La Universidá d’Uviéu foi almitida como miembru de plenu derechu nel Real Colexu Complutense en Harvard (RCC), un centru universitariu afiliáu a la Universidá de Harvard y destináu a promover la cooperación académica, científica y cultural ente la universidá americana y el sistema español de conocencia. La institución asturiana súmase asina al selectu grupu d’universidaes integráu, amás de pola Universidá Complutense de Madrid y la Universidá de Harvard, pola Politécnica de Madrid y les de Alcalá, Sevilla y Valencia. El rector de la universidá asturiana, Ignacio Villaverde, acompañáu pol vicerrector de Internacionalización, Daniel Santos, presentó güei l’alcuerdu de collaboración qu’asitia a la institución académica asturiana nuna posición privilexada pa establecer llazos de collaboración cola universidá estadounidense que lidera’l ranking académicu mundial.
El Real Colexu Complutense en Harvard ye una institución ensin ánimu d’arriquecimientu con personalidá xurídica mesma otorgada pol Estáu de Massachusetts (USA). Foi creáu en 1990 conjuntamente pola Universidá Complutense y l’Universidá de Harvard, so la presidencia de Derek C. Bok. Esti colexu concibióse como una institución conxunta pa fomentar y promover l’intercambiu académicu intelectual y científicu entre Harvard, la Complutense y les universidaes miembru, a les que s’incorpora agora Uviéu.
Col propósitu d’estender les posibilidaes qu’ufierta la collaboración entre Harvard y la Complutense al mayor númberu de profesores ya investigadores españoles, estableciéronse convenios de collaboración con delles universidaes españoles. Como parte d’esti proyectu d’espansión del conceutu orixinal, incorporáronse nos últimos años, la Universidá Politécnica de Madrid (2013), la Universidá de Alcalá (2014), la Universidá de Sevilla (2015), la Universitat de València (2015) y, agora, la d’Uviéu.
El rector Ignacio Villaverde amosóse bien satisfechu en suscribiendo l’alcuerdu de collaboración y destacó que, gracies a él, el personal docente ya investigador de la universidá asturiana va poder beneficiase d’un ambiciosu programa de beques y ayudes d’investigación y beques pa estudios de posgráu na universidá que lidera la conocencia nel mundu. Nesta mesma llinia, el vicerrector Daniel Santos destacó que l’alcuerdu va favorecer la realización d’estancies del personal docente ya investigador y d’estudiantes, col envís de faer posible l’establecimientu de los contactos en Harvard que puedan fructificar nel desenvolvimientu d’un proyectu o eventu, lo mesmo que d’una eventual estancia de llarga duración.
