La Conseyería d’Educación publicó güei unes instrucciones que regulen l’usu de los teléfonos móviles puramente con fines didácticos nes etapes de Secundaria, Bachilleratu, Formación Profesional (FP) y enseñances de réxime especial nos centros sosteníos con fondos públicos.
Les instrucciones tán yá disponibles nel portal Educastur y van entrar a valir al otru día de la so publicación nel Boletín Oficial del Principáu (Bopa). Los centros d’enseñanza van tener de plazu hasta final del cursu p’afaer les sos normes d’organización y funcionamientu internu, según los planes integrales de convivencia, a lo dispuesto nestes instrucciones.
El documentu recueye que los colexos d’Infantil y Primaria “han ser espacios llibres de dispositivos móviles”. Sicasí, establezse como única escepción aquellos menores que precisen utilizar el teléfonu “por razones de salú o personales debidamente acreditaes énte la dirección del centru”.
Nes etapes cimeres –Secundaria, Bachilleratu, FP y enseñances de réxime especial-, los móviles podrán usase namás con fines didácticos y educativos “siempres y cuando tea debidamente xustificada’l so usu atendiendo a criterios pedagóxicos y afechos a les característiques psicoevolutivas del alumnáu, nes correspondientes programaciones docentes o didáctiques del centru educativu y supervisao pol profesoráu”.
Por tanto, va evitase l’usu de los móviles mientres tola xornada escolar, qu’inclúi l’horariu lectivu, el tiempu de recréu y los periodos dedicaos a actividaes complementaries o extraescolares. La llimitación estiéndese tamién a pasiellos, patios y demás zones comunes.
Cuando nun alleguen los mentaos supuestos, l’alumnáu tendrá de caltener el móvil apagáu dende la entrada al centru d’enseñanza hasta la salida al esterior de la cortil educativa.
De forma escepcional, la dirección del centru va poder autorizar l’usu d’estos dispositivos, ensin que medien fines pedagóxicos, a aquellos estudiantes que lu rican “atendiendo a les sos circunstancies personales, que van tener que ser debidamente acreditaes”.
L’incumplimientu de les normes va poder traer la retirada del dispositivu, previu apagáu per parte del estudiante, y en presencia de dos testigos. Pa ello, los centros educativos van establecer los procedimientos pa la custodia y devolución de los móviles al concluyir la xornada escolar.
La Inspección Educativa, nel ámbitu de les sos competencies, va ser el serviciu de la conseyería encargáu de velar pola correctu aplicación d’estes instrucciones.
