Xixón al día

Etiqueta: 26-M

  • Martín propón «modernizar tolos equipamientos deportivos»

    Martín propón «modernizar tolos equipamientos deportivos»

    Aurelio Martín, candidatu a l’Alcaldía de la coalición Xixón por la Izquierda, propunxo esti martes el desenvolvimientu de «un plan para modernizar en cuatro años tolos equipamientos deportivos municipales que non solo acusen el pasu del tiempu sinón, y, sobremanera, el d’un Gobiernu de dereches que nun quixo o nun supo caltenelos». Martín aconceyó esti martes pela tarde cola Asociación de Clubes de Fútbol Base de Xixón. Nesi alcuentru, recordó cómo «los mugores, cuando non les goteres, les ventanes rotes y toa triba de desperfectos fueron una constante en piscines, campos de fútbol y polideportivos a lo llargo d’estos postreros cuatro años ensin que’l Gobiernu de Foru diéra-yos solución». El candidatu considera necesaria una «intervención de choque que ponga frenu rápido al deterioru que sufren los equipamientos deportivos municipales».

    Al pie de ello, Martín apostó por «executar les obres pendientes, como les del Xixón Industrial o’l campu de fútbol femenín» y por estudiar «nuevos equipamientos en barrios con necesidaes nesta materia». Introducir una xestión enerxética eficiente nes instalaciones, caltener el so calter públicu, apostar pola promoción del deporte escolar y del deporte base, establecer una llínea de sofitu y financiamientu específicu al deporte femenino, y facilitar l’accesu a la práctica deportiva a persones con diversidá funcional, son otros de los compromisos de la coalición IX-IAS pa los próximos cuatro años.

    Pela so parte, Víctor Martínez comprometió’l sofitu de Xixón por la Izquierda pa «diseñar un nuevu sistema de repartida de les subvenciones ente los clubes del fútbol base». El candidatu propón «una mayor collaboración del Conceyu nel caltenimientu de los campos que dexe a los clubes que los xestionen abaratar los costos», asina como «asumir dende’l Patronado Deportivu Municipal el seguru principal de les instalaciones».

  • «Tenemos el PSOE más subordináu nel momentu más vital pa’Asturies»

    «Tenemos el PSOE más subordináu nel momentu más vital pa’Asturies»

    El candidatu de Ciudadanos (Cs) a la presidencia d’Asturies, Juan Vázquez espresó la so esmolición por que’l PSOE y Podemos «lleven a Asturies a un viaxe a nenguna parte». Asina lo manifestó Vázquez en La Pola Ḷḷena, mientres una visita al que fuera’l so colexu, Sagrada Familia El Pilar. «Creo qu’un PSOE con Podemos, ésti PSOE actual de la Federación Socialista asturiana, absolutamente subordináu al Gobiernu de Madrid ye la peor solución para Asturies«.

    Vázquez, criticó al candidatu socialista, Adrián Barbón, por tener un «discursu vacíu» y por dedicase a «pasiar ministros» per Asturies. «Creo que tenemos el PSOE más subordináu nel momentu más vital pa’Asturies y toi seriamente esmolecíu por ello, por eso yo llamo a los asturianos a que voten una alternativa como la nuesa, creo que somos la única alternativa real y l’única que ye capar de representar verdaderamente los intereses d’Asturies», dixo Vázquez.

    “Paezme qu’Adrián Barbón tien bones dotes pa ser delegáu del gobiernu, pero estes elecciones son a presidente del Principáu d’Asturies; son pa l’autonomía, non pa les subordinación”, concluyó’l candidatu autonómicu de Cs.

  • Podemos-Equo propón que los colexos tengan cocina propia

    Podemos-Equo propón que los colexos tengan cocina propia

    Los colexos de Xixón precisen d’una puesta a puntu urxente nes sos instalaciones. Asina lo considera la coalición Podemos-Equo Xixón, que propón la realización d’un plan de choque d’obres nes escueles de la ciudá: «Son obres de caltenimientu o ampliación, yá que gracies a la desidia del Gobiernu del PSOE nel Principáu y de Foru nel Conceyu abasnen un bon númberu d’obres pendientes», señala Yolanda Huergo, candidata a l’alcaldía de Xixón pola coalición.

    La coalición entiende qu’habría que destinar un millón d’euros pa cubrir les actuales faltes. Un centru que exemplifica estes necesidaes ye’l CP Martínez Torner, que Huergo y Mario Suárez del Fueyo, secretariu xeneral de Podemos Xixón. Huergo llamenta que dende la entrada «yá se percibe la necesidá d’asitiar elementos disuasorios de la velocidá de los automóviles, yá que son pocos los que cumplen la llende de 30 Km/hora que se marca na zona». «Tamos énte un problema claru de seguridá pal alumnáu, que se xune a la cayida de cascotes del bistechu, lo que fai ver la necesidá ya intervenir lo antes posible”, remarca la candidata a l’alcaldía.

    Asina, dende ochobre de 2017, cuando cayeron los primeres cascotes, la comunidá educativa del CP Martínez Torner ta a la espera de que se iguen los bistechos: “El Conceyu fixo un parcheo, pero nun volvieron saniar la zona dende entós. Ye una cuestión que nos esmolez enforma, yá que ye peligrosu pa los neños y ye un problema que s’estiende por tola zona del perímetru escolar ensin que faigan nada, a pesar de que lo reclamemos reiteradamente a la Corporación”, afirma Patricia Toribio, presidenta de la AMPA.

    «Dícennos nun coyamos a tantos neños nel comedor, pero si van ye por necesidá, non por caprichu»

    Otra de les necesidaes ensin cubrir del centru ye l’ampliación del comedor escolar. Trátase d’un centru con casi 500 alumnos y, d’ellos, más d’un centenar asisten al comedor. Sicasí, al quedase pequenu, esti serviciu dase en dos veces: «La solución que nos dan ye que nun coyamos a tantos neños nel comedor, pero si los neños van al comedor ye por necesidá, non por caprichu», puntualiza la presidenta de la AMPA. Por esti motivu, la única solución que ven ye la d’ampliar les instalaciones del comedor.

    Nesta llínea, Podemos-Equo Xixón entiende que los centros tendríen que dotase de cocina propia: «Queremos fomentar asina una alimentación más saludable y un consumu de productos de km0, una midida cola qu’al empar se pretende fomentar el consumu y la producción local», apunta Huergo. Otra de les demandes ensin cubrir dende va dos años nel CP Martínez Torner ye l’ampliación de la cubierta del patiu d’Infantil, yá que cuando llueve l’alumnáu d’Infantil tien de treslladase a otres zones. Igualmente, el pavimentu del patiu foise sedando col pasu del tiempu y la filtración d’agua, «con pequenes dunes de formigón que reclamemos iguar», indica Demelsa García, collaboradora del AMPA.

  • Martín reivindica IX como la fuerza “que garantiza que gobierne la izquierda”

    Martín reivindica IX como la fuerza “que garantiza que gobierne la izquierda”

    Aurelio Martín, candidatu a l’Alcaldía de la coalición Xixón por la Izquierda, repitió esta mañana’l compromisu de la so fuerza política por trabayar tamién dende l’ámbitu municipal «pa poner fin a la precariedá llaboral y a la discriminación salarial que sufren les muyeres trabayadores». Fízolo mientres un alcuentru con trabayadores del sector de minoristes d’alimentación de Xixón, a quien reconoció y estimó «la so capacidá d’organización, reivindicación y llucha polos derechos llaborales». El candidatu d’IX-IAS aseguró que’l votu a la coalición ye un votu útil qu’asegura que dempués del 26 de mayu nun haya xiros al centru derecha. Somos la fuerza que garantiza qu’en Xixón gobierne la izquierda comprometida colos trabayadores”.

    La númberu cuatro de la candidatura, Arantxa Carcedo, pela so parte, manifestó «el sofitu de la candidatura de Xixón por la Izquierda a los trabayadores del sector» y denunció unes «condiciones llaborales miserables, con salarios bien baxos y con munches dificultaes pa conciliar la vida llaboral y personal». Carcedo recordó’l «‘basta yá’ que trabayadores del sector dixeron mientres la convocatoria de fuelga del pasáu mes d’avientu» y comprometió el sofitu d’IX-IAS «nos retos futuros para ameyorar les sos condiciones llaborales».

  • Gimena Llamedo: «Queremos avanzar hacia la gratuidá de los museos»

    Gimena Llamedo: «Queremos avanzar hacia la gratuidá de los museos»

    La cabeza de llista del PSOE nel Oriente d’Asturies, Gimena Llamedo, na so visita esta tarde, con motivu del Día de los Museos, el Muséu del Xurásicu d’Asturies (MUJA) en compañía de Josep Borrell, cabeza de llista del PSOE a les elecciones europees y l’alcaldesa de Colunga, Sandra Cuesta.

    Tres la visita, Llamedo punxo en valor el muséu con mayor númberu de visitantes al pie de Tito Bustillo, anunció que «ún de los compromisos colos que’l PSOE se presenta a les próximes elecciones ye avanzar, en casu de gobernar, hacia la gratuidá nes visites a los museos que sían titularidá del Principáu«. «Trátase», esplicó, «d’una midida con un doble oxetivu: per una parte, faer accesible la cultura a tolos ciudadanos, y por otru, amontar el númberu de visitantes».

    «Trátase d’una midida», siguió Llamedo, «yá enllantada con notable ésitu n’otros países d’Europa que contribuyó al aumentu de visites». Por tanto, considera que «va ser un elementu de dinamización de la zona y un impulsu económicu más para la Contorna del Oriente, y para Asturies polo xeneral»

  • Podemos-Equo apuesta por que’l Grau de Deportes s’implante en Xixón

    Podemos-Equo apuesta por que’l Grau de Deportes s’implante en Xixón

    «L’actividá deportiva ye un de les pilastres fundamentales del Estáu del Bienestar y, nesti sentíu, l’apueste pol deporte de Podemos-Equo Xixón en tolos niveles y modalidaes ye claro”, afirma Yolanda Huergo, candidata a l’alcaldía pola coalición. Dende esti convencimientu, la candidatura defende que Xixón sía la see del Grau de Ciencies de l’Actividá Física y el Deporte: “Equí cúmplense los requisitos fundamentales para faelo posible, dende la Universidá pública y, más allá de localismos, entendemos que Xixón axunta les meyores condiciones para ello”, caltien Huergo.

    Al empar, teniendo en cuenta que los clubes y equipos deportivos son una pata fundamental del texíu social de la ciudá, la coalición considera que ye necesario da-yos toles facilidaes posibles: «Más qu’acorvia-yos con burocracia, tenemos qu’acompañar a esti texíu entainando les ayudes, yá que hai munchos d’esos clubes que nos dan tantes allegríes nos deportes dependen d’esta collaboración pública para sobrevivir, pero frecuentemente tienen de faelo dende’l voluntarismu y los esfuerzos personales polos retrasos continuos colos que s’abonen les subvenciones”, apunta la númberu unu de Podemos-Equo Xixón.

    Na mesma llínea, la coalición quier garantizar que tola ciudadanía tenga accesu a la práctica del deporte n’igualdá de condiciones: “Para ello precisamos tener toles infraestructures al altor de lo que merecen los xixoneses y por eso vamos realizar un plan de choque para revisar cuál ye l’estáu de toles instalaciones de tolos barrios y espacios de Xixón y cubrir les faltes que se detecten. L’oxetivu ye que toles persones que quieran practicar l’actividá física nes nueses siendes, nel nuesu mediu natural tan maraviyosu o nes instalaciones deportives tengan les mesmes oportunidaes moren onde moren”, añede Laura Tuero, númberu dos de la candidatura.

  • Juan Vázquez: «Celebro qu’otros partíos empiecen a falar de les oportunidaes d’Asturies»

    Juan Vázquez: «Celebro qu’otros partíos empiecen a falar de les oportunidaes d’Asturies»

    El candidatu de Ciudadanos (Cs) a la presidencia d’Asturies, Juan Vázquez, celebró esti xueves que los mensaxes de la so formación tean empezando a calar y vaigan per delantre na campaña. «Yá veo qu’otros partíos empiecen a falar de les oportunidaes d’Asturies», dixo. Vázquez manifestó amás que la posición de centru de Ciudadanos, «ye agora acobiciada por munchos pero llamentó que sía una posición que revele «poco convencimientu porque son cambeos de fin de selmana».

    «Veo tamién un desfile de ministros continuu del gobiernu de Pedro Sánchez per Asturies, aprovechen pa velos agora», aseguró Vázquez, «porque depués nun sé si van volver». Ye l’amuesa del preste y la sumisión” que’l PSOE de Pedro Sánchez n’Asturies tien respectu del Gobiernu Central, añedió’l candidatu de Cs. Y esi sentíu aprovechó pa #preguntar a la Ministra d’Economía, Nadia Calviño, “si la meyor Asturies ye l’Asturies que según los datos qu’apaecieron apocayá, tuvo’l peor rexistru de crecedera económica nos diez últimos años, a lo cabero con una crecedera negativa de 4 puntos y medio, mientres otres comunidaes crecieron el 12, el 10”.

    Tamién se quixo referise Vázquez a la Ministra de Sanidá, María Luisa Carcedo, «querdría preguntar si la so dedicación a la campaña n’Asturies déxa-y resolver el problema seriu de desabastecimiento farmacéuticu que tien a munchos asturianos de farmacia en farmacia, buscando melecines fundamentales pa los sos tratamientos». Mentanto, concluyó la cabeza de llista autonómicu de Cs, nós tamos «conociendo l’Asturies real, l’Asturies de les oportunidaes, l’Asturies con capacidá pa xenerar actividá, dinamismu, empléu, que ye lo que precisa esta rexón».

  • Adrián Barbón comprométese a duplicar les places de 0 a 3

    Adrián Barbón comprométese a duplicar les places de 0 a 3

    Na visita a la escuela de 0 a 3 ‘El Carmín’, en La Pola Siero, Adrián Barbón recordó que “la rede d’escueles de 0 a 3 foi una creación del PSOE. Aprobóse nun Congresu socialista y una alministración socialista punxo en marcha dempués ta rede de centros educativos como esta escuela de Siero, que lleva 16 años funcionando”, destacó.

    Nesti sentíu, el candidatu a la presidencia del Principáu, amosó’l so compromisu en “sofitar la necesidá de doblar el númberu de places de 0 a 3 en Siero pola demanda qu’esiste y que ye entendible”. Anunció que “les nueses propuestes, que se recueyen nel nuesu programa a nivel xeneral, son doblar, a lo menos, el númberu de places de 0 a 3 n’Asturies y, en tolos conceyos onde haya demanda d’una escuela de 0 a 3, lleguemos a toos nesta llexislatura”. Nestos momentos hai 39 escueles “y tenemos qu’ampliar pa llegar a tolos conceyos onde haya demanda”

    Per otra parte, Adrián Barbón espresó públicamente, en declaraciones a los medios, el so “sofitu a la candidatura d’Ángel García, Cepi, la única que da estabilidá y futuru y tien esperiencia de gobiernu. L’alcalde de Siero y candidatu a la reeleción, Ángel García, informó que se va construyir una nueva escuela de 0 a 3 en Pola de Siero para doblar les plaza y que se van ampliar les places de la de Llugones “por que nenguna neña nin neñu de Siero quede ensin plaza”.

  • Carmen Moriyón: «Asturies ta en tiempu de descuentu»

    Carmen Moriyón: «Asturies ta en tiempu de descuentu»

    La candidata de Foru a la presidencia d’Asturies, Carmen Moriyón, presentó esti miércoles  les midíes del programa electoral del so partíu en materia fiscal, concebíes para “impulsar l’actividá económica, frenar la despoblación y acabar cola discriminación d’Asturies con d’otres Comunidaes”. “Estes midíes fiscales son les primeres que presentamos porque busquen llograr un impactu socioeconómicu relevante y son la canal pela que más rápido pueden fluyir los cambeos que precisa Asturies”, indicó Moriyón. “Asturies ta nel tiempu de descuentu; hemos de ser prácticos y centranos nes soluciones a los graves problemes d’emponen a esti territoriu a la desertización industrial y demográfico”, alvirtió.

    Ente les propuestes de Foru, Moriyón destacó l’amenorgamientu de la tarifa autonómica del IRPF en tolos sos tramos y de forma progresiva nun superando’l postreru d’ellos el tipu del 21%. Nel mediu rural, Foru propón midíes de discriminación diferenciada. “Nun pueden pagar lo mesmo quien carecen de servicios que sí disponen les ciudaes”. En materia d’IRPF plantégase una deducción de 30% de los gastos n’escueles infantiles, centros infantiles o personal contratáu pal cuidáu de fíos de 0 a 3 años pa contribuyentes qu’afiten la so residencia habitual y caltener la fecha de devengu del impuestu.

    Foru tamién propón ameyorar la deducción por arriendu de vivienda habitual, con oxetu d’atender les necesidaes de colectivos que nun pueden aportar a la compra d’una vivienda (menores de 35 años ente otros), frenar la perda de población nel mundu rural y promover la reactivación d’esti sector.

    Moriyón recordó tamién que Foro vien reclamando un nuevu sistema de financiamientu autonómicu. Con esi oxetivu va promover la reforma del modelu actual que garantice la suficiencia y l’igualdá nos servicios públicos fundamentales, redefiniendo les necesidaes de gastu y teniendo bien en cuenta, les singularidaes que presenta Asturies, como la dispersión y l’avieyamientu de la nuesa población.

  • Huergo: «Queremos facer de Xixón un referente tecnolóxicu n’I+D+i»

    Huergo: «Queremos facer de Xixón un referente tecnolóxicu n’I+D+i»

    Yolanda Huergo, candidata a l’alcaldía de Podemos-Equo Xixón, y Juan Chaves, integrante de la candidatura, caltuvieron esti miércoles una xunta cola Asociación Cluster TIC d’Asturies para presenta-yos les sos propuestes en materia económica y d’empléu con valor añedíu de la coalición. “Esta ciudá tien blimes, tien persones con iniciativa y una Universidá innovadora. Con too ello, la coalición Podemos-Equo Xixón venimos xenerar les polítiques y les sinerxes que faigan de Xixón un referente tecnolóxicu n’I+D+i y dinamizador d’un empléu llimpiu y con valor diferencial”, afirmó Huergo, candidata a l’alcaldía.

    Pa consiguilo, la coalición considera que ye preciso “dar continuidá a la collaboración público-privada de los programes impulsaos pol Conceyu venceyaos con Europa, el Cluster TIC, el Parque Tecnolóxicu y l’Universidá pa crear un texíu social, económicu y empresarial que xenere empléu calidable y de valor añedíu cola implicación de too el texíu tecnolóxico que yá esiste en Xixón y que realiza la so actividá en redol al Cluster TIC”, caltuvo Juan Chaves.

    Asina, el principal oxetivu ye la «xeneración d’oportunidaes d’empléu y autu empléu» pa les persones qu’estudien tantu na Universidá como en centros de formación profesional. El papel de l’alministración nesti sentíu va ser «facilitar les infraestructures que dexen xenerar valor pa la creación d’empléu calidable», dende Xixón, pa intentar evitar la fuga de la mocedá. Un puntu que tien de complementase col sofitu a les empreses locales pa que puedan retrucar los servicios de Xixón n’otres ciudaes fomentando la so internacionalización, señala la coalición nuna nota de prensa.

    Igualmente, la coalición tien por oxetivu desenvolver una base económico-industrial diversificada y d’altu valor añedíu. Nesta llínea va l’apueste pol Parque Tecnolóxicu y del Mar na nueva zona industrial d’El Natahoyo, contemplada nel Plan Xeneral d’Ordenación [PDF]: “Esti desenvolvimientu tien de ponenos na sienda de la economía azul y pa ello pretendemos impulsar la creación d’empreses innovadores por aciu mecanismos d’incubación de xeneración centrífuga (spin-off) nes actividaes de acuicultura, turismu costeru, biotecnoloxía, enerxía oceánica y esplotación de los fondos marinos”, espuso la candidata de Podemos-Equo Xixón. Nel marcu d’esta estratexa, la coalición va encamentar al Principáu a introducir los estudios de Ciencies del Mar nel campus de Xixón.

    La candidatura liderada por Huergo apuesta poles enerxíes llimpies y comprométense a  crear una comercializadora enerxética pública d’enerxía anovable. “Esta comercializadora suministraría, nuna primer fase, a les instituciones municipales, pa abrir dempués a otres entidaes y a la ciudadanía”, señala.

    En sintonía con esta iniciativa diría tamién l’apertura d’una Oficina d’Asesoría Enerxética  coles mires d’ameyorar la eficiencia enerxética, tantu nos ámbitos municipales como de les empreses que quieran sumase al programa. Esta Oficina, amás, va asesorar a la ciudadanía en relación a les grandes suministradores (llectura de factures, potencia contratada, solución de problemes). Al empar, va asumir les xestiones y costos derivaos de que cualquier particular o grupu de particulares qu’exerzan el so derechu al autoconsumo enerxéticu puedan sacar rendimientu económicu venciendo a la cooperativa enerxética’l so escedente de producción.

    Estes apuestes en materia enerxético van dexar afondar nesa collaboración público-privada en cuestiones rellacionaes cola eficiencia enerxética: “Esta collaboración ye la base pa que surdan empreses auxiliares capaces de crear puestos de trabayu calidable”, apunta Chaves.