Xixón al día

Categoría: Asturies

  • El llaboratoriu de xenética del HUCA, a la vanguardia nel diagnósticu d’enfermedaes hereditaries

    El llaboratoriu de xenética del HUCA, a la vanguardia nel diagnósticu d’enfermedaes hereditaries

    El llaboratoriu de xenética del Hospital Universitariu Central d’Asturies (HUCA) avanzó notablemente na eficacia del so trabayu tres el so treslláu a les nueves instalaciones de La Cadellada. El departamentu asitióse a la vanguardia d’España pol númberu de pruebes que realiza añalmente, la so dificultá y los altos niveles de calidá que consigue.

    Una de les claves d’esti éxitu ye la incorporación de la técnica d’analís conocida como secuenciación masiva de nueva xeneración (NGS). L’alquisición, va cinco años, de los equipos necesarios facilitó l’usu habitual de práctiques que revolucionaron la xenómica, el diagnósticu y la conocencia d’enfermedaes hereditaries, de la que s’avanzó na medicina personalizada y de precisión.

    La incorporación de la secuenciación de nueva xeneración reforzó la posición del HUCA nel diagnósticu xenéticu dientro del Sistema Nacional de Salú (SNS). D’esta manera, permitióse evitar la derivación de munches pruebes a centros esternos y convertir l’hospital en referencia pa comunidaes como Cantabria, Castiella y Llión y Madrid.

    L’hospital ye referencia pa comunidaes como Cantabria, Castiella y Llión y Madrid

    Les pruebes que se soliciten dende fuera d’Asturies de forma más habitual tán rellacionaes con cardiopatíes, enfermedaes neurolóxiques y patoloxíes pediátriques rares. L’HUCA ye centru de referencia nacional en cardiopatíes hereditaries, enfermedaes neuromusculares o nefropediátriques y asítiase en bona posición p’ampliar esta cartera.

    L’actividá del llaboratoriu de xenética incrementóse de manera significativa, especialmente aquelles pruebes más complexes y de mayor costu, ente les que s’atopen toles qu’utilicen la metodoloxía NGS, que pasaron de 2.000 a 4.000 añales. Estes técniques, que permitieron aumentar la capacidá diagnóstica, constitúin amás una midida d’eficiencia, yá que se pasó de pagar de 800 a 900 euros por muestra analizada esternamente a un costu d’ente 200 y 300 por caúna examinada nel HUCA.

    Anguaño, bien pocos hospitales públicos ufierten un catálogu de pruebes xenétiques tan estensu como’l del centru de referencia de la sanidá asturiana, munches de les que llograron l’acreditación de la norma ISO 15189. Anguaño va sumase al conxuntu de pruebes acreditaes la NGS que s’aplica al diagnósticu de cardiopatíes.

    Una técnica en continuu progresu

    El diagnósticu d’enfermedaes xenétiques o hereditaries abórdase de distintes maneres. Antes namás s’estudiaben fragmentos pequeños de dellos xenes rellacionaos con estes patoloxíes, pero agora la NGS permite l’estudiu de cientos de xenes al empar, polo que s’eleva la especificidá y rapidez del diagnósticu.

    Por esta razón, nun mayor númberu de casos puede ufiertase asesoramientu xenéticu a los pacientes y la so redolada. Esto fai posible la realización de diagnósticos predictivos o presintomáticos y diagnósticos xenéticos prenatales o preimplantacionales que prtetenden atayar la tresmisión de la enfermedá nes families.L’usu d’esta metodoloxía potencióse pal abordaxe diagnósticu d’otres patoloxíes ya incorporóse personal especializáu pal so desempeñu.

    Toos estos asuntos van abordase na ‘I Jornada de secuenciación de nueva generación en el HUCA: un antes y un después en la medicina’, que va empezar el próximu vienres, 24 de mayu, a partir de les 9:00 hores, nel salón d’actos del HUCA y que va cuntar con espertos na materia, tanto del ámbitu de llaboratoriu como del clínicu. La doctora Carmen Díaz Ayuso, xefa del Serviciu de Xenética de la Fundación Jiménez Díaz y directora científica del el so institutu d’investigación sanitaria, va ser la encargada d’impartir la conferencia de clausura.

  • Moriyón comprométese a diseñar un plan pa «rellanzar» Perlora

    Moriyón comprométese a diseñar un plan pa «rellanzar» Perlora

    La candidata de Foro a la presidencia del Principáu, Carmen Moriyón, visitó güei les instalaciones de la Ciudá de Vacaciones de Perlora. Ellí aconceyó con diverses asociaciones vecinales de la zona. Fízolo acompañada por Carmen Fernández y Pablo González, número cuatro y siete, respectivamente, de la candidatura autonómica, y pola candidata a l’Alcaldía de Carreño, Alejandra Martínez.

    «Perlora tien una situación privilexada que dende Foru queremos aprovechar con un plan que permita optimizar el so potencial económicu y turísticu. Pa ello, güei comprometimos a consensuar colos vecinos los proyectos, los plazos y el financiamientu necesariu para rellanzar lo que güei ye un pueblo pantasma», esplicó Moriyón.

    Los dirixentes de Foru denunciaron «l’estáu d’abandonu» qu’ufierta la Ciudá de Vacaciones de Perlora con «instalaciones y equipamientos desdexaos, y con una falta absoluta de caltenimientu y llimpieza de les cais y zones verdes». Una situación qu’atribuyeron «a la desidia y falta d’idees de los gobiernos socialistes». Recordaron que «fai casi trelce años que’l Gobiernu del Principáu decidió cerrar les sos instalaciones y condergales al derrumbe».

    Otra manera, Foru propónse «consensuar colos vecinos de Perlora los proyectos que ‘espierten’ esti espaciu allugáu nuna redolada privilexada», afirmó Moriyón. “Toa Asturies ta precisada de proyectos que reactiven la economía y, ensin dulda, el complexu vacacional de Perlora nun puede caltenese zarráu por más tiempu. El turismu, el comerciu y l’hostelería local van vese beneficiaos cola so reapertura». «Perlora siempres foi un llugar abiertu, d’usu y esfrute pa los ciudadanos y asina tien de siguir», concluyó.

  • Retenciones nel Güerna pola quema d’una camión

    Retenciones nel Güerna pola quema d’una camión

    La quema d’un camión que circulaba pela autopista del Güerna (AP-66) ta provocando retenciones nel tráficu en sentíu Xixón. El sucesu producióse al altor del puntu kilométricu 71, nel conceyu de Ḷḷena. Efectivos de Bomberos del Serviciu d’Emerxencies del Principáu d’Asturies (SEPA), con base nos parques de Mieres y Llamorgal, escastaron el fueu, que xamuscó’l camión y los trés vehículos que tresportaba. Les llapaes nun alcanzaron a otru coche que treslladaba nun remolque.

    El Centru de Coordinación d’Emerxencies del 112-Asturies recibió l’avisu a les 08.20 hores. Na llamada informaben que taba quemando la cabina d’un camión que tresportaba coches na autopista del Güerna. La Sala 112 del SEPA movilizó una dotación de bomberos con base nel parque de Mieres y tamién activó otra dende’l parque central de Llamorgal con una autobomba nodriza. Tamién s’informó al Xefe de Zona Centro qu’allegó al incidente.

    Los bomberos dieron por controlada la quema a les 09.17 hores, pero permanecieron nel llugar realizando xeres de refrigeración hasta les 10.37 hores. L’incidente provocó’l pieslle de la vía en sentíu Xixón. El tráficu restablecióse momentos depués nún de los carriles.

  • Barbón: «La sidra ye parte fundamental de la economía d’Asturies»

    Barbón: «La sidra ye parte fundamental de la economía d’Asturies»

    Adrián Barbón punxo en valor la sidra esti miércoles mientres visita una visita al Llagar Frutos, en Quintueles (Villaviciosa). «Ye una parte fundamental del desenvolvimientu económicu, non solo de les nueses tradiciones», dixo. A manera d’anécdota, el candidatu a la presidencia del Principáu señaló que «Casado, cuando faltó a frixuelos y horros faltó-y la sidra» frente a la posición de la FSA-PSOE, «porque nós reivindicamos la sidra, sobremanera como parte de la crecedera económica d’Asturies».

    Adrián Barbón puntualizó que nel programa de gobiernu de los socialistes «tenemos midíes para potenciar el sector, más allá de lo que fixo’l Gobiernu del Principáu, que creo que ye enforma, sobremanera tocantes a Patrimoniu Inmaterial de la Unesco, creemos qu’hai qu’ampliar la variedá del productu, non solo la sidra tal que lo conocemos sinón otres ufiertes y otres variedaes que dexen siguir desenvolviendo’l sector”.

    En concretu, Adrián Barbón, en declaraciones a los medios, esplicó que «proponemos ampliar el númberu de variedaes de mazana que formen parte de la Denominación d’Orixe para favorecer la vienta». Nun escaeció reconocer que «tamos tamién énte una realidá periódica porque, dependiendo del añu, queda muncha mazana ensin recoyer. Queremos acompañar a productores y llagareros por que se peracaba esa mazana”, detalló sobro «un sector económicos estratéxicu en Villaivicios y en toa Asturies por eso queremos reivindicar la importancia de la sidra».

    Finalmente, pidió’l sofitu electoral al candidatu municipal, Alloñando Vega, que como alcalde «dexó ver a un gobiernu municipal serenu, tranquil y cercanu a la ciudadanía». El candidatu tuvo acompañáu na so visita por Gimena Llamedo, cabeza de llista d’Oriente, Alejandro Vega, candidatu a l’alcaldía de Villaviciosa, y Juan Cofiñu, Ángel Morales y Esther Freile, candidatos autonómicos.

  • Un escursionista cai al ríu na Sienda l’Osu

    Un escursionista cai al ríu na Sienda l’Osu

    Un home resultó mancáu en cayendo dende unos trés metros a la vera del ríu cuando s’atopaba na Sienda del Osu, pasada la esviadura para Teberga, na primer ponte percima del ríu, en Proaza. L’afectáu, un varón de 45 años, foi evacuáu nel helicópteru medicalizáu del Serviciu d’Emerxencies del Principáu d’Asturies (SEPA) al Hospital Universitariu Central d’Asturies (HUCA) n’Uviéu. L’afectáu foi asistíu nel llugar pol médicu rescatador y sacupáu, darréu, inmovilizáu, por aciu una operación de grúa a l’aeronave.

    Hasta’l llugar del accidente tamién se movieron efectivos de Bomberos del SEPA con base nel parque de Proaza que collaboraron y participaron na evacuación y rescate. Los bomberos xuntu al equipu de rescate inmovilizaron al mancáu y treslladaronlu hasta la otra vera del ríu onde l’helicópteru puedo realizar la evacuación. Na zona había un tendíu eléctricu que torgaba un mayor acercamientu. Por cuenta de más pruebes y hasta nueva valoración médica l’home presentaba politrauma de pronósticu reserváu.

    El Centru de Coordinación d’Emerxencies del 112 Asturies recibió l’avisu a les 19.40 hores. Na llamada, realizada por un guarda de la zona, indicaba qu’una persona cayérase dellos metros en venciendo la barandiella a la vera del ríu. Darréu una persona que lo vio dende l’otru llau llogró llegar hasta él y acompañalu, suxetándo-y la cabeza y tapándolu, hasta que llegaron al llugar los bomberos.

    Amás de pasar l’avisu al Serviciu d’Atención Médica Urxente (SAMU), la Sala 112 del SEPA, activó l’helicópteru medicalizado col Grupu de Rescate y a efectivos de Bomberos del SEPA con base nel parque de Proaza. L’incidente, como marca’l protocolu, tamién se punxo en conocencia de la Guardia Civil.

  • «Tenemos el PSOE más subordináu nel momentu más vital pa’Asturies»

    «Tenemos el PSOE más subordináu nel momentu más vital pa’Asturies»

    El candidatu de Ciudadanos (Cs) a la presidencia d’Asturies, Juan Vázquez espresó la so esmolición por que’l PSOE y Podemos «lleven a Asturies a un viaxe a nenguna parte». Asina lo manifestó Vázquez en La Pola Ḷḷena, mientres una visita al que fuera’l so colexu, Sagrada Familia El Pilar. «Creo qu’un PSOE con Podemos, ésti PSOE actual de la Federación Socialista asturiana, absolutamente subordináu al Gobiernu de Madrid ye la peor solución para Asturies«.

    Vázquez, criticó al candidatu socialista, Adrián Barbón, por tener un «discursu vacíu» y por dedicase a «pasiar ministros» per Asturies. «Creo que tenemos el PSOE más subordináu nel momentu más vital pa’Asturies y toi seriamente esmolecíu por ello, por eso yo llamo a los asturianos a que voten una alternativa como la nuesa, creo que somos la única alternativa real y l’única que ye capar de representar verdaderamente los intereses d’Asturies», dixo Vázquez.

    “Paezme qu’Adrián Barbón tien bones dotes pa ser delegáu del gobiernu, pero estes elecciones son a presidente del Principáu d’Asturies; son pa l’autonomía, non pa les subordinación”, concluyó’l candidatu autonómicu de Cs.

  • Ataquen a pedraes les sedes de Ciudadanos y Vox n’Uviéu

    Ataquen a pedraes les sedes de Ciudadanos y Vox n’Uviéu

    Una de les ventanes de la sede de Ciudadanos (Cs), na cai Posada Herrera d’Uviéu, apaeció rota esti martes pol impactu d’una piedra. La formación punxo en conocencia de la Policía Nacional. El secretariu d’organización del partíu n’Asturies, Sergio García, condergó estos fechos que califica de «llamentables» porque amuesen, asegura, que «delles persones nun entienden lo que ye la democracia”. García espera que sía «un fechu aislláu» y afirma que «nun nos van a amedranar porque vamos siguir trabayando na campaña tan bien como hasta agora».

    Tamién foi atacada la sede de Vox Asturies, que s’alcuentra xustu nel pisu d’arriba. «VOX Asturies conderga esti tipu d’actos qu’atenten contra la esencia mesma de la democracia y la llibertá d’espresión, y d’escoyer llibremente una opción política. Dende VOX Asturies reclamamos la condena del restu de partíos a esti tipu de fechos delictivos».

  • Educación y la Comisión Fulbright alcuerden incorporar a les aules once auxiliares de conversación d’inglés

    Educación y la Comisión Fulbright alcuerden incorporar a les aules once auxiliares de conversación d’inglés

    El conseyeru d’Educación y Cultura, Genaro Alonso, suscribió esti llunes la adenda al conveniu de cooperación que caltién el Principáu cola Comisión d’Intercambiu Cultural, Educativu y Científicu ente España y los Estaos Xuníos (Comisión Fulbright) pa la incorporación a les aules d’once auxiliares de conversación en llingua inglesa’l próximu cursu. Al actu asistieron tamién el director executivu de la Comisión Fulbright, Alberto López, y el director xeneral d’Ordenación Académica ya Innovación Educativa, Francisco Laviana.

    En concreto, la comisión va escoyer a once auxiliares de conversación que van realizar xeres de sofitu en llingua inglesa en centros docentes sosteníos con fondos públicos dende’l 16 de setiembre d’esti añu hasta’l 15 de xunu de 2020.

    L’aportación del Principáu pa completar les beques del programa d’auxiliares de conversación xube a 89.980 euros (8.180 euros por persona). Pela so parte, la Comisión Fulbright va contribuyir con 114.345 euros más. El conveniu inicial roblóse en 2017, con un añu de vixencia, y cola posibilidá de prorrogalo por aciu la correspondiente adenda.

  • Asturies promociónase en Portugal

    Asturies promociónase en Portugal

    La Conseyería d’Empléu, Industria y Turismu, al traviés de la Sociedá Pública de Xestión y Promoción Turística y Cultural del Principáu, participa nel estand col que Turespaña promociona los destinos españoles nel mercáu portugués. Esti espaciu, destináu a reforzar la Marca España y diseñáu pal públicu final, va amosase esta fin de selmana nel centru comercial Forum Sintra, en pasando por Almada Forum, dos ámbitos comerciales de referencia nel mercáu portugués.

    Asturies cunta con un espaciu individualizáu nel estand de Turespaña, que tamién comparte Andalucía, Canaries y Galicia. La so participación nesti eventu respuende al oxetivu d’impulsar la so internacionalización como destín turísticu definíu nel Programa de Turismu Sostenible 2020. Esti trabayu saldóse col aumentu del 28,8 % de la llegada de visitantes internacionales de magar se punxo en marcha.

    Portugal ye’l cuartu mercáu internacional n’importancia pal turismu del Principáu, al qu’apurre más de 30.000 viaxeros anualmente, según los últimos datos facilitaos pol Institutu Nacional d’Estadística, qu’amuesen un enclín de medría estable dende’l 2014, a un ritmu mediu del 12,5 % anual.

  • Pedro Sánchez pide en Xixón «un nuevu 28A»

    Pedro Sánchez pide en Xixón «un nuevu 28A»

    El secretariu xeneral del PSOE y presidente del Gobiernu en funciones, Pedro Sánchez, llamó esti llunes en Xixón a votar el próximu domingu para completar la xera empecipiada nes elecciones xenerales del 28 d’abril y «nun dexar la xera a medies». Si fai menos d’un mes los españoles votaron «pola xusticia social, la convivencia y la rexeneración», argumentó’l líder socialista, agora hai que votar de nuevu pol PSOE, l’únicu proyectu que «garantiza’l futuru, la meyora y l’estabilidá», y por que l’Executivu central, les comunidaes y los conceyos «remen na mesma dirección».

    Namás asina, esplicó Sánchez énte 3.000 persones en Xixón, va consiguise que la meyora n’España sía «atayante». Porque si les alministraciones autonómiques y locales nun comparten l’apueste del Gobiernu central pola educación pública, la sanidá pública, el trabayu dignu, la estabilidá y el poder adquisitivo de les pensiones y la necesidá de garantizar l’accesu a la vivienda, argumentó’l númberu unu del PSOE, «la meyora nun va ser tan atayante». Por eso, pa llograr un cambéu contundente y progresista nel nuesu país, Sánchez llamó a faer del 26M «un nuevu 28A«. Porque «si’l 28A votamos meyora y futuru, el 26M tenemos que votar meyora y futuru», sintetizó.

    Sánchez apeló a los mozos, a quien prometió convertir esta llexislatura nel mandatu «de les oportunidaes» pa ellos, y a les muyeres que «votaron de manera masiva al PSOE», y quien convocó pa dicir «ultraclaro» a la derecha que quieren «feminismu, convivencia y nin un pasu tras» na defensa de los sos derechos y llibertaes. Coles mesmes, el socialista calificó de «fundamental» votar socialista al Parlamentu Européu, porque España y el PSOE son vistos «como un exemplu» a nivel comuñal tres el 28A, cola «enorme responsabilidá» qu’ello trai, y porque agora tenemos «la oportunidá de qu’haya un presidente socialdemócrata» na Comisión Europea y, por tanto, de construyir una Europa distinta.

    «Qué bien recuperar Xixón pa la xente, pa la xusticia social, qué bien tener una alcaldesa feminista que trabaye pola democracia y qué bien Ana González como alcaldesa», empezó deseyando la vicesecretaria xeneral del PSOE na so intervención, na que recordó que «esti mes cumplimos 140 años, somos el partíu con más solera y con más futuru d’esti país», ensin escaecer tampoco Adriana Lastra los recordatorios de que se va a cumplir un añu de la sentencia de la Gürtel, que provocó xuna moción de censura, y dos años d’unes primaries que volvieron xunir al PSOE».

    «Si’l 28A votamos pa parar a la ultraderecha, el 26M tenemos que frenala tamién», reclamó Lastra porque, «si va un mes votamos pa garantizar les pensiones, agora tenemos que votar pa garantizar la sanidá asturiana, el meyor d’España». La vocera socialista nel Congresu remató’l so discursu reivindicando l’arguyu de gobernar esta rexón y gracies a ello tenemos la meyor sanidá, educación y los meyores servicios públicos que son la envidia de toos».

    «Un candidatu a presidente y seis candidatos a liderar la oposición»

    P’Adrián Barbón, que tuvo una alcordanza cariñosa pa los padres de Joaquín, el compañeru de Llangréu fináu apocayá, constató que «somos l’únicu partíu que tamos faciendo campaña porque hai candidatos que van de mercáu en mercáu pero qu’entá nun fueron capaces de xuntar a 10 persones nun mitin». Nesti sentíu, concluyó: «solo hai un candidatu a presidente, los otros seis son candidatos a liderar la oposición».

    En reclamando sofitu «por que Jonás siga siendo eurodiputáu y ganar en Xixón con Ana, que tien valentía, calter y firmeza por qu’haya futuru nesta ciudá», Adrián Barbón dio les gracies a Pedro Sánchez, «que ye la sesta vegada que ta n’Asturies desque ye secretariu xeneral».

    El candidatu a la presidencia del Principáu argumentó que les razones pa votar el PSOE son «que damos estabilidá». Tamién, dixo, «porque gracies a la nuesa influencia l’axenda de asturias vuelve tar nel Conseyu de Ministros dempués de siete años que nun s’alcordaben de qu’esistía Asturies, notar col Plan d’Hunosa, el Plan de Víes o la medría de les compensaciones poles emisiones de CO2″.

    Adrián Barbón, que recordó la importancia de la qu’UE ponga un arancel ambiental «pa protexer la nuesa industria», nun evitó comparar «a un presidente que vieno a Asturies a falar con vaques con otru presidente como Pedro Sánchez que vieno falar cola xente, con cercanía, nes cais d’Uviéu y agora ta nesti actu en Xixón».

    «Yo nun quiero l’erru d’Andalucía, d’un gobiernu de la derecha cola estrema derecha», dixo, y alvirtió de qu’a un cuartetu de la involución nun los dexaría nin gobernar una comunidá de vecinos, como pa dexa-yos gobernar Asturies», clamó. Y remató avisando «que non se coloree Ciudadanos porque, si suma cola derecha, gobierna cola derecha». Y ente encendíos aplausos, reclamó «emoción ya ilusión porque’l meyor futuru d’Asturies ta por construyir. Ye mentira que nun hai futuru p’Asturies. Vamos consiguir que la xente crea en nós, vamos construyir el meyor Asturies».

    Ana González, pela so parte, recordando que «tu lo consiguisti Pedro’l 28A y nós vamos ganar n’Asturies y volveremos recuperar Xixón», aseguró la candidata a l’alcaldía, porque «Xixón precísanos, hai un clamor na cai. Ye’l nuesu momentu, vamos iguar Xixón tres ocho años bien duros nos que tán gobernando queríen destruyir el modelu del PSOE«.