Una gran retrospectiva conmemora’l centenariu de la nacencia del xenial artista xixonés Antonio Suárez, un referente del arte contemporáneu y de la vanguardia española. La Conseyería de Cultura, Política Llingüística y Turismu, en collaboración con Sabadell Herrero, promueve la esposición Los 100 d’Antonio Suárez, que per primer vegada va dexar al públicu almirar un centenar de les pieces qu’el so marchante, galerista y amigu, Fernando Fernán-Gómez, axuntó na so colección a lo llargo de les décades.
La conseyera de Cultura, Berta Piñán, y la directora de la Rede comercial Noroeste de Banco Sabadell, Carmen Vilabrille, inauguraron esta mañana l’amuesa, acompañaes por Fernando Fernán-Gómez y por Luis Feás, comisariu de la esposición. La retrospectiva va poder visitase na sala Sabadell Herrero d’Uviéu hasta’l próximu 31 d’agostu y la entrada va ser llibre y gratuita.
La esposición percuerre más de mediu sieglu de trabayu del pintor ya inclúi pieces relevantes na so trayectoria, como les primeres obres astractes creaes a mediaos de los años 50, coincidiendo cola fundación del grupu El Paso.
Los 100 d’Antonio Suárez propón un percorríu pol llabor del artista xixonés dende les sos primeres obres, nos años 40 del pasáu sieglu, hasta los entamos de los 2000. Tolos trabayos esibíos pertenecen a la Colección Fernán-Gómez Arte Contemporáneu, qu’el so amigu y galerista foi conformando y qu’inclúi más de 300 obres pertenecientes a artistes d’El Paso, el grupu artísticu que representó un finxu y un referente pa la vanguardia española de posguerra.
La obra d’Antonio Suárez tien una especial representación dientro de la colección ya inclúi dibuxos, acuareles, monotipos, olios en papel, pero sobremanera olios sobro cartón y sobre llenzu. La selección, esibida per primer vegada n’Asturies, va dexar al públicu apreciar les técniques personales que l’artista aplicaba pa llograr un amiestu únicu na base de les sos obres, llograda a partir de pintura industrial de color blancu España y aceite de llinaza.
El centenar de trabayos escoyíos reflexa la evolución constante del artista, dende la inxenuidá de los primeros dibuxos de los años 40 y 50 hasta la so dómina dientro d’El Paso y la so etapa posterior. L’amuesa inclúi obres realizaes nes sos estancies en París y mientres les sos visites a México, país que frecuentó y nel que caltuvo contactu y collaboraciones con asturianos nel esiliu, como Paco Ignacio Taibo I o Ángel González.
