Xixón al día

Etiqueta: Equo

  • El PSOE barre en Xixón y recupera l’Alcaldia

    El PSOE barre en Xixón y recupera l’Alcaldia

    Folixa na Casa’l Pueblu de Xixón. El PSOE barrió esti domingu nes elecciones municipales y llogró una bultable victoria al sumar once conceyales. La candidatura d’Ana González llogró’l sofitu de 46.465 xixoneses, 11.360 papeletes más que va cuatro años, lo qu-y abre dafechu les puertes de l’Alcadía. La socialista amosóse satisfecha tres conocer el resultáu del escrutiniu. «Siéntome yá alcaldesa».

    El PSOE tendralo fácil pa llograr l’Alcaldía. Ana González va poder ser alcaldesa de la ciudá en solitariu. La suma de les cuatro fuercies de la derecha ye de doce conceyales, una cifra que nun algama la mayoría absoluta (14). La Llei de Réximen Electoral Xeneral establez qu’en casu de nun algamáse mayoría, l’alcaldía ye pal candidatu de la llista más votada. Y nesi casu, Ana González ye la clara ganadora.

    Pactos

    Lo que sí va necesitar la candidata socialista son pactos pa sacar alantre les sos midides. La   próxima alcaldesa de la ciudá va poder buscar la complicidá de Podemos-Equo. La coalición que llidera Yolanda Huergo queda con la metá de los conceyales que tenía Xixón Sí Puede. Dexa pel camín 13.742 votantes, pasa del 21,10% del votu al 11,87% y queda con tres representantes nel Plenu, suficientes pa sumar la mayoría col PSOE. La candidatura Xixón por la Izquierda, d’IX y IAS, tamién vio amenorgada la so representación na Casa Conceyu, al pasar de dos a un conceyal y 3.109 papeletes menos.

    Ún de los grandes trunfadores de la nueche foi Ciudadanos. La candidatura de José Carlos Fernández Sarasola sumó 10.103 votos y tres conceyales, convirtiéndose na segunda fuercia política de la ciudá. Foru pasa a la tercer posición con tres representantes. La candidatura d’Álvaro Muñiz pierde más de la metá de la representación que llograra Carmen Moriyón en 2015. El PP d’Alberto López-Asenjo caltuvo los tres conceyales colos que ya cuntaba. Bon resultáu pa Vox, qu’entra con dos conceyales. Eladio de la Concha atropó 9.517 votos, un 7,01%.

  • Yolanda Huergo: «Nun ye’l resultáu qu’esperábemos»

    Yolanda Huergo: «Nun ye’l resultáu qu’esperábemos»

    Yolanda Huergo nun ocultó esti domingu la so decepción pol resultáu de la coalición Podemos-Equo nes elecciones municipales d’esti 26-M. «Nun ye’l resultáu qu’esperábemos. Cometimos errores y tenemos qu’asumilos», esplicó depués de felicitar al PSOE pol so trunfu. «Tamos onde la ciudadanía nos quixo colocar», aseguró, al tiempu que destacó que los tres conceyales de la formación van ser decisivos: «La nuesa presencia ye importante nes instituciones y tenemos munches ganes».

    Huergo nun quixo entrar en valoraciones, anque achacó’l mal resultáu al arrastre de la victoria socialista nes caberes elecciones xenerales. «Vamos poner tol nuesu enfotu en llevar a cabo les polítques que creemos que tenemos que sacar alantre. «La renta social, les escueles de 0 a 3 son pilancos fundamentales na nuestra manera de tar nes instituciones», concretó.

    «Nun podemos defraudar»

    El secretariu xeneral de Podemos na ciudá, Mario Suárez del Fueyo, valoró esti llunes que la coalición caltuvo 16.118 votos y el 12,8% con tres conceyales. «Nun podemos defraudar a la xente que nos votó. La renta social, la llucha contra la contaminación, la depuradora del Esta… Esi va ser el nuesu trabayu». Del Fueyo llamentó la falta d’entendimientu con Izquierda Xunida pa sacar alantre una candidatura conxunta y nun descartó un pactu con Ana González. «El PSOE tien una mayoría que-y permite gobernar y va ser el PSOE quien decida cómo va xestionar esa mayoría».

  • En directo: la participación baxa tres puntos en Xixón

    En directo: la participación baxa tres puntos en Xixón

    🕗 20.01 | Pisellen los colexos electorales, entama’l recuentu.

    🕗 18.22 | La participación a les 18 hores en  ye del 47,34%, tres puntos más baxa que va cuatro años (50,28%).

    🕗 14.03 | Primeros datos de participación n’Asturies. Hasta les 14 hores votó’l 32,86%, casi un puntu menos que va dos años (33,66%). Na circunscripción central pasóse del 33,82% de 2015 al 31,53%. Tamién baxa la participación nes elecciones municipales: del 33,71% al 32,79%. Nel casu de Xixón la baxada ye del 34,53% al 32,97%.

    🕗 13.40 | Na Escuela de Maxisteriu d’Uviéu votó’l candidatu de Ciudadanos a la presidencia del Principáu, Juan Vázquez.

    🕗 13.06 | Pablo Casado votó en Madrid agradeciendo’l trabayu d’apoderaos ya interventores del PP.

    🕗 12.50 | «Oxalá la participación sía bien alta. Siempres ye importante que la xente movilícese votando en conciencia», dixo Pablo Iglesias, secretariu xeneral de Podemos, depués de votar.

    🕗 12.30 | Yá votó tamién Aurelio Martín, candidatu  l’Alcaldía de Xixón por la Izquierda. Fízolo nel IES Emilio Alarcos.

    🕗 12.10 | Albert Rivera, de Ciudadanos, votó en Madrid «pola llibertá, la igualdá y la dignidá».

    🕗 11.50 | Depués de votar, Adrián Barbón animó a la ciudadanía a votar porque «del votu depende too». El candidatu de la FSA-PSOE aseguró nun tar nerviosu y dixo tener la esperanza d’un futuru pa «la meyor Asturies».

    🕗 11.34 | La candidata de Foru Asturies a la presidencia del Principáu votó nel Palaciu de Deportes de Xixón. «Hoy tienen que hablar los asturianos y asturianas», declaró Carmen Moriyón depués votar.

    🕗 11.07 | Pela so parte, Ana González, votó nel Antiguu Institutu. La candidata del PSOE a l’Alcaldía de la ciudá animó a los xixoneses a dir a votar: «Tenemos que pensar en qué modelu de ciudá queremos».

    🕗 11.05 | El candidatu de Foru Asturies a l’Alcaldía votó nel pabellón de deportes de L’Arena.

    🕗 10.44 | Tamién votó, nel Nicanor Piñole, el candidatu de Por Gijón, David Alonso.

    🕗 10.35 | El presidente del Gobiernu saliente, Javier Fernández, yá votó nel colexu Río Piles.

    Yolanda Huergo votó pasaes les diez de la mañana nun colexu de Laviada. / Podemos
    Yolanda Huergo votó pasaes les diez de la mañana nun colexu de Laviada. / Podemos

    🕗 10.15 | La candidata de la coalición Podemos-Equo a l’Alcaldía de Xixón, Yolanda Huergo, votó pasaes les diez de la mañana nel colexu públicu de Laviada.

    🕗 10.10 | José Carlos Fernández Sarasola, candidatu de Ciudadanos a l’Alcaldía, foi’l primeru en votar. Fízolo nel colexu de Begoña.

    Pedro Sánchez vota nes elecciones municipales y autonómiques d'esti domingu 26-M.
    Pedro Sánchez votó nun colexu de Pozuelo de Alarcón (Madrid). / PSOE

    🕗 10.00 | El presidente del Gobiernu central en funciones, Pedro Sánchez, foi’l primer llíder nacional n’exercer el so derechu al votu. Fízolo acompañáu de la so pareya, Begoña Gómez, en Pozuelo de Alarcón (Madrid).

    🕗 9.05 | Normalidá n’apertura de los colexos electorales n’Asturies.

    🕗 8.02 | Los colexos electorales van permanecer abiertos hasta les ocho de la tarde. A esa hora va empezar l’escrutiniu. Dada la coincidencia de trés procesos electorales, l’orde en que se va llevar a cabu’l recuentu va ser el siguiente: comicios al Parlamentu Européu, municipales y autonómicos. Los resultaos provisionales van poder consultase na web www.resultadoselecciones2019.asturias.es y a través de la app oficial d’estos comicios.

    🕗 8.00 | 973.736 asturianos tan llamaos a votar nesta triple cita electoral (municipales, autonómiques y europees). Asturies cunta con 615 locales electorales distribuyíos nos 78 conceyos, onde tan instalaes 1.573 meses.

  • Podemos-Equo márcase como prioridá acabar cola contaminación de les agües

    Podemos-Equo márcase como prioridá acabar cola contaminación de les agües

    La sablera de San Llorienzo foi’l llugar escoyíu por Podemos-Equo Xixón pal so últimu actu de campaña pa llamar l’atención sobro la necesidá d’actuar p’acabar colos episodios de contaminación de les agües: «Escoyimos esti llugar simbólicamente porque ye una sablera y un mar que ye fonte de vida y una de les ventanes principales de la nuesa ciudá escontra’l mundu. Merez toa nuesa atención», afirmó Yolanda Huergo, candidata a l’alcaldía pola coalición.

    La contaminación na sablera y a lo llargo de tola mariña ye ún de los retos fundamentales nel mandatu qu’empieza: «Equí arrama la ría d’Aboño, El Piles, l‘emisariu de Peñarrubia, calces que precisen llimpieza… Son munchos aspeutos a los que faer frente, una y bones los problemes de contaminación nun deriven d’una sola causa, sinón de munches, y ye precisu actuar énte toes elles», caltuvo la númberu ún de Podemos-Equo Xixón.

    Cuestiones como tener en Xixón xuna rede separativa d’agües pluviales y fecales, dar respuesta a la depuración na zona este de la ciudá o terminar de construyir los pozos de tormentes son puntos que Podemos-Equo Xixón lleva nel so programa electoral. «Nel próximu mandatu tenemos que sentanos dende’l primer minutu a tratar esti problema. Nun podemos dexanos episodios como los que se vivieron el branu pasáu», señaló Huergo.

    Huergo responsabilizó directamente al equipu de Gobiernu de Foru y «a los heriedos de los gobiernos socialistes d’años anteriores que nun s’asumieron responsabilidá política». «Esta cuestión nun puede esperar más. Confío en cuntar col consensu de tolos miembros de la Corporación pa priorizar tolo que tien que ver col resolvimientu d’estos problemes y l’ayuda evidente del Principáu de Asturies y el Ministeriu de Mediu Ambiente», indicó.

  • Encuesta: ¿qué partíu crees que va ganar les elecciones en Xixón?

    Encuesta: ¿qué partíu crees que va ganar les elecciones en Xixón?

    Xixón decide esti domingu cuál va ser la composición del Plenu del Conceyu pa los vinientes cuatro años. Siete fuercies polítiques cunten con opciones de tener representación na Casa Conceyu nes elecciones municipales del 26-M. Son Foru Asturies, PSOE, Podemos-Equo Xixón, PP, Ciudadanos, Xixón por la Izquierda y Vox. Y tú, ¿quién crees que va ganar les elecciones a l’Alcaldía de Xixón?. Vota nesta encuesta:

  • Directu: debate de candidatos a l’Alcaldía de Xixón

    Directu: debate de candidatos a l’Alcaldía de Xixón

    La Federación d’Asociaciones de Vecinos (FAV) entama esti miércoles nel Teatru Xovellanos un debate ente los principales candidatos a l’Alcaldía de Xixón. Cualquier vecín de la ciudá puede plantegar una entruga al traviés de Facebook, Twitter o enviando un corréu llectrónicu a: gijonpregunta@gmail.com.

  • Los conceyales de Podemos-Equo comprométense a nun cobrar más de 1.980 euros

    Los conceyales de Podemos-Equo comprométense a nun cobrar más de 1.980 euros

    Podemos-Equo Xixón presentó esti miércoles el so códigu éticu, un documentu que van roblar toos y toles candidates de la coalición: «Énte quien piensen qu’en política tol mundu ye igual, nesta candidatura diferenciámonos del restu de formaciones por cuestiones como esta: nuna ciudá na que ye poco la xente que cobra 2.700 euros netos al mes Podemos-Equo Xixón adquier el compromisu de nun cobrar más del equivalente 2,2 vegaes el Salariu Mínimu Interprofesional, 1.980 euros, y a llindar los mandatos a ocho años nes instituciones», espón Juan Chaves, integrante de la candidatura. «Creemos que na política ye un serviciu públicu nel qu’hai que tar de camín y nun faer d’ella un oficiu vitaliciu”,

    La coalición va plantegar al restu de partíos con presencia na Casa Conceyu que faigan sos estos compromisos «pa dar un mensaxe a la ciudadanía de Xixón de qu’en política nun somos toos iguales y de que tenemos que ser como la xente a la que representamos», añade Chaves. Estes cuestiones van presentar nel primer Plenu de la nueva Corporación coles mires de que toles fuerces asuman la llimitación de sueldos y tamién el númberu de persones con dedicación, qu’anguaño llega a 21 conceyales.

    «Nel casu de qu’estes midíes nun sían aprobaes, los conceyales de Podemos-Equo Xixón sí van acatar esti códigu éticu y van arrenunciar a tola remuneración qu’entepase los 1.980 euros. Col escedente vamos faer un fondu común pa financiar a les ONGs y entidaes sociales de la nuesa ciudá», indica Laura Tuero, númberu dos de la candidatura.

    Un compromisu éticu que yá se fixo efectivu esti mandatu que termina. Los conceyales de Xixón Sí Puede asumieron dende’l primer momentu la llimitación de salarios que marca Podemos, coles modulaciones correspondientes en función de les situaciones personales de quien tienen fíos o persones mayores o dependientes a cargu. «De los cuatro conceyales con dedicación plena que se asignaben al grupu municipal en 2015, namás s’aceptaron trés, arrenunciando a una d’elles y los conceyales cotizaron al 75% del salariu, lo qu’en conxuntu dexó aforrar 200.000 euros pa la ciudá de Xixón», afirma Tuero, remarcando que «somos la única organización en Xixón que se presenta con un códigu tan estrictu».

    Esti códigu éticu va aplicase a toos integrantes de la formación, incluyida quien ocupe l’alcaldía: «Frente a los 4.500 euros que cobra anguaño la primer edil, Carmen Moriyón, Yolanda Huergo va tener un salariu de 1.980 euros nel casu d’ocupar l’alcaldía», apunta’l númberu dos de la candidatura.

    «A pesar de qu’en 2015 José María Pérez, voceru del grupu municipal del PSOE, nun aceptó roblar esti códigu, sí vamos encamentar a Ana González y a tola so candidatura a qu’asuma estos compromisos éticos que llevamos al Conceyu de Xixón», adelantra Laura. Tuero.

    «Nun tenemos puertes xiratories, vinimos ameyorar la vida de la xente, non a buscar puestos de trabayu en grandes empreses o corporaciones como faen otros, polo que nun va ser posible que nengún de los conceyales pueda ocupar, nel plazu de cinco años posteriores a la finalización del mandatu, nengún altu cargu executivu n’empreses venceyaes con decisiones del so mandatu. Namás entendemos la política de forma participada, tresparente y al serviciu de los xixoneses», caltien el númberu dos de la candidatura.

  • Podemos-Equo propón que los colexos tengan cocina propia

    Podemos-Equo propón que los colexos tengan cocina propia

    Los colexos de Xixón precisen d’una puesta a puntu urxente nes sos instalaciones. Asina lo considera la coalición Podemos-Equo Xixón, que propón la realización d’un plan de choque d’obres nes escueles de la ciudá: «Son obres de caltenimientu o ampliación, yá que gracies a la desidia del Gobiernu del PSOE nel Principáu y de Foru nel Conceyu abasnen un bon númberu d’obres pendientes», señala Yolanda Huergo, candidata a l’alcaldía de Xixón pola coalición.

    La coalición entiende qu’habría que destinar un millón d’euros pa cubrir les actuales faltes. Un centru que exemplifica estes necesidaes ye’l CP Martínez Torner, que Huergo y Mario Suárez del Fueyo, secretariu xeneral de Podemos Xixón. Huergo llamenta que dende la entrada «yá se percibe la necesidá d’asitiar elementos disuasorios de la velocidá de los automóviles, yá que son pocos los que cumplen la llende de 30 Km/hora que se marca na zona». «Tamos énte un problema claru de seguridá pal alumnáu, que se xune a la cayida de cascotes del bistechu, lo que fai ver la necesidá ya intervenir lo antes posible”, remarca la candidata a l’alcaldía.

    Asina, dende ochobre de 2017, cuando cayeron los primeres cascotes, la comunidá educativa del CP Martínez Torner ta a la espera de que se iguen los bistechos: “El Conceyu fixo un parcheo, pero nun volvieron saniar la zona dende entós. Ye una cuestión que nos esmolez enforma, yá que ye peligrosu pa los neños y ye un problema que s’estiende por tola zona del perímetru escolar ensin que faigan nada, a pesar de que lo reclamemos reiteradamente a la Corporación”, afirma Patricia Toribio, presidenta de la AMPA.

    «Dícennos nun coyamos a tantos neños nel comedor, pero si van ye por necesidá, non por caprichu»

    Otra de les necesidaes ensin cubrir del centru ye l’ampliación del comedor escolar. Trátase d’un centru con casi 500 alumnos y, d’ellos, más d’un centenar asisten al comedor. Sicasí, al quedase pequenu, esti serviciu dase en dos veces: «La solución que nos dan ye que nun coyamos a tantos neños nel comedor, pero si los neños van al comedor ye por necesidá, non por caprichu», puntualiza la presidenta de la AMPA. Por esti motivu, la única solución que ven ye la d’ampliar les instalaciones del comedor.

    Nesta llínea, Podemos-Equo Xixón entiende que los centros tendríen que dotase de cocina propia: «Queremos fomentar asina una alimentación más saludable y un consumu de productos de km0, una midida cola qu’al empar se pretende fomentar el consumu y la producción local», apunta Huergo. Otra de les demandes ensin cubrir dende va dos años nel CP Martínez Torner ye l’ampliación de la cubierta del patiu d’Infantil, yá que cuando llueve l’alumnáu d’Infantil tien de treslladase a otres zones. Igualmente, el pavimentu del patiu foise sedando col pasu del tiempu y la filtración d’agua, «con pequenes dunes de formigón que reclamemos iguar», indica Demelsa García, collaboradora del AMPA.

  • Podemos-Equo apuesta por que’l Grau de Deportes s’implante en Xixón

    Podemos-Equo apuesta por que’l Grau de Deportes s’implante en Xixón

    «L’actividá deportiva ye un de les pilastres fundamentales del Estáu del Bienestar y, nesti sentíu, l’apueste pol deporte de Podemos-Equo Xixón en tolos niveles y modalidaes ye claro”, afirma Yolanda Huergo, candidata a l’alcaldía pola coalición. Dende esti convencimientu, la candidatura defende que Xixón sía la see del Grau de Ciencies de l’Actividá Física y el Deporte: “Equí cúmplense los requisitos fundamentales para faelo posible, dende la Universidá pública y, más allá de localismos, entendemos que Xixón axunta les meyores condiciones para ello”, caltien Huergo.

    Al empar, teniendo en cuenta que los clubes y equipos deportivos son una pata fundamental del texíu social de la ciudá, la coalición considera que ye necesario da-yos toles facilidaes posibles: «Más qu’acorvia-yos con burocracia, tenemos qu’acompañar a esti texíu entainando les ayudes, yá que hai munchos d’esos clubes que nos dan tantes allegríes nos deportes dependen d’esta collaboración pública para sobrevivir, pero frecuentemente tienen de faelo dende’l voluntarismu y los esfuerzos personales polos retrasos continuos colos que s’abonen les subvenciones”, apunta la númberu unu de Podemos-Equo Xixón.

    Na mesma llínea, la coalición quier garantizar que tola ciudadanía tenga accesu a la práctica del deporte n’igualdá de condiciones: “Para ello precisamos tener toles infraestructures al altor de lo que merecen los xixoneses y por eso vamos realizar un plan de choque para revisar cuál ye l’estáu de toles instalaciones de tolos barrios y espacios de Xixón y cubrir les faltes que se detecten. L’oxetivu ye que toles persones que quieran practicar l’actividá física nes nueses siendes, nel nuesu mediu natural tan maraviyosu o nes instalaciones deportives tengan les mesmes oportunidaes moren onde moren”, añede Laura Tuero, númberu dos de la candidatura.

  • Huergo: «Queremos facer de Xixón un referente tecnolóxicu n’I+D+i»

    Huergo: «Queremos facer de Xixón un referente tecnolóxicu n’I+D+i»

    Yolanda Huergo, candidata a l’alcaldía de Podemos-Equo Xixón, y Juan Chaves, integrante de la candidatura, caltuvieron esti miércoles una xunta cola Asociación Cluster TIC d’Asturies para presenta-yos les sos propuestes en materia económica y d’empléu con valor añedíu de la coalición. “Esta ciudá tien blimes, tien persones con iniciativa y una Universidá innovadora. Con too ello, la coalición Podemos-Equo Xixón venimos xenerar les polítiques y les sinerxes que faigan de Xixón un referente tecnolóxicu n’I+D+i y dinamizador d’un empléu llimpiu y con valor diferencial”, afirmó Huergo, candidata a l’alcaldía.

    Pa consiguilo, la coalición considera que ye preciso “dar continuidá a la collaboración público-privada de los programes impulsaos pol Conceyu venceyaos con Europa, el Cluster TIC, el Parque Tecnolóxicu y l’Universidá pa crear un texíu social, económicu y empresarial que xenere empléu calidable y de valor añedíu cola implicación de too el texíu tecnolóxico que yá esiste en Xixón y que realiza la so actividá en redol al Cluster TIC”, caltuvo Juan Chaves.

    Asina, el principal oxetivu ye la «xeneración d’oportunidaes d’empléu y autu empléu» pa les persones qu’estudien tantu na Universidá como en centros de formación profesional. El papel de l’alministración nesti sentíu va ser «facilitar les infraestructures que dexen xenerar valor pa la creación d’empléu calidable», dende Xixón, pa intentar evitar la fuga de la mocedá. Un puntu que tien de complementase col sofitu a les empreses locales pa que puedan retrucar los servicios de Xixón n’otres ciudaes fomentando la so internacionalización, señala la coalición nuna nota de prensa.

    Igualmente, la coalición tien por oxetivu desenvolver una base económico-industrial diversificada y d’altu valor añedíu. Nesta llínea va l’apueste pol Parque Tecnolóxicu y del Mar na nueva zona industrial d’El Natahoyo, contemplada nel Plan Xeneral d’Ordenación [PDF]: “Esti desenvolvimientu tien de ponenos na sienda de la economía azul y pa ello pretendemos impulsar la creación d’empreses innovadores por aciu mecanismos d’incubación de xeneración centrífuga (spin-off) nes actividaes de acuicultura, turismu costeru, biotecnoloxía, enerxía oceánica y esplotación de los fondos marinos”, espuso la candidata de Podemos-Equo Xixón. Nel marcu d’esta estratexa, la coalición va encamentar al Principáu a introducir los estudios de Ciencies del Mar nel campus de Xixón.

    La candidatura liderada por Huergo apuesta poles enerxíes llimpies y comprométense a  crear una comercializadora enerxética pública d’enerxía anovable. “Esta comercializadora suministraría, nuna primer fase, a les instituciones municipales, pa abrir dempués a otres entidaes y a la ciudadanía”, señala.

    En sintonía con esta iniciativa diría tamién l’apertura d’una Oficina d’Asesoría Enerxética  coles mires d’ameyorar la eficiencia enerxética, tantu nos ámbitos municipales como de les empreses que quieran sumase al programa. Esta Oficina, amás, va asesorar a la ciudadanía en relación a les grandes suministradores (llectura de factures, potencia contratada, solución de problemes). Al empar, va asumir les xestiones y costos derivaos de que cualquier particular o grupu de particulares qu’exerzan el so derechu al autoconsumo enerxéticu puedan sacar rendimientu económicu venciendo a la cooperativa enerxética’l so escedente de producción.

    Estes apuestes en materia enerxético van dexar afondar nesa collaboración público-privada en cuestiones rellacionaes cola eficiencia enerxética: “Esta collaboración ye la base pa que surdan empreses auxiliares capaces de crear puestos de trabayu calidable”, apunta Chaves.