Izquierda Xunida pide esplicaciones sobre la denegación del permisu pa la celebración del Primera Sidre l’Añu nel Pueblu d’Asturies. La conceyala Noelia Ordieres denuncia’l perxuiciu que supondría poner fin al usu del Tendayu pa eventos sociales y culturales de la ciudá: “pondría fin a eventos tan importantes como’l mesmu Primer Sidre l’Añu, el Día de la Reciella, los alcuentros de les Vocalías de la Muyer o la mesma inauguración de la Feria de Muestres”.
IX solicitó accesu al espediente pa conocer los detalles de la denegación y l’informe xurídicu qu’ampara la decisión, qu’inclúi la idea del Conceyu de treslladar la tradicional celebración sidrera a la Plaza Toros, descontestualizando dafechu un eventu que pon en valor la cultura sidrera asturiana, agora que concurre a la posibilidá de convertise en Patrimoniu Mundial de la Humanidá.
La concejala d’Izquierda Xunida – Más País – Izquierda Asturiana, Noelia Ordieres, encamentó güei a la conceyala de Cultura, Montserrat López Moru, a esplicar los motivos de la denegación del permisu pa celebrar la XIV edición del Primera Sidre l’Añu nel Pueblu d’Asturies.
Ordieres recuerda que “la cultura de la sidra ta en procesu de ser declarada Patrimoniu Cultural Inmaterial pola Unesco, una declaración sofitada pol mesmu Conceyu de Xixón, y esti eventu faise nel muséu etnográficu que tien como oxetu la recuperación y caltenimientu de les tradiciones asturianes, ente otres la de la sidra. Si nun puede realizase equí, qu’a les clares ye’l llugar más aparente pol so significáu, va tener qu’esplicanos refechamente los motivos”.
La conceyala d’IX-MP-IAS esplica qu’esti eventu, tal que recueye la mesma páxina web del Conceyu, ye una collaboración que se realiza dende va trece años cola Fundación Asturies XXI que nunca supunxo nengún problema, amás de ser un ésitu seguru de públicu y calidá, y apunta que nos xeneren munches duldes xurídiques les alusiones de la conceyala responsable a una normativa que magar lleva vixente dende 2015 en nengún casu fai referencia a los equipamientos museísticos y na que se espliciten les prohibiciones a menores d’edá”.
Pa Ordieres ye necesaria una esplicación detallada de qué eventos, más allá d’este, van dexar de celebrase dende esti momentu nel espaciu, yá que na práctica totalidá de los actos entamaos por entidaes, empreses y particulares inclúin consumu de tou tipu de bébores nes instalaciones. “¿Van dexar de celebrase les bodes, los eventos de la Feria de Muestres, el Día de la Reciella, los alcuentros interculturales, los alcuentros de les Vocales de la Muyer o la Folixa pola Paz nel Tendayu? Estos eventos formen parte de la identidá de la ciudá y refugar l’usu del espaciu ye una torga que pue poner en riesgu eventos sociales y culturales d’especial relevancia pa Xixón”, conclúi la conceyala.
