La industria europea del automóvil ta bien asitiada na carrera pol coche eléctricu tres fracasar el so apueste pol diésel. Esta ye la principal conclusión d’una investigación realizada por Ignacio de la Rosal, profesor del Departamentu d’Economía Aplicada de la Universidá d’Uviéu. L’estudiu, publicáu na revista Transport Policy, de máximu impactu nel sector, revela que la dieselización del parque automovilísticu européu foi una estratexa errónea p’apangar el calentamientu global y amuesa que la competitividá de la industria europea nun ta amenaciada énte’l retu de la electrificación.
El profesor De la Rosal, firmante del artículu, esplica que’l términu dieselización refiérese al aumentu sosteníu del porcentaxe de turismos diésel nos parques automovilísticos de los países de la UE, que foi’l frutu d’una estratexa de la Comisión Europea y de la industria del automóvil p’amenorgar les emisiones de CO2. “A cambéu del desenvolvimientu de meyores técniques nos motores que dexaren un menor consumu y xunas menores emisiones de CO2, la industria llogró un tratamientu fiscal favorable pa los turismos diésel y xuna laxa regulación d’emisiones contaminantes”, sorraya l’investigador. La dieselización n’Europa desapegó a finales del deceniu de 1990 y llegó al so cenit nel periodu 2005-2015, cuando más de la metá de los coches que se rexistraben na UE taben fechos con motor diésel. L’escándalu dieselgate asociáu al Grupu Volkswagen, desatapáu en 2015, aceleró’l cayente d’esti procesu.
El profesor del Departamentu d’Economía Aplicada esplica que la dieselización ye un fenómenu únicu nel mundu y con plenu protagonismu de la industria europeo, anque Xapón y Corea vendieron más de 25 millones de turismos diésel nos países de la UE. Sicasí, l’apueste pola tecnoloxía del diésel nun torgó a la industria europeo caltener una notable posición competitiva nel mercáu mundial. «El superávit comercial acomuñáu al automóvil, que pal conxuntu de la UE supera los 70.000 millones añales, provien casi na so totalidá de les esportaciones de turismos con motor de gasolina”, añede.
La principal enseñanza de la dieselización ye, a xuiciu d’esti investigador, que la meyora na eficiencia de los motores de combustión nun ye n’absolutu suficiente pa llograr un amenorgamientu significativu de les emisiones de gases d’efectu invernaderu. “La mayor eficiencia enerxética reparada nes nueves matriculaciones viose compensada por una crecedera sosteníu del parque automovilísticu, un aumentu del tamañu y la potencia de los turismos (destacando la proliferación de los SUV o touterrén urbanos) y por un usu más intensivu del automóvil debíu al menor costu por kilómetru que la mayor eficiencia trai apareyáu”, comenta.
Los grandes oxetivos medioambientales que la UE s’afitara cola Llei Europea del Clima van traer pernotables cambeos nel mundu del automóvil. La Comisión Europea punxo sobro la mesa una regulación d’emisiones de CO2 con oxetivos bien ambiciosos pa 2030 y, sobremanera, pa 2035. Va ser entós cuando los turismos matriculaos tendrán de tener cero emisiones, lo qu’implica la prohibición de facto de cualquier tipu de motor de combustión, incluyendo los coches eléctricos enchufables. Les autoridaes europees tamién pretenden que la regulación ambiental sía una palanca de política industrial verde que dexe al sector européu del automóvil liderar la carrera pol esplegue masivu del coche eléctricu. “Nesti contestu, nun paez que les grandes empreses europees del sector tean mal asitiaes p’afaese a la movilidá verde del futuru”, conclúi Ignacio de la Rosal.
