El Gobiernu d’Asturies va esplegar les llinies d’ayuda del Fondu de Transición Xusta y va sofitar inversiones en proyectos tractores pa facilitar el tresformamientu ecolóxicu de la industria y les pymes nel actual contestu d’emerxencia climática. Asturies pretende compatibilizar nesta llexislatura’l resurdir industrial de la comunidá cola preservación del mediu ambiente.
La conseyera de Transición Ecolóxica, Industria y Desenvolvimientu Económicu, Nieves Roqueñí, presentó güei na Xunta Xeneral les llinies maestres del so departamentu pa esti mandatu, marcáu pol gran desafíu que representa la descarbonización de la economía “con ambición y audacia”. Les acciones prioritaries de la conseyería son nes siguientes exes:
Tresformamientu ecolóxicu de la industria
La conseyería va encarar el tránsitu d’una economía basada nel carbonu a otra sofitada nes enerxíes anovables y l’hidróxenu verde por aciu la puesta en marcha de distintes ferramientes de tresformamientu, mientres les que figura’l Fondu de Transición Xusta (FTJ), y el respaldu a proyectos tractores. Nesti marcu, van promovese grandes consensos na concertación social y el Foru pola Industria.
Coles mesmes, en coordinación cola Conseyería de Ciencia, Empreses, Formación y Empléu presentaráse la Llei de Proyectos Estratéxicos, reforzada por un nuevu programa de suelu industrial y un ventanu únicu de comercialización d’estos terrenes, xestionada por Sogepsa, coles mires de dar respuestes axiloses a les empreses.
El diálogu col texíu empresarial va ser permanente pa sofitar el desenvolvimientu de proyectos de descarbonización, según la concurrencia de les compañíes nos distintos proyectos estratéxicos financiaos con fondos del Plan de Recuperación, Tresformamientu y Resiliencia.
Impulsu a les enerxíes anovables
El departamentu que lidera Nieves Roqueñí va impulsar les enerxíes anovables pa garantizar la calidá y estabilidá del suministru y aprovechar el so potencial como vector de xeneración de nueves actividaes económiques y empléu. Amás, va promover la creación de comunidaes enerxétiques al traviés de la Fundación Asturiana de la Enerxía (Faen) col propósitu de llograr l’amenorgamientu del preciu de la enerxía ente particulares y empreses.
La revisión de les Directrices Sectoriales d’Ordenación del Territoriu pal Aprovechamientu de la Enerxía Eólica y la incorporación d’otres, como la fotovoltaica, ye otra de les prioridaes pa esta llexislatura, un compromisu que se va encetar en coordinación cola Conseyería d’Ordenación de Territoriu, Urbanismu, Vivienda y Derechos Ciudadanos.
Transición Ecolóxica tamién va ellaborar una estratexa d’aprovechamientu de gases anovables (como’l biogás y el biometano) y va poner en marcha un programa, financiáu col Fondu de Transición Xusta, de fomentu de les enerxíes anovables, l’autoconsumu, l’almacenamientu y l’hidróxenu verde.
