La inversión, anunciada pola ministra d’Industria, enmárcase nel proyectu del Gobiernu central pa promover los Caminos de Santiago con un presupuestu de más de 121 millones.
El Plan Nacional Turísticu Xacobéu 2021-2022 incluye ente les sos inversiones más importantes nel capítulu de rehabilitación del patrimoniu históricu l’ampliación del Muséu de Belles Artes d’Asturies. Asina lo anunció güei la ministra d’Industria, Comerciu y Turismu, Reyes Maroto, nun actu celebráu nel mesmu equipamientu y nel que tamién intervinieron el presidente del Principáu, Adrián Barbón; el secretariu d’Estáu de Turismu, Fernando Valdés, y la conseyera de Cultura, Política Llingüística y Turismu, Berta Piñán.
Con una inversión de 5,9 millones, la intervención nel Belles Artes enmárcase nel plan Xacobéu pol fechu de tratase del primer muséu del Camín Primitivu, al tar asitiáu a pocos metros de la catedral d’Uviéu, puntu de partida de les pelegrinaciones históriques a Santiago.
Como señaló Piñán mientres la so intervención, la cercanía física del orixe del Camín Primitivu y el Belles Artes fai que sumen “una carga emblemática como enclave singular del patrimoniu asturianu, lo que los convirtió n’iconos d’escelencia”.
L’ampliación de la pinacoteca ta dirixida a que’l Belles Artes se convierta na cabeza visible de la ufierta del turismu cultural n’Asturies. La conseyera recordó que’l muséu tien una colección permanente de más de 15.000 obres d’arte, y que nel 2019 batió un récord históricu de visites con aproximao 112.000.
Amás, insistió nel apueste del so departamentu por fomentar nel Xacobéu 2021-2022 una estratexa turística tresversal y intensiva “que pon el focu nos conceyos y les localidaes per onde trescurren les rutes xacobees, con una programación qu’axunta numberoses cites culturales, itinerarios y acciones turístiques empobinaes a promover una mayor conocencia de los nuestros Caminos de Santiago”.
Proyectu d’ampliación
El proyectu d’ampliación del Belles Artes, que taba ente los compromisos prioritarios de la Conseyería de Cultura pa esta llexislatura, va completar l’adaptación de la pinacoteca a la gran relevancia de la so colección artística y va garantizar l’accesibilidá de tolos sos espacios, amás de dotar al equipamientu d’un salón actos.
Concretamente, el proyectu va ameyorar la circulación ente los trés edificios del muséu: el Palaciu Velarde, la Casa d’Uviéu-Portal y l’edificiu Ampliación. Otra manera, va ameyorar la organización de les sales d’esposiciones, faciéndoles lo más amplies y versátiles posibles, y va incrementar l’altor d’estes sales y la del taller de restauración. El plan contempla tamién la creación del auditoriu salón d’actos que dexe desenvolver un completu programa de divulgación cultural.
Amás, va aumentase l’espaciu destináu al almacén d’obres d’arte, lo que va dexar cuntar con un ampliu taller de carpintería y un almacén xeneral pa materiales de caltenimientu, espositivos, utillaxe y maquinaria de tresporte. El proyectu contempla tamién un muelle pa cargar y descargar les obres d’arte.
Cola so execución, refuérciase notablemente la ufierta del turismu cultural patrimonial venceyada al Camín de Santiago n’Uviéu, ciudá onde confluyen el Camín Primitivu, el Camín de la Costa (al traviés del enllaz de Sariegu y Siero) y el Camín del Salvador.
El Plan Nacional Turísticu Xacobéu 21-22 ta dirixíu a impulsar los Caminos de Santiago como productu cultural y patrimonial en tol territoriu nacional con una inversión que supera los 121 millones y que va financiase colos fondos europeos Next Generation.
