La Conseyería d’Educación va destinar 21.902.111 euros del so presupuestu pa 2022 a les escueles públiques de primer ciclu d’Infantil (0-3 años). El Principáu suma recursos propios y fondos europeos tanto pa caltener los centros yá existentes como pa promover la estensión de la rede, con un doble oxetivu: ameyorar el serviciu na zona rural y acabar coles llistes d’espera nos conceyos con más demanda. Per primer vez, el Gobiernu d’Asturies va conceder ayudes a los conceyos que construyan nueves unidaes.
Esti ye ún de los aspectos que la conseyera, Lydia Espina, resaltó güei n’Uviéu, na presentación de les cuentes del so departamentu pal próximu exerciciu, que xuben a 780 millones, un 6,01% más qu’anguaño.
Espina sorrayó que la presentación de les cuentes ye un momentu “pa falar de númberos, pero tamién d’enseñanza y de futuru, d’un sistema educativu públicu de calidá y d’oportunidaes, de construyir una sociedá xusta y democrática na que quepamos toos. Too esto consíguese con recursos y, por tanto, con unos presupuestos”. Tamién aseguró que’l Principáu cumple los sos compromisos: “Tamos al pie de la nuestra comunidá educativa ya intentamos dar una respuesta áxil a les necesidaes. Estos presupuestos van dexanos caltener esa llinia de trabayu, inda dientro d’un contestu de pandemia”.
Los recursos pa les escueles d’Infantil estructútense en trés partíes distintes. Asina, acutáronse 17.869.772 euros pa financiar los convenios colos conceyos, por aciu un creitu ampliable que permite atender el funcionamientu de toles escueles. Amás, hai dos más procedentes de los fondos del Mecanismu de Recuperación y Resiliencia (MRR): 2.391.007 euros pa tresferencies corrientes y 1.641.332 pa inversiones, esto ye, pa sufragar la construcción de nueves unidaes. La intención de la conseyería ye que los conceyos interesaos puedan aportar a estos últimos fondos al traviés d’una llinia de subvenciones, que se va repartir por un procedimientu de concurrencia competitiva.
Per otru llau, el tresformamientu del sistema educativu asturianu, entá nun contestu de pandemia, sigue col apueste pola dixitalización. La partida destinada a esta finalidá crez hasta los 7 millones. Del total, 5 acútense pa la dixitalización d’aules y 2, pa l’alquisición de dispositivos tecnolóxicos.
El reconocimientu al llabor del profesoráu demuéstrase nel presupuestu col segundu Plan d’Evaluación Docente, que’l so pagu empecipiose en setiembre y que pa’l próximu exerciciu suma 21 millones, qu’ameyoren la retribución de más de 9.000 docentes.
Inversiones
El capítulu d’inversiones crez hasta los 28 millones, lo que supón una medra del 39,46%. D’esta miente, van recibir un impulsu definitivu obres yá anunciaes como los institutos de La Corredoria (3.549.036 euros) y La Florida (2.671.626 euros), dambos n’Uviéu, y el Rei Pelayo de Cangues d’Onís (3.449.850 euros). Toes tán yá axudicaes.
Tamién hai partíes reseñables pa la rede d’Infantil y Primaria. La conseyería habilitó 164.900 euros pa sufragar la redacción del proyectu del futuru colexu públicu de Nuevu Roces (Xixón), que s’acaba d’axudicar. Amás, ta presupuestada l’ampliación del Laviada, tamién en Xixón, con 740.810 euros, y l’ampliación de la etapa d’Infantil nel CP Maliayo (Villaviciosa), comprometida dende 2017, con 565.810 euros. El nuevu colexu d’educación especial de Latores, n’Uviéu, cuenta con 50.000 euros pa la redacción del proyectu, a la espera de la cesión de la parcela municipal na que se va construyir.
El Centru d’Innovación en FP, en Xixón, dispón de 200.000 euros. Ye una obra tresañal, con un plazu d’execución d’ocho meses, que se va axudicar en 2022 y va siguir en 2023. El futuru Centru Integráu de Formación Profesional (CIFP) de La Grandiella, n’Avilés recueyese nel presupuestu con una partida de 50.000 euros que va sirvir pa contratar la redacción del proyectu mientres se peracaba la cesión de la parcela.
Atención a la diversidá
Tamién crez el programa dedicáu a la educación especial y les necesidaes específiques, onde figuren los centros d’educación especial, les unidaes d’orientación y tamién Pedagoxía Terapéutica (PT) y Audición y Llinguaxe (AL). Esto va permitir contratar a 15 profesores más a xornada completa (10 PT y 5 AL) y poner en marcha les unidaes d’acompañamientu, que van sofitar al alumnáu más vulnerable pa prevenir el fracasu y promover l’aprendizaxe. Estes unidaes van tar integraes por personal d’orientación educativa y profesoráu técnicu de servicios a la comunidá.
La conseyera destacó la trescendencia del financiamientu del PROA+. L’oxetivu d’esti programa consiste n’algamar l’ésitu escolar de too l’alumnáu y concíbese como un mecanismu d’ayuda pa’l tresformamientu de los centros, que van poder desenvolver actividaes tamién en períodos vacacionales o branizos. La conseyería va escoyer a 68 de la rede pública y 10 de l’alcordada, d’ente les 150 solicitúes recibíes. Antes de rematar esti añu, va ingresáse-yos daqué más d’un millón del Ministeriu d’Educación y Formación Profesional. Nel presupuestu de 2022, incorpórense casi 2 millones más, que se van destinar fundamentalmente a la contratación de personal docente.
