Categoría: Última hora

Moriyón comprométese a diseñar un plan pa «rellanzar» Perlora

La candidata de Foro a la presidencia del Principáu, Carmen Moriyón, visitó güei les instalaciones de la Ciudá de Vacaciones de Perlora. Ellí aconceyó con diverses asociaciones vecinales de la zona. Fízolo acompañada por Carmen Fernández y Pablo González, número cuatro y siete, respectivamente, de la candidatura autonómica, y pola candidata a l’Alcaldía de Carreño, Alejandra Martínez.

«Perlora tien una situación privilexada que dende Foru queremos aprovechar con un plan que permita optimizar el so potencial económicu y turísticu. Pa ello, güei comprometimos a consensuar colos vecinos los proyectos, los plazos y el financiamientu necesariu para rellanzar lo que güei ye un pueblo pantasma», esplicó Moriyón.

Los dirixentes de Foru denunciaron «l’estáu d’abandonu» qu’ufierta la Ciudá de Vacaciones de Perlora con «instalaciones y equipamientos desdexaos, y con una falta absoluta de caltenimientu y llimpieza de les cais y zones verdes». Una situación qu’atribuyeron «a la desidia y falta d’idees de los gobiernos socialistes». Recordaron que «fai casi trelce años que’l Gobiernu del Principáu decidió cerrar les sos instalaciones y condergales al derrumbe».

Otra manera, Foru propónse «consensuar colos vecinos de Perlora los proyectos que ‘espierten’ esti espaciu allugáu nuna redolada privilexada», afirmó Moriyón. “Toa Asturies ta precisada de proyectos que reactiven la economía y, ensin dulda, el complexu vacacional de Perlora nun puede caltenese zarráu por más tiempu. El turismu, el comerciu y l’hostelería local van vese beneficiaos cola so reapertura». «Perlora siempres foi un llugar abiertu, d’usu y esfrute pa los ciudadanos y asina tien de siguir», concluyó.

23/05/2019
Retenciones nel Güerna pola quema d’una camión

La quema d’un camión que circulaba pela autopista del Güerna (AP-66) ta provocando retenciones nel tráficu en sentíu Xixón. El sucesu producióse al altor del puntu kilométricu 71, nel conceyu de Ḷḷena. Efectivos de Bomberos del Serviciu d’Emerxencies del Principáu d’Asturies (SEPA), con base nos parques de Mieres y Llamorgal, escastaron el fueu, que xamuscó’l camión y los trés vehículos que tresportaba. Les llapaes nun alcanzaron a otru coche que treslladaba nun remolque.

El Centru de Coordinación d’Emerxencies del 112-Asturies recibió l’avisu a les 08.20 hores. Na llamada informaben que taba quemando la cabina d’un camión que tresportaba coches na autopista del Güerna. La Sala 112 del SEPA movilizó una dotación de bomberos con base nel parque de Mieres y tamién activó otra dende’l parque central de Llamorgal con una autobomba nodriza. Tamién s’informó al Xefe de Zona Centro qu’allegó al incidente.

Los bomberos dieron por controlada la quema a les 09.17 hores, pero permanecieron nel llugar realizando xeres de refrigeración hasta les 10.37 hores. L’incidente provocó’l pieslle de la vía en sentíu Xixón. El tráficu restablecióse momentos depués nún de los carriles.

23/05/2019
Cortes de tráficu pol XI Triatlón Villa de Xixón

Cortes de tráficu na zona oeste de la ciudá pola celebración del XI Triatlón Villa de Xixón. Les restricciones van afectar el sábadu pela mañana a delles víes d’El Natahoyo y La Calzada y a la contorna de la sablera de Poniente. Los cortes van durar dende les diez de la mañana hasta les dos de la tarde.

La prueba en bicicleta va salir del paséu de Poniente pa percorrer l’avenida Juan Carlos I hasta la cai Agustín Argüelles, n’El Cerilleru. La vuelta va ser pela avenida Juan Carlos I hasta Dionisio Fernández-Nespral Aza (Muséu del Ferrocarril). El segmentu de carrera a pie va afectar al paséu de Poniente y cera de Fomentu hasta’l Puertu Deportivu.

Pa entrar y salir d’El Natahoyo y La Calzada mientres la competición encamiéntase utilizar l’avenida Príncipe d’Asturies. L’accesu a dambos barrios pela cai Rodríguez San Pedro y Carlos Marx va tar cortáu al tráficu. Los vehículos procedentes de la cai Rodríguez San Pedro dirección La Calzada van ser esviaos pela cai Marqués de San Esteban. Amás, va acutase l’accesu de turismos nel tramu de la cai Mariano Pola ente la cai Palafox y l’accesu al Acuariu, permitiéndose namás la entrada y salida de garaxes.

Coles mesmes, el tráficu procedente de la cai Carlos Marx en dirección a la Plaza del Padre Máximo González va cortase al altor de la Carretera Vizcaina. Va habilitase un carril en Juan Carlos I p’aportar y salir del barriu de Moreda dende l’avenida Príncipe d’Asturies.

L’estacionamientu tará prohibíu en tol circuitu y namás se permitirá la circulación tresversal en casos d’urxencia vital. Les persones afectaes por estes restricciones pueden contactar cola Policía Local de Xixón nos teléfonos 092 y 985 18 11 00.

23/05/2019
Barbón: «La sidra ye parte fundamental de la economía d’Asturies»

Adrián Barbón punxo en valor la sidra esti miércoles mientres visita una visita al Llagar Frutos, en Quintueles (Villaviciosa). «Ye una parte fundamental del desenvolvimientu económicu, non solo de les nueses tradiciones», dixo. A manera d’anécdota, el candidatu a la presidencia del Principáu señaló que «Casado, cuando faltó a frixuelos y horros faltó-y la sidra» frente a la posición de la FSA-PSOE, «porque nós reivindicamos la sidra, sobremanera como parte de la crecedera económica d’Asturies».

Adrián Barbón puntualizó que nel programa de gobiernu de los socialistes «tenemos midíes para potenciar el sector, más allá de lo que fixo’l Gobiernu del Principáu, que creo que ye enforma, sobremanera tocantes a Patrimoniu Inmaterial de la Unesco, creemos qu’hai qu’ampliar la variedá del productu, non solo la sidra tal que lo conocemos sinón otres ufiertes y otres variedaes que dexen siguir desenvolviendo’l sector”.

En concretu, Adrián Barbón, en declaraciones a los medios, esplicó que «proponemos ampliar el númberu de variedaes de mazana que formen parte de la Denominación d’Orixe para favorecer la vienta». Nun escaeció reconocer que «tamos tamién énte una realidá periódica porque, dependiendo del añu, queda muncha mazana ensin recoyer. Queremos acompañar a productores y llagareros por que se peracaba esa mazana”, detalló sobro «un sector económicos estratéxicu en Villaivicios y en toa Asturies por eso queremos reivindicar la importancia de la sidra».

Finalmente, pidió’l sofitu electoral al candidatu municipal, Alloñando Vega, que como alcalde «dexó ver a un gobiernu municipal serenu, tranquil y cercanu a la ciudadanía». El candidatu tuvo acompañáu na so visita por Gimena Llamedo, cabeza de llista d’Oriente, Alejandro Vega, candidatu a l’alcaldía de Villaviciosa, y Juan Cofiñu, Ángel Morales y Esther Freile, candidatos autonómicos.

23/05/2019
«En diez meses solucionamos un problema de 17 años»

El ministru de Fomentu en funciones, José Luis Ábalos, punxo esta mañana en valor, na so visita a Xixón, la firma del conveniu del Plan de Víes. Señaló que «adquirí un compromisu y roblé el conveniu, lo que significa qu’un gobiernu, en 10 meses, foi capaz de solucionar un problema que llevaba 17 años arrastrándose y nun se solucionara».

Ábalos esplicó que’l Plan de Víes «ye l’apueste por un proyectu fundamental pal desenvolvimientu de Xixón», que supón un costu que supera los 1.000 millones, de los cualos 814 queden por invertir y 614 millones que va poner Adif directamente de la so participación na sociedá, «colo que va suponer de tresformamientu urbanu y de conexón, que va significar un impulsu de rexeneración urbana bien importante».

Amás, el ministru destacó que «la FSA-PSOE foi decisiva nel panorama nacional que tenemos, gracies a la vicesecretaria xeneral del PSOE, Adriana Lastra, y tamién a Adrián Barbón, que foi un bastión fundamental para’l socialismu español». «La influencia del socialismu asturiano», añadió, «ye definitiva nel partíu y nel Conseyu de Ministros».

Pela so parte, Adrián Barbón, en declaraciones a los medios, esplicó que «el ministru Ábalos vien a Asturies pola especial vinculación de la FSA-PSOE y la so influencia, porque nuevamente l’axenda asturiana ta nel Conseyu de Ministros». Énte les crítiques pola presencia de ministros socialistes n’Asturies, el candidatu a la presidencia punxo en valor que «los ministros vienen a Asturies pola influencia política de la FSA-PSOE, tantu nel PSOE como nel Conseyu de Ministros, vienen trabayar y a recoyer les reivindicaciones que tresllada la ciudadanía asturiana».

Respectu al plan de víes, Adrián Barbón sorrayó que «el ministru Ábalos comprometióse a arreglar una cuestión histórica de Xixón, que llevaba años de muncho dichu y poco fechu. Güei ye una realidá yá roblada que la ciudadanía de Xixón sabe que foi gracies al trabayu del PSOE». Xuntu al proyectu xixonés, en materia d’infraestructures, felicitóse de que «la variante de Payares ye la primer vegada que s’empobina de forma definitiva por que rematen les obres en 2020 y en 2021 pueda tar en serviciu dempués de 7 años de inacción de gobiernu del PP».

22/05/2019
Los conceyales de Podemos-Equo comprométense a nun cobrar más de 1.980 euros

Podemos-Equo Xixón presentó esti miércoles el so códigu éticu, un documentu que van roblar toos y toles candidates de la coalición: «Énte quien piensen qu’en política tol mundu ye igual, nesta candidatura diferenciámonos del restu de formaciones por cuestiones como esta: nuna ciudá na que ye poco la xente que cobra 2.700 euros netos al mes Podemos-Equo Xixón adquier el compromisu de nun cobrar más del equivalente 2,2 vegaes el Salariu Mínimu Interprofesional, 1.980 euros, y a llindar los mandatos a ocho años nes instituciones», espón Juan Chaves, integrante de la candidatura. «Creemos que na política ye un serviciu públicu nel qu’hai que tar de camín y nun faer d’ella un oficiu vitaliciu”,

La coalición va plantegar al restu de partíos con presencia na Casa Conceyu que faigan sos estos compromisos «pa dar un mensaxe a la ciudadanía de Xixón de qu’en política nun somos toos iguales y de que tenemos que ser como la xente a la que representamos», añade Chaves. Estes cuestiones van presentar nel primer Plenu de la nueva Corporación coles mires de que toles fuerces asuman la llimitación de sueldos y tamién el númberu de persones con dedicación, qu’anguaño llega a 21 conceyales.

«Nel casu de qu’estes midíes nun sían aprobaes, los conceyales de Podemos-Equo Xixón sí van acatar esti códigu éticu y van arrenunciar a tola remuneración qu’entepase los 1.980 euros. Col escedente vamos faer un fondu común pa financiar a les ONGs y entidaes sociales de la nuesa ciudá», indica Laura Tuero, númberu dos de la candidatura.

Un compromisu éticu que yá se fixo efectivu esti mandatu que termina. Los conceyales de Xixón Sí Puede asumieron dende’l primer momentu la llimitación de salarios que marca Podemos, coles modulaciones correspondientes en función de les situaciones personales de quien tienen fíos o persones mayores o dependientes a cargu. «De los cuatro conceyales con dedicación plena que se asignaben al grupu municipal en 2015, namás s’aceptaron trés, arrenunciando a una d’elles y los conceyales cotizaron al 75% del salariu, lo qu’en conxuntu dexó aforrar 200.000 euros pa la ciudá de Xixón», afirma Tuero, remarcando que «somos la única organización en Xixón que se presenta con un códigu tan estrictu».

Esti códigu éticu va aplicase a toos integrantes de la formación, incluyida quien ocupe l’alcaldía: «Frente a los 4.500 euros que cobra anguaño la primer edil, Carmen Moriyón, Yolanda Huergo va tener un salariu de 1.980 euros nel casu d’ocupar l’alcaldía», apunta’l númberu dos de la candidatura.

«A pesar de qu’en 2015 José María Pérez, voceru del grupu municipal del PSOE, nun aceptó roblar esti códigu, sí vamos encamentar a Ana González y a tola so candidatura a qu’asuma estos compromisos éticos que llevamos al Conceyu de Xixón», adelantra Laura. Tuero.

«Nun tenemos puertes xiratories, vinimos ameyorar la vida de la xente, non a buscar puestos de trabayu en grandes empreses o corporaciones como faen otros, polo que nun va ser posible que nengún de los conceyales pueda ocupar, nel plazu de cinco años posteriores a la finalización del mandatu, nengún altu cargu executivu n’empreses venceyaes con decisiones del so mandatu. Namás entendemos la política de forma participada, tresparente y al serviciu de los xixoneses», caltien el númberu dos de la candidatura.

22/05/2019
Un escursionista cai al ríu na Sienda l’Osu

Un home resultó mancáu en cayendo dende unos trés metros a la vera del ríu cuando s’atopaba na Sienda del Osu, pasada la esviadura para Teberga, na primer ponte percima del ríu, en Proaza. L’afectáu, un varón de 45 años, foi evacuáu nel helicópteru medicalizáu del Serviciu d’Emerxencies del Principáu d’Asturies (SEPA) al Hospital Universitariu Central d’Asturies (HUCA) n’Uviéu. L’afectáu foi asistíu nel llugar pol médicu rescatador y sacupáu, darréu, inmovilizáu, por aciu una operación de grúa a l’aeronave.

Hasta’l llugar del accidente tamién se movieron efectivos de Bomberos del SEPA con base nel parque de Proaza que collaboraron y participaron na evacuación y rescate. Los bomberos xuntu al equipu de rescate inmovilizaron al mancáu y treslladaronlu hasta la otra vera del ríu onde l’helicópteru puedo realizar la evacuación. Na zona había un tendíu eléctricu que torgaba un mayor acercamientu. Por cuenta de más pruebes y hasta nueva valoración médica l’home presentaba politrauma de pronósticu reserváu.

El Centru de Coordinación d’Emerxencies del 112 Asturies recibió l’avisu a les 19.40 hores. Na llamada, realizada por un guarda de la zona, indicaba qu’una persona cayérase dellos metros en venciendo la barandiella a la vera del ríu. Darréu una persona que lo vio dende l’otru llau llogró llegar hasta él y acompañalu, suxetándo-y la cabeza y tapándolu, hasta que llegaron al llugar los bomberos.

Amás de pasar l’avisu al Serviciu d’Atención Médica Urxente (SAMU), la Sala 112 del SEPA, activó l’helicópteru medicalizado col Grupu de Rescate y a efectivos de Bomberos del SEPA con base nel parque de Proaza. L’incidente, como marca’l protocolu, tamién se punxo en conocencia de la Guardia Civil.

22/05/2019
La Bonoloto dexa 80.468,07 euros en Ciares

La suerte vuelve a sonreir a Xixón. Una selmana depués de que’l cupón de la ONCE repartiera un premiu de 35.000 euros en La Plazuela l’azar del sortéu de la Bonoloto dexó un segundu premiu en Ciares. Un boletu selláu n’Alministración de Lloteríes númberu 35, asitiada na cai Hermanos Felgueroso, 51, resultó agraciaú con 80.468,07 euros. La combinación ganadora nel sortéu correspondióse colos númberos: 9, 14, 22, 25, 29 y 45; complementariu 28; reintegro, 4.

22/05/2019

José Manuel y María del Carmen, los nomes más comunes n’Asturies

José Manuel y María del Carmen son los nomes más comunes n’Asturies. Asina lo ponen de manifiestu los últimos datos del Institutu Nacional d’Estadística (INE) correspondientes a 2018 y publicaos esti miércoles. En total, 15.994 muyeres llámense María del Carmen n’Asturies. Esi nome encabeza una llista na que tamién figuren María, María Ángeles, María Teresa, María del Pilar y María Luisa. Nel casu de los homes, el nome mas repetíu ye José Manuel. En total, 12.319 persones llámense asina. Manuel, José Luis, José Antonio y José son otros de los nomes más comunes ente los homes del país.

Nomes más comunes ente les muyeres

NOME	FRECUENCIA	Por 1.000
MARIA CARMEN	15.994	29,8
MARIA	10.000	18,6
MARIA ANGELES	7.963	14,8
MARIA TERESA	7.701	14,3
MARIA PILAR	7.509	14,0
MARIA LUISA	7.505	14,0
ANA MARIA	7.023	13,1
MARIA ISABEL	6.253	11,6
LUCIA	6.251	11,6
CARMEN	6.198	11,5

Només más comunes ente los homes

NOME	FRECUENCIA	Por 1.000
JOSE MANUEL	12.139	24,7
MANUEL	12.111	24,7
JOSE LUIS	10.815	22,0
JOSE ANTONIO	9.585	19,5
JOSE	8.470	17,3
DAVID	8.013	16,3
PABLO	7.886	16,1
JAVIER	7.712	15,7
DANIEL	7.580	15,4
ALEJANDRO	6.654	13,6

22/05/2019

Martín propón «modernizar tolos equipamientos deportivos»

Aurelio Martín, candidatu a l’Alcaldía de la coalición Xixón por la Izquierda, propunxo esti martes el desenvolvimientu de «un plan para modernizar en cuatro años tolos equipamientos deportivos municipales que non solo acusen el pasu del tiempu sinón, y, sobremanera, el d’un Gobiernu de dereches que nun quixo o nun supo caltenelos». Martín aconceyó esti martes pela tarde cola Asociación de Clubes de Fútbol Base de Xixón. Nesi alcuentru, recordó cómo «los mugores, cuando non les goteres, les ventanes rotes y toa triba de desperfectos fueron una constante en piscines, campos de fútbol y polideportivos a lo llargo d’estos postreros cuatro años ensin que’l Gobiernu de Foru diéra-yos solución». El candidatu considera necesaria una «intervención de choque que ponga frenu rápido al deterioru que sufren los equipamientos deportivos municipales».

Al pie de ello, Martín apostó por «executar les obres pendientes, como les del Xixón Industrial o’l campu de fútbol femenín» y por estudiar «nuevos equipamientos en barrios con necesidaes nesta materia». Introducir una xestión enerxética eficiente nes instalaciones, caltener el so calter públicu, apostar pola promoción del deporte escolar y del deporte base, establecer una llínea de sofitu y financiamientu específicu al deporte femenino, y facilitar l’accesu a la práctica deportiva a persones con diversidá funcional, son otros de los compromisos de la coalición IX-IAS pa los próximos cuatro años.

Pela so parte, Víctor Martínez comprometió’l sofitu de Xixón por la Izquierda pa «diseñar un nuevu sistema de repartida de les subvenciones ente los clubes del fútbol base». El candidatu propón «una mayor collaboración del Conceyu nel caltenimientu de los campos que dexe a los clubes que los xestionen abaratar los costos», asina como «asumir dende’l Patronado Deportivu Municipal el seguru principal de les instalaciones».

22/05/2019