Xixón al día

Etiqueta: mediuambiente

  • Mediu Ambiente va acabar a primeros del 2022 les obres de restauración del suelu de lo que yeren los Talleres del Conde, en Llangréu

    Mediu Ambiente va acabar a primeros del 2022 les obres de restauración del suelu de lo que yeren los Talleres del Conde, en Llangréu

    El vicepresidente y conseyeru d’Alministración Autonómica, Mediu Ambiente y Cambéu Climáticu, Juan Cofiño, anunció güei que los trabayos de recuperación ambiental del suelu de los antiguos Talleres del Conde, en Llangréu, a los que’l so departamentu destina 136.000 euros, van acabar a primeros del 2022.

    De la que visitaba les obres, Cofiño esplicó qu’anguaño ta faciéndose la roza y la demolición de les lloses de formigón allugaes nel terrenu. Tamién indicó que se ta tramitando la documentación alministrativo pa tresportar los residuos contaminaos a Coxersa. De mano, ta previsto que’l treslláu empiece a últimos d’esti mes pa, depués, volver facer otru análisis del suelu y rellenalu. Desque se remate la restauración, el Conceyu de Llangréu, propietariu del terrenu, va acondicionar la parcela cola mira de da-y dellos usos, ente ellos, la construcción d’un recintu ferial.

    Amás del proyectu actual de rehabilitación ambiental, l’Alministración local yá sacó a llicitación el proyectu pa executar los accesos al recintu, que van ser soterraños y van pasar per debaxo de les víes del tren. Desque se rematen estes actuaciones, el conceyu va urbanizar la parcela.

    P’acabar, en toes estes iniciatives van invertise camín de los seis millones, financiaos al traviés de convenios de los fondos mineros.

    Mediu Ambiente axudicó n’agostu’l proyectu de recuperación medioambiental de Talleres del Conde, onde se desenvolvió una actividá metalúrxica intensa nos sieglos XIX y XX. L’actuación, qu’empezó en setiembre, afecta a una superficie d’unos 500 metros cuadraos, con una fondura mínima de 25 centímetros, qu’incluye la capa de tierra vexetal.

    El proyectu tamién incluye la escavación d’alredor de 515 metros cúbicos de tierra, la demolición y llevantáu de 300 metros cuadraos de pavimentu de formigón en masa y el rellenu de zanxes con material de la escavación, amás de la xestión y tresporte de los residuos.

    Otres intervenciones centrar na retirada de suelos contaminaos, xeneraos pol allugamientu de distintes actividaes siderúrxiques na parcela, como un taller de calderería. Les resultancies de los analises realizaos evidencian la presencia nos terrenes de metales pesaos, sobremanera arsénicu y chombu, según otros compuestos orgánicos. En total, envalórase que se van retirar 400 metros cúbicos de suelu.

  • EDP pieslla la térmica de Soto Ribera

    EDP pieslla la térmica de Soto Ribera

    EDP va antemanar el zarru de les centrales de carbón na península ibérica. La compañía lusa informa que va tramitar la solicitú de pieslle de la planta de Soto Ribera «nes próximes feches». EDP argumenta qu’esta decisión enmárcase na estratexa de descarbonización del grupu y adóptase nun contestu nel que la producción d’enerxía depende cada vez más de fontes anovables.

    Soto 3 nun produz enerxía dende fai más d’un añu. Nesti allugamientu, EDP ta validando proyectos coles mires de desenvolver un proyectu innovador d’almacenamientu d’enerxía. «Les perspectives de viabilidá de les centrales de carbón menguaron de forma drástica cola medría constante de los costos de producción con carbón y la mayor competitividá del preciu del gas natural y les centrales de ciclu combináu», esplica la compañía nun comunicáu.

    Queda fuera d’esta decisión la central d’Aboño. EDP yá pidió la llicencia pal tresformamientu del so grupu 1 (342 MW de potencia) nuna central qu’utilice namáS gases siderúrxicos a partir de 2022. Aboño 2 va caltenese como sofitu a cualesquier indisponibilidad contribuyendo asina a una economía más circular. Esti ye’l primer proyectu de transición xusta que se desenvuelve nuna central de carbón n’España.
    Los cambeos nes centrales d’Aboño y Soto nun van suponer perda d’empléu.

  • La captura de reines d’aviespa asiática medra un 600%

    La captura de reines d’aviespa asiática medra un 600%

    La campaña de trampéu primaveral de l’aviespa asiática zarróse con un aumentu de les captures de reines d’un 600 % al respective de tol añu pasáu. En concreto, prindáronse 110.694 exemplares frente a los 15.717 del 2019. Los directores xenerales del Mediu Natural, David Villar, y d’Infraestructures Rurales y Montes, Fernando Prendes, presentaron los resultaos de les actividaes rellacionaes col siguimientu, control y posible desaniciamientu d’especies invasores nel Centru d’Alarma y Control de La Mata, en Grau.

    Villar destacó que nestos resultaos influyó la implicación y collaboración de la sociedá civil y de les demás alministraciones. Alredor de 4.000 voluntarios coordinaos polos conceyos asitiaron 7.749 trampes per toa Asturies. Esta cifra supón un 115 % más que nel 2019, cuando s’instalaron 3.609. D’equí p’alantre va dase continuidá a los trabayos cola retirada de niales en collaboración estrecha col Serviciu d’Emerxencies del Principáu. Precisamente, la selmana que vien va celebrase una xunta del comité asesor contra l’aviespa asiática que va analizar y va consensuar les midíes a adoptar.

    Nel marcu de la llucha contra especies invasores, Villar anunció una campaña nueva de control sobre’l plumeru de la pampa, dientro del plan rexonal pa un posible desaniciamientu d’esta especie. Los trabayos d’eliminación de plántules y destoconáu van priorizar les zones de más interés natural. Amás, van desenvolvese actuaciones piloto en collaboración cola Dirección Xeneral d’Infraestructures Viaries y Portuaries.

  • Xixón apuesta pola movilidá en bicicleta cola campaña ‘Muévite pel ciclocarril’

    Xixón apuesta pola movilidá en bicicleta cola campaña ‘Muévite pel ciclocarril’

    Que les bicis seyan una alternativa de tresporte. Xixón sigue sumando midíes pa camudar la movilidá na ciudá de cara a la nueva normalidá que va entamar esti branu. Movilidá activa, tresporte públicu y movilidá compartida configuren les prioridaes na nueva política de movilidá sostenible del Gobiernu local. El conceyal de Mediu Ambiente y Movilidá, Aurelio Martín, presentó’l vienres un conxuntu de midíes empobinaes a facilitar y promocionar la movilidá ciclista más allá del ociu. «La bicicleta tien de ser una opción más pa movenos nel día a día».

    El Conceyu busca un cambéu nos vezos de desplazamientu. Nesti contestu enmárquense los 29 ciclocarriles anunciaos va unes selmanes, que busquen favorecen la circulación segura de bicicletes y patinetes eléctricos. Agora, la Conceyalía de Mediu Ambiente y Movilidá pon en marcha la campaña ‘Muévite pel ciclocarril‘. En palabres del conceyal «ha d’entendese como una midida de concienciación y sensibilización», y que busca ameyorar la seguridá vial. La campaña ufierta mensaxes y conseyos pa la circulación de ciclistes y usuarios de patinetes y fai un llamamientu a la convivencia, respetu y prudencia en cualesquier mediu de tresporte.

    Nuevos ciclocarriles

    La implantación de los 29 ciclocarriles ta desenvolviéndose en paralelu a la creación de nuevos tramos de carriles bici segregaos pa completar la rede ciclista de la trama urbana. El Conceyu tien previstu habilitar dos nuevos tramos n’El Coto y la cai Mariano Pola.

    El desenvolvimientu de nueves infraestructures ciclistes nun ye la única midida. Tamién se va poner en marcha la BiciEscuela Municipal. El programa quier promocionar l’alquisición de mañes y habilidaes pa circular en bicicleta de forma autónoma, segura y responsable pela vía pública. Va ponese en marcha la próxima seronda y va tar dirixida a población adulta y a población escolar, afaciendo los conteníos y actividaes a les distintes edaes. La BiciEscuela escolar va desenvolvese en 5 centros educativos de la ciudá, y va cuntar con un cursu de formación pal profesoráu.

    Les actividaes de promoción y sensibilización completen el plan ciclista presentáu por Martín, con marches ciclistes pa families, campañes informatives, actividaes mientres la Selmana Europa de la Movilidá y el desenvolvimientu d’una xornada técnica de bones práctiques.

  • El Muro pierde otru carril en favor de peatones y bicicletes

    El Muro pierde otru carril en favor de peatones y bicicletes

    El Muro va perder un tercer carril pal tráficu. El Conceyu de Xixón anunció ayeri’l pieslle  del carril izquierdu de l’avenida de Rufo García Rendueles, sentíu Piles, p’asitiar n’él el carril bici. Los conceyales de Movilidá y Obres Públiques, Aurelio Martín y Olmo Ron, respectivamente, presentaron el conxuntu de midíes derivaes de la crisis sanitaria de la Covid-19. «Puen responder tamién a un nuevo modelu de ciudá»; afirmó Martín.

    Amás, va crease un corredor piatonal que va comunicar Begoña cola Plazuela y la sablera de San Llorenzo mediante la piatonalizacón de les cais Ruiz Gómez y Caridad. Trátase d’una midida que va permitir «garantizar un tránsitu piatonal seguru», señaló Ron. Los aparcamientos que se van perder por estos trabayos van recuperase nes cais Eladio Carreño y Marqués de Casa Valdés. Ún de los oxetivos del equipu de Gobiernu ye «pacificar los accesos a los centros escolares de Xixón». Pa ello, va llevase alantre nueves piatonalizaciones y supresión d’aparcamientos na redolada de colexos de tola ciudá.

    Tamién se va actuar nel carril bici de Poniente. L’equipu de gobiernu plantegó un cambéu de sentíu na cai Mariano Pola nel tramu dende l’edificiu de los antiguos xulgaos hasta la rotonda. Esti vial pasará d’esta manera a dar serviciu esclusivamente a los garaxes de los edificios. Amás, nesti espaciu van suprimise les plazes d’aparcamientu p’asitiar un carril bici que va sustituyir al de Poniente nesta zona.

  • El Plenu atrasa un añu les restricciones de la nueva ordenanza de movilidá

    El Plenu atrasa un añu les restricciones de la nueva ordenanza de movilidá

    El Gobiernu municipal fixo propios los pidimientos de la oposición pa retrasar la entrada a valir de les restricciones de la nuevu ordenanza de movilidá. PSOE ya Izquierda Xunida presentaron 17 enmiendes al proyectu p’ampliar los plazos pa la puesta en marcha de les restricciones de circulación y estacionamientu venceyaes a los distintivos ambientales de los vehículos. Con esti cambéu, l’equipu de Gobiernu pretende amenorgar l’impactu económicu que la midida pudiera causar ente la crisis sanitaria del Covid-19.

    La propuesta atrasa un añu la entrada a valir de toles restricciones, hasta 2022 el estacionamiento en zona regulada y hasta 2026 la circulación pela zona urbana. La iniciativa del equipu de gobiernu incorpora la posibilidá de que’l Plenu pueda prorrogar toes les moratorias hasta un máximu de 24 meses.

    El restu de les enmiendes tienen como oxetivu realizar axustes técnicos y actualizaciones na norma, incluyendo les paraes a demanda de EMTUSA. Amás, matícense criterios de circulación pa les bicicletes. El Gobiernu municipal propón la supresión de les restricciones venceyaes a los distintivos ambientales na zona rural y la eliminación de les zones d’aparcamientu vecinal previstes.

  • Foru propón que les restricciones de circulación y aparcamientu s’apliquen «de forma progresiva»

    Foru propón que les restricciones de circulación y aparcamientu s’apliquen «de forma progresiva»

    La ordenanza de Movilidá nueva que’l Conceyu de Xixón ta tramitando contempla, ente otres midides, restricciones de circulación y aparcamientu. Foru Asturies enmendará el proyectu redactáu polos técnicos municipales col enfotu de llograr «el mayor consensu posible». El conceyal Pelayo Barcia esplicó esti martes la postura de la so formación, insistiendo na so voluntá d’algamar grandes alcuerdos.

    «Anque la Ordenanza contien múltiples aspeutos, ta claro qu’el que más esmolez ente la ciudadanía ye la prohibición de circulación a los vehículos ensin distintivu ambiental. Paeznos poco responsable aprobar una Ordenanza con prohibiciones que va tener qu’asumir el siguiente Gobiernu», esplicó. El conceyal ve «imposible d’aplicar» la midida que, según les sos pallabres, va suponer que «de un día pa otru, el 31 d’avientu de 2023, se prohíba la circulación por tola ciudá a miles de vehículos».

    Barcia propón entamar con una prueba pilotu informativa afinales de 2020 y ellaborar un calendariu de llimitaciones progresives qu’entame polos domingos y festivos «hasta llegar al 2024 onde s’aplicaría totalmente». Foru plantega una consulta ciudadana en 2022 sobre esta cuestión.

  • Asturies recicla yá’l 32,5% de les borrafes

    Asturies recicla yá’l 32,5% de les borrafes

    Les borrafes reocyíes nel Consorciu para la Xestión de Residuos Sólidos d’Asturies (Coxersa) crecieron casi’l 1,5% en 2019 y algamaron les 516.479 tonelaes. El 24,74% fueron oxetu de tratamientu. A esta cifra hai qu’añedir les recoyíes selectives llevaes a cabu por xestores distintos a la entidá y el compostaxe domésticu. Esta actividá, cada vez más estendida, medró hasta’l 32,5% les refugayes domésticu y comercial reciclaos n’Asturies.

    Coxersa recibió 895.108 tonelaes de borrafes, qu’inclúin los residuos municipales y comerciales, los de construcción y baltadera, les folles d’estaciones depuradores y los industriales non peligrosos. El 40% de los que pasaron poles sos instalaciones foi sometíu a dalgún tratamientu de recicláu. Nel apartáu d’envases, el porcentaxe superó’l 50%. L’aumentu débese a que en 2019 la recoyida selectiva creció percima del 13% n’envases y del 6% nos apartaos de cartón y papel y vidriu. Esta medría sostenida del reciclaje va tener un fuerte impulsu en 2020 pola estensión de la recoyida selectiva de materia orgánico nes grandes ciudaes, que creció un 228%. Amás, en 2023 va entrar en serviciu una nueva planta de reciclaje na que se van invertir 48 millones.

  • El Principáu dobla’l presupuestu d’esti añu pa combatir l’aviespa asiática

    El Principáu dobla’l presupuestu d’esti añu pa combatir l’aviespa asiática

    El Gobiernu asturianu anunció que va doblar el presupuestu destináu esti añu a esaniciar l’aviespa asiática, al aumentar yá en 100.000 euros la partida inicial de 150.000 y disponer d’otros 50.000 euros para’l casu de que seya necesario reforzar les actuaciones previstes hasta avientu. El conseyeru de Desenvolvimientu Rural, Agroalimentación y Pesca, Alejandro Calvo, que presidió esti martes el comité asesor para la detección y control d’esta especie, confirmó estes decisiones. Calvo comprometióse a garantizar los recursos necesarios para lluchar contra esta plaga y a impulsar y reforzar la coordinación con conceyos, entidaes y organismos implicaos. «El so desaniciu ye un asuntu prioritariu pal Gobiernu d’Asturies», señaló.

    El conseyeru destacó la collaboración ciudadana como un elementu clave na llucha contra la vespa velutina y comprometióse a impulsar campañes de divulgación pa que la población tenga información veraz, sepa cómo ha actuar y conoza les canales a les que tien de dirixise sobre cualquier cuestión rellacionada con esti asuntu. Tamién valoró’l trabayu ya implicación de les asociaciones y profesionales de l’apicultura, a los que calificó como axentes imprescindibles na llucha contra l’aviespa asiática.

    Respectu al balance de les actuaciones realizaes, esplicó que nos primeros seis meses d’esti añu asitiáronse en tol territoriu más de 3.600 trampes, nes que se prindaron unes 15.500 reines. La segunda de les fases céntrase na detección y eliminación de niales, de los que se neutralizaron alredor de 2.000 no que va d’añu.

    Comité asesor

    Estes son dalgunes de les cuestiones abordaes na xunta que celebró güei el comité, l’órganu encargáu de proponer, analizar y verificar el cumplimientu de les midíes y actuaciones recoyíes nel plan d’actuación. Ta constituyíu, amás de pol conseyeru, polos responsables de les direcciones xenerales de Mediu Natural y Ganadería y representantes de la Federación Asturiana de Conceyos (Facc), el Serviciu d’Emerxencies del Principáu d’Asturies (Sepa), la Sociedá de Servicios del Principáu d’Asturies (Serpa), la Federación d’Apicultores del Principáu d’Asturies (Fapi), l’Asociación d’Apicultores Profesionales-PROMIEL Asturies, l’Asociación en defensa de l’abeya del Principáu d’Asturies (Adapas), y la Plataforma Stop-Velutina d’Asturies

    Cualquier persona interesa puede contactar cola Alministración al traviés de la web www.avisap.es, nel teléfonu 984249165 o unviando un mensaxe por WhatsApp al 610255111 o un corréu electrónicu a @info@avisap.es.

  • Entrada gratis a la Feria si llegues en bici

    Entrada gratis a la Feria si llegues en bici

    La Feria de Muestres celebra esti vienres el Día del Mediu Ambiente. Tou aquel qu’allegue al recintu ferial Luis Adaro en bicicleta va entrar gratuitamente al certame. El Conceyu de Xixón, en collaboración cola Empresa Municipal de Servicios del Mediu Ambiente Urbanu (EMULSA) y l’Empresa Municipal d’Agües (EMA), va habilitar un aparcamientu vixiláu pa bicicletes. Va tar asitiáu al pie de la entrada principal.

    Les bicicletes van ser recibíes nel aparcamientu pol personal a cargu que se va encargar d’aparcales y vixilales ensin que sía necesariu candales. A la recepción del vehículu, va entregase al visitante una ficha que va sirvir tantu d’entrada pa la Feria como pa recoyelo a la fin de la visita. L’aparcamientu va tar abiertu mientres tol día pero, a partir de les 20:30, namás se van poder retirar les bicicletes yá aparcaes.

    L’oxetivu ye buscar un modelu de ciudá más atenta col que les persones y la so seguridá sían la prioridá. L’asociación Asturies con Bici va collaborar instalando un pequeñu stand informativu que se va allugar xuntu al aparcamientu. Encargaránse d’entregar folletos nos que se recordarán delles normes y encamientos como, por casu, circular por siendes, ceres y restu de zones ciclo-piatonales o dar preferencia a les persones que se mueven caminando nes zones espresamente señalizaes.