Un nuevu estudiu realizáu nel xacimientu paleolíticu de Cova Eirós (Atayo, Triacastela, Lugo), nel que participó la Universidá d’Uviéu, apurre nuevos datos sobre’l territoriu qu’habitaron los postreros neandertales del noroeste peninsular. La investigación, que se centró na fauna de la dómina, ufierta una perspectiva novedosa gracies a la reconstrucción paleoclimática y paleoambiental y revela que les sierres orientales de Galicia convirtiéronse nun auténticu abelugu climáticu que dexó la supervivencia de los grupos neandertales hasta momentos más recién que n’otres zones del norte peninsular.
El trabayu, publicáu na revista Journal of Archaeological Science:Reports, analiza más de 1000 restos fáunicos recuperaos nel nivel 3 del yacimientu, que presenta una antigüedá d’al rodiu de los 41.000 años. Nesta dómina, los grupos de neandertales entá ocupaben les sierres orientales de Galicia nun momentu nel que, por casu, en parte de la cornisa cantábrica yá habitaben los Homo sapiens. Los neandertales esplotaben una amplia variedá de recursos, mientres que’l venáu yera la so principal presa, pero non la única, yá que tamién se detectó la esplotación interesada d’osos de los covarones.
