Les discoteques van tener qu’esperar. El Boletín Oficial del Principáu d’Asturies (Bopa) espublizó esti martes el decretu que regula les condiciones de la fase 3 de la desescalada. Va llindase a 15 persones la circulación en grupu, amás de prohibir l’apertura al públicu de sales de fiestes y bares d’ociu nocturnu por criterios de salú pública. Estes decisiones van poder revocase en función de la evolución del andanciu.
La llei, roblada pol presidente del Principáu, Adrián Barbón, y el conseyeru de Salú, Pablo Fernández, adapta les restricciones na cabera etapa del estáu d’alarma. Nesta fase les comunidaes autónomes asumen la xestión del plan de transición hacia la nueva normalidá.
Asina, va establecese la prohibición de circular en grupos de más de 15 persones, sacante nel casu de convivientes. Los establecimientos de hostelería y restauración van poder abrir siempres que nun perpasen los dos tercios d’aforu máximu y cumplan toles condiciones de seguranza. Les discoteques y los bares d’ocio nocturnu queden fuera d’esta regulación. Nes terraces al aire llibre l’aforu va llindase al 75% de la capacidad de les meses permitíes. Amás, recomiéndase nun fumar ente l’incrementu del riesgu de tresmisión del coronavirus que pue conllevar esti hábitu. El decretu va tar en vigor hasta la fin del estáu d’alarma.
