Xixón al día

Categoría: Última hora

  • PSOE ya IX van alcordar un programa de gobiernu conxuntu

    PSOE ya IX van alcordar un programa de gobiernu conxuntu

    Izquierda Xunida (IX) va votar a favor de la investidura de la candidata del PSOE. Dambes formaciones van trabayar pa concretar un programa de gobiernu conxuntu depués del Plenu del sábadu. Ana González valoró la decisión de la coalición y destacó’l compromisu de les dos fuerces polítiques pa «activar Xixón» nel mandatu que ta a piques d’entamar.  «Van ser cuatro años de capital importancia pola cantidá de problemes qu’hai que resolver», asegura la candidata socialista. «Hai muchos proyectos qu’impulsar tres los ocho años de paralises de Foru».

    González insitió en que les midíes que se van acometer tendrán de ser frutu d’un alderique sele y fondo, pero sobremanera, d’un trabayu responsable que va empezar el sábadu. Sicasí señaló que l’equipu de gobiernu va trabayar «dende la izquierda» siendo «conscientes de qu’hai cuestiones que van riquir d’un ampliu consensu«. Fizo referencia al plan de víes, proyectu sobre’l qu’aseguró que «intentaráse sumar a tolos grupos políticos».

    Ana González destaca que l’equipu de gobiernu va trabayar «dende la izquierda»

    Respectu al decálogu presentáu por Podemos-Equo y a la posibilidá d’aceptalo de cara a cuntar col votu de los moraos nel plenu del sábadu, González reconoció que prefier dexar les coses fluyir. «Nun ye necesariu un trabayu pocu fondu y pocu seriu col únicu oxetivu de paecer que cuentu con más sofitos de los que tengo», dixo. Nesti sentíu reivindicó la necesidá d’empezar un trabayu de fondura que defina claramente’l presente, pal futuru de Xixón. «El presente nun ye’l 15, empieza’l 16», señaló.

    Ana González emplazó a Podemos a aconceyar na primer selmana de xunetu. Esta posición  llevó a les tres conceyales de la formación morada a tomar la decisión d’astenese nel Plenu d’investidura. Yolanda Huergo, vocera de la coalición, aseguró que «gustáranos concretar los asuntos nos que tamos d’alcuerdu» enantes de la votación.

  • Pedro Sánchez ofréce-y a Iglesias un «Gobiernu de cooperación»

    Pedro Sánchez ofréce-y a Iglesias un «Gobiernu de cooperación»

    Entendimientu. Pedro Sánchez y Pablo Iglesias acercaron postures esti martes en La Moncloa. El presidente en funciones acercó postures col candidatu de Xuníes Podemos depués de recibir l’encargu del rei pa formar Gobiernu. El candidatu socialista a la reelección nun compareció ente los medios depués del conceyu. Quien sí lo fizo foi Adriana Lastra, vicesecretaria xeneral del PSOE y vocera socialista nel Congresu de los Diputaos. La diputada asturiana sorrayó qu’esiste «voluntá d’alcuerdu» ente’l PSOE y Xuníes Podemos pa que la llexislatura entame «cuanto antes» con un «Gobiernu progresista» y «de cooperación”.

    Nuna rueda de prensa posterior a la xunta caltenida por Sánchez y Iglesias, Lastra dixo que pa los socialistes esti primer alcuentru foi bien satisfactoriu. «Constatóse la voluntá d’alcuerdu ente la izquierda» y que’l PSOE ta determináu a trabayar en «buscar fórmules pa gobernar la complexidá».

    La vocera del PSOE recordó, amás, que «nos postreros 12 meses» demostróse que «ye posible l’entendimientu de la izquierda». Destacó l’alcuerdu presupuestariu algamáu y la collaboración de socialistes y XP pa poner en marcha midíes como la recuperación de la sanidá universal, la revalorización de les pensiones y la derogación del impuestu al sol. «Estes midíes ameyoraron la vida de los españoles y demostraron que la izquierda sabe entendese», recordó.

    Por too ello, resumió, hai «grandes coincidencies programátiques» y esisten «les meyores blimes para siguir desenvolviendo una axenda progresista». Lastra amestó que se van buscar fórmules para un Gobiernu de «cooperación plural, abiertu, integrador, incluyente» y onde tengan cabida personalidaes que sían «referentes» nos sos respectivos ámbitos.

  • Rubén Hidalgo tamién arrenuncia a l’acta de conceyal

    Rubén Hidalgo tamién arrenuncia a l’acta de conceyal

    Cambéos nel grupu municipal de Foru Asturies pa la llexistalatura nueva. El númberu cuatro de la llista, Rubén Hidalgo, ta acabante de comunicar la so decisión d’arrenunciar l’acta de conceyal. Según informa Europa Press, la intención del actual xerente d’Impulsa ye tornar al sector priváu y asegura tar yá en conversación con daqué empresa. Hidalgo refuga confirmar si la so renuncia a ocupar l’asientu de conceyal nel salón de Plenos de la Casa Conceyu va suponer tamién la so salida de Foru. «Ya se verá».

    Foru foi la tercera más votada nes elecciones municipales del pasáu 26-M. La candidatura d’Álvaro Muñiz llogró sumar 16.803 votos, un 12,37% del total. D’esta manera, la formación pierde l’Alcaldía de la ciudá pasando de ocho a tres conceyales. Hai que recordar que’l cabeza de llista arrenunció va dos selmanes a l’acta pa dexar pasu a Hidalgo. «Nun quiero dexar nin que piense en dexalo», dixo entós a los medios el candidatu.

    La renuncia de Rubén Hidalgo a l’acta de conceyal va facer correr la llista. La siguiente na candidatura de Foru ye la hasta agora conceyala de Educación y Cultura, Montserrat López. El grupu municipal del partíu na Casa Conceyu va quedar formáu por tres miembros del equipu de gobiernu de Carmen Moriyón. Jesús Martínez Salvador, responsable de Turismu, Festexos, Deporte y Mocedá, va exercer de voceru. Va tar acompañáu, amás de por López, por Ana Braña, conceyala saliente de Facienda, Organización Municipal y Empléu.

  • Mancáu por quemadures nel incendiu d’un pisu n’Avilés

    Mancáu por quemadures nel incendiu d’un pisu n’Avilés

    Un home de 36 años resultó mancáu por quemadures la pasada nueche al declarase un incendiu nun pisu d’Avilés. Efectivos de Bomberos del Serviciu d’Emerxencies del Principáu d’Asturies (SEPA), con base nos parques d’Avilés y Pravia, escastaron el fueu na vivienda afectada, asitiada na tercer planta d’un edificiu de 9 plantes del númberu 29 de l’Avenida de la Constitución.

    La quema xamuscó una habitación de la vivienda que resultó afectada pol fumu na so totalidá. Según los datos facilitaos pol Serviciu d’Atención Médica Urxente(SAMU) el mancáu, un varón de 36 años d’edá, foi evacuáu al Hospital Universitariu Central d’Asturies (HUCA), n’Uviéu, con pronósticu reserváu, por cuenta de más pruebes y hasta nueva valoración médica. Foi atendíu nel llugar pol equipu médicu de la UVI-móvil avilesina que darréu lu treslladó al centru hospitalariu. Hasta la zona tamién se movió una ambulancia de soporte vital básicu.

    Los bomberos retiraron parte d’un falsu techu y revisaron el llugar cola cámara d’imaxes térmiques

    El Centru de Coordinación d’Emerxencies del 112 Asturies recibió l’avisu a les 06.40 hores d’esta mañana. Na llamada sollertaben d’una quema na tercer planta d’un edificiu de 9 plantes. Esplicaron que taba quemando un pasiellu y había una persona mancada.

    La Sala 112 del SEPA activó a los bomberos del parque avilesín y otra dotación dende’l parque de Pravia. Amás, pasóse l’avisu al SAMU qu’unvió los medios citaos enantes ya informóse a la Policía Local y Nacional. A les 07.21 hores los bomberos comuniquen que l’incendiu ta escastáu. Pa escastar el fueu, amás d’instalar una llínea d’agua pel interior del inmueble, los bomberos tuvieron que trabayar colos equipos de respiración autónoma. Tamién retiraron parte d’un falsu techu y revisaron el llugar cola cámara d’imaxes térmiques.

    Nes xeres d’estinción participaron nueve efectivos de Bomberos del SEPA que treslladaron al llugar trés autobombas, un vehículu d’altor y unu de mandu. Rematada la intervención, a les 08.25 hores, retiraron del llugar para tornar a les sos respectives bases.

  • Muerre un home al incendiase la so casa en Llaviana

    Muerre un home al incendiase la so casa en Llaviana

    Un home morrió esti martes nel incendiu d’una vivienda allugada na localidá de La Xerra, nel conceyu de Llaviana. La vivienda, de dos plantes, quedó xamuscada por completu. Foi la policía xudicial quien solicitó la movilización de servicios funerarios para retirar restos mortales del fallecíu.

    El Centru de Coordinación d’Emerxencies del 112-Asturies recibió l’avisu a les 03.52 hores d’esta madrugada. La llamada realizóla un familiar, dende otra localidá, tres ser sollertáu polos vecinos del afectáu. Taba quemando la so vivienda, un inmueble de dos altores. Esplicaben que la vivienda nun tenía cases amiestes y desconocíen si’l so familiar s’atopaba nel interior.

    La Sala 112 del SEPA activó a efectivos de Bomberos del parque de Samartín del Rei Aurelio y del parque de Llamorgal xuntu al xefe de Zona Centro. Cuando la primer dotación llegó al incidente informóse que yera una casa con treme de madera, totalmente incendidada y derruida.

    Los bomberos, a los que darréu se sumaron dotaciones de Proaza y Coballes, tuvieron que trabayar colos equipos de respiración autónoma yá que tuvieron que dir removiendo adulces los escombros para esfrecer y escastar el fueu. Encaloraes les llapaes parte de les dotaciones tornaron a la so base. Nel llugar permanecieron hasta la llegada de la Policía Xudicial, trés efectivos de bomberos del parque de Coballes y el xefe de Zona.

  • Un tramu d’Ezcurdia, cortáu por obres hasta’l xueves

    Un tramu d’Ezcurdia, cortáu por obres hasta’l xueves

    Un tramu de la cai Ezcurdia ente l’avenida de Castiella y la cai Marqués d’Urquijo va permanecer cortáu al tráficu hasta’l xueves. El motivu nun ye otru que la realización d’obres nesta zona de la vía. Los trabayos van desendolcase ente les ocho de la mañana y les ocho de la tarde.

    Les obres n’Ezcurdia van afectar amas a la circulación de los autobuses de la llínea 10 d’Emtusa. Los trayectos con salida del Hospital de Cabueñes, Candenal y Plaza Villamanín va faer percorríu normal hasta Ezcurdia na so confluencia cola avenida de  Castiella. Nesi puntu va xirar pa garrar esta avenida y facer la parada de ‘Moka’. Depués va siguir pela avenida de la Costa y cai Uría, onde se va retomar el percorríu normal de la llínea. A lo llargo del tiempu que duren les obres, van quedar anulaes les dos paraes afectaes de la cai Ezcurdia: Marqués de Urquijo y Fábrica de Gas.

  • Estopa va dar un conciertu en Xixón n’avientu

    Estopa va dar un conciertu en Xixón n’avientu

    Estopa va ufiertar un conciertu en Xixón el 21 d’avientu. Va Ser a les 21:30 nel Palaciu de Deportes de la Guía ‘Presidente Adolfo Suárez’. Los hermanos David y José Muñoz celebren 20 años de trayectoria musical cola so banda Estopa cola publicación d’un nuevu trabayu discográficu, ‘Fuego’. Desque en 1999 publicaren el so primer trabayu nun pararon de collechar ésitos, como’l récord de vientes pa un grupu debutante gracies a los 1.200.000 exemplares vendíos del so primer discu, ‘Estopa’.

    ‘Fuego’ ye’l primer cantar del décimu álbum d’Estopa. Un nuevu trabayu con cantares tamién totalmente nueves, que va ser el meyor homenaxe posible pa celebrar dos décades de música d’Estopa. ‘Fuego’ ye Estopa n’estáu puru: rock, palmes y desenfadu, la infalible receta cola que va dos décades rescataron la rumba de la mormeyera dende una perspectiva roquera.

    Nel so Tour Fuego nun van tocar namás los sos nuevos cantares, sinón que van faer esfrutar al públicu con tolos sos grandes ésitos. Una celebración en toa riegla d’unu de los grupos españoles más importantes de les últimes décades. Les entraes pal conciertu d’Estopa nel Palaciu de Deportes de Xixón yá tán a la vienta. Pueden adquirise al traviés d’internet na páxina web: http://2monkeys.es/conciertos/

  • El 5G llega esti sábadu a Xixón

    El 5G llega esti sábadu a Xixón

    Los primeros servicios comerciales de 5G van llegar el sábadu a Xixón. Vodafone España anunció’l llanzamientu d’esti serviciu a partir del 15 de xunu. Esta tecnoloxía va tar disponible pa los clientes d’esta compañía nesta ciudá y n’otres catorce: Madrid, Barcelona, Valencia, Sevilla, Málaga, Zaragoza, Bilbao, Vitoria, San Sebastián, La Coruña, Vigo, Pamplona, Logroño y Santander. Vodafone conviértese asina na primer operadora en poner a disposición de los sos veceros los servicios 5G n’España y n’una de les pioneres nel mercáu européu.

    Los veceros de Vodafone con tarifes ilimitaes van poder despreocuparse del consumu de datos. Beneficiaránse de velocidaes de descarga d’hasta 1Gbps nel llanzamientu y d’hasta 2 Gbps a finales d’añu colos planes de más valor. D’esta forma, podríen multiplicase por diez les velocidaes actuales de la rede 4G. Les tarifes ilimitaes, colos servicios 5G incluyíos, pueden contratase na web www.vodafone.es y nes tiendes Vodafone. Coles mesmes, tamién pueden adquirise dende güei los primeres smartphones 5G nel so catálogu de terminales.

  • Dos mancaos nun accidente de tráficu en Cuadonga

    Dos mancaos nun accidente de tráficu en Cuadonga

    Dos persones, un varón y una muyer, resultaron mancaos en sufriendo un accidente de tráficu cola moto na que circulaben, topetaron con una barandiella y cayeron por un desnivel, na redolada de Cuadonga, en Cangues d’Onís. El Grupu de Rescate de Bomberos del Serviciu d’Emerxencies del Principáu d’Asturies (SEPA), a bordu del helicópteru medicalizáu, evacuó al varón al Hospital Universitariu Central d’Asturies (HUCA). La muyer foi evacuada, pola ambulancia de soporte vital básicu de Ribeseya, al Hospital Comarcal de Les Arriondes. Según los datos facilitaos pol Serviciu d’Atención Médica Urxente (SAMU) por cuenta de más pruebes y hasta nueva valoración médica’l pronósticu de dambos ye reserváu.

    El Centru de Coordinación d’Emerxencies recibió l’avisu a les 12:14 hores. Na llamada indicóse qu’había una moto cayida, xubiendo a la Basílica de Cuadonga, y cayeren por un desnivel y nun los víen. Darréu movilizóse al Xefe de Bomberos del SEPA de la Zona Oriental y a seis efectivos de Bomberos del SEPA, con base nel parque de Cangues d’Onís, que se treslladaron col furgón multisocorro y el vehículu primera salida, y al Grupu de Rescate de Bomberos del SEPA, a bordu de l’aeronave medicalizada.

    Hasta nueva valoración médica’l pronósticu de dambos ye reserváu

    Una vegada na zona, los bomberos aportaron hasta los mancaos. Al paecer, por cuenta del choque de la moto contra una barandiella, los dos ocupantes salieron despidíos y cayeron por un desnivel unos 20 metros. Los bomberos utilizaron la camiya nial para portear y sacar del llugar, hasta l’ambulancia al varón. Para ello los efectivos tuvieron qu’utilizar la radial para cortar ún de los barrotes y asina poder sacar hasta la calzada al mancáu. De siguío, n’inmovilizando a la muyer y el collarín, tamién la portearon y sacaron de la zona, cola tabla de rescate.

    La sala del 112 del SEPA informó del sucesu a la Guardia Civil, a la Policía Local y al Serviciu d’Atención Médica Urxente (SAMU) qu’activó l’ambulancia de soporte vital básicu de Ribesella y l’ambulancia y el médicu d’Atención Primaria de Cangues d’Onís.

  • Álvaro Muñiz: «Ana González va tener la oposición que Moriyón nun tuvo»

    Álvaro Muñiz: «Ana González va tener la oposición que Moriyón nun tuvo»

    Foru va llevar a cabu una una «oposición lleal» en Xixón. Álvaro Muñiz tresmitió-y a Ana González que la so formación va tener «la oposición que Carmen Moriyón nunca tuvo: rigorosa y cola mano tendida siempres al diálogu y los alcuerdos». Fízolo mientres un conceyu col Comité Negociador del PSOE de Xixón, que calificó de «cordial y constructivu».

    Muñiz añadió que «Foru, como únicu partíu que gobernó esta ciudá amás del PSOE, va liderar l’alternativa». Aseguró nun compartir «el modelu de los socialistes», pero reconoció «que ye l’escoyíu democráticamente polos xixoneses». Anunció que la formación nun va presentar candidatu a l’Alcaldía y va abstenese na investidura d’Ana González. «Ye un xestu qu’esperamos seya recibíu como una invitación a esi diálogu, esa llealtá institucional que Carmen Moriyón, por desgracia, nunca esfrutó”. Muñiz añadió, amás, que «el trespasu de poder va ser tresparente, llimpio, y sobremanera, lleal a los intereses de tola ciudá».

    Muñiz acudió al conceyu acompañáu polos tres conceyales que van representar a la formación na Casa Conceyu: Jesús Martínez Salvador, Ana Braña, y Rubén Hidalgo. Hai que recordar qu’Álvaro Muñiz renunció al acta de conceyal. «Voi siguir lliderando’l partíu y voi tar arreyáu al 100% en tolo qu’asoceda nel Conceyu de Xixón y nel grupu municipal», esplicó entós. Y detalló que la so decisión taba motivada pol deséu de que’l númberu cuatro de la llista, Rubén Hidalgo, ocupara un asientu nel Plenu.