Xixón al día

Etiqueta: elecciones

  • En directo: la participación baxa tres puntos en Xixón

    En directo: la participación baxa tres puntos en Xixón

    🕗 20.01 | Pisellen los colexos electorales, entama’l recuentu.

    🕗 18.22 | La participación a les 18 hores en  ye del 47,34%, tres puntos más baxa que va cuatro años (50,28%).

    🕗 14.03 | Primeros datos de participación n’Asturies. Hasta les 14 hores votó’l 32,86%, casi un puntu menos que va dos años (33,66%). Na circunscripción central pasóse del 33,82% de 2015 al 31,53%. Tamién baxa la participación nes elecciones municipales: del 33,71% al 32,79%. Nel casu de Xixón la baxada ye del 34,53% al 32,97%.

    🕗 13.40 | Na Escuela de Maxisteriu d’Uviéu votó’l candidatu de Ciudadanos a la presidencia del Principáu, Juan Vázquez.

    🕗 13.06 | Pablo Casado votó en Madrid agradeciendo’l trabayu d’apoderaos ya interventores del PP.

    🕗 12.50 | «Oxalá la participación sía bien alta. Siempres ye importante que la xente movilícese votando en conciencia», dixo Pablo Iglesias, secretariu xeneral de Podemos, depués de votar.

    🕗 12.30 | Yá votó tamién Aurelio Martín, candidatu  l’Alcaldía de Xixón por la Izquierda. Fízolo nel IES Emilio Alarcos.

    🕗 12.10 | Albert Rivera, de Ciudadanos, votó en Madrid «pola llibertá, la igualdá y la dignidá».

    🕗 11.50 | Depués de votar, Adrián Barbón animó a la ciudadanía a votar porque «del votu depende too». El candidatu de la FSA-PSOE aseguró nun tar nerviosu y dixo tener la esperanza d’un futuru pa «la meyor Asturies».

    🕗 11.34 | La candidata de Foru Asturies a la presidencia del Principáu votó nel Palaciu de Deportes de Xixón. «Hoy tienen que hablar los asturianos y asturianas», declaró Carmen Moriyón depués votar.

    🕗 11.07 | Pela so parte, Ana González, votó nel Antiguu Institutu. La candidata del PSOE a l’Alcaldía de la ciudá animó a los xixoneses a dir a votar: «Tenemos que pensar en qué modelu de ciudá queremos».

    🕗 11.05 | El candidatu de Foru Asturies a l’Alcaldía votó nel pabellón de deportes de L’Arena.

    🕗 10.44 | Tamién votó, nel Nicanor Piñole, el candidatu de Por Gijón, David Alonso.

    🕗 10.35 | El presidente del Gobiernu saliente, Javier Fernández, yá votó nel colexu Río Piles.

    Yolanda Huergo votó pasaes les diez de la mañana nun colexu de Laviada. / Podemos
    Yolanda Huergo votó pasaes les diez de la mañana nun colexu de Laviada. / Podemos

    🕗 10.15 | La candidata de la coalición Podemos-Equo a l’Alcaldía de Xixón, Yolanda Huergo, votó pasaes les diez de la mañana nel colexu públicu de Laviada.

    🕗 10.10 | José Carlos Fernández Sarasola, candidatu de Ciudadanos a l’Alcaldía, foi’l primeru en votar. Fízolo nel colexu de Begoña.

    Pedro Sánchez vota nes elecciones municipales y autonómiques d'esti domingu 26-M.
    Pedro Sánchez votó nun colexu de Pozuelo de Alarcón (Madrid). / PSOE

    🕗 10.00 | El presidente del Gobiernu central en funciones, Pedro Sánchez, foi’l primer llíder nacional n’exercer el so derechu al votu. Fízolo acompañáu de la so pareya, Begoña Gómez, en Pozuelo de Alarcón (Madrid).

    🕗 9.05 | Normalidá n’apertura de los colexos electorales n’Asturies.

    🕗 8.02 | Los colexos electorales van permanecer abiertos hasta les ocho de la tarde. A esa hora va empezar l’escrutiniu. Dada la coincidencia de trés procesos electorales, l’orde en que se va llevar a cabu’l recuentu va ser el siguiente: comicios al Parlamentu Européu, municipales y autonómicos. Los resultaos provisionales van poder consultase na web www.resultadoselecciones2019.asturias.es y a través de la app oficial d’estos comicios.

    🕗 8.00 | 973.736 asturianos tan llamaos a votar nesta triple cita electoral (municipales, autonómiques y europees). Asturies cunta con 615 locales electorales distribuyíos nos 78 conceyos, onde tan instalaes 1.573 meses.

  • 26M: 973.736 asturianos tan llamaos güei a votar

    26M: 973.736 asturianos tan llamaos güei a votar

    Cerca d’un millón d’asturianos tan llamaos güei a votar. Un total de 973.736 personas van poder participar na triple cita electoral (municipales, autonómiques y europees). Asturies cunta con 615 locales electorales distribuyíos nos 78 conceyos, onde se van instalar 1.573 meses. L’Alministración va distribuyir pol territoriu de la comunidá a 894 representantes que van disponer de 701 tabletes pa la correcta tresmisión de los sufraxos.

    El Gobiernu d’Asturies pon en marcha un ampliu dispositivu de siguimientu para facilitar l’espardimientu de los resultaos de les elecciones a la Xunta Xeneral del Principáu y a los conceyos, qu’inclúi l’usu de tabletes pal treslláu eficaz de los datos, aplicaciones móviles y retrasmisiones en directu.

    La xornada va empezar a les ocho de la mañana cola apertura de los colexos electorales y la constitución, media hora depués, de les meses. A les nueve empecipiará la votación y ta previsto facilitar meyores de participación a les dos y a les seis de la tarde. A les ocho de la tarde van cerrase los colexos y va empezar l’escrutiniu. Dada la coincidencia de trés procesos electorales, l’orde en que se va llevar a cabu’l recuentu va ser el siguiente: comicios al Parlamentu Européu, municipales y autonómicos.

    El siguimientu de la xornada electoral va desenvolvese nel Palaciu del Conde de Toreno, n’Uviéu, onde s’instaló’l Centru d’Espardimientu de Datos (CDD). Los resultaos provisionales van poder consultase na web www.resultadoselecciones2019.asturias.es

  • Foru culpa a la riegla de gastu de los retrasos nes subvenciones a fachaes

    Foru culpa a la riegla de gastu de los retrasos nes subvenciones a fachaes

    El presidente de Foru Xixón y candidato a la Alcaldía del Conceyu, Álvaro Muñiz, presentó esti vienres les sos propuestes en materia de rexeneración urbana, movilidá, sostenibilidá, saneamientu y vivienda. «Entendemos la sostenibilidá nun necesariu equilibriu: social, económicu y medioambiental», esplicó Muñiz.

    Defendió’l Plan Xeneral d’Ordenación (PXO), que define «una ciudá compacta que quier crecer de manera sostenible». Pa desenvolvelu, propunxo la creación de la Oficina Te Crea. «Ye una unidá alministrativa capaz d’entainar la collaboración público-privada necesaria pal mayor aprovechamientu del plan», señaló. Esta oficina encargaríase de xestionar la inversión del Conceyu nos barrios «concretando les inversiones de manera ordenada y atendiendo a prioridaes técniques».

    El programa de Foru pa Xixón recueye tamién la creación d’una Oficina pa la Economía Circular nel equipamientu de Quinta la Vega. «Esta oficina va tener una doble función, per una llau empecipiar un diálogu cola Comisión Europea p’acceder a los fondos del nuevu periodu marco y otra meyorar la participación ciudadana». El candidatu amosó’l so compromisu cola zona rural y apostó por «una economía de valor que vertebre un nuevu futuru rural».

    Coles mesmes, fixo referencia a les subvenciones de fachaes: «La riegla de gastu que caltienen los Gobiernos de PP y PSOE tórganos pagar les subvenciones a fachaes como nos gustaría». «La xestión socialista de los planes d’inversión foi catastrófica pa Xixón. Executemos una media de 30 millones d’euros añales n’inversión y vamos faer d’esti mandatu’l mandatu del caltenimientu urbano y rural», recordó.

  • Podemos-Equo márcase como prioridá acabar cola contaminación de les agües

    Podemos-Equo márcase como prioridá acabar cola contaminación de les agües

    La sablera de San Llorienzo foi’l llugar escoyíu por Podemos-Equo Xixón pal so últimu actu de campaña pa llamar l’atención sobro la necesidá d’actuar p’acabar colos episodios de contaminación de les agües: «Escoyimos esti llugar simbólicamente porque ye una sablera y un mar que ye fonte de vida y una de les ventanes principales de la nuesa ciudá escontra’l mundu. Merez toa nuesa atención», afirmó Yolanda Huergo, candidata a l’alcaldía pola coalición.

    La contaminación na sablera y a lo llargo de tola mariña ye ún de los retos fundamentales nel mandatu qu’empieza: «Equí arrama la ría d’Aboño, El Piles, l‘emisariu de Peñarrubia, calces que precisen llimpieza… Son munchos aspeutos a los que faer frente, una y bones los problemes de contaminación nun deriven d’una sola causa, sinón de munches, y ye precisu actuar énte toes elles», caltuvo la númberu ún de Podemos-Equo Xixón.

    Cuestiones como tener en Xixón xuna rede separativa d’agües pluviales y fecales, dar respuesta a la depuración na zona este de la ciudá o terminar de construyir los pozos de tormentes son puntos que Podemos-Equo Xixón lleva nel so programa electoral. «Nel próximu mandatu tenemos que sentanos dende’l primer minutu a tratar esti problema. Nun podemos dexanos episodios como los que se vivieron el branu pasáu», señaló Huergo.

    Huergo responsabilizó directamente al equipu de Gobiernu de Foru y «a los heriedos de los gobiernos socialistes d’años anteriores que nun s’asumieron responsabilidá política». «Esta cuestión nun puede esperar más. Confío en cuntar col consensu de tolos miembros de la Corporación pa priorizar tolo que tien que ver col resolvimientu d’estos problemes y l’ayuda evidente del Principáu de Asturies y el Ministeriu de Mediu Ambiente», indicó.

  • Por Gijón quier que los conceyales fichen

    Por Gijón quier que los conceyales fichen

    Por Gijón quier que los conceyales que salgan escoyíos esti domingu nes elecciones municipales fichen. «Va ser la primer midida que vamos aplicar mientres los primeros cien díes de Gobiernu», señala la formación nuna nota de prensa. «Tenemos de devolver a la ciudadanía la confianza na política y la meyor manera ye teniendo l’axenda pública y controlando los horarios de los conceyales». Consideren que «la xente tien de ver lo que faemos y cómo y cuándo lo faemos. Tienen derechu a saber cómo inverten el so dineru porque trabayamos pa ellos».

    La formación que llidera l’exconceyal de Xixón Sí Puede, David Alonso, defende que al igual que nes dotaciones económiques de los grupos políticos o los salarios de los representantes públicos, ye necesario «poner sobro la mesa, con claridá, el trabayu que se realiza nel Conceyu». «Ye quiciabes la mayor percepción que pueda tener cualquier ciudadanu de la política, del día ente día y de lo que tendría d’implicar faer política», aseguren. Encamienten al restu de partío a sumase a la iniciativa como un xestu pa «devolver la credibilidá necesaria al exerciciu de la política».

  • «La falta d’acción de Sánchez amenacia a la industria d’Asturies»

    «La falta d’acción de Sánchez amenacia a la industria d’Asturies»

    Carmen Moriyón aconceyó esti vienres col presidente de la Federación Asturiana d’Empresarios (FADE), Belarmino Feito. La candidata de Foru a la presidencia del Principáu treslladó-y’l so compromisu pa «crear un marcu d’enfotu qu’allane’l camín a la inversión. Un territoriu crez lo que crecen les sos empreses, y eso en Foru va tenese bien en cuenta».

    Tres «el nuevu avisu d’Arcelor» de parar el fornu altu, Moriyón alvirtió de que «tendríen de saltar toles alarmes porque la irresponsabilidá de la transición ecolóxica del PSOE ta condergando a la siderúrxica al zarru, xuntu con Alcoa y les térmiques». «La falta d’acción del Gobiernu de Pedro Sánchez amenacia gravemente’l caltenimientu de la industria básico n’Asturies», amestó.

    Mientres el so alcuentru colos responsables de FADE, la candidata de Foru insistió na necesidá d’invertir nel sistema educativu «pa qu’emplegue a la xente nes necesidaes de los empleadores». Nesa llínea, amosóse partidaria reformar el sistema educativu educación pal empléu. «Ye necesario que la formación profesional y la universitaria respuendan lo más llueu a les necesidaes de les empreses. Y eso puédese facer al traviés d’una concertación social educativa». Pa ello, espunxo que si los asturianos dan-y el so votu’l 26 de mayu «vamos proponer una concertación social educativa, qu’incluya a empresarios y al sector de la educación pa trabayar con eficiencia na xunión ente la formación profesional y universitaria y les necesidaes de les empreses». «Vamos sofitar una Formación Profesional y Universitaria Dual con financiamientu y espacios abondos p’ameyorar la empleabilidá», apuntó.

    Esaniciar l’Impuestu de Sucesiones

    La candidata de Foru treslladó a Belarmino Feito les sos propuestes en materia fiscal. «Queremos baxar los impuestos pa llograr un impactu socioeconómico relevante; queremos que nazan y crezan empreses que modernicen el nuesu texíu granible, dando llugar a nueves posibilidaes d’empléu». «Vamos amenorgar el tipu máximu nel tramu autonómicu del IRPF del 25,5% actual al 21%. Y como Asturies sigue a la cabeza nel arrenunciu d’heriedos, vamos esaniciar l’Impuestu de Sucesiones y Donaciones y el de Patrimoniu», destacó.

    Según Moriyón, «tamos decidíos a romper la inercia de los gobiernos socialistes que nos postreros diez años provocó la fuga de 4.400 empreses d’Asturies. Les nueses polítiques van tar enfocaes a acompasar los retos que tenemos como territoriu defendiendo más inversión en tecnoloxía pa evitar los zarros de la nuesa industria básico. Cualquier costu adicional que s’imponga a les empreses, sía fiscal, enerxéticu o ambiental, supon un deterioru de marxes y de la capacidá d’inversión, y pon en riesgu l’empléu», alvirtió.

    Foru defendió «una inversión pública añal estable pa’l sector de la construcción»

    La candidata de Foru defendió «una inversión pública añal estable pa que’l sector de la construcción tenga percorríu n’Asturies, y non como fixeron los gobiernos socialistes, provocando la destrucción de 25.000 empleos». Tamién se comprometió a invertir n’investigación ya innovación, «reformando’l Plan de Ciencia y Tecnoloxía enfocando los retos que tenemos como territoriu: fienda dixital, despoblamientu, avieyamientu y reindustrialización”.

    Pa facilitar la crecedera de les micropymes y pymes d’Asturies, Moriyón abogó pol financiamientu riesgu. «El préstamu reembolsable fai grande a la empresa; la subvención fáila pequena», apuntó. Los autónomos, el sector turísticu y otros sectores prioritarios pa la rexón que fueron «escaecíos», como’l agroalimentariu, la industria creativo y cultural y el sector tecnolóxicu «van tener tol respaldu d’un Gobiernu de Foru, dende onde vamos crear ferramientes público-privaes que nos dexen trabayar cola mesma fueya de ruta», concluyó.

  • Martín «IX va ser ganantía d’un nuevu modelu cultural»

    Martín «IX va ser ganantía d’un nuevu modelu cultural»

    «Un gobiernu municipal con una fuerte presencia d’Izquierda Xunida-IAS va ser la garantía d’un nuevu modelu cultural». Asina lo afirmó Aurelio Martín nun alcuentru calteníu esti xueves con persones venceyaes al mundu de la cultura. El candidatu a l’Alcaldía de Xixón por Xixón por la Izquierda, tamién espresó’l so prestu pola importante presencia de persones de la cultura na candidatura qu’encabeza. «Representa la meyor amuesa de la importancia que pretende dase a les polítiques culturales». Y añadió qu’esa apuesta tien de tar centrada en fomentar la creación, el consumu y l’espardimientu cultural«. Nel conceyu tuvo acompañáu, ente otros, polos miembros de la candidatura Ana Castaño y Carlos González Espina.

    «La política cultural fue una de les grandes escaecíes pol gobiernu de Foru nos últimos años y eso tien que camudar a partir del 26 de mayu», aseguró Ana Castaño. La candidata númberu dos de la llista municipal plantegó la necesidá d’ellaborar un Plan Estratéxicu de Cultura. Tamién esbilló otres propuestes baltes como convertir l’edificiu de Tabacalera nel Muséu de Xixón qu’allugue les colecciones municipales de Belles Artes y tresformalo nun elementu dinamizador que desenvuelva la singularidá de Cimavilla. Amás, defendió potenciar la creación artística por aciu una política de beques y premios, establecer un circuitu municipal d’artes escéniques y música y potenciar l’Edificiu Cristasa como un viveru empresarial dedicáu a les industries creativu y cultural.

  • Encuesta: ¿qué partíu crees que va ganar les elecciones en Xixón?

    Encuesta: ¿qué partíu crees que va ganar les elecciones en Xixón?

    Xixón decide esti domingu cuál va ser la composición del Plenu del Conceyu pa los vinientes cuatro años. Siete fuercies polítiques cunten con opciones de tener representación na Casa Conceyu nes elecciones municipales del 26-M. Son Foru Asturies, PSOE, Podemos-Equo Xixón, PP, Ciudadanos, Xixón por la Izquierda y Vox. Y tú, ¿quién crees que va ganar les elecciones a l’Alcaldía de Xixón?. Vota nesta encuesta:

  • González asegura que la participación va ser esencial nel próximu mandatu

    González asegura que la participación va ser esencial nel próximu mandatu

    La candidata del PSOE a l’Alcaldía de Xixón, Ana González, aseguró esti xueves que la participación real va ser un elementu esencial del próximu mandatu. González, que caltuvo una xunta cola xunta directiva de la Federación d’Asociaciones de Vecinos de la zona urbana (FAV), esplicó qu’esta participación va articulase al traviés de los distintos colectivos de la ciudá, pero tamién con tolos vecinos de la ciudá.

    La candidata socialista señaló que la demostración más importante de lo positiva que ye la unión de la participación ciudadana col PSOE ye l’ésitu del plan de víes. En toles xuntes calteníes hasta agora coles distintes asociaciones vecinales de Xixón, González pudo constatar les ganes que tien la ciudadanía de participar y, sobremanera, l’amplia conocencia que tienen de los sos barrios.

    «Ye imprescindible xenerar climes de confianza cola ciudadanía y non de rocea, como fixo Foru a lo llargo d’estos años, suspendiendo, por casu, los Conseyos de Distritu». Nesti sentíu aseguró que «Xixón tien que ser una rede de confianza colos sos vecinos porque queremos una ciudá de les persones». Tres la so xunta cola FAV, la candidata del PSOE axuntóse cola Asociación de Vecinos de la zona centro.

  • Moriyón comprométese a diseñar un plan pa «rellanzar» Perlora

    Moriyón comprométese a diseñar un plan pa «rellanzar» Perlora

    La candidata de Foro a la presidencia del Principáu, Carmen Moriyón, visitó güei les instalaciones de la Ciudá de Vacaciones de Perlora. Ellí aconceyó con diverses asociaciones vecinales de la zona. Fízolo acompañada por Carmen Fernández y Pablo González, número cuatro y siete, respectivamente, de la candidatura autonómica, y pola candidata a l’Alcaldía de Carreño, Alejandra Martínez.

    «Perlora tien una situación privilexada que dende Foru queremos aprovechar con un plan que permita optimizar el so potencial económicu y turísticu. Pa ello, güei comprometimos a consensuar colos vecinos los proyectos, los plazos y el financiamientu necesariu para rellanzar lo que güei ye un pueblo pantasma», esplicó Moriyón.

    Los dirixentes de Foru denunciaron «l’estáu d’abandonu» qu’ufierta la Ciudá de Vacaciones de Perlora con «instalaciones y equipamientos desdexaos, y con una falta absoluta de caltenimientu y llimpieza de les cais y zones verdes». Una situación qu’atribuyeron «a la desidia y falta d’idees de los gobiernos socialistes». Recordaron que «fai casi trelce años que’l Gobiernu del Principáu decidió cerrar les sos instalaciones y condergales al derrumbe».

    Otra manera, Foru propónse «consensuar colos vecinos de Perlora los proyectos que ‘espierten’ esti espaciu allugáu nuna redolada privilexada», afirmó Moriyón. “Toa Asturies ta precisada de proyectos que reactiven la economía y, ensin dulda, el complexu vacacional de Perlora nun puede caltenese zarráu por más tiempu. El turismu, el comerciu y l’hostelería local van vese beneficiaos cola so reapertura». «Perlora siempres foi un llugar abiertu, d’usu y esfrute pa los ciudadanos y asina tien de siguir», concluyó.