Muncho antes de qu’empecipiara una edición nueva de Metrópoli (que yá son diez cola d’esti añu), l’ambiente alredor del recintu ferial Luis Adaro ya daba cuenta de lo que diba pasar unes hores dempues. Al rodiu de les tres de la tarde y aguantando la calor d’un día braniegu de xunu, varies persones yá aportaren a la puerta pa esperar al entamu, pa esperar y poder garrar un bon sitiu pa ún de los platos fuertes de la edición d’esti 2023.
Lola Índigo foi la encargada ayer (xunto con Nía nel escenariu Thunder Bitch) d’echar andar Metrópoli. Y lo fizo énte 10.000 persones qu’enllenaben tol espaciu destináu a los conciertos ya inclusive más. Pasaben un poco más de les 22:30 cuando l’escenariu quedó ensin lluz y empezaron a sonar les primeres músiques que yá fixeron gritar a ún públicu onde la mocedá yera una clara mayoría y que dexara dende va díes un sold out nes taquilles.
La granadina que pasara por Operación Triunfo amosó nel escenariu El Águila que tien unos fans envidiables que la siguen alló onde va, entá más nesti «Dragón Tour», onde l’artista salió d’un güevu blancu y causó la sensación del públicu tres cantar «An1mal» y llanzar un «¡Puxa Asturies!»
Tres esti entamu y col públicu yá entregáu, llegó’l tiempu de que sonaren grandes hits como «La niña de la escuela» o «4 besos» mientres que reivindicaba la llibertá d’espresión y de les muyeres, sobre manera, envuelta nun xuegu de lluces y coreografíes nes que se dexó la piel. Pa dalgunos asistentes, faltó «Lola Bunny». Sicasí, naide salió decepcionao d’esti primer día de Metrópoli.
Güei ye’l turnu de Drugos magar de les 21:00 y de Daviles de Novelda y 3Pac a partir de les 22:30. Metrópoli nun fizo namás qu’empezar.
