleche Materno púnxose en marcha n’Hospital Universitariu Central d’Asturies (HUCA) y, dende xunu del añu pasáu, pa facilitar les donaciones, los Hospitales Universitarios de Cabueñes y San Agustín son centros receptores de lleche materno procedente de madres residentes en Xixón y Avilés, respectivamente.

    Beneficios de la lleche materno

    La Organización Mundial de la Salú (OMS) aconseya la lactancia materna poles sos cualidaes nutricionales y los sos componentes bioactivos, que previenen múltiples enfermedaes en comparanza cola lleche artificial. Estos beneficios poténciense nos naciellos mui prematuros o enfermos porque los protexe frente a problemes gastrointestinales graves como la enterocolitis. Amás, mengua’l riesgu d’infección y aumenta les posibilidaes de recuperación, supervivencia y desenvolvimientu d’estos naciellos.

    La OMS aconseya la lactancia materna de forma esclusiva nos primeros seis meses de vida y complementada con otros alimentos polo menos hasta los dos años d’edá. Los beneficios de la lactancia tamién s’estienden a les madres porque mengua’l riesgu de cáncer d’ovarios y de mama. El Bancu de Lactancia Materna d’Asturies estima la collaboración altruista de les muyeres donantes. La Conseyería de Salú anima a les madres que puedan donar lleche a que se pongan en contactu con esta unidá especializada nel teléfonu 985 652 456.

  • La epidemia de gripe mengua

    La epidemia de gripe mengua

    La epidemia del gripe mengua y asítiase en 329 casos por cien mil habitantes. La situación continua siendo d’intensidá baxa per tercer selmana consecutiva y la remisión detéctase en toles edaes, sacante nel grupu de 15 a 64 años, nel que se caltién. Según los datos facilitaos pola Rede de Médicos Centinela d’Asturies, el virus gripal predominante ye l’A, anque empieza a incrementase la circulación del B, daqué habitual na fase de descensu de la onda epidémica.

    Ente’l 3 y el 9 d’esti mes viose un amenorgamientu de los ingresos y de los casos graves. L’HUCA, como hospital centinela d’Asturies, rexistró 333 hospitalizaciones, de les cualos 138 fueron graves. Nel conxuntu de la comunidá, los ingresos xuben a 1.024 y tanto estos como les afectaciones de mayor importancia presentaben dalgún factor de riesgu y nun taben vacunaos. Los datos nacionales reflexen que la incidencia del gripe ye decreciente o estable en toles comunidaes sacante en Canaries, Comunidá Valenciana y Ceuta, onde sigue n’ascensu. Estremadura ye la única rexón con un nivel d’intensidá basal.

    Vacunación y encamientos

    Hasta’l 9 de febreru vacunáronse n’Asturies 207.378 persones, 5.564 más que na campaña anterior. Llavar de manera frecuente les manes con agua y xabón, asina como caltener una bona ventilación de los espacios zarraos son les midíes preventives más eficaces pa evitar les andaes. En casu de tusir o espirriar hai qu’usar pañuelos de papel d’un solu usu pa tapar la boca y la nariz, o bien el buecu del coldu pa evitar contaminar les manes. Amás, suxerse llimpiar con frecuencia les superficies que se toquen coles manes como los pomos de les puertes, interruptores, etc… Los síntomes del gripe son malestar xeneral, una fiebre alta súbita y tos, que se trata con antitérmicos. Les autoridaes sanitaries insisten en que los antibióticos nun curen el gripe.

  • «La especialidá docente nun pue esperar»

    «La especialidá docente nun pue esperar»

    Les palabres de la ministra Isabel Celaá sobre la especialidá docente d’asturianu nun gustaron nada a los colectivos que defenden la oficialidá de la llingua. La responsable d’Educación refugó la modificación del decretu d’especialidaes enantes de la reforma estatutaria que-y de a l’asturianu’l rangu d’oficial. Iniciativa pol Asturianu recordó esti xueves que la especialidá docente d’asturianu ye «imprescindible pa iguar d’una vegada la situación del profesoráu d’asturianu».

    El presidente de la organización, Iván Llera, destacó qu’esta propuesta yá se votó na Xunta Xeneral «cola unanimidá de tolos partíos, polo tanto, entendemos que nun habría nengún motivu pa nun facela agora». La organización insiste en que namás fai falta «voluntá» por parte de los responsables políticos «p’acabar cola interinidá y precariedá del profesoráu y dignificar l’asignatura». La ONG va solicitar un conceyu urxente cola Conseyera d’Educación pa tresmitir al Gobiernu astuiranu p’aclarar esta cuestión. «Esta situación nun ye aceptable y vamos reclamar soluciones. Esti tema nun puede esperar pola oficialidá», remató.

    Llera fizo estes declaraciones nuna rueda de prensa pa facer una valoración de los alcuentros que mantuvo la organización con representantes de PSOE, PP, Podemos y Foro nel Congresu de los Diputaos. El presidente agradeció a les diferentes fuercies polítiques la so voluntá p’aconceyar y «tar atentos a les peticiones que-yos ficimos en materia llingüística». Ente les midides puestes enriba la mesa tuvieron una partida pa l’ALLA nos Presupuestos Xenerales del Estáu y l’usu de la toponimia oficial nes carreteres estatales.

    Llera aprovecho tamién p’anunciar qu’Iniciativa pol Asturianu va entamar delles actividaes col Centru Asturianu de Madrid, ente elle, un Día de les Lletres na capital española; un concursu lliterariu n’asturianu y actos en defensa de la oficialidá.

  • Cabueñes incorpora les nueves técniques endoscópiques pa tratar les patoloxíes de columna

    Cabueñes incorpora les nueves técniques endoscópiques pa tratar les patoloxíes de columna

    El Serviciu de Ciruxía Ortopédica y Traumatoloxía del Hospital de Cabueñes practicó a trés pacientes de estenosis de canal lumbar y hernia discal, les primeres intervenciones coles nueves técniques endoscópiques. El centru incorporóles pa tratar les lesiones de columna. Esti nuevu procedimientu aplicáu pola Unidá de Columna de Cabueñes resulta mínimamente invasivu y apurre a los pacientes una recuperación más rápida con menores molesties posoperatories, lo qu’amenorga tamién los tiempos d’estancia hospitalaria.

    La endoscopia de columna permite la esploración de la canal espinal por aciu una óptica d’alta definición que namás rique d’una incisión menor d’un centímetru. Esto da como resultáu un abordaxe de la lesión muncho menos agresivu quirúrgicamente.

    El doctor Ghassan Elgeadi, espertu internacional nesti tipu de técniques, va asisitió al desenvolvimientu d’estes microciruxíes, que permiten tratar de manera eficaz patoloxíes tan habituales como la hernia discal cervical y lumbar. Estes enfermedaes dexeneratives de la columna afecten a gran parte de la población adulta y acarreten costos tanto asistenciales como sociales en términos de baxes llaborales y discapacidá residual permanente.

  • Más de 5.000 trampes n’Asturies contra l’aviespa asiática

    Más de 5.000 trampes n’Asturies contra l’aviespa asiática

    El Gobiernu asturianu entamó esta selmana la campaña de llucha contra l’aviespa asiática cola repartida de más de 5.000 trampes selectives. Los trabayos d’entrampiáu de reines, una de les midíes más eficaces contra esta especie, constitúin el primer paquete d’actuaciones de la nueva campaña. L’añu pasáu asitiáronse más de 3.600 trampes coles que se prindaron casi 16.000 reines.

    La distribución d’estos dispositivos y la so posterior instalación realízase siguiendo una metodoloxía diseñada por técnicos especializaos. La midida tamién ye fundamental pa disponer de datos con solidez científica qu’apurran información sobre la posible meyora de l’aviespa asiática, de cara a la so potencial declaración como plaga per parte de los organismos competentes.

    Les trampes van quedar instalaes nes próximes selmanes. La monitorización de la rede va apurrir datos de valor pa la retirada de niales activos que se va asolapar con otres actuaciones. El comité asesor pa la detección y control de la vespa velutina va axuntase esti mes pa planiar y coordinar les actuaciones de tol añu. Amás, les acciones previstes van coordinase colos conceyos en collaboración col personal técnicu de la dirección xeneral del Mediu Natural. Dicha coordinación tamién s’estiende al restu d’asociaciones, entidaes y alministraciones arreyaes na llucha contra la vespa velutina.

    La Conseyería de Desenvolvimientu Rural, Agroganadería y Pesca cuenta con un presupuestu de más d’un millón pa facer frente a plagues y especies invasores, como l’aviespa asiática o’l plumeru de la pampa. Ente les novedaes anunciaes pa esti exerciciu ta la puesta en marcha d’un centru de recepción d’alertes y control de plagues y especies invasores allugáu en La Mata (Grau), y que va permitir trabayar con más eficacia y antelación.

  • Abierta la inscripción pa los primeros esámenes oficiales d’asturianu

    Abierta la inscripción pa los primeros esámenes oficiales d’asturianu

    Los primeros esámenes oficiales d’asturianu yá tienen fecha. La Conseyería d’Educación convocó les pruebes de certificación de competencia Intermediu B2. Anguaño va celebrase una única convocatoria, a la que van poder concurrir un máximu de 500 aspirantes. Les persones interesaes han presentar les sos solicitúes d’almisión ente esti xueves, día 6, y el próximu vienres 14 de febreru. Va poder tramitase nos siguientes centros: IES Aramo, n’Uviéu; IES Calderón de la Barca, en Xixón; IES Carreño Miranda, n’Avilés; o IES Bernaldo de Quirós, en Mieres. El llistáu d’inscripción definitivu va publicase’l 20 d’abril.

    Los exercicios de les cinco partes que componen la prueba de certificación de llingua asturiana van realizase en dos bloques. Nel bloque 1, que se va realizar el vienres 29 de mayu, van tener llugar los exercicios correspondientes a les partes de comprensión de testos escritos, de compresión de testos orales y de producción y coproducción de testos escritos. Nel bloque 2, que se va realizar en xornaes distintes a partir del xueves 21 de mayu, van llevase a cabu los exercicios correspondientes a la parte de producción y coproducción de testos orales y a la parte de mediación.

    El primer bloque del esamen va desarrollase íntegramente na Facultá de Formación del Profesoráu y Educación. El IES Aramo va acoyer les pruebes correspondientes al denomináu bloque 2. Tres esti primer esame, el Gobiernu asturianu va convocar polo menos una vez al añu pruebes de certificación de llingua asturiana pa un mínimu d’ún de los niveles (A1, A2, B1, B2, C1).