Xixón al día

Categoría: Última hora

  • El PP pierde un senador por Asturies: «Retroceder ye perder»

    El PP pierde un senador por Asturies: «Retroceder ye perder»

    El PP tien un senador menos por Asturies depués del 26-M. La candidatura de Teresa Mallada nes elecciones del pasáu domingu resistió enforma l’emburrión socialista, pero perdió un diputáu. El PSOE duplicó en votu a los populares, que pierden el representante por designación autonómica col que cuntaben na Cámara Alta. La asignación d’estos dos escaños nel Senáu fáise al aplicar el sistema D’Hont al númberu de miembros de los grupos parlamentarios.

    La presidenta del Partíu Popular d’Asturies, Mercedes Fernández, llamó a la «reflexón» nel so analís de los resultaos del 26-M n’Asturies, realizáu na so intervención inicial nel Comité Executivu Autonómicu del PP, celebráu n’Uviéu. N’él, felicitó a los candidatos que llograron la mayoría absoluta nos sos conceyos y a aquellos que, ganando les elecciones, van precisar de pactos pa gobernar.

    «Los electores reconócennos na austeridá del gastu públicu, l’amenorgamientu d’impuestos y les conductes exemplares»

    «Los electores reconócennos na austeridá del gastu públicu, l’amenorgamientu d’impuestos y les conductes exemplares», afirmó la líder del PP. La presidenta llamentó que, con esos resultaos, los dos senadores asturianos por designación autonómica seyan del PSOE, daqué que nunca asocediera hasta la fecha.

    Mercedes Fernández, énte la «escesiva diferencia» col PSOE, espunxo que la resultancia electoral «nun foi bonu». «Tolo que ye sumar ye ganar, pero tolo que ye recular ye perder», aseveró. El votu esterior confirmó esi enclín. «Hai espertos en comunicación política que dicen que la meyor campaña ye aquella que ye difusa; yo toi en desalcuerdu, hai qu’escoyer cuatro o cinco temes, de forma machacona, y marcar l’axenda», razonó, poniendo como exemplu «la eliminación del Impuestu de Socesiones«.

    A nivel nacional y sobre les resultancies del PP, la presidenta aseguró que les últimes resultancies supunxeron una meyora respecto a la «llombada» de les xenerales. «L’autocomplacencia inxustificada paraliza la meyora», añadió.

  • Cortes de tráficu’l sábadu pola VI Marcha Popular en Patines

    Cortes de tráficu’l sábadu pola VI Marcha Popular en Patines

    La zona centru y este de Xixón va sufrir cortes de tráficu esti sábadu pola celebración de la VI Marcha Popular en Patines. El pistoletazu de salida va producise a les once de la mañana. Los casi 400 patinadores saldrán del aparcamientu del patinódromu Manuel Fernández López ‘Manolín’. Van percorrer: Escobiu de los Beyos, avenida Juan Carlos I, Marqués de San Esteban, Melquiades Alvarez, sablera de San Llorienzo, avenida de Castilla, Torcuato Fernández Miranda, Calle Sporting y Jesús Revuelta hasta llegar a Les Mestes.

    Los participantes van dir nun bloque continuu y van producise cortes de tráficu’l tiempu mínimu imprescindible. La circulación va quedar abierta al pasu de los patinadores. Depués de casi seis kilómetros peles principales cais de la ciudá, van llegar al Complexu Deportivu de Les Mestes. Ellí va celebrase una ‘folixa’ con carreres de velocidá nel velódromu, discu móvil, xuegos y entrega de trofeos.

    Recorríu de la VI Marcha Popular en Patines.
    Recorríu de la VI Marcha Popular en Patines.

    La celebración d’esta prueba nun va ser la única que va afecta a la circulación del tráficu esti fin de selmana en Xixón. El domingu los cortes van treslladase a la zona oeste mientres la VI Carrera Popular Dona Vida. La prueba, que va salir de la sablera de Poniente, va percorrer un total d’ocho kilómetros pelos barrios d’El Natahoyo, La Calzada, Moreda y Xove.

    Los autobuses d’EMTUSA van sufrir esviadures puntuales y retenciones según se desenvuelva la prueba deportiva. La complexidá de la prueba va obligar a torgar y abrir el pasu nes víes afectaes. Les circunstancies de les esviadures van dir variando, pudiendo haber momentos nos que’l serviciu quede atayáu de forma provisional al pasu de los participantes.

  • Trés empreses asturianes ganen el Ances Open Innovation

    Trés empreses asturianes ganen el Ances Open Innovation

    Trés empreses asturianes resultaron ganadores, ente más d’un centenar de participantes, del Ances Open Innovation. Trátase d’un programa que busca crear negocios ente grandes sociedaes tractores y pymes de base tecnolóxica. Les nueves empreses iKnovatio&doShareIT Solutions, SVMAC y Objetiv Creativo fueron escoyíes gracies a les soluciones qu’ufiertaron a los retos llanzaos por Gonvarri, Iberdrola y Liberbank, respectivamente.

    Esti programa d’innovación ta entamáu pola Asociación Nacional de Centros Europeos d’Empreses ya Innovación (Ances) so la coordinación de Cristina Fanjul, vicepresidenta d’Ances y directora de CEEI Asturies. La segunda edición cuntó cola participación d’once empreses líderes nos sos sectores: Capsa Food (Central Llechera Asturiana); Central de Reserves; CEU Business School; Enagás; Ferrovial; Gonvarri; Grupu Fuertes (El Pozo); Iberdrola; J. García Carrión; Liberbank y Soltec. Estes sociedaes escoyeron 30 soluciones finalistes pa los oxetivos tecnolóxicos llanzaos d’ente les 110 propuestes presentaes dende toa España.

    Ente les escoyíes atopábense 5 pymes asturianes: Altabox, Dois Miller, iKnovatio& doShareIT Solutions, Obetivo Creativo, SVMAC, amás del Institutu d’Investigación Sanitaria del Principáu (ISPA). Finalmente, trés nuevos empreses innovadores del Principáu resultaron ganadores nun actu celebráu güei en Madrid, que cuntó cola presencia de Cristina Fanjul, directora del CEEI Asturies y coordinadora del programa, y del director xeneral de Centru pal Desenvolvimientu Tecnolóxicu Industrial d’España, Javier Ponce.

    Los retos que se plantegaron nesta edición taben rellacionaos con enclinos globales de la nueva economía, como dixitalización, industria 4.0, economía circular y enerxíes anovables. Amás, tomaben nuevos modelos de negociu o productos, mesmo que l’aplicación de tecnoloxíes a procesos como la sensórica, la intelixencia artificial, big data o l’internet de les coses.

  • PSOE y Ciudadanos descarten un alcuerdu d’investidura

    PSOE y Ciudadanos descarten un alcuerdu d’investidura

    PSOE y Ciudadanos (Cs) descarten un alcuerdu que se traduza nun sofitu per parte de la formación naranxa a la investidura d’Ana González como alcaldesa de Xixón. Ye la principal conclusión del conceyu manteníu esti xueves pela tarde entre dambes formaciones. La xunta foi «cordial» y nella dambes fuerces polítiques manifestaron la so disposición a «practicar un diálogu constructivu». Los dos partíos sí manifestaron la so disposición a adoptar alcuerdos puntuales a lo llargo del mandatu y a siguir dialogando.

    Trátase de la primera de les xuntes de la ronda prevista pol PSOE, empezando pola segunda fuerza más votada nes elecciones municipales del domingu y en sentíu descendente. La comisión negociadora de l’Agrupación Municipal Socialista de Xixón ta integrada pol secretariu xeneral, Iván Fernández Ardura, el vicesecretariu xeneral, Francisco Blanco, el secretariu d’organización, Roberto Lena, y el númberu trés de la candidatura municipal, Natalia González. Per parte de Ciudadanos asistieron los cuatro conceyales electos, José Carlos Fernández Sarasola, Rubén Pérez, Ana Isabel Menéndez y Mara Simal.

    Ana González podría ser investida alcaldesa llogrando la mayoría absoluta de los votos  o con una mayoría simple al ser la llista más votada. La candidata tien previsto siguir la ronda de contactos col grupos que van constituyir el próximu Plenu sacante Vox. «Somos formaciones antagóniques».

  • Cuatro firíos en Casu tres salise de la vía’l coche nel que vixaben

    Cuatro firíos en Casu tres salise de la vía’l coche nel que vixaben

    Cuatro persones resultaron firíes de diversa considerancia en saliéndose de la vía’l turismu nel que viaxaben. El vehículu cayó per un desnivel d’ente 10 y 20 metros, a un kilómetru de la salida de la localidá d’Orllé en dirección a El Campu, en Casu. L’afectada de mayor considerancia ye una muyer, de 41 años d’edá que foi treslladada al Hospital Universitariu Central d’Asturies (HUCA) con politrauma de pronósticu reserváu.

    La muyer foi atendida nel llugar del accidente pola médica-rescatadora del Grupu de Rescate movíu al llugar col helicópteru medicalizáu. En emprestándo-y asistencia foi evacuada, inmovilizada en camiya, acompañada pola médicu, por aciu una operación de grúa na que s’esplegaron unos 45 metros de cable, hasta l’aeronave.

    Según los datos facilitaos pol Serviciu d’Atención Médica Urxente (SAMU) otros dos firíos, dos varones de 40 y 51 años, fueron sacupaos nuna ambulancia de soporte vital básicu al Hospital Valle del Nalón con pronósticu leve. El cuartu afectáu, otru varón de 52 medios, podía movese polos sos medios. Nel turismu viaxaba una quinta persona que resultó ilesa.

    Nel turismu viaxaba una quinta persona que resultó ilesa

    Amás del Grupu de Rescate col helicópteru medicalizáu hasta l’incidente movióse, per tierra, una dotación de Bomberes del Serviciu d’Emerxencies del Principáu d’Asturies (SEPA) con base nel parque de Samartín del Rei Aurelio.

    Cuando llegaron al llugar tolos afectaos salieren pelos sos propios medios del interior del coche. Dos bomberos aportaron hasta’l coche y aseguraronlu col cable del furgón multisocorro. Amás, ayudaron a unu de los mancaos a xubir hasta la carretera onde esperaba l’ambulancia.

    El Centru de Coordinación d’Emerxencies del 112 Asturies recibió l’avisu a les 16.31 hores. Na llamada señalaben qu’un vehículu cayérase por un terremplén ente 20 o 30 metros. Tolos ocupantes taben fuera del turismu. La Sala 112 del SEPA movilizó a Bomberos del parque de Samartín del Rei Aurelio y al Grupu de Rescate col helicópteru medicalizado. Amás, pasó la llamada al SAMU qu’unvió l’ambulancia de soporte vital básicu de Llaviana y comunicó lo asocedío a la Guardia Civil. Rematada la intervención el Grupu de Rescate tornó a la so base en La Morgal a les 18.31 hores y los bomberos llegaron a parque a les 18.43 hores.

  • Daniel Ripa, sobre’l 26-M: «Tócanos cambiar coses»

    Daniel Ripa, sobre’l 26-M: «Tócanos cambiar coses»

    «Lo que toca cuando les resultancies nun son los esperaos ye escuchar a la xente p’ameyorar y camudar coses». Daniel Ripa analizó esti miércoles n’Uviéu los resultaos electorales del 26-M. Podemos perdió nestos comicios más de la metá de la representación na Xunta Xeneral, pasando de nueve a cinco diputaos. «Tócanos escuchar a la xente p’ameyorar y camudar coses, avanzando y trabayando muncho, reforzando la organización, abriendo un diálogu, trazando estratexes al mediu plazu, con mayor implicación social y más apertura». El secretariu xeneral de la formación morada compareció énte los medios de comunicación en compañía d’Andrés Fernández Vilanova, diputáu saliente y responsable d’Organización, y de Nuria Rodríguez, vocera autonómica del partíu y diputada electa.

    Daniel Ripa anunció la convocatoria pa esti sábadu d’una xunta del Conseyu Ciudadanu y del Conseyu Territorial de Podemos Asturies pa valorar unos resultaos que, «ensin ser los qu’esperábamos», asítiense como «los meyores de Podemos» en toles comunidaes autónomes. «Somos l’únicu llugar onde se superó la barrera del 10% nel Parlamentu, l’únicu onde la suma de Podemos y d’Izquierda Xunida supera la suma de les elecciones xenerales». Reconoció que «hubo una baxada xeneralizada en toles comunidaes y en toles ciudaes, que tien enforma que ver con una inercia de les elecciones xenerales onde la victoria de Pedro Sánchez asitióse tamién nel restu d’elecciones d’esti ciclu».

    «La victoria de Pedro Sánchez asitióse tamién nel restu d’elecciones d’esti ciclu»

    A pesar d’ello, aseguró, «les resultancies déxennos tener fuerza nel Parlamentu asturianu, porque’l PSOE sigue ensin cuntar cola mayoría pa gobernar. Y a nivel municipal nuesa presencia pasa de 22 a 23 conceyos, amenorgando daqué’l númberu de conceyales». Recordó que «nestos cuatro años consiguimos ésitos, tantu a nivel municipal como autonómicu. Nel Parlamentu asturianu consiguimos devolver a les families la delda del ERA, plantegar midíes contra les llistes d’espera sanitaries, amenorgar les matrícules de 0 a 3 y universitaries, impulsar procesos xudiciales en casos de corrupción… Y son llogros que se van a caltener». Refirióse tamién a les resultancies electorales d’Izquierda Xunida y afirmó que «pa nós nun ye una bona noticia la potencial perda del grupu parlamentariu d’IX». Por ello, manifestó, «apostamos por que nun se produza. Tamos por buscar soluciones pa que xuntos avancemos en busca d’una Asturies que vaiga meyor».

    Pela so parte, Nuria Rodríguez esplicó que «tamos equí pa faer política pa la ciudadanía. Lo único qu’importa son les polítiques de cambéu, les que pueden faer que la xente ameyore la so situación. Porque Asturies ta nun momentu críticu, cada selmana hai nueves trabayadores que ven apeligrar los sos puestos de trabayu». Por tanto, alvirtió, «quien quiera xugar al intercambiu de cromos, a intereses de sillones y de sielles, que lo faigan so la so responsabilidá». Sobro les resultancies electorales collechaos pol partíu moráu, aseguró que «nun ye innecesariu focalizar la responsabilidá en nenguna persona en concretu. De lo que se trata ye d’analizar con criteriu p’avanzar y p’ameyorar la situación».

    Andrés Fernández Vilanova queda fuera de la Xunta al nun consiguir representación na circunscripción occidental

    Andrés Fernández Vilanova, diputáu saliente pola circunscripción occidental, señaló que «despídome como parlamentariu dempués de cuatro años bien intensos. Esta vegada nun pudo ser, yera difícil pero teníamos qu’intentar de toes toes sacar representación nel oriente y nel occidente. Sicasí, estos territorios van siguir teniendo la so voz enriada al traviés de Podemos nes instituciones». Amestó que «defendimos les necesidaes de la vida nesos territorios y, nel mio casu particular, engarré contra la corrupción nel sistema sanitariu y por una sanidá meyor. Hai munches coses que dexamos feches y esto danos una prestu enorme».

    Quixo estimar amás «l’honor de poder representar a la xente del Occidente y de poder engarrar pola sanidá pública mientres estos cuatro años. Agora vuelvo a la mio vida profesional, porque quien entramos en Podemos facer pa sirvir a Asturies, non pa sirvinos d’ella. Creemos que la política ye un mediu pa camudar y ameyorar la vida de la xente, non pa vivir d’ella». Y dexó claro que «a quien na nueche electoral frotaben les manos al ver el descensu de Podemos diría-yos que nun rieren tantu, porque agora, anque tengamos menos diputaos, sabemos muncho más, conocemos les sos trampes, los sos procedimientos d’engañu, y vamos siguir desatapándolos».

  • Moriyón renuncia a ser diputada pero va siguir lliderando Foru

    Moriyón renuncia a ser diputada pero va siguir lliderando Foru

    Carmen Moriyón renuncia a l’acta de diputada. La candidata de Foru Asturies a la presidencia del Gobiernu d’Asturies asumió esti miércoles como propios los malos resultaos del partíu nes elecciones autonómiques del pasáu domingu y anunció al so intención de nun ocupar l’escañu que-y correspuende na Xunta Xeneral. «Cuando se llogra una derrota en política, dimítese. Ye lo que procede facer, anque nun sía la práctica habitual», resaltó.

    La tovía alcaldesa de Xixón en funciones aseguró qu’entró en política «col deséu y l’ilusión de contribuyir a camudar fechos y usos de la política«. Aseguró sentir «una alcordanza imborrable con toles persones que trabayaron conmigo y tanta xente que me paró pola cai pa dame ánimos».

    [Llea’l comunicáu íntegru de Carmen Moriyón]

    Moriyón llamentó «los erros que pudiera cometer», pero aseguró que va siguir como presidenta de Foru. «Sigo creyendo nesti proyectu. Débo-ylo a los más de 34.000 asturianos que colos sos votos dexáronnos llograr 49 conceyales en 21 conceyos». Comprometióse a «favorecer los cambeos necesarios» nel partíu «p’afaenos al nuevu escenariu políticu y a lo que la sociedá asturiana demanda». Y defendió que la so formación ye «l’únicu partíu con un proyectu y una ideoloxía propia más allá de personalismos: Asturies nel centru y centraos n’Asturies».

    La renuncia de Carmen Moriyón a l’acta de diputada va suponer la so vuelta a la plaza de Ciruxía Xeneral nel Hospital de Cabueñes. Una marcha que coincide nel tiempu cola decisión del candidatu de Foru a l’Alcaldía de Xixón, Álvaro Muñiz, d’arrenunciar al acta de conceyal pa dar pasu a Rubén Hidalgo.

  • Álvaro Muñiz céde-y el puestu de conceyal a Rubén Hidalgo

    Álvaro Muñiz céde-y el puestu de conceyal a Rubén Hidalgo

    Álvaro Muñiz nun va recoyer l’acta de conceyal. El candidatu de Foru Asturies a l’Alcaldía de Xixón anunció esti miércoles pela tarde la so renuncia. «Voi siguir lliderando’l partíu y voi tar arreyáu al 100% en tolo qu’asoceda nel Conceyu de Xixón y nel grupu municipal», esplicó. Detalló que la so decisión vien motivada pol so deséu de que’l númberu cuatro de la llista, Rubén Hidalgo, ocupara un asientu nel Plenu.

    «Toi seguro que l’equipu formáu por Jesús Martínez Salvador, Ana Braña y Rubén Hidalgo ye l’únicu nel Conceyu que va poder realizar una oposición calidable», aseguró en rueda de prensa. Y insistió en que la so decisión «nun ye un pasu atrás». Muñiz esplicó que Jesús Martínez Salvador va ser la voz del partíu nel Plenu y descartó que vaya haber bicefalia porque «tamos en constante comunicación».

    Álvaro Muñiz afirmó que los socialistes nun a atopar «sorpreses» na so llegada a la Casa Conceyu. «Van encontrase con una situación muncho meyor de la que dexaron», dixo. El candidatu forista valoró d’esta manera la xestión de la que tovía ye alcaldesa en funciones, Carmen Moriyón, que güei anunció la renuncia a l’acta de diputada pa tornar a la so actividá como ciruxana nel Hospital de Cabueñes.

  • Bon tiempu hasta’l domingu

    Bon tiempu hasta’l domingu

    Selmana soleyera en Xixón. El bon tiempu va ser protagonista hasta’l domingu na ciudá. Les nubes de díes atrás dexen pasu a un miércoles nel que va llucir el sol tol día. Les temperatures perpasaron los 20 graos nos momentos centrales del día. La estación meteorolóxica asitiada nel campus de Viesques marcó 20,4 graos.

    La situación va mantenese nos díes vinientes. El xueves vamos siguir esfrutando del sol, con temperatures que podríen algamar los 23 graos. Les máximes van siguir xubiendo de cara al viernes y el sábadu cuando los termómetros podríen llegar a los 26 graos.

    El domingo espérense intervalos nublos, principalmente de nubes altes, aumentando a nublu o cubiertu na metá occidental pela tarde. Nun se descarten agües débiles na mariña occidental a la fin del día. Les temperatures baxarán y el vientu va soplar variable tendiendo a oeste y noroeste.

     

  • Nuevu retrasu d’un Alvia de Madrid a Xixón

    Nuevu retrasu d’un Alvia de Madrid a Xixón

    Nueva incidencia na conexón ferroviaria ente Asturies y Madrid. L’Alvia de les 14.50 nun llegó a salir de la estación de Chamartín. Los pasaxeros de la llínia atoparonse con un tren de media distancia. «Renfe fai lo que-y da la gana col trayectu Madrid-Asturies. Espérennos cinco hores de viaxe ensin cafetería y nun tren de media distancia. Olé.
    Tamos fartes. Muncho», criticó Noelia Odieres, una de les pasaxeres afectaes, en Twitter.

    A través de la mesma rede social, Renfe esplicó que’l convói circula con 24 minutos de retrasu por una avería d’instalaciones que nun tien nada que ver col cambiu de tren. «Vamos con retrasu, nun tren ensin cafetería que nun ye un Alvia y ensin avisanos», llamentó. L’avería ta provocando retrasos n’otres llínies que conecten Madrid col norte de la península.