El conceyal de Mediu Ambiente y Movilidá, Aurelio Martín, esplicó na Comisión de Seguridá, Movilidá y Medio Ambiente celebrada esta mañana, que los cambeos introducíos na zona O. R. A., a valir dende’l pasáu 1 de xineru, busquen consiguir una xestión más eficiente y un usu más equilibráu del aparcamientu reguláu na ciudá.
Na actualidá, Xixón cunta con una zona O. R. A. escasa qu’absuerbe l’aparcamientu tantu de vehículos con tarxeta como de vehículos ensin ella. Sicasí, según datos de la Empresa Mista de Tráficu, les tarxetes O. R. A. superen en mil el númberu de places esistentes.
L’estudiu realizáu, ensin rematar entá pero qu’analiza yá’l 75% de les cais con aparcamientu reguláu de la ciudá, señala qu’en Xixón esisten 4.596 places O. R. A. frente a un total de 5.519 tarxetes, de les cualos 5.242 son tarxetes de residente añales o trimestrales. L’informe, que recueye datos a 31 d’avientu de 2021, amuesa tamién la esistencia de 375 viviendes de la ciudá nes que tán rexistraes dos o más tarxetes, una cifra que s’envalora algame les 500 viviendes una vegada rematara l’estudiu del 100% de la zona O. R. A.
Esta ye la razón pola que’l Conceyu decidió llindar el númberu de tarxetes de residente a una por vivienda. Trátase, según esplicó’l conceyal de Mediu Ambiente y Movilidá, de llograr una repartida más equilibrada y un usu más racional d’un espaciu públicu que ye llindáu, y nel que dando prioridá a los residentes de cada zona O. R. A. debe tamién facilitase l’accesu al restu de vecinos de la ciudá (que representen del orde de 90.000 vehículos con etiqueta ambiental) y a los visitantes. El conceyal recordó que ciudaes como Uviéu escarecen de tarxeta pa residentes na so zona O. R. A., y qu’otres nun dexen cuntar con tarxeta a vecinos que tengan una plaza de garaxe.
Esta midida nun ye la primera que la conceyalía de Mediu Ambiente y Movilidá toma nesti sentíu, yá que’l pasáu añu suprimió 120 tarxetes que dexaben a políticos y altos cargos de distintes alministraciones públiques aparcar de forma gratuita en zona O. R. A.
Otru de los cambeos a valir dende’l 1 de xineru ye que yá nun ye necesariu anovar el ticket d’aparcamientu cada 2 hores, una obligación qu’escarecía de sentíu prácticu y que suponía una molestia pa los usuarios ensin nengún efectu sobro l’aparcamientu. El conceyal Aurelio Martín recordó esta mañana qu’en Xixón nunca esistió rotación na zona azul de la O. R. A., una y bones la obligación de cambéu de ticket cada dos hores, al traviés d’un parquímetro o de la APP dende’l móvil del usuariu, nun implicaba en nengún casu la obligación de camudar el vehículu nin de plaza nin de zona.
Trátase, por tanto, nesti casu, de simplificar la xestión de la zona azul de la O. R. A. y facilitar el so usu a los ciudadanos.
A lo último, y tocantes a la posible ampliación de la zona d’aparcamientu reguláu na ciudá y l’implantación de zones O. R. A. de nuevu tipu, el conceyal de Mediu y Movilidá esplicó que’l Conceyu yá dispon del preséu normativu pa faelo, que ye la Ordenanza de Movilidá Sostenible, a valir dende’l pasáu 1 de xunu y que, recordó, nun recibió nengún allegamientu, nin particular nin de los partíos, mientres el períodu d’información pública con relación a los cambeos qu’agora se planteguen, incluyida la llimitación de les tarxetes de residente, polo qu’afirmó nun entender el discutiniu.
Sía que non, la implantación de nueves zones O. R. A., según la so planificación y delimitación, tendrán de ser oxetu de propuesta nel Plan de Movilidá Sostenible 2021-2030, que’l so primer borrador va ser presentáu nes próximes selmanes.
Sicasí, de manera paralela a la tramitación del Plan, el Conceyu estudia la puesta en marcha d’una esperiencia piloto de zones O. R. A. verde (de rotación) y naranxa (pa residentes) nel barriu de Cimavilla, al tratase d’un cascu históricu y ser yá una zona d’accesu acutáu, lo que facilitaría la implantación de la midida. L’Asociación Vecinal “Gigia” de Cimavilla ye yá conocedora d’esti proyectu.
