XIXÓN, 31 de mayu de 2022.- Xixón acaba de presentar la so candidatura pa convertise en European Capital of Smart Tourism 2023 (Capital Europea del Turismu Intelixente 2023). Esta iniciativa de la Unión Europea tien como oxetivu promover el turismu intelixente; poner en rede y fomentar el desenvolvimientu turísticu innovador, sostenible ya inclusivu de los destinos y facilitar l’intercambiu de les meyores práctiques. La Comisión va evaluar los llogros de les ciudaes candidates en sostenibilidá, accesibilidá, digitalización y patrimoniu cultural y creatividá.
Pa la so candidatura, Xixón punxo en valor tol trabayu realizáu na so conversión en destín turísticu intelixente. Ese trabayo yá foi reconocíu por Segittur, que certificó a la ciudá asturiana como Destín Turísticu Intelixente en 2020.
N’accesibilidá, Xixón destaca, ente otres coses, por cuntar con una ordenanza d’accesibilidá recién (2019), qu’inclúi accesibilidá nes infraestructures y l’urbanismu; na edificación d’usu públicu; nel tresporte; na información y na comunicación y nes actividaes culturales, deportives y d’ociu. Amás, inclúi l’accesibilidá n’itinerarios y espacios piatonales, paraes de tresporte, reserves de estacionamientu, etc. La ciudá tamién potenció la seguridá vial y l’accesibilidá na movilidá de la ciudadanía y desenvolvió actuaciones empobinaes a facilitar el turismu accesible, como la meyora de señalización turística de rutes urbanes y rurales o la creación de rutes urbanes por aciu apps basaes en realidá aumentada. La candidatura tamién pon el focu na Sablera de Poniente de Xixón, una de les sableres d’España con mayor númberu de servicios ya instalaciones afeches.
Tocantes a sostenibilidá, Xixón conciencia a les empreses col proyectu Impulsa Empreses EcoCircular; sigue un Plan Acción pa la Enerxía Sostenible; forma parte del Pactu de los Alcaldes pol clima y l’Enerxía (PACE); y trabaya n’eficiencia enerxética nel llume público ya instalaciones municipales. Dende l’añu 2013, Xixón cuenta cola certificación Biosphere Destination como destín sostenible y síguese un Plan d’Acción de Turismu Sostenible de Xixón empobináu a cumplir colos Oxetivos de Desenvolvimientu Sostenible de Naciones Xuníes. Amás, cuenta con un decálogu de turista responsable. A lo último, destaca na so candidatura’l Mercáu Ecolóxicu y Artesanu de Xixón y la Cátedra de Sostenibilidá de la Universidá d’Uviéu, financiada pol Conceyu de Xixón.
Nel ámbitu de la dixitalización, Xixón ye un destín bien avanzáu nel usu de les nueves tecnoloxíes pa ameyorar la gobernanza. Foi pioneru en servicios dixitales a disposición de la ciudadanía, cola implantación de la tarxeta ciudadana y la rede de caxeros ciudadanos. Dispón del Plan Smart City Xixón, coles mires d’ameyorar la calidá de vida de les persones, y cuenta con un portal de datos abiertos que da accesu a más de 700 conxuntos de datos. Destaca l’usu de realidá aumentada pa promoción ya información turística y punxo en marcha una ferramienta d’intelixencia de datos del sector d’agospiamientos, Xixón Data LAb, pa analizar el so rendimientu y comparalo colos sos competidores, monitorizar en tiempu real la ocupación y los precios medios y consultar los eventos de la ciudá y acomuñar a la evolución de les sos reserves y la so ocupación. Tamién se ta desenvolviendo un motor de reserves d’actividaes turístiques y un plan de dixitalización y sostenibilidá del comerciu. Xixón ye miembru del proxecto “Ciudaes Conectaes” y cuenta con una serie de ferramientes d’innovación empobinaes a desenvolver un modelu de ciudá intelixente.
A lo último, nel segmentu de patrimoniu cultural y creatividá, Xixón destaca por incluyir el turismu cultural como un de los segmentos oxetivos del so plan de marketing, desenvolviendo una serie de rutes culturales, Culrutas, que dexen percorrer y conocer Xixón dende doce perspectives totalmente distintes. Tamién s’implementaron rutes de realidá aumentada pa dar a conocer el patrimoniu históricu y cultural de la ciudá. Amás, pon en valor la Ruta de la Sidra Xixón, qu’ufierta a quien visiten Xixón la posibilidá de somorguiase nún de los sos recursos más tradicionales y auténticos al traviés de visites a llagares. Otru de los puntos destacaos nesti apartáu ye’l Plan “Xixón, identidá, sostenibilidá y digitalización”, col que va potenciase’l Camín de Santiago de la Mariña, van recuperase pa usu turísticu y museolóxicu les bateríes de defensa de la mariña asturiana, l’abelugu antiaéreo de la guerra civil española y les marques de milla de la Sienda del Cervigón. Coles mesmes, Xixón cuenta con una ufierta cultural mientres tol añu, con una importante rede de museos públicos y privaos y una ufierta d’eventos variada y pa tolos públicos. Xixón va presentar la so candidatura pa optar a Capital Europea de la Cultural en 2031.
Les candidatures van evaluar nun primer momentu por un xuráu d’espertos independientes. Dempués, hasta siete ciudaes van ser convidaes a presentar la so candidatura como finalistes énte un xuráu de la Unión Europea. Asina, a finales d’ochobre van dar a conocer les dos ciudaes ganadores que se van convertir en European Capital of Smart Tourism 2023, siguiendo’l cercu de Helsinki y Lyon; Gotemburgo y Málaga; y Burdeos y Valencia, que fueron el ganadores de 2019, 2020 y 2022 respectivamente.
